الخط ده خطّي .. و الكلمة دي ليَّ غطّي الورق غطّي .. بالدمع يا عينيّ

[د/فارس]

عشانك يافلسطين

الخط ده خطّي .. و الكلمة دي ليَّ


غطّي الورق غطّي .. بالدمع يا عينيَّ


شط الزتون شطّي .. و الأرض دي ليَّ


نسايمها أنفاسي .. و ترابها من ناسي


و إن كنت أنا ناسي .. ما حتنسانيش هيّ


الخط ده خطّي .. و الكلمة دي ليَّ



لاكتب على عيني .. يحرم عليكي النوم


و احبس ضيا عيني .. بدموعي طول اليوم


قبل الوفا بديني .. زَي الصلا و الصوم


ده الدين في عُرف الحر .. هم و مذلة و مر


و هموم تجيب و تجُر .. أحزان مخبِيَّة



لاكتب على كفي .. و الحبر من دمي


يا عِزوتي كفي .. يا همتي ضمي


أول ما حنوَفي .. بالوعد حنسمّي


باسم اللي ماتوا صغار .. في المدرسة و الدار


و المصنع اللي انهار .. فوق الصنايعية


الخط ده خطي .. و الكلمة دي ليَّ

إخواني يامسلمين .. مدوا إديكم ليَّ

نضرب عدونا .. ضربة تكون هيَّ

إلّي ترفع راسنا .. في وسط الدنيا ديَّ

المسلم أخو المسلم .. ويبان في الشدة ديَّ

ياعرب يامسلمين .. أنا عرضكم ماتفرطوش فيَّ

قبل مايسألكم رب العباد .. عملتم إيه ليَّ