|
|
|
|
28-09-2007, 05:12 AM
|
#61 |
|
-+[¨¤ نائبة الإدارة ¤¨]+-  
|
رد: ღ° ☆∴ روايه صفحه الم ! ☆∴°ღ
انصدم هلال بكلام عبدالله ياللي كان يهز جدران قلبه .. ما عرف شنو ياللي حصل له .. كل ياللي عرفه انه قام من مكانه وحضن ولده عبدالله ياللي فجأه انفجر يبكي في حضن ابوه .. ما كان متوقع انه في يوم بيحضن عبدالله الولد ياللي طول عمره وقح وقليل الادب.. حضنه بقوه لدرجه انه عبدالله نفسه ما تحمل وبدى يبكي بحرقه .. الظاهر انه الامور بدت تطلع على حقيقتها قدام هلال .. عرف انه ولده طول الفترات الاخيره يدور حنان فاقده من البيت .. وراح يدوره في الناس ياللي مثل ما قال فارس له انها تستغل ولده بسبب عدم خبرته في الحياه . .. بسبب توفير الطعم للناس في ولده عبدالله على شان يصيدونه فريسه سهله ...... هلال وهو حاضن ولده عبدالله وولاول مره بصوت حنون يقول لولده ...: افا يا ابوحميد .. ما عاش ياللي يسوي فيك جيه يا ولدي .. ما عاش ياللي يسوي فيك وانا عايش .. وانا كل ياللي كان في باللي اني بسحب منك السياره وما بعطيك فلوس .. هذا هوه عقابي لك .. ما راح اسوي اكثر من جيه .. وكان احتجت فلوس في يوم .. انته حصلها بنفسك .. اشتغل .. حس بقيمه ياللي تسويه .. حس بقيمه الفلوس .. بقيمه التعب ياللي تتعبه .. حس بقيمه الفلوس ياللي تصرفها .. هني بدى عبدالله يبكي اكثر ... ما كان متوقع انه ابوه بيكون في يوم مثل هذا اليوم.. استمر عبدالله في البكى لمده وهو في حضن ابوه .. ما عرف ليش كان يحس بلذه غريبه عمره ما حسها في يوم .. حتى انه ابوه ما ابعد ولده عن صدره .. بالعكس ..جلس معاه في السرير .. وجلس يراضيه .. بدى عبدالله يحس بالذنب لانه كان يسوي اشياء ما ترضي اهله .. كان هذا اقوى عقاب هلال سواه في ولده .. كان العقاب انه حضنه .. حسسه بالحنان .. عمر هلال ما توقع انه الحنان بيكون عقاب للناس ياللي مثل عبدالله .. صار هلال يراضي ولده ويطيب خاطره .. حس عبدالله باول مره بشعور غريب .. شعور له ما ينحس غير في القلب .. شعور يحسس الانسان بلذه غريبه داخل شرايينه و يحسها تمشي وتتخلل في جميع ارجاء جسده .. بدى هلال يغير المواضيع .. ويتكلم عن اشياء عبدالله ما كان يعرفها .. او حتى انه يفهمها .. كل ياللي كان في بال عبدالله انه نفسه ولو لمره في عمره انه يوقف الوقت عند هاي النقطه .. كان عبدالله يتمنى انه حياته تنتهي ويخلص من عذابه .. بس في هذيج اللحظه ياللي كان ابوه يكلمه يحسسه فيها بحنان الاب تمنى عبدالله انها توقف .. ما تنتهي ..مرت فتره على عبدالله وهلال جالسين مع بعض .. بس بدون لا ينطق عبدالله ولا ببنت شفه .. كان صامت ..هادي .. يكتفي بالنظر للانسان ياللي واقف قدامه .. هل هوه في حلم ولا في علم .. اهذا ابوه .. ولا هذا ملاك في شخص ابوه .. مرت اللحظات على عبدالله مثل ما تمر على الانسان لحظات وهو يذوق شي حلو وطيب ... طلع هلال من المستشفى .. وسار لابوظبي ...... وفي سيارته لاول مره تخونه الدمعه وتنزل .. اول مره يحس هلال انه كسب شي .. طول عمره يكسب صفقات .. اموال .. بس اليوم حس انها احلى صفقه كسبها من عاش ... حس بلوعتها .. بعذابها .. بس في الاخير حس بحلاوتها .... ما كان متصور انه في يوم راح تكون علاقه بينه وبين ولده عبدالله .. ما تصور انه في يوم بيحس انه لعبدالله قلب مكسور ..ما عمره تصور انه عبدالله حساس لهاي الدرجه .. ما عمره حس انه عبدالله بيكون سهل البكي ... حساس .. متحطم .. يبكي مثل ما شافه اليوم.. بس الظاهر انه الشغل والفلوس ابعدته عن عياله.. بس حس هلال انه هذيج الفلوس كلها ما تسوى شي بالنسبه للي حسه وعاشه من لحظات في المستشفى ... بدى يحس باللي كان مقصر فيه .. بدى هلال يعرف انه فيه اشياء كان مقصر فيها ..عرف انه الاب دوره مش في ملي البطون وملي الجيوب فلوس واموال .. عرف ولاول مره انه دور الاب انه يحسس عياله باشياء تكون الام مش قادره تمنحهم اياها مثل الاحساس بالامان .. الاستقرار .. اشياء عمر هلال ما فكر فيها في يوم .. كان يحس انه الاب دوره بس يكون في توفير الاشياء المطلوبه للحياه .. ودور الام في توفير الاحاسيس.. بس وين كان هوه من كل هذا .. كان بعيد عن دوره كأب ..كان بعيد عن دوره كمدير لبيته مثل ما هو مدير لمكتبه .. عرف انه عياله صاروا محرومين من كل شي يخص الوالدين .. عرف انه عياله ناقص عليهم حنان الام والاب .. اشياء الفلوس نفسها ما تعوضها .. عرف بانه عياله ينقصهم الشي الكثير .. بس وين كان هوه من هذا كله .. وين حصه من هذا كله .. وجلس يفكر هلال في حال عايلته .. وفي الاخيرعرف هلال انه كان مخطي في اختياره حصه كزوجه .. بس هل ينفع التراجع الحين .. صار وجودها مثل عدمه .. على الاقل ما يريد يعيش عياله في خوف وشكوك انه امهم ما لها اي اهميه ... رغم انها ما لها اصلا اهميه .. مرت فترات في الطريق على هلال وهو يكلم ويحاسب نفسه ... بدى يحاول انه يصلح اموره .... يصلح جدران تصدعت في حياته .. بدى يحاسب نفسه .... يشوف نقاط ضعفه .. يحس بالنقاط ياللي ناس كثيره تجامله فيها .. بدى يراجع نفسه . ... واكتشف نتايجها واثرها اليوم .... |
