قمر وخالد ... قصه طويله بس حلوه ومؤثره

[حزينه^وحيده]

سكرت نورة عن نوفه ونزلت تحت شافت ناصر وخبرته واهو طلع من اول ما سمع الكلام وراح يتصل في نوفه نوفه شافت رقمه وسوت ريجكت للرقم سكرت جهازها ونزلت تحت ويا خواتها ناصر تسكرت الدنيا بعيونه وقعد يدز صور ومسجات ليما تعب ورد داخل
نوفه:يمه خالتي ام ناصر بتيينا يوم الخميس ان شالله
ام خليفه:حياها الله زارتنا البركه والله وحشتني خويتي ام ناصر
مروة:لا يكون بس بتييب وياها بناتها والله مااشتهيهن
نوفه:انتي منو تحبين بالله عليج غير روحج
مروة:احب امي الغاليه العزيزة
ام خليفه:ايييييييه شوفوا شتبي مني هالشقرديه ويايه تتلزق
مروة:افا عليج يمه انا اتلزق اصلا انا احبج يمه من زماااااااااان يالله يمه مده يدج 100 دينار
ام خليفه:حشى عليج مرووو مو توني ماعطتج 50 قبل يومين
مروة:يمه ما يكوفون وانتي تدرين الجامعه على الابواب
ام خليفه:امري لله والله ماادري وين تصرفين هالفلوس
مروة:بالحلال يمه بالحلال
في دار طلال
طلال:ههههههههههه حياتي بسج عاد ذبحتيني من الضحك
وسيمه:سلامه عمرك حبيبي ماتشوف شر اذبحك انا شنو بنت اللحام
طلال:ماادري علامج مزوده البطاريه حبتين اليوم
وسيمه:من الحب حبيبي من الحب تصدق قمت اتكلم بروحي لين مااكون وياك
طلال:حاسبي على عمرج حياتي تراج غاليه ما تنفعيني بينونج
وسيمه:اهون عليك تقول لي جذي
طلال:والله اللي خالقني محد علقني فيج الا خبالج ولا منو بهالزمن يحب وحده اسمها وسيمه
وسيمه:انت حياتي انت احبك طلول
طلال:الله يا حياتي احبج اكثر عنج بمليون مرة انتي عمري وانتي حياتي وانتي غناتي وابوي
وسيمه:الله الله الله كل هاذول فيني وانا اقول من وين لي الكيلوات اليداد
طلال:خخخخخخخ من حبي لج الغاليه
وسيمه:بس عاد بسك مغازل وقول لي شخبار قمور
طلال:والله بخير كلمتها قبل سبوع وكانت بخير تسلم على الكل
وسيمه:الله يسلمها حبيبي الوحش اخوي شكله وصل بسكر عنك
طلال:اوووووووووف انتي اخوج هاذا ما بيموت
وسيمه:سلامه عمره حرام عليك تحرق قلب امي
طلال:والله محد بيذبحه غيري عندي شوزة بسيارتي شرايج اروح اقنصه اليوم
وسيمه:طالع هاذا تبي تدخل سجن يعني فيه خله ما يستاهل يوم اللي بنتزوج ما بيقدر يتكلم لي
طلال:ااااااااااه وسوم حياتي متى بس متى متى ادخل الكليه واتزوجج وافتك وانييب من بعدها عبادي حبيبي يلعب ويا الضب والفار والتيوس
وسيمه:يعع عليك هاذا تفكيرك صج مسطح
طلال:هههههههههههه سطحي حبيبتي سطحي
وسيمه:never care يالله حبيبي باي
طلال:هههههههههههههه باي حياتي
في بيت سبع بن ضاحي جاسم كان قاعد يتسمع اغاني يوسف المطرف وبالتحديد اغنيه كشفو سر الهوى صار له اللحين شهر واهو مو بوعيه وغرقان بحب لولوة يبي يكلم ام خليل عنها بس مستحي وينتظر ليما ايي خالد من السفر بس ماكو راحه بلياها شلون حبها جذي اهو صج بسرعه يحب الحلوات بس لولوة ملكت مشاعره كلها الله يهنيج يا لولوة بقلبي وروحي ويرزقني الخير بحبج يالغاليه في بيت بو خليل بن ضاحي ام خليل وحرمه خليل ومريم كانوا يسولفن عن المرحوم عبد العزيز ويتذكرون ايامه
ام خليل بحزن:من مات بو سعود كل شي تغير وكل شي تبدل والقطيعه سادت بين الاخوان والخوات
