كوكتيل نكت كتير اوى .. تدحك موت .. اللى فاضي يدخل

[ميمي العسولة]

هاااااااااااااااااااااااااااااااااااااااى


شوية نكت بالهبل .. كتير اوى اوى اوى .. اللى فاضي بأة ومش وراه حاجة .. يقرأها

** دكتور فى مستشفى المجانين بيسأل ثلاثه مرضى بيقول انتم الثلاثه أقرب ما تكونوا للشفاء فأنا حسأل كل واحد سؤال لو جاوبه حيخرج
فسأل الأول : خمسه فى أربعه بكام
فرد وقال : نفق العباسيه
و سأل الثانى : خمسه فى أربع بكام
فرد وقال : يوم الجمعه
فسأل الثالث : خمسه فى أربعه بكام
قاله : بعشرين
فقاله : برافو إنت خفيت بس قولي عرفتها منين
قاله : لما طرحنا نفق العباسية من يوم الجمعة طلعت عشرين

** واحد قهوجي اشتغل منادي في المحكمة القاضي قاله نادي علي قضية محمدين عوضين حسن راح المنادي نادي و قال
وعندك 2 محمد و 2 عوض و 1 حسن و صلحه

** طبيب نفسى اشترى ساعة سيكو عالجها بالصدمات

** واحد بخيل مراته بتموت اتصل بالاسعاف و سابلهم missed call

** واحد بلدياتنا معاه واحد صاحبه وطالعين ناطحة سحاب على رجليهم علشان الكهرباء مقطوعه وهما ساكنين فى الدور الـ 200 طلعوا للدور الـ 199 فبلدياتنا بيقول له فيه خبرين واحد حلو والثانى وحش فصاحبه قالوا قول الحلو الأول .. قال له الخبر الحلو أن احنا فى الدور 199 والخبر الوحش ان مش دي العمارة

**كيف تضع فيل فى الثلاجه على ثلاثة مراحل؟ تفتح التلاجه، تحط الفيل، تقفل التلاجه...
كيف تضع زرافه فى الثلاجه على أربع مراحل؟
تفتح الثلاجه، تخرج الفيل، تحط الزرافه، تقفل ثلاجه...
كيف تضع نفس الفيل على مرحلتين؟ تفتح الثلاجه، تقول للفيل يأخذ الباب فى ايده و هو داخل

** واحد بلدياتنا راكب القطر ومعاه ابنه ومش عاوز يدفع له تذكرة .. فلما جه الكمسرى حط ابنه فى شوال ومسكه بايده برة الشباك فالكمسرى بيقوله ايه اللى مطلعه فى ايدك برة ده .. فدخل ايده جوة وقال له ما فيش حاجة.

** واحد ماشى فى الصحراء قابل واحد بلدياتنا
فبيقلوا انا حران من الشمس
فبلدياتنا قاله وانا محمدين من الارض

**واحد مسطول بيسأل واحد ايه ده ..
واحد : ده ا ربعين واحد ميت..
المسطول : ياه اربعين واحد ماتوا
الواحد : لأه ده واحد ميت بقا له اربعين يوم..
المسطول : ياه وما دفنهوش لغاية دلوقتى

** سبعه بلدياتنا اشتروا عربيه سابعه راكب علشان يكسبوا منها، خافوا للساق يسرقهم فضلوا راكبين معاه رايح جاى، لما لقوا نفسهم ما بيكسبوش استشاروا ابن عمهم خبير الاقتصاد فاقترح تغيير السواق

** واحد بلدياتنا بيهرج مع مراته فرماها من الدور العاشر فطلعت قالت له والله ما انا لاعبة معاك تانى

** واحد مسطول بيلعب كورة اخذها على صدره طلعها من مناخيره
واحد رفيع قوى بيبص من خرم الباب بعينيه الاثنين

** واحد بخيل ابوه مات فراح يعمل نعى فى الجرنان
فقالهم :أقل حاجه عندكم ايه
قالوا له : سطر واحد خمس كلمات،
قالهم : اكتبوا رزق ينعى ولده،
قالوا له : لسه ، فاضل كده كلمتين
قال لهم : و يصلح راديوهات