|
|
|
|
28-09-2007, 05:15 AM
|
#62 |
|
-+[¨¤ نائبة الإدارة ¤¨]+-
|
رد: ღ° ☆∴ روايه صفحه الم ! ☆∴°ღ
وفي المستشفى وبين الغرف كانت ابتسامه اعلانت اشراقتها بعد سنين من الغياب .. كانت شموع الامال تبدى تولع لانسان امال واحلام تحطمت من سنين في ظلام الاحباط وبحور الدموع .. أورت له الشموع اول ابتسامه على شان يتجتاز مرحله الاحباط والضغوط النفسيه ياللي يمر فيه عبدالله ...... كان عبدالله يبستم ولاول مره .. ما كان مصدق ياللي كان قدامه .. ما كان مصدق ياللي استوى... ابوه كان موجود وكلمه بطيبه وبحنان وحضنه.. وفجأه بكت عيون عبدالله ....كانت اول مره بيكي وهو يبتسم .. ... ليش بدى يحس بلذه ذابت في قلبه ... ليش عاش في احلام .. بدى عبدالله يسأل نفسه هل هيه احلام ولا حقايق بدى الزمن يعوضها لعبدالله بعد سنين من الحرمان عيشها في هاي الدنيا ..... ومر اليوم كله وعبدالله موب مصدق ياللي استوى في اليوم كله .... مرت الايام سريعه... مرت الايام وبدت اشياء تتصلح بين هلال وولده عبدالله .. بدى عبدالله ينتظر الوقت ياللي عوده ابوه انه يمره في المستشفى .. مر الوقت لين وصل لليوم ياللي عبدالله بيطلع فيه من المستشفى .. طلع عبدالله من قضيه المخدرات مثل الشعره من العجين وهذا بفضل الله ثم واسطه ابوه ياللي تهز العالم هز........ وفي بيت ابو عبدالله "هلال" كان بيت في قمه الضخامه .. بيت كان في اروع ما يكون .. ارضيات رخاميه لونها بين الابيض والازرق .... اثاث من الرقى وافخر ما يكون "كان لون الاثاث بين الزرق والاحمر" .. .. كانت التحف في كل ارجاء البيت .. كان البيت في قمه الاناقه والذوق الرفيع .. ويدخل هلال ومعاه عبدالله .. ولا بحصه في الصاله وتتكلم في التلفون ....... حصه ... وهيه جالسه على الكنبه وبنظره حقيره تطلع في عبدالله ...: اقول ام احمد .. بتصل فيج بعدين ...فيه ناس ضايقه نفسي منهم وصلوا .. اكلمج بعدين .. يالله باي حبيبتي ..... *وتلتفت حصه في عبدالله وبنظره حقيره تنظر لولدها ..وهيه تقول * وصل راعي المشاكل .. افففففففففف .. ما كان احسن لو تجلس في المستشفى .. بدل فضايحك .!!!! ناظر عبدالله في وجه ابوه ياللي ارتسمت نظره غضب بسبب كلام زوجته حصه .. واكتفى بالسكوت ...وطلع لغرفته في الطابق العلوي ... وقبل لا يطلع عبدالله ناداه ابوه .. هلال ...: عبدالله ..بدل ملابسك .. بنطلع نتعشى انا وانته واخواتك .... حصه : لا والله .. وشنو المناسبه .. هلال وهوماسك اعصابه ..: المناسبه سلامه عبدالله وطلوعه من المستشفى .. وعلى حسب توقعاتي ياللي ما تخطي قلتي للطباخ ما يسوي غدى ولا يسوي عشا لانه عبدالله اليوم طالع .. صح يا حصه ولا انا غلطان .. حصه وهيه تحط رجل على رجل وتحط يدها على فكها مثل ياللي مستحقره ياللي قدامها ..: لا شاطر .. والحمدلله انك فهمتها .. وانا ما اشوفها مناسبه تستاهل يوم انه عبود طلع من المستشفى .. يكفي الفضايح ياللي مسويها .. حتى اني ما اقدر اطلع واتكلم عند خوياتي بسببه.. والله اني متفشله بعبود .. في هاي اللحظه شاف هلال نظره مكسور خاطرها في عيون عبدالله ياللي طلع على طول لغرفته بعد ما سمع ترحيب امه حصه فيه .. عرف هلال لحظتها انه حصه جرحت عبدالله .. ولا اهتمت بشعوره .. كان طول عمره يشوفها .. يشوف هذيج النظره .. بس كان يحسبها وقاحه من عبدالله .. بس الحين توضحت له الصوره بعد ما عرف بعض الاشياء عن ولده عبدالله ... عرف انه نظره مش وقاحه .. بالعكس نظره الم .. نظره جريحه كانوا يسببونها له كل يوم .. هلال وبنظره غضبانه ..: ومنو حظرت الشله ياللي انتي مستحيه ومتفشله بعبدالله منهم .. ام هذا ياللي ما يتسمى احمد .. ياللي لا شغل ولا مشغله غير انه يجلس مقابل مدارس البنات وترقيم في بنات خلق الله .. حتى انه كل حراس المدراس صاروا يعرفونه بسبب مشاكله .. ولا هذي ام حسينوه ياللي فالحه في نقل الكلام بين الحريم وتسبيب المشاكل بين الازواج .. انتي قبل لا تتفشلين بولدج المفورض تتفشلين بالشله السوء ياللي تعرفينها .. من متى بدوا لهم اهميه في حياتنا ولاا لهم اهميه في كلامهن ياللي تعقينه على الناس واعراضهم مثل ما تعقين .... وقبل لا يكمل هلال كلامه ولا بام حسين داخله ...