وضحه مرت خليل:ايه خالتي وانتي الصاجه بس اللحين خالد تزوج قُمر وان شالله بزواج مريم وسعود كل شي بيتغير وبعد لا ننسى ضاري ومطلق والرعبوب حمود واحد لمروة والثاني لنوفه والثالث لولوة ارفيجه قُمر حبابه وحليوة ويا حظنا لو تدخل العايله
ام خليل:وانتي الصاجه حبوبه البنت وتدخل القلب واصيله بعد ولو انهم مو بدوو
مريم:اصلا لولوة ما بتتزوج الا عمي جاسم وهاذا قرار نهائي
ام خليل:وانتي من موكلج على هالسالفه لا يكون بس مشتغله خطابه
مريم:لو خطابه جان خطبت لروحي مو قبلت بهالزواج اللي حيا الله مني والدرب
ام خليل:هاذا ولد المرحوم الغالي مو أي واحد وان شالله من بتلقين احسن منه
مريم:أي واحد ألا اهو
ام خليل:يالله عاد لاتقلبينها لنا فلم هندي
مريم:انزين انزين بس عمي جاسم ما بياخذ الا لولوة
وضحه:والله مادري يا مريم بس عمج هالايام مختفي عن عيوننا
مريم:احم احم الغايب عذره معاه
بدخله خليل:الله الله وانا اقول منو اللي اييب طاريي اثاريها حبيب قلب اخوها
مريم بدلع:ايه والله منو غيري يعني
انيي لخليل شويه ذكرناه في بدايه القصه بس بالكلام وما تعمقنا بشخصيته وراح انتعمق لان خليل راح تكون ماساته متوحده وفريده من نوعها خليل شاب ولا كل الشباب اخو خالد الاكبر عمره 33 سنه اول العنقود دس بجامعه البترول والمعادن بالسعوديه وتخرج بس استنغنى عن كل الشركات وانضم الى شركه العايله الجبيرة تلبيه لرغبه ابوه وعشان يملي مكان عمه المرحوم حباب وحليو وراعي سوالف ونكت وكل شي راح يتغير بحياته بسبب المصايب اللي بتحل على حياته فجاه
وضحه:الله وامرى اللحين يعني انا مااذكرك
خليل يلس يم مريم:والله ماادري قلبي اليوم كان يدق يدق بعنف وقوة وانا يبت اسمج عشان اشوف يهدى لكن ما هدى قلت اكيد مريوم ولا ست الغوالي
وضحه بزعل وقامت:عن اذنج خالتي شكله الوحام بدى عليي
وراحت وضحه واهي حاقرة ريلها
مريم:ههههههههههههههه كفك بو برهوم حرقت دمها ههههههههههههههههههه
خليل:ويلي ويلاه منها بانزين هالحرمه بسرعه تحترق ههههههههههههههههه
ام خليل:من الحب يا ولدي والله الحرمه ما يحترق دمها الا بسبه الغيرة والحب
مريم:هاااااا يمه قمتي تتكلمين بلسان نزار قباني
ام خليل:نزار منو
خليل بغشمرة:يما نزار قباني هاذا شاعر سنافي يمه يتحدى حامد زيد
ام خليل:يذلف اهو وربعه ما ايبون ولد الطيب حامد اقلك ان تعرفه وصل له كلامي
خليل:بسم الله علي يمه تبين تموتيني الريال مات وتحولت عظامه الى رميم
مريم:هههههههههههههههههههههه خلول والله انك ذبيحه
خليل:هع هع هاذا انا خلول بن برهوم كفج مريم بس كفخ
ام خليل:خليل
خليل يحاول يتناسى التهزيبه:قلي يا خلي من اللي ياخذك مني وانا اللي توقف ايامي في بالي وضحو يا حبيبه قلبي ويحك اين انتِ؟
مريم:انها بخيمتها تحلب اليوهرة
خليل:خيمه تهب على راسج وبقرة تسقي من مرعاج لاتتغشمرين عليها بنت العرب هاذي فديت خشمها الزعوله يالله انا بدخل اللحين ارفعن اياديكن بالدعاء اطلع سالمن غانمن فايزن بحربي ويا بنت الدانه
مريم نقعت من الضحك على اخوها وكلامه وام خليل بسذاجه رفعت يدها:منصور غانمن يا ولد نيمه
خليل:لو سمحتي بن ابراهيم ريال شكبري شيبي برز تقولين لي ولد نيمه الله يخلي خلود وين راح
ام خليل:اااااااااااه على خلود اثاريها سحرته بنت سعد يحليلها والله قُمر بن ضاحي
مريم:ايو الله اثاريهم اللحين يتوسدون ثرى بحر باليرمو ويتكلمون باسرار العشق والغرام