** مرة واحدة رفيعة بلعت زتونة افتكروها حامل

** واحد بلدياتنا رجع البيت لقى فيه دبان غير الكالون

** واحد بلدياتنا وقع على السلم فظهره وجعه .. راح للدكتور.. فكتب له مرهم وقال له إدهن مكان الاصابة.. فراح دهن السلم
واحدة بتقول لجوزها افرح حنبقى ثلاثة علطول
فقال لها : انتى حامل يا حبيبتى
فقالتله لا .. ماما حاتيجى تقعد عندنا علطول

** كلب فاقد الذاكرة فماشى عمال يقول صوصو.. لأه.. نونو.. لأه

**واحدة بتقول لجوزها مش ناوى تجيب ليا الدواء اللى بيطول العمر
فقال لها ما انا خايف اجيبه لحسن تخده امك

**واحدة بتقول لجوزها لازم تصلح الشباك عشان الناس بيشوفونى فرد عليها
الزوج : هما لما حيشوفوكى حييجوا يصلحوه هما.

** واحدة بتقول لجوزها مش انا حلمت انك اشتريت ليا فستان
افقال لها طب نامى على الله يتمر فيكى

** مرة 10 بلدياتنا بيهرجوا مع بعض .. مات منهم خمسه و فضل خمسة فقالوا كفاية كده لحسن تقلب بجد

** بلدياتنا نزل يستحمى فى الترعة السمك جاله تينيا
واحد مسطول بيسأل واحد مسطول
الأول : الجزمة دى حلوة اوى بكام
التاني : دى بنى
الأول : ياه دى رخيصة أوى

** واحد بيسأل واحد عن رأيه فى مصارعة الثيران فقاله دى بروفة جواز

** اثنين يابانيين اتخبطوا فى بعض فقالوا لبعض سونى

** واحد قصير قوى بيسخر من واحد طويل قوى
فبيقوله.. : إيه اخبار الجو عندك فوق
فرد وقال له : أمك قاعده فى البلكونه

** واحد مسطول قاعد مع واحد صاحبه والحجرة بتلف بيه فقال له أنا اقتنعت دلوقتى ان الارض بتلف

** فيل ضخم كل يوم يمر على مملكة النمل يهدها، النمل اتفق عليه
قالوا : حنستخبى له فوق الشجر و أول ما يعدى نقفز عليه و نقرصه لحد ما نقضى عليه
المهم الفيل مر راح النمل قفز عليه الفيل حس بيهم راح خابط بزلومته شمال وقع نصهم و راح خابط يمين وقع النص التانى و مفضلش غير نمله واحده
فكل النمل واقف تحت يهتف لها اخنقه يا فوزى

** فيل على علاقة بنمله قرر فجأه ينهى العلاقه فقالت النمله وهى تترجاه ارحمنى و ارحم الفيل إلى فى بطنى

** ليه بلدياتنا مش بيبوس بنته. لأنه حاطط ذيل الجلابية فى بقه

** واحد أعمى واقف يشحت من واحد تانى
فالتانى سأله : إيه اللى يثبت لى إنك مش بتشوف
فرد عليه قاله : شايف اليافطة اللى هناك دى
فقاله : أيوه
فقاله : أنا بقى مش شايفها

** راجل متجوز عنده دولاب فى البيت ممنوع أى حد يفتحه غيره مراته حيقتلها الفضول عاوزه تعرف الدولاب فيه ايه؟ لكن الرجل مش مديها أى فرصة، المهم فضلت طوال عشرين سنه منتظره الفرصه لحد ما فى يوم نسى يقفل الدولاب و نزل ففتحته فلقيت عشرين ألف جنيه و بيضتين فجريت على جوزها وسألته عن سر الموضوع ده و أصرت انها تعرف فقالها اقولك بس توعدينى انك تسامحينى، قالت أوعدك، فقالها الصر*** انا كنت كل ما أخونك أجيب بيضة و أحطها فى الدولاب، فالست قالت فى نفسها مرتين خيانه فى عشرين سنه ماشى سامحتك بس العشرين ألف جنيه دول بتوع إيه قال لها ابدا أنا كنت كل أما اكمل كرتونه أبيعها