لا دقت الباب ولا كنه للبيت دستور .. التفت فيها هلال بنظره خلتها ترتبك وترتجف .. ام حسين وهي تلتفت على حصه .. : حصه .. !!!. انتي ما قلتي ليه انه زوجك موجود !!! .. ويلتفت هلال فيها وبنظره غضبانه يقول لها ..: حووووه ... انتي .. سود الله هذا البرقع .. ما كنه للبيت حشمه ولا دستور .. داشه انتي كبره بقر موب بيت اوادم .. عنبوا هالسنع ياللي طايحتبه .. يالله .. يالله .. برا .. برا .. وتعلمي تدقين بيوت الناس قبل لا تدخلين .. وتلتفت ام حسين على حصه ياللي بدت تتقفط من كلام هلال .. وترجع حصه تلتفت على هلال .. حصه وهيه خلاص ... طافح فيها الكيل ..: انته ليش تفشلني قدام خويتي .. ما عندك احترام لي على شان تحترمها .. وهني يلتفت هلال في حصه ياللي اول مره تشوف نظره مثل هذيج النظره .. وحست برهبه في قلبها بس ما طلعتها .. عرفت انها لو تقول كله زياده راح تستوي مصيبه .. وتلتفت حصه في ام حسين ياللي كانت واقفه جنب الباب .. حصه ..: ام حسين اسمحيلي ما اقدر الحين اسير عندكم .. الظاهر اني بصلح بعض الامور قبل لا الحقكم... ام حسين ..وهيه نظراتها خايفه من هلال ياللي كان يخزها بعيونه ..... : خلاص .. انا بسير الحين وبيني وبينج التلفون .. *وهني تشرد ام حسين من الباب وهيه خايفه من هلال * .. يالله في امان الله ... وتلتفت حصه في هلال ياللي وقف يناظر حصه بنظره ما عرفت حصه شنو سببها .. وترد حصه تكلم هلال .. : الظاهر انك موب على بعضك .. اقول .. انا بتفاهم عندك بعدين .. موب الحين .. ويالله .. انا طالعه عند ام حسين .. ويوقف هلال في طريق حصه ياللي كانت بتطلع من الباب .. حصه ..وبعصبيه ..: هلال !! .. انته شنو تسوي .. !!! .. هـــــــــــــــــــلال!!! .. موب احسلك !! .. ابعد عن دربي قبل لا اتصرف معاك بتصرف ثاني ...... هلال وببروده يقولها.. : يعني شنو بتسوين .. تسحبين الشركه مني لانها بأسمج .. ولا بتطرديني من البيت لانه بأسمج بعد .. شوفي يا حصه .. وقبل لا يكمل هلال كلامه تمسك حصه الباب وتطلع واتخلي هلال واقف وبعده ما خلص كلامه .. وتطلع حصه ويطلع ورها هلال .. اقول يا حصه .. تراه ان طلعتي بيكون ليه تصرف ثاني معاج ..... حصه وهيه عاطيه هلال قفاها وتمشي صوب ام حسين ياللي كانت برا الفيلا بتسير ..: سو ياللي بتسويه .. وياللي ما تطوله بيديك طاوله برجولك .. وانا ياللي بتفاهم معاك يوم برجع من ام حسين ...... |
|
|
|
|
28-09-2007, 05:21 AM
|
#63 |
|
-+[¨¤ نائبة الإدارة ¤¨]+-
|
رد: ღ° ☆∴ روايه صفحه الم ! ☆∴°ღ
وطلعت حصه من البيت بدون شور هلال وهو زعلان عليها .... رجع هلال البيت ... ولا بسلومى الصغيره مع الخدامه .... كانت الخدامه ما تفارق سلومي ياللي كانت دايما تتعب وتمرض ..... من شافت سلومي ابوها دخل تربع صوبه .. سلومي ..: بابا .. بابا .. هني ابتسم هلال لانه سلومي كانت اقرب وحده له لانها الصغيره ... : هلا والله .. سلومي .. *ويشلها هلال فوووووووووووووق ويحضنها .. وهيه تضحك ببرائه الطفوله .. * وتبدى سلومي تخبر ابوها ياللي سوته اليوم كله .. وهلال يتسمع لسلومي ياللي كانت احلى جنه عاشها هلال في هذا البيت .. وحتى انه سلومي لطفت جوه ياللي كانت حصه معكرته من مده بسيطه ... جلست سلومي تتلكم .. ولاا بهند نازله من فوق للصاله ياللي تحت .. هند وهيه تبتسم لابوها ..: مرحبا الساع .. هلا والله بابوي .. هلال وهو يبتسم ..: هلا والله بهند .. هلا بزينه البيت .. هني سلومي قلدت ابوها وبصوت الطفوله تكرر كلامه .. : هلا زين بيت .. وهني تبتسم هند .. وتفتح ذراعها لسلومي مشان تشلها .. : يالله سلومي خلي ابوي يرتاح .. توه راجع من الشغل .. هلال : لا خليها .. موب ثجيله .. هاهاها.. سلومي كلها على بعضها كيلو جلد على عظم .. موب ثجيله .. حتى لو تاكل ما يبين فيها ... هند ..: كيف الشغل اليوم .. انشاء الله تمام ... هلال وهو يبتسم ..: اي شغل .. نسيتي اليوم انه عبدالله طلع من المستشفى .. هند وهيه متفاجأه : والله .. عبودي طلع ..!!! .. متى !! وليش ما فيه احد قالي شي عنه .. هلال وهو يقول في خاطره .. : والله ما الومج يا بنتي .. قلبج مش معا اخوج .. وكله لانكم دوم بعيد عن بعض في القلوب .. عمركم ما حسيتوا بانكم خوان .. هند وهيه تناظرابوها.... : ابوي .. انشاء الله ما شي يعورك .. اشوفك سكتت .. هلال ..: لا والله .. افكر في الشغل .. هند ..: لي متى بتم شال امور الشغل في بالك يا ابوي .. خلاص .. انته في البيت .. حتى لو فكرت في الشغل الحين ما راح تغير شي فيه .. لانه لا اوراق معاك ولا ملفات ..خلاص ..عطنا هذيلا الدقايق ياللي نشوفك فيها قبل لا يدق تلفونك وتنسانا .. هلال وكلمه هند البسيطه سوت رنين في قلبه ..بدى يكلم نفسه .. : اول كنت ما فكر في الكلام ياللي كان يقولونه عيالي .. بس الحين بديت احاسب كل كلمه يقولونها .. اول ما كنت جيه .. بس شكلي خلاص .. عرفت الحين راسي من كرياسي ... هند .. : لاااااا .. انته اليوم موب على بعضك .. شكلك مهتم من الصفقه ياللي قدمت فيها .. هلال ..: لا والله .. بس كنت افكر في موضوع كان في بالي .. كيف الدراسه .. عسى بتخلصين الكورس بدرجه امتياز .. هند ..