خليل:صدقتي يا بقرة امج الغاليه .. بس والله ما يتحدوني بالغرام انا ووضحو
مريم باهتمام:صج صج علمنا علمنا
خليل توه بيتكلم ورفع حاجب على مريم:ها مريوم اشوفج ميته على هالسوالف شهالحركات
مريم انحرجت:اعنبووووووو شقلت انا انت اللي فاضح عمرك
خليل:جب ولا كلمه اخر مرة اسمع منج هالكلام لا ماكو حب شمسي باجر
مريم:خل الحب لروحك ماابي شي منك
خليل:انزين قومي قصي لي يحه
مريم:يحه هالحزة حشى ولا بصراوي
خليل:ايه انتي صاجه بس انا احاول العب بالوقت قبل لا تلعب النظرات بعمري اثاريها وضحوا اللحين مشخطه الدار بروحتها وييتها ولا موتر بو قزوز دبابه تنتظرني بروح لها والله يحليلها يمه قط شكرتج على حبيبتي وضحه
ام خليل:مليون مرة
خليل:فلتجعليها المليون وواحد 1000001 عدل مريوم
مريم:هههههههههههههه عدل عدل
خليل بطريقه ساخرة:في امان الله اماه انا رايح الحرب مريم عدلي خشمج بس عشان الدرب
نقعن الحريم على خفه دم خليل وراح عنهن يراضي وضحه
دخل عليها الدار:ليله لوباقي ليله عمر ي ابيه الليله واسهر بليله عيونك ذي ليله عمر
ما تعطيه ويه واهي تسحي شعرها الطويل
ويكمل مغني زمانه:وضحه يا وضحه وشكثر انتي جميله
وضحه بغرور:ادري من دون ماتقول لي
خليل:اوووووووووف خليني اشوف حرارتج(يحط صبعه بالماي اللي على الطاوله ويمس يد وضحه) فيشششششششش حريجه وضحو اعنبوج بتيننيني هههههههههههههههههه
وضحه بعصبيه:خليل تراك ذبحتني بالغشمرة انا من صجي معصبه وانت تتغشمر
خليل:هههههههههه شسوي فيج يا عمري الدنيا يومين ومن يدري باجر انا اموت وانتي بتظلين يعني جذي معصبه علي
وضحه:قص بلسانك لا تقول جذي الله لا يحرمني منك يا بعد روحي
خليل:ااااااااااااااااااه يا قلبي تحبيني وضحه
وضحه وشوي شوي تنسها زعلها:مو بس احبك انا روحي فيك
خليل واهو يمثل بالعوار:وانا اقول علامي احس بالطيران الا من روحج الحرة يالدلوعه
وضحه:انا مو دلوعه بس انا ابيك تدللني جدام هللك
خليل:ما له داعي ياعمري حنا مفضوحين جدام الاهل حتى ان الناس يعرفونا من بعيد لين نمر كاهم العاشقين وضحه وخليل كاهم هناك كاهم هني وين الدفتر وين القلم ابي التوقيع
وضحه:هههههههههههههههههههههه يالمايع
خليل:افاااا اانا مايع
وضحه:واحلى مايع بعد شعندك
خليل:ما عندي شي اخر دينار صرفته على البانزين
وضحه:من يوم ورايح لازم تخصص ولا نسيت البيبي
خليل:انا انساه يخسي اهو واللي يابوه الا ناطره على احر من الجمر الا اقول لج ما تحرك اليوم ما تكلم وياج ما دق قاطع هاذا من شهرين ما ندري عنه
وضحه:باجر عندي موعد بالمستشفى حقه
خليل:اييه اقول لج ان تكلم وياج وطول لسانه على طول حوليه لي وانا بتصرف وياه اوكيه حياتي
وضحه:يا ربي متى بتصير جاد انت بحياتك
خليل:اممممممممممممممممممممم ابدا شرايج
وضحه:ههههههههههههههههههه احسن
جاسم حس حاله متضايج وايد ويحس بالكابه وماله الا خالد يفش له مزاجه اتصل فيه لقى تلفونه مسكر فكر يصل بالبيت ومرة وحده يكلم قُمر اللي وحشته حيل اتصل على البيت وظل التلفون يرن ليما انرفع
انابيلا:bin thahi mansion
جاسم تورط شكلمها تطلع لي ايطاليه واخربط وياها:hi this is jassim bin thahi where is gomar
انابيلا:just a moment sir
خذت انابيلا التلفون لقُمر اليالسه بصاله التشميس ضايعه بحزنها