** واحد بواب كل يوم ينزل ينادى على مراته
ويقول لها : عاوزة حاجة قبل ما أروح الشغل
فتقوله : لا
يروح قاعد على الدكة

** راجل و مراته ساكنين جنب شريط سكة حديد فكل لما القطار يعدى يوقع لهم الدولاب فالزوجه زهقت فجابت نجار طلبت منه يصلح الدولاب
النجار اختبر الدولاب
قال لها ده سليم
قالت له خش جواه و لما القطر يعدى حتعرف العيب فين فسمع كلامها و دخل،
بعد شويه جوزها وصل من الشغل فتح الدولاب فوجئ بالنجار
فقاله انت بتعمل ايه هنا؟
رد عليه لو حلفتلك ميت يمين حتصدق انى مستنى القطر؟ ـ

** واحد بلدياتنا واقف فوق البرج عاوز ينتحر عشان هو غبى فجابوا له دكتور نفسى وقاله حنسألك سؤال لو جاوبت عليه يبقى ما تنتحرش
(فسأله إيه هى الحاجة اللى اسمها زى لونها وفيها صفار).
رد عليه وقال البطيخة
قال له غلط البيضه يا أخى،
فقال له لازم انتحر
فقال له استنى حسألك سؤال تانى
قال له (ما هى الحاجتين اللى لونهم زى اسمهم وجوه فيه صفار)
فقال له بطيختين
قال له غلط بيضتين يا أخى
فقاله لازم أنتحر
فقال له استنى حسألك سؤال ثالث
فرد عليه لونهم اخضر ومن جوة احمر وفيهم بذر
رد عليه وقاله 3 بيضات
راح الدكتور راميه من فوق البرج

** عملوا مسابقة ذكاء لكل بلديتنا فى الاستاد وكل بلدياتنا حضروا وجابوا أذكى واحد فيهم
فالمذيع بيسأله 2+2 = كام
فقاله : 5
فقاله : غلط فبلدياتنا قعدوا يهتفوا أديله فرصة تانية ل له المذيع بينه وبينه أى سؤال أسألك عليه قول 4 فسأله 3 + 1 = كام ؟ فقال 4 فبلدياتنا هتفوا إدى له فرصة تانية



** اثنين تايهين فى الصحراء ولقوا خاتم سليمان فطلع لهم المارد وقال كل واحد فيكم له طلب واحد
فالأول طلب يروح بلده
الثانى قال وانا حاقعد لوحدى رجعهولى تانى هنا

** ثلاثة تايهين فى الصحراء طلع لهم مارد وقال لهم كل واحد له طلبين-
الأول طلب يأكل ويروح بلده –
والثانى يأكل ويروح بلده –
وبلدياتنا طلب كشرى والطلب الثانى (واحد كمالة)

** واحد بلدياتنا ماشى فى الشارع فبرنامج استضافه فسألته المذيعة اسمك ايه؟
رد عليها وقال ما فيش اختيارات؟

** واحد غلس أوى وقع على وجهه فقال أحسن

** واحد حقود اتحكم عليه بالاعدام هو وواحد ثانى فقالوا لهم كل واحد له طلب أخير قبل الموت
فالأول طلب إنه يشوف مامته
والثانى الحقود قاله ما تخلوش يشوفها

** واحد بخيل أوى راح شهر العسل لوحده

** واحد نايم جنب مراته بعد نص الليل و فجأه الباب خبط جامد فمراته صحيت مفزوعه من النوم وهى بتصرخ يا نهار اسود جوزى . راح جوزها نط من البلكونه.

** واحد عنده برد.. راح للدكتور..
فالدكتور سأله.. انت بتهوى بيتك كويس..
فقاله لا ..
فقاله افتح الشبابيك كل يوم قبل ما تنزل وتعالى ليه بعد اسبوع..
بعد اسبوع راح للدكتور
فسأله الدكتور.. ها البرد راح
فقال له البرد راح والتليفزيون راح والفيدو راح .