وهيه تبتسم ..: هاهاها.. اول مره اشوفك مهتم في دراستي ..هاها.. لا ولا يهمك ... برفع راسك فوق .. وانا قدها وقدود .. بس شد خليك في الهديه .... هلال وهو يبتسم ..: لج عيوني يا عيوني ... وانتي تامرين بس ..بس رفعي الراسي فوق ولج ياللي يطيب خاطرج .. هند وهيه مستغربه ..وفي خاطرها تسأل نفسها ..: عيوني !! .. هذي اول مره اسمع من ابوي يقول هذا الكلام ليه .. لاااااااااااااا .. السالفه فيها شي ... هلال .. : هند .. !! .. شلي ساره ولبسيها ملابس عدله .. خلينا نسير نتعشى برا ..... هند مستغربه ..: برا .. !! .. ليش شنو المناسبه .. هاهاها.. لا يكون بسبب امتحانات الكورس.... هلال ..: لا يا هند .. بنتعشى على شرف الاستاذ عبدالله .. وانشاء الله بيكون كل خميس وجمعه طلعه لكم .. وبخلي الشغل في هذيلا الايام لكم وبس .. بلا شغل ... هند وهيه مش مصدقه يالي تسمع : واللـــــــــــــــــــــه .. اللهههههههههههههههههههههههههه .. وخيرا بنطرع مع بعض .. والله الليله احلى ليله .. يالله بيسر اتلبس .. تربع هند لطابع العلوي .. وقبل لا تكمل نص السلالم تسمع ابوها يضحك وهو يناديها .. هلال ..وهو يضحك ..: هند .. يا هند .. ردي .ردي .. وترجع هند وهيه منكسه راسها لانها كانت تعرف انه ابوها راح يغير رايه مثل كل مره .... هند وهيه شبه زعلانه ..: امر يا ابوي .. اخرت .. صح .. !! .. ما لك خاطر تطلع .. هلال ..: هاهاهاها.. لا .. ما اخرت .. وانا عطيتج كلمتي ... بس حبيت اذكرج .. نسيتي شي .. وهني تلتفت هند في ابوها ولا بسلومي في حضنه وحاطها يدها في فمها ببرائه .. ضحكت هند في هاي اللحظه وضربت على راسه مثل ياللي تذكر شي ..: اوووووه .. تقصد سلوم ..!! ..هاهاهاه.. والله اني قلت انك غيرت رايك مثل العاده ..هاهاها هلال .. وهو يرفع سلوم لهند على شان تاخذها وتبدل لها ملابسها ..: زين انج تذكرتيها ... عليكم بالله فيه احد يقدر ينسى سلومي حبيبتي ...هاهاها هاها.. هل هالله فيها .. هند : لا ما عليك .. *وتنادي هند على خدامتهم ياللي كان اسمها ميري * ... ميري .. يا ميري .. وينج .. وتجي ميري وهي تقول .. : نعم ماما هند .. هند ..: شلي سلوم ولبسيها ملابس حلوه .. ترانا بنطلع نتعشى برى.... ويقاطع هلال هند بزعل ..: انا قلت لميري تبدل لسلوم ولا قلت لج انتي .. هند !! .. لا تعتمدين على الخدامات في تربيت اختج .. مني غادي انتي مسؤوله عن سلوم .. هند وهيه مستغربه زعل ابوها منها .. هيه طول عمرها تنادي الخدامات على شان تبدلن لسلوم وتأكلنها .. ليش يعني هاي المره غير .. هند ..: انشاء الله .. على امرك يا ابوي .. من عيوني ... هلال وبنظره رضى لهند يقول لها ..: الله يرضى عليج .. يالله وانتي في طريقج خبري عبدالله ينزل من غرفته ..*وفجأه يغير هلال رايه ..* .. ولا اقولج .خلاص .. انا بسير لغرفته وبنزله عندي .. |
|
|
|
|
28-09-2007, 05:22 AM
|
#64 |
|
-+[¨¤ نائبة الإدارة ¤¨]+-
|
رد: ღ° ☆∴ روايه صفحه الم ! ☆∴°ღ
هند وهيه مستغربه هذا الاهتمام الزايد في عبدالله وسلومي .. : على راحتك .. *وتلتفت هند على سلومي ياللي كانت في حضنها ..* .. يالله نبدل ملابسنا يا سلوم .. سلوم وهيه تبتسم ..: ملابس .. حند ..حند .. ابي حلاوه .. بس ما خبرين امي ... وهني ترتسم بسمه حزينه في وجه هند كانت مثل السهام في قلب هلال .. عرف لحظتها انه حصه بدت تغرز انيابها حتى في سلوم الطفله الصغيره .. عرف انه بيكون لها مستقبل مثل مستقبل هند وعبدالله ياللي عاشوا في عذا بسبب امهم هذا اذا ما لحق عليها وضاعت مثل ما ضاع اخوانها قدامها .. ... هند ....: لا سلومي ما بخبر امي .. يالله بنسير لفوق نبدل .. وتطلع هند للطابق العلوي وسار هلال لغرفه عبدالله يشوفه بعد ما سمع نغمه الترحيب من امه ياللي حتى ما رحبت فيه مثل باقي الامهات .... طلعت هند لغرفتها ودخلت ومعاها سلوم .... ولا بالجوالها فيه 3 مكالمات ما ردت عليها .. وتبتسم هند وهيه تشوف الرقم .... وتتصل .. في نفس اللوقت ياللي يالسه فيه تبدل الملابس لسلوم ويرن تلفون الطريف الثاني .. تكلمت هند اول ما انشلت سماعه التلفون ...: مرحبا ملايييييييييييييييين .... محبه "بفتح الميم والحاء" : لا ملايين ولا هم يحزنون .. وين كنتي ..حشى ليه ساعه على التلفون انتظر تتصلين فيني ... *محبه ... اقرب قريب لهند .. تعرفت عليها في ايام الثانويه ... صارت محبه اخت لهند ..كانت قريبه لها بدرجه كبيره ..... حتى انه هند تحس انها اختها بالدم من كثر ما هيه قريبه لها .. كانت محبه من النوع ياللي على النت بشكل فضيع .. كل همها النت .. والاكل .. رغم انه ما يبين في شكلها ياللي كان نحيل .. واتقول محبه دوم لهند انها رشاقه .. رغم انها نحاله ..