انابيلا:phone call from mr jassim
قُمر:الووووو
جاسم:الواااااااااااااات ملايين هلا بالغاليه مرت الغالي
قُمر:هلا عمي هلا الغالي شخبارك
جاسم:ابخير الحمد لله انتو شخباركم شعلومكم
قُمر بصوت حزين:بخير عمي عايشين وحشتوني عمي وايد وحشتوني
جاسم حس ان السالفه فيها غلط:وانتي اكثر قمورعلامج قُمر فيج شي
قُمر توهقت ويا عمها شتقول له جاسم وايد دقيق ويلاحظ اقل تغير لذاحاولت تغير النبرة:سلامتك عمي مافيني شي بس مليت من هني ابي ارد لكويت
جاسم:بعد عمري والله بس خلاص قولي لخالد واهو ما بيرد طلبج
قُمر:ادري عمي ادري
جاسم:ايه قُمروصيتي فيج اهو خالد تصبري عليه تراه يحبج ويعزج
حتى انت يا عمي انقص عليك مسكين:ان شالله عمي اللي تامر فيه
جاسم:عفيه على البنات الا وينه خالد
قُمر:طلع راح يسوي جم شغله وبيرد من بعدهن
جاسم:ايه الله يوفقه يالله حبيبتي اخليج وراي شغل
قُمر:براحتك عمي توصيني بشي
جاسم:ذكر الله يالغاليه
قُمر:ااااااااه ونعم بالله
جاسم:مع السلامه الغاليه
قُمر:الله يسلمك
سكر جاسم عن قُمر واهو يحس بشي غلط قاعد يصيرقُمر صوتها كان حزين وكانت تتكلم من قلب ومو معقوله ان كان يصير اللي خالد يقول عنه وقُمر تظل جذي تعبانه تعوذ من بليس وقعد على النت يحس بالسخف من حاله ليما يقعد على النت بس شيسوي يقضي وقت قعد يصمم خلفيات فلاشيه باغاني راشد المايد بحيث يطلع الكلام من البحر او كدموع او يفتح رساله ويطلع منها الكلام ويكتب من تحت عاشق اللولو حس بالوحده صار له اكثر من 3 سنوات يعيش لحاله من بعد وفاه ابوه بيت شكبره يعمر ديار واهو يالس فيه لحاله وتخيل لو لولوة كانت زوجته يا الله راح تكون احلى عيشه وياها صارت الدنيا ليل وخالد للحين ما رد الشكوك بدت تتصارع بقُمر بس قلبها المجروح يتمنى لو انه ما يرد ابدا ولا تضطر انها تشوفه او تتعامل وياه ابدا قعدت تفكر لو ردوا الكويت شلون بيعيشون مع بعض راح يعيشون في بيته بغرفه وحده واهي ماتبي بتخليه يشتري لها بيت او شقه ليما تتقوى على نفسها وتطلب منه الطلاق نزف قلبها مرة ثانيه الطلاق انا اصير مطلقه انسانه منفصله عن زوجها شالحياه اللي راح اعيشها شهالموت البطيء اللي ناويته على عمري ليش انا ليش يصير وياي جذي بس ماعليه ابلعها واهي بارده بس مستحيل اعيش ويا خالد بمكان واحد وانا اعرف ان قلبه يود وينشد غيري مستحيل خالد كان قاعد بالحديقه من زمان وصل البيت بس ما حب يدخل داخل ما يبي يشوف قُمر ويشوف اجرامه فيها قعد بالحديقه واهو يتنسم الهوا اللي يمر عليه وكانه رحمه من الله عن العذاب اللي يعيش فيه ليش ندى سوت جذي في حياته مو كفايه انها رفضته وخلته يتزوج قُمر واخيرا يوم بدى قلبه يحب قُمر تدخلت مبيناتهم وهدمت كل امل وذبحت كل امنيه بقلبه طلع علبه الزقاير شافها فاضيه هاذا ثالث علبه يخلصها باليوم الواحد ولا يحس بعد بالراحه حس باليوع ينهشه واخيرا قوم نفسه عشان يدخل البيت قُمر كانت يالسه بصاله زجاجيه اضيفت حديثا بالبيت كلها جزاز وتكشف اللي داخل وتعتم من برع قعدت تتنسم الهوا اللي يمر بالصاله من الدرايش المفتوحه كانت هلكانه وتحس بتعب الدنيا كله فيها خالد دخل البيت وسكر الباب رمى الجاكيت اللي كان حامله وبوكه وساعته وراح للمطبخ
ستيلا:good evening sir
خالد:hello stilla.. Where is gomar?
ستيلا:she is in the sollarion hall do you want me to serve the dinner?
خالد:yes please
راح خالد عنها ما يتذكر انه امس شوي ويذبح ستيلا يوم عرفت انها حبست قُمر بالدار راح عن باله وقف عن باب الصاله واهو يطالع قُمر كان منظرها اثيري واقفه وشعرها مفتوح عاقده ذراعاتها ومغمضه عيونها تتمتع بالنسيم تمت على شكلها جذي ليما اهو قطع الهدوء
خالد:قُمر
قُمرانتفضت صوت خالد لدقيقه وحده نست امس بس ابتسامتها وجعت خدها المتورم وتذكرت فتحت عيونها وملامحها متغيرة والتفتت له
قُمر:وايد تاخرت على مااظن مو اليوم بنرد لروما
خالد:ماكو رحلات خبرج الوقت صيف وكل الناس اتيي على ايطاليا باجر بنطلع من هني بنروح روما ويمكن نمر ميلان ومنها نرد الكويت
قُمر:حسبت ان ميلان ما راح نطبها مرة ثانيه
خالد واهو يقعد:لا مضطرين لان هناك عندنا طيارة خاصه وتقدر تردنا الكويت
قُمر ما ردت ومشت تطلع من الصاله
خالد بصوت تعبان:وين رايحه
قُمر فز قلبها:بروح داري
خالد يطالعها:ما بتتعشين وياي
قُمر من دون ما تلتفت له:ماابي اكل
خالد:قُمر لازم تاكلين
قُمر:اللحين شنو قبل كان واجب اللحين شفقه
خالد:لا يا قُمر
قاطعته:بس عيل قلت ماابي يعني ماابي
خالد:على راحتج
وكملت قُمر دربها اهو بعد كان تعبان مثلها ما قدرت تحط عيونها بعيونه تخاف تضعف جدامه راحت دارها بسرعه واهي تمسح دمعه ساخنه حرقت روحها قبل خدها خالد قعد مكانه واهو متلوم حييييييييل على نفسه للحين ما يقدر يصدق انه مد يده على قُمر قُمر الضعيفه إلى مالها قوة اللي قالته من غير قصد من حرقه قلبها تبي تجرحني مثل ما جرحتها وانا عاقبتها بهاذي الصفعه اللي تدوخ الواحد الله يعينه ليما يردون الكويت الحرب راح تكون حاميه بالكويت لانهم بيعيشون بدار وحده وخالد من المستحيل يطلع بره بيتهم زهب العشا وقعد ياكل بهدوء على الرغم من يوعه القاتل شرب من بعده قهوة ويا حبوب مسكن للالام لان يده تالمه استغنى عن الدار وانسدح على احد الكراسي المريحه وراح في سابع نومه قُمر كانت يوعانه بس لان خالد اللي عزمها ماحبت تروح تاكل وياه ما تبي تشوف رقعه ويهه الحقير النذل يحاول يرد كل شي على طبيعته لكن مستحيل تمت بدارها ودقت جرس للخدامات ايبون العشى لها فوق انابيلا اللي ياتها بدال ستيلا
قُمر:انابيلا وينه خالد
انابيلا:استاز خالد نايم تحت هيئته كتير تعبان ايده ع الجفصين
قُمر:ليش اهو متعور
انابيلا:ما بعرف ستي صحى اليوم وطلع واجا هيكي بدك شي تاني
قُمر:لا سلامتج شكرا انابيلا
انابيلا:العفو
اهو صج قال لها اليوم الصبح انه بروح المستشفى لان يده تالمه بس لانها ما شافته ما لاحظت الجبيرة من شنو متعورة يده والله انا شيهمني لو يتكسر بكبره ما يهمني وقعدت تاكل خالد كان راقد بسابع رقده واهو على الكرسي ما يحس بولا شي حتى انه كان ماد يده باستسلام قُمر نزلت بعد ما ملت من القعده لحالها دخلت الصاله وما شافت احد التفتت عشان تطلع وشافت خالد كان مثل الميتين برقاده خافت وحست بالرعب راحت عنده بهدوء تبي تتحسسه ان كان ميت ولا لاء كان ماد يده ويتنفس بهدوء راحت قعدت عنده بكل هدوء واهي تراقب ملامحه بعد تفكير راحت جريب من ويهه عشان تحس لنفسه جربت وجربت واخيرا حست لشي كان يستنشق ويزفر بهدووووء تام شم ريحتها وقعدت يبتسم يفكر نفسه بحلم قُمر تطالعه وتطالع شكله قاعد يتبسم ومرة وحده خالد قعد يتكلم برقاده:قُمر ماابي ليش لازم بعد ما حبيتج
دق قلب قُمر من كلام خالد يتكلم واهو راقد ويفكر فيها يحلم بها وليش يعني اهو ما يحبني وشقاعد يقول لا يكون صاحي وهاذي تمثيليه من تمثيلياته توها بتقوم عنه الا ويرن التلفون كان الجو هادئ وسكون وطلع صوت التلفون مرة وحده وقُمر انتفضت على مسمعه وطقت يدها بيد خالد وواتعى كان منتفض ما يدري شصار
خالد:قُمر
قُمر كانت يمه ومن دون وعي:لبيه
انتبه لوجودها ما يصير كان يحسب انه يحلم فيها بس اهو شم ريحتها ليش قاعده يمه
قُمر حست بالحرج من نظراته:التلفون
انتبه خالد له وقام يرد عليه:الو
جاسم:الو خلوووووووود
خالد يطالع الساعه الساعه 10 بتوقيت فينيسيا معناته الساعه 11 بالكويت
خالد:هلا هلا جاسم شخبارك
جاسم:تمام الحمد لله انت شخبارك
خالد يطالع قُمر ويطالع يده شالمفروض يكون حالي بظيج:الحمد لله عايشين
جاسم حس بنفس اللي حساه يوم كلم قُمر:متاكد؟
خالد يعرف جاسم وتاكد انه حس بشي:ايه خلك مني وقول لي شخبار الاهل
جاسم:انا متصل فيك عشان اخبرك ان مريم ملجتها بعد سبوعين على سعود ولد اخوي المرحوم عبدالعزيز
خالد نسى همه وبدى له هم ثاني مريم تتزوج ومن منو سعود:شنوووووووووووووو
جاسم:علامك يا خالد مريم بتتزوج من سعود تقدم لها قبل سبوعين وابوك وافق
خالد:ومريم؟
جاسم:وافقت
خالد:صج؟
جاسم:أي صج علامك مومصدق سعود تراه ولد عمها مو أي غريب
خالد:يعني لازم تعيدون نفس الكلام بكل عرس ولد عمها يعني خلاص خلصوا الرياييل
قُمر انتبهت للي يقوله خالد بس ما قدرت تفهم هل اهو يرثي حاله ولا حالها وزاد حزنها وقامت تروح دارها واهي تمشي مسكها خالد من يدها عشان تنتظر
خالد:أي جاسم بعد يومين احنا بالكويت بس خلاص ملينا من ايطاليا لا مانبي نروح مكان ثاني اههههه يمكن لا اله الا الله الله يسلمك ان شالله ع هالخشم جم بو محمد عندي ههههه اكيد الله يسلمك الله يسلمك
خالد من غير تصديق:مريم بتتزوج من سعود ولد عمي عبد العزيز واهي وافقت
قُمر بسخرية:ما كفاهم معزة وحده يابوا الثانية يخلصون عليها
راحت قُمر عنه لكن يد خالد كانت أسرع ومسكها
خالد:شقصدج قُمر
قُمر:قصدي واضح وحده الغبي اللي ما يفهم تسمح تخلي يدي
خالد هد يدها وراحت عنه قُمر وقبل لا تركب الدري
قُمر بحقد ولؤم غريب:بس قبل أي شي تأكد ان قلبه مو مملوك لغيرها لا بعدين تنسم وتكره حياتها
تألم خالد زود من كلام قُمر جرحها عميق وينزف بغزارة بس اهي صاجه لو ما تزوجها واهو على حبه لندى جان ما صار اللي صار ولا راحت روح قُمر الطيبة يحس نفس مجرم مجرم بحقها ومجرم بحقه ومجرم بحق ندى بعد ما يدري عن ندى أكيد ردت لندن من بعد تهزيبه أمس والا منو بظل من بعد الكلام الجارح اللي قاله بس اهو أتخذ القرار المناسب لقُمر وإكراما لزواجه اللي ما يدري شنو مصيره من بعد اللي صار أمس بس مستحيل يترك قُمر لو كان هذا الشي اهي اللي تبيه مستحيل يفرط فيها وفي زواجهم اللي صار بالنسبه له حبل النجاه من بعد ماكان حبل المشنقة تلبست قُمر وقعدت تنتظر انابيلا تناديها عشان تنزل تبجي على شهر العسل اللي انتهى قبل لا يبدى صج انه اتعس شهر عاشته بحياتها خسرت روحها وخسرت دفترها وخسرته اهو اللي ما يتعوض خالد تنزل دموعها بغزارة واهي تمرر يدها على كل شي بالجناح الكراسي الطاولات المزهريات المليانه بورود الاوركيد الابيض تبتسم واهي مجروحه تتذكر طلعه ذاك اليوم قبل لا تهب عاصفه ندى على حياتها بس الحمد لله ان الحقيقه انكشفت لها قبل لا تغوص اكثر بحب خالد مع ان قلبها تعلق فيه وفي هواه الا انها بتحاول تموت هذا الحب ولو كان اخر شي تسويه بحياتها
انطق الباب وقُمر تمسح دموعها بنعومه وترد:تفضلي انابيلا
ما كانت انابيلا:انا خالد
التفتت له قُمر ودموعها سيلان يهز القلوب المتحجرة نست حقدها وانتقامها للحظه وقعدت تلومه وتعاتبه بنظراتها كان واقف بهدوء وجسمه مايل من التعب اللي فيه معدته تصرخ بانواع الاالام الغريبه اللي عمره ماحس بمثلها بس متحمل عشان يردون الكويت باسرع وقت دموعها كانت بمثابه لسان حالها المزري تطالعه و عتب القلوب واللوم المذيب موجه له
خالد بحزن:الوقت صار قبل لاتفوتنا الرحله
قُمر ما ردت عليه ظلت تطالعه بنظرة العتاب واهو ما عاد يستحمل اكثر
خالد:قُمر تكفين خلينا نطلع من هالكابوس ونرد للكويت
قُمر تبتسم بالم:كان من الممكن ان يكون هذا المكان الجنه الحلم الوردي حلم الف بنت وبنت تمنى السعاده الشرعيه ببدايه حياتها الزوجيه بس انت من الانانيه انك قضيت عليها وقضيت على حياتي وتناسيت حقوقي عشان نفسك الله يجازيك كل الخير خالد على اللي سويته فيي
تمت تبجي وملامحها متعذبه خالد زادت الامه ليش تقول له جذي تسم روحه وتجرعه العذاب اهو يحبها ليش ما تصدقه
خالد:قُمر انا احبج علامج ما تصدقيني ليش تقولين لي هالكلام اللي يذبحني بكل مرة اضطر اني اسمعه
قُمر تمسح دموعها وتحمل جنطتها ومن دون ما ترد تطلع من الدار ويظل خالد يسترجع ذكريات ذاك الصباح اللي كان مقرر انهم يطلعون كانت قُمر شي وقُمر اللي كانت هني قبل شويه شي ثاني ليش الحياه لازم تتعقد مستحيل يعني يعيش حياته بهدوء مستحيل يلاقي الراحه اللي الكل يتمناها هل هذي انانيه ولا حرام عليه ماقدر يستحمل اكثر وطلع من الدار قبل لا يطلع حس بشي تحت ريله باعدها لقى السوار الابيض اللي كانت قُمر لابسته قفله مكسور ومطروح على الارض شبيه بحاله زواجه ويا قُمر رفعه شمه وباسه وحطاه بجيب بانطلونه وطلع بعد ما طلعوا بنص ساعه ندى كانت واقفه عند الباب متوترة وخايفه من رده فعل خالد لو شافها بالبيت بس اهي لازم تتكلم وياه اهو وايد عصب عليها بس مستحيل يكون عنى الكلام اللي قاله دقت على الجرس واخذت نفس