مسمار جديد في نعش الحجاب .......... حوار شبابي جدا

[عمهم]

حوار دار بين الشباب
- شوفت الغنوة الجديدة بتاعت هيثم سعيد
- ده مين ده كمان
- ده بيغني غنوة أسمها هما مالهم بينا ياليل
- آه شوفت التصوير ياعم ده أصلا مش صوته
أنا أفتكر لما كنت بتفرج عليه في مسابقة سوبر إستار العرب وكان بيغني لعمرو دياب كان صوته زي القطران ده غير انه طلع العاشر من عشر متسابقين يعنى لو كان فيه حداشر أو اتناشر ولا حتى عشرين كان هيطلع الآخير برضك
بيغشونا حتى في أصوات الناس ياجدع
- الغريب في الغنوة مش صوته
- أيوه فعلا
الغريب هو البنت اللي معاه مين دي بقه الست هانم
لا وايه طالعه بحجاب
- يا بني دي سياسة
- سياسية أيه بقه اللي تطلع واحده بحجاب في غنوة لا وأيه بتترقص و قاعدين علي الكورنيش وقاعده رومانسيه
يعني مش الحجاب هو سر الإحترام
- مش مخرجها شريف صبري منتظر منه أيه بقه
- يابني ده أنا لقيت مكتوب إخراج د / شريف صبري
نفسي أفهم دكتور في أيه ده
- دكتور في الت************ ( الرقابه قطعت الكلمة )
- بكل المقاييس الكليب ده زفت انه يجيبوا واحده محجبه وبتترقص
ده بمثابة ومسمار جديد في نعش الحجاب الله يرحموا بقه
- ياعم فيه ايه اولا هو بيعملوا في النعش وبعدين المسامير كتيرة مدقش أنت بس وبعدين كمان ما فيه في الشارع محجابين وبيترقصوا
- إمبارح كنت ماشي أنا ومراتي رايحين عند بابا وماما ولقيت مراتي فجاة بتقول يا سلام
طبعا أنا سايق ومش شايف لا قدامي ولا في أي حته أنت عارفني لما بركب الطياره مبعرفش أبويا بس كنت مهدي علشان الإشارة
فبصيت لها كده وبعدين لقيتها باصه علي الناحيه الشمال ببص في السريع لقيت واحده محجبه ولابس الحمد لله إسترتش
مش عارف ازاي بس أهوو حاصل يعني
فبقولها فيه ايه
- بقول يا سلام علي الحجاب علي الإسترتش طيب وليه لابسه الحجاب بقه
- ومين قالك أنه لابسه الحجاب تدين أو حشمه حتى
- امال أيه
- دي لابساه علشان مسرحتش شعرها بس فلما تروح للكوافير تتسرح وترجع بقه تظبط فيه اللي هي عايزاه
- والله مراتك دي ست عاقله هي اللي بتصرخ علي الناس امال الرجاله تعمل أيه بس
- يابني بص أنا معنديش مانع عن كل الكليبات اللي بتيجي في زفت روتانا ولا ميلودي ولا مزيكا ولا أي حتى طالما مبيدخلوش فيها الأساسيات الدينيه
- من كام يوم بالصدفه بقلب في التلفزيون لقيت بيعرضوا فيديو كليب لست هانم معرفش هي مين من الناس الجداد اللي بتقلع دي
وبيصوروها من وفق مش عارف ليه
لكن بعد شوية عرفت ليه بيصوروها من فوق
- انت عبيط أصلك يا بني المنظر الفوقي غير الأمامي خالص
- أيوه غير الجانبي بقه
- طيب خلاص بقه قفلوا كفايا بلاوي سوده مش ناقصين سيئات
- احنا عندنا سيئات بما يكفي أننا ندخل جهنم حدف
- يابني جهنم معدتش فيها مكان
يعني بزمتك يدخل جهنم اللي بيصور الفيديو ولا اللي بيخرج ولا اللي بيتفرجوا
ولا اللي بيعترضوا عليه زينا
- أستغفر الله العظيم .... يا عم كلهم هيدخلوا جهنم
- صليت العصر طيب
- نصلي أزاي بقه وأحنا قاعدين نرغي في أشي صبري وأشي روبي وأشي هيثم أفندي كعب الغزال
- طيب ممكن تقوموا تتوضوا بقه
- الله يخرب بيتهم جميعا
- يابني قول ربنا يهديهم
- لا ربنا يهدهم زي ما هد السلم لم لم .... لم لم ...

- طيب خلص وروح أتوضا


انتوا كمان قوموا أتوضوا وأدعوا ربنا يفكها علينا من اللي أحنا فيه ويزيح عننا البلاوي السوده والتفكير الجميل اللي البوق الإعلامي بيفكر فيه وبيتبعه