* هند وهي موب مصدقه الخبر ..: محبه ..محبه .. توقعي شنو ياللي بسويه الحين ...يا ربي موب مصدقه .. محبه ..: حيلج حيلج .. شنو يعني استوى .. هند وهيه ميته من الفرحه ..: لا....... توقعي انتي ... شي ما راح تتصورينه .. محبه ...وهيه تخمن ..: ربحتي سياره مرسيدس من مهرجان دبي ..!!! هند .. : لا لا .. شي احلى من هذا والله بكثير .... محبه ..: عيل فزتي بوجبه مكدونالز مجانا .. هاهاهاهاها هند .. : مكدونالز في عينج .. انتي هذا ياللي فالحه فيه .. اكل من المطاعم السريعه .. وشات اربع وعشرين ساعه ..خفي على النت شوي .. محبه ..: والله حيرتيني معاج ... قولي شنو ياللي عندج .... تراه ما عندي اشياء ثانيه اقدر اقولها لج .... هند .. وهيه بكل لهفه تقول : ..ابوي .. ابوي يا محبه .. عازمنا كلنا على العشا .. اللـــــــــه .. ما صدق انا بنطلع .. محبه وهيه مثل ياللي مستغربه..: بس .. عشا ..!!!! ... هند .. ليتج انتظرتي خمس دقايق ثانيه على شان تتأكدين من الخبر ...هاهاها.. الحين بيناديج ابوج وبيقولج خلاص ... اخرت .. هذا ابوج ... دوم يغير رايه ..هاها هند ..: فال الله ولا فالج .. حرام عليج .. قولي شي يرفع المعنويات موب شي يكسر الجناح .. اما اني غلطت يوم قلت لج .. محبه ..: حيلج .. حيلج .. كنت امزح معاج والله .. وشنو المناسبه يعني هاي المره .. هند ..: والله الناسبه الله يسلمج انه عبدالله طلع من المستشفى ... وابوي يبينا كلنا نكون على العشا .. بس برى .. محبه ..: هممم .. غريبه .. بس امج بتسير ولا لا .. هند ..: ما اظن .. دومها برا البيت .. هيه وابويه .. وتخيلي شنو قالي اليوم بعد ... محبه ..: والله ما اردي .. حيرتيني .. ما صرت اقدر اتخيل ..هاها هند .. وبلهفه ..: قالي كل خميس وجمعه بنطلع مع بعض .. اللــــــــــــــــــه .. عمري ما تصورت ابوي بيختلف جيه ... محبه ..: لا تفرحين وايد .. هند وهيه مستغرب : ليش ما افرح ..!!! محبه .: ما ابا اكسر رجاج وخاطرج ..بس انتي تأكدي انه ما بيغير رايه .. هو دوم يقولج شي ويغير رايه في اللحظه الاخير وهني ينادي هلال على هند بعد ما طيب خاطر ولده عبدالله وخلاه ينزل معاه ......... هلال من الطابق الارضي .. : هند .. يا هند .... هند : اقول محبه .. ابوي يناديني .. محبه وهي تضحك ...: هاهاها.. خلاص .. غير رايه ..هاهاهاها هند ..: الله ياخذ العدو .. دومج متفاوله بالشر .. محبه .: لاني متفاوله ولا شي .. ارهنج .. هند .. : وانا قبلت .. على قوطي ببسي .!!!! محبه ..: وافقت ..هاهاها.. يالله سيري وردي عليه بعد دقيقه ..هاهاها هند .. : ما برد عليج الا بعد العشا ..هاهاهاها محبه ..: يالله قبل لا يستوي شي ويغير رايه ويوديكم ..هاهاها.. واخسر انا الرهان .. هند ..: بنشوف ..يالله انقلعي للمسنجر حقج ..هاهاها محبه ..: بنشوف .. وانا بسير الحين .. يالله في امان الله هند ..: باي حبيبتي ... محبه ..: باي ... وتصكر هند من محبه ومسكت سلومي ياللي كانت حاطه يدها على فمها وتغني ببرائه الطفوله وتتمايل بكل حلاه وبرائه... ويطلعون الكل مثل ما وعدهم ابو عبدالله للعشا برا البيت .. هذا بعد ما بيحوط فيهم في كل مكان في ابوظبي مثل ما كان مخطط على شان يفاجأ عياله ياللي عمره ما قد طلع معاهم ..... |
|
|
|
|
28-09-2007, 05:23 AM
|
#65 |
|
-+[¨¤ نائبة الإدارة ¤¨]+-
|
رد: ღ° ☆∴ روايه صفحه الم ! ☆∴°ღ
في هاي اللحظه كان فارس ضايق ما عنده شغله .. كان في الشقه .. وكان معاه عادل ..بس عادل مثل عادته في عالم النت ولا كنه موجود ..كان وجوده مثل عدمه ... وجلس يفكر في ايام الملجأ ياللي كان عايش فيها ... كانت ايام حلوه .. ما فيها هموم مثل العالم ياللي عايشه الحين .. وفجأه تذكر انه عم عوض موجود في العين .. ويعيش فيها .. وخاصه انه تقاعد .. فقرر انه يزوره .. رغم انه قرب وقت العصريه وقريب على المغرب .. فاتصل بابو عبدالرقيب ...... ويرن تلفون ابو عبدالرقيب ..ويشله عبدالرقيب الصغير ..... عبدالرقيب ببرائه ..: الووو ... فارس ..: هلا والله .. عبدالرقيب ..كيفك .. عبدالرقيب : من تريد .. ويضحك فارس ...: هاهاها.. ما عرفتني لين الحين ..!! .. هذا انا فارس .. هني يصيح عبدالرقيب ..: فالس ..فالس .. وينك .. ليش ما تينا .. خلاص ما تبينا .... وهني يبتسم فارس ويقوله ..: ليش ما ابيك .. انته حبيبي .. وين ابوك .. هني يبتسم عبدالرقيب ...ويقوله .. : انا حبيبك ليش ما تينا .. والله ما احد يلعب عندي .. ابوي زعلان على امي .. وامي ما تكلم ابوي .. ولا فيه احد يلعب معاي ... تعال العب عندي .. هني ارتسمت الدمعه في عيون فارس لانه عرف انه هوه السبب في ياللي يعيشه عبدالرقيب .. : خلاص .. انا بجيك العب معاك .. بس عطني ابوك .. وينه .. عبدالرقيب ..: ابوي في المجلس نايم .. صبر صبر .. فارس : لا .. عبدالرقيب .. خلاص .. ما ابي اكلمه .. بس عبدالرقيب ما انتبه لكلام فارس .. كل ياللي سواه انه ربع صوب ابوه في المجلس .. دخل عليه الباب ولا بابوه قايم يقراء قرأن ... عبدالرقيب .. : بابا ... بابا .. فالس يبيك .. هني ابتسم ابوعبدالرقيب ... وصكر القرأن على شان يكلم فارس ..: الو .. هلا فارس .. بس فارس التزم الصمت .. عرف ابو عبدالرقيب انه عبدالرقيب قال شي ..: فارس .. شنو فيك ما ترد ... الوه .. الوه ... التزم فارس الصمت وبدى يجهش بالبكي على التلفون .. ابو عبدالرقيب التفت على ولده .. وقاله .: انته شنو قلت لفارس !! عبدالرقيب ..: ما قلت له شي .. بس قلت له ما فيه احد يلعب معاي .. ابوي زعلان على امي وامي ما تلعب معاي .. هني عرف عبدالرقيب انه ولده قال لفارس كل شي .. وفارس عرف انه وهو السبب .. عبدالرقيب وعيونه في ولده ..: سير عند امك ... وانا بلعب معاك بعدين .. وطلع عبدالرقيب مكسور الخاطر .. وسار صوب امه .. ابوعبدالرقيب ..: افا يا فارس .. عسى ما شر .. ليش تبكي .. شنو ياللي مكدر خاطرك .. وبدى فارس يمسك نفسه .. : ماشي .. بس ضايق يا ابوعبدالرقيب .. وهني يبتسم ابو عبدالرقيب ..: فارس !! .. انته قول هذا الكلام لواحد ما يعرفك .. انته متلوم فيني لانك تحس انك سببت ليه مشاكل ..صح ولا انا غلطان .. هني بدى فارس تخنقه العبره .. ما عرف شنو يقول .. ابو عبدالرقيب .. وبصوت حنون ..: اسمعني يا ولدي .. انته ما لك دخل في مشاكلي الشخصيه .. وانته ما تعرف الحريم مثل ما انا اعرفهن .. وانته صدقني مالك اي دخل في اي من ياللي يستوي .. وبدى ابو عبدالرقيب يكلم فارس ويطيب خاطره ..في الوقت هذا كان عبدالرقيب مع امه في المطبخ ... فاطمه ..: عبود .. ابوك وين .. عبدالرقيب وهو يلعب تحت امه باغراض المطبخ ..: في المجلس ... فاطمه ..: قولي شنو يسوي .. عبدالرقيب ..وهو يهز كتوفه مثل ياللي ما يعرف شي ..: ما اعرف .. بس كان يكلم فالس .... هني اشتغلت نار الغيره في قلب فاطمه .. : شنو يكلم فارس !!! .. لااااااااااااا .. الموضوع زاد عن حده .. وتطلع فاطمه من المطبخ وعلى طول للمجلس ..في هاي اللحظه كان ابوعبدالرقيب يعطي فارس رقم العم عوض وعنوانه .. ولا بفاطمه امبطله عليهم الباب .. فاطمه وهيه تصرخ ..: ولا بعد تكلمه من وراي .. لا تقول الحين ما لك علاقه فيه .. والله اني بديت اتأكد من انه ولدك ... وهني يحاول ابوعبدالرقيب انه يتعذر لفارس .. : فارس .. بكلمك بعدين .. فارس وهو ماسك نفسه .. : لا ما يحتاج .. بكلمك بعد كمن يوم .. يالله في امان الله .. ويصكر فارس التلفون قبل لا يقول ابو عبدالرقيب اي كلمه له ..ويلتفت ابو عبدالرقيب لفاطمه ياللي كانت وقفه فوقه ... ابوعبدالرقيب ..: انتي لي متى بتمين ياهله .. تراه هذيلا الحريم ما وراهن غير المصايب .. يا فاطمه ذكري الله .. فاطمه وهيه زعلانه ..: لا والله .. وليش ما اصدقهن وانا اشوفك تكلم فارس قدامي ... والله اني اعرف انك بتكلمه ولا بتنقطع منه .. ابو عبدالرقيب ..وهو يستغيذ من الشيطان ..: فاطمه ..خافي الله .. الولد يتيم .. وماله احد في هاي الدنيا غيري .. يعني لو في يوم كان ولدج يتيم وانسان في هذا العالم فتح له قلبه بتزعلين وبتغارين من ولدج !!! كانت هذي الكلمه مثل السكين تطعن في قلب فاطمه ..وبدت تبكي ..: بعيد الشر عنك .. طلعت هذي الكلمه غصب عن فاطمه لانها تحب زوجها وكل هذا بس غيره زايده عن حدها .. بس ما عرفت نفسها غير انها تبكي وتربع لغرفتها .. عرف ابو عبدالرقيب انها الفرصه انه يراضي حرمته .. وسار وراها للغرفه ... دخل ابو عبدالرقيب ولا بفاطمه تبكي ..وبدى ابو عبدالرقيب يراضيها بعد ما جلس معاها على السرير ..: فاطمه ..ليش تبكين .. والله يا فاطمه ما تجمعني بفارس صله دم .. وانتي لا تصدقين فيني هذا الكلام .. تراني والله وقبل لا يكمل كلامه بكت فاطمه بعد ما رمت نفسها على الفراش ..... هني عرف ابو عبدالرقيب انه الاحسن انه يخلي حرمته بروحها شوي لين تهدى .. وطلع عنها بعد ما حب راسها وقالها انه بيرجع لها يوم تهدى من موجه البكي ياللي صابتها ... وقبل لا يطلع ما درى غير بفاطمه ماسكه ذراعه ..ويوم التفت صوبها ارتمت في حضنه مثل ياللي يطلب منه انها ما تركها بروحها .... وبدت تبكي في حضن زوجها بمراره .. كانت تحس بالوحده طول فتره زعلها منه ..كانت تبي تصدقه .. بس ام عباس ما خلتها في حالها .. كانت تزرع الشكوك فيها .. كانت تغرز ابر الشك والاكاذيب في قلب فاطمه ياللي من حبها لزوجها كانت تغار عليه اكثر من غيرتها على نفسها .... في الوقت ياللي كان ابو عبدالرقيب يراضي حرمته .. كان فارس يبكي بس بصمت وسكوت .. عرف انه سبب لابوعبدالرقيب مشاكل كفايه .. مشاكل تكفيه عن مليون مشكله كان عيشها ..فقرر انه يطلع على طول للعم عوض على شان يغير شويه جو .. ويتكلم عند انسان يعرف فارس على حقيقته مثل ابو عبدالرقيب ... طلع فارس لمنطقه زاخر بالعين ... كان بيت العم عوض جنب دوار الجمعيه "او دوار مسجد حمد بن سهيل الخييلي " ياللي في زاخر .. كانت مزرعه قديمه .. كان فيها نخيل وبشكل كثيف.. وكان يبين على انه المزرعه عاشت زمان طويل من طول نخيلها ياللي كانت مزرعه فيها .. |
|
|
|
|
28-09-2007, 05:47 AM
|
#66 |
|
-+[¨¤ نائبة الإدارة ¤¨]+-
|
رد: ღ° ☆∴ روايه صفحه الم ! ☆∴°ღ
وصل فارس وعرف من وصف ابو عبدالرقيب انه هذي هيه المزرعه المقصوده ... اقترب فارس منها ولا ببيت ابيض كان فيها ... دخل فارس لين وصل للحوش الداخلي .. صاح على اهل البيت .. فارس : هود يا اهل البيت .. هودكم ... ولا ببنت العم عوض ترد من ورا الباب ..: هداك .. يا حيالله .. قرب في المجلس .. فارس : تقرب منكم العافيه .. بس مش هذا بيت عوض *الفلاني * .. عفرا بنت عوض ...: نعم .. هذا بيته .. حياك .. قرب .. فارس : قربت منكم العافيه .. وينه ابوج !!! عفرا ومن ورا الباب تقوله ..: في الزرعه بتلاقيه .. بس انته قرب وانا بخلي الخدامه تزقره لك .. فارس : لا ما يحتاج .. انا بسيرله .. عفرا .. : على راحتك .. بس قرب بعد ما تخلص عنده.... تراه قهوتك زاهبه .. والله ما تسير لين تتعشى لليله عندنا ..... وانصدم فارس من كرامه هذيج البنت لانه حاله البيت كانت قديمه .. بس حتى ولو كانت فقيره .. كرامت اهلها من اعظم ساسه .. وهذا موب غريبه على عوض انه عنده بنت في كرامتها واخلاقها .. عرف فارس انه بنت عوض كريمه الاخلاق لانها كلمته من ورا الباب .. وخاصه انها غلضت صوتها وهيه تكلمه موب مثل بعض البنات ياللي تتلين في صوتها على شان تجذب الشباب .. فارس : يا علج باقيه .. ما قصرتي ... بس والله اني مستعجل .. وعندي اشغال .. عفرا .. : الشغل ولاحق عليه .. وانته دخلت بيتنا .. والله ما تطلع منه لين تاخذ كرامتك منه .. فارس وهو يبستم ..: يا علج باقيه .. استرخص منج .. بسير اسلم على ابوج عفرا .. : الله لا يرخصبك .. ويطلع فارس للعم عوض .. ولا بالعم وعوض كان يرتب جواني *خيش* التمر على شان يبيعها في السوق .. اول ما شاف فارس .. ارتسمت علامات الشوق في وجهه وهو يرحب في فارس .. عوض .. : مرحبا ارضاف .. عدد الشجر والغاف .. مرحبا بوليدي ..هلا والله بفارس .. فارس وهو يسلم على العم عوض ويحب راسه ..: الله يرحبك على فضله .. كيفك يا عمي .. انشاء الله تمام .. عوض .: الله يسلمك ... ويخليك .. كيفك انته .. وانشاء الله تمام .. فارس وهو من الفرحه موب مصدق انه دخل بيت عوض ..: والله يسرك الحال .. كيف حالك .. وشنو علوم المزرعه .. عوض ..: والله يسرك الحال .. نشتغل فيها .. عسى بس نوفي ديونها .. فارس : ديون !! .. اي ديون .. !! انته دوم تخبرني انه المزرعه مستور حالها .. عوض : يا وليدي الدنيا قلابه .. وانا رهنتها على شان ازوج ولدي مايد .. ومسكين مايد موب مقصر .. يحاول انه يعيني في تسديد ديونها .. بس موعد التسديد قرب .. وما فيه امل لتسديد غير انها تنسحب مني .. فارس وهو منصدم : تنسحب .. !! .. كيف يا ابوي .. انته كم صار لك وانته تدفع فيها !! .. عوض ..: يا وليدي زمان وانا ادفع فيها .. بس ما باليد حيله .. الحين ببيع اخر دفعات فيها .. وخلاص .. المزرعه وبتنسحب .... فارس : الله يعوضك باللي احسن عنها .. والمزارع مشاء الله كثيره .. وخيرها في غيرها .. عوض وهو يطالع في النخيل وقت قربت فيه الشمس تغيب ..: يا وليدي كل شي بيتعوض غير شيئين .. الروح .. وشي ورثته من ابوك .. وهذي المزرعه كانت لابوي الله يرحمه .. وورثها ليه .. وما اظن اني بتعوض فيها .. وهني نزل عوض ظهره على شان يلتقط سعفه نخيل صغيره من على الارض .. وبدى يناظر السعفه بنظره حزينه وبحسره وهو يقول : شكل المزرعه ما بدوم الا غير ياللي الله كتبها في حظه .. والله يهنيه فيها .. هني حزن فارس لانه ما كان عنده اي شي يقدر سويه .. كان نفسه تكون عنده فلوس على شان يعطيها للعم عوض يوفي فيها ديونه .. بس ما قدر يسوي اي شي غير انه يبتسم ويهدي من بال العم عوض .... فارس وهو يبستم ..: انشاء الله المزرعه راح توفي كل ديونها .. بس تبا شويه وقت .. عوض : والله بتوفيه لو عطوني سنه وحده .. بس خلاص .. ما بقي شي .. باقي ثلاث شهور لتسليم المبلغ للبنك ولا خلاص .. بتنسحب المزرعه وبيروحن الفلوس ياللي دفعناهن فيها ... فارس : بس ثلاث شهور .. والله موب كافيه .. كيف انته وقعت عقد مثل جيه يا عمي ... عوض .: يا وليدي انا ما اعرف اقرا واكتب مثلكم .. كان كل همي اني افرح بولدي .. ما فكرت باللي عقبها ...وهو مش مقصر .. يدفع ياللي يقدر عليه .... فارس : عمي .. حاولت تتكلم عند مدير البنك .. !! .. يمكن يساعدك .. عوض .. وهو يمشي ويأشر لفارس انه يمشي جنبه ..: يا وليدي .. هذي يعتبرونها تجاره .. وانا ما قصرت في شي .. حاولت اتسلف من بعض الجماعه .. بس يا وليدي تعرف انه العالم كلها مديونه للمزارع .. ولا فيه انسان سالم في الدوله من الدين .. ويا سعد من افتك من دينه .. وانا كلمت المدير بعدها بس رفض .. وانا ما برد عليه .. يكفيني مره كلمته .. فارس ..: والله يا عمي شنو اقولك.. ماشي بيدي .. ولاا تراني والله لا ساعدك ... عوض ..: ادري يا وليدي .. وانته وجودك معاي من الدنيا كلها .. والله شاهد عليه يوم جيتني اني فرحت بك مثل ما افرح بجيت مايد ليه .. فارس : ادري يا عمي .. والله يخليك لنا .. ويخليك لعيالك .. وانشاء الله راح اشوفلك طريقه نقدر نطلع المزرعه من هذي المشكله .. عوض ..: يا فارس لا تتعب نفسك .. المدير نفسه طمعان فيها .. يبيها لنفسه .. وانا ادري فيه .. من زمان وهو يلمح ليه انه بيشتريها يوم اول ما رهنتها في بنكه.. فارس : ما عليك منه .. انابشوفلك طريقه تطلع منها .. بس ما اوعدك .. عوض ....: يا وليدي ما به قصورن فيك .. بس يا وليدي وش ياللي بيدك .. انته توك صغير .. ولا تعرف ناس مثل ما اعرفهم انا.. ولا فيهم واحد قدر يساعدني ... والله يستر .. فارس وهو يبتسم ..: لا ما عليك .. انا اعرف شخص راح يقلب لك راعي البنك ويخليه بروحه يجيك للبيت ..هاهاها *كان في بال فارس عمه هلال ياللي ما يعرفه ... كان امله الوحيد في انه يقلب موازين البنك ويخليه يزلزلها عليهم ..* عوض : كيف يا وليدي .. ومنو هذا الشخص .. انا اعرفه !؟ فارس ..: لا ما عليك .. انا بشوف الرجال وبتصرف معاه ... هني ارتسم امل في عيون عوض الكبير في السن .. وهو يحس انه مصيبته في مزرعته راح تهون ...طلع فارس ويا عوض لبيته وتعشا عندهم بعد ما سوت عفرا لهم العشا ... وطلع فارس للسكن بعد ما سلم على عوض واخذ كل ارقامه ... وصل فارس للسكن ولا بخليفه ومعاه عادل ومحمد وبعض الشباب .. في البيت ... سلم عليهم فارس وقاموا الشباب يسلمون على فارس.. جلسوا مع بعض على سوالف ورمسه وتقصير دوب ..... وتغيرت المواضيع بين مواضيع مختلفه لين دخلوا في موضوع الحب والشعر .... كان خليفه يحاول انه يغير الموضوع على شان خاطر فارس ما تجيه حاله الاكتئاب ... بس محمد كان من النوع ياللي يحب الشعر .. ومتعلق فيه... فبدى يتكلم عن الشعر ويتطرفون في مواضيع كثيره .. لين دخل عادل عرض و بدى يخبر عن العلاقات ياللي يسويها في النت ويضحك على البنات .. عادل وهو فخور باللي يسويه ..: والله مره شيت عند وحده صعبه .. مسكينه كانت ما تحب تشيت عند الشباب بس استدرجتها لين كلمتني ومناك رميت شباكي عليها ..هاهاها .. اما الحين والله بديت اضحك عليها واتصل فيها ومسكينه تحسب اني احبها ..هاهاها.. ما تدري اني العب بس عليها .. محمد ..وهو مش عاجبه كلام عادل ..: حرام عليك يا اخي .. والله انه كل ياللي تسويه في البنت بيكون على كتفك يوم القيامه .. والله موب جيه الحب .. يا اخي الحب مشاعر صادقه وعاطفه عزيزه عن ياللي تسونه في عالم النت من حب وخرابيط .. الحب يا عادل موب كلام حلو ينقال للبنت .. الحب خوفك على بنت وتمنيك لها بالسعاده سواء كانت عندك ولا عند غيرك ..... والشباب كلهم وافقوا محمد في الكلام ضد ياللي يسويه عادل ....ما عدا فارس ياللي ما تكلم وكان سرحان اكثر الوقت .... عادل وهو يتذمر لانه ما فيه احد وقف في صفه ..: فارس انته شنو رايك .. انته في صف منو فينا .. يا اخي البنت لو ما بترمسك رمست غيرك .. وانا الصراحه ابدى فيها ..صح ولا انا غلطان ...!!!؟ فارس : والله انته غلطان يا اخ عادل .. البنت كلها احاسيس ..مشاعر .. البنت يا عادل تعتبر جوهره لو ما صنتها انته يا المسلم من بيصونها .. على الاقل تطلع عليها كاخت .. موب كدميه الليله تلعب عليها وبكره تتركها في جروحها تنزف بسبب كلامك وفعايلك فيها .. وهني صفق محمد وهو يضحك ..: هاهاها.. .عاش فارس ... والله انه كلامك درر يا اخي .. لا يكون بعد انته الثاني تحب من ورانا .. من كلامك امبين انك تحب .. كلامك فيه كثير من الاحاسيس والخوف على بنات الناس... فارس ..وهو يتذكر ذيج العيون الذبوحيه ولا شعوريا قال كلامه .... : يا محمد ما من غضن في هاي الدنيا ما قد هزه الهوى .. وانا انسان من احاسيس ومشاعر ...*وهني تذكر انه مش بورحه .. وانه طلع عما في خاطره غصب عنه .. وحاول انه يتراجع ويغيرالموضوع .. بس الحين لازم يغير الموضوع لموضوع ثاني فبدى يشكك علىانه ما يحب * ......... وان حبيت في يوم ما بكون سويت جريمه .. والحب ما له بد ما يهز قلوب الناس ... محمد ... : الله عليك الله .. والله انك روعه يا اخي .. وين كنت مني يوم انا كنت عندك