** بلدياتنا زعلوا من النكت اللى بتتقال عليهم فكتبوا النكت كلها ورموها فى البحر فتانى يوم لقوا السمك كله ميت من الضحك




** الفلاحين خايفين يقولوا نكت على بلدياتنا فرقموا النكت وقعدوا على القهوة أمام بلدياتنا ..
واحد منهم يقول 3 الفلاحين يضحكوا..
واحد ثانى يقول 7 .. يضحكوا..
راح واحد بلدياتنا قام وقال 5 فلم يضحك أحد
فقال لهم ليه ما ضحكتوش
فردوا عليه.. أصل إلقاءك وحش

** زبون يدخل كل يوم نفس المطعم فالجرسون يسأله
عاوز تاكل إيه..
فيأخذ فوطة الجرسون ويشمها ويقول له انتوا عندكم النهاردة سمك فيليه + أرز + صلاطة وهكذا كل يوم فالجرسون اتجنن فأعطى لمراته الفوطة وقال لها استحمى بيها وأديها لى وبعد كده الزبون دخل المطعم واخذ الفوطة زى كل يوم وشمها وبص للجرسون وقاله انت جوز فتحية؟

** الواد سوسو قابل صاحبه فقال له خد بالك البنت اختك ماشيه مع عبده الميكانيكى فرد عليه غاضبا ده لا ميكانيكى ولا بيفهم فى الميكانيكا


** ليه بلدياتنا بيحط فى إيده الشمال زلطة واليمين كبريت؟ (الزلطة عشان يكسر اللمبة والكبريت عشان يتأكد ان اللمبة انكسرت)

** ليه بلدياتنا بيحط معلقة فى بقه وهو نايم؟
(عشان يتقلب صح)

** كيف ندخل الفيل داخل زجاجة سفن أب
(أسهيه وهو بيشرب وأزقه)

** كيف نخرجه منها ؟
(أرجها تفور يروح طالع)

** إيه اللى بيطير فى السماء وينور ويطفى
(عصفورة لابسه أميجو بينور)

** ليه بلدياتنا لما يدخل يستحمى ياخد معه ابرة وفتلة
(عشان لو المياه انقطعت يخيطها)

** ليه بلدياتنا بيدق مسمار 10 سم فى صدر طفله
(عشان يشبك فيه التيتينه)

** ليه الفيل بيلبس شورت أخضر
(عشان لما يختبئ فى البطيخ ما يبانش)

** ليه الفيل بيلبس شورت أحمر
(عشان الأخضر مغسول)

** موس أعطى ميعاد لموسه لماذا لم تحضر
(عشان ناسيت)

ولماذا لم تذهب المرة الثانية
(عشان ناسيت 2)

** ما هو التشابه بين إزازة الريحة والجواز
(الريحة قسمة والشبراويشى والجواز قسمة ونصيب).

** ما هو التشابه بين الكمبيوتر والحفرة
(الكمبيوتر حاسب ألي والحفرة حاسب لتقع)

يللا كفايا كده
عشان محدش يموت من الدحك


يارب يكونو عجبوكو
وتقبلو تحياتي
ميمي

[وسام الحزن]

ههههههههههههههههههههههههههههههههه
بايخه كلهم وقديمه اصلا عسوله كلهن سامعهن قبل كدا

[Maisa]

جــامل على اقل وسامـــ

انا عاد شيفهمـــــ اجداد

سلمتـ ايداكٍ ميمي العسولة

جنـــان النكـت

دمتِ بود

MAISA

[ميمي العسولة]

هااااااااااااااااااااااااااااااااااااى

ميرسي أوى أوى يا حبيبتي يا ميسا والله انك زى العسل

مش زى البصل زى ناس ==>>> ((وسام الحزن))

على العموم بردو انا هكون زوق وهؤلك ميرسي على ردك
وعلى انك رفعت معنوياتي اوى

((محدش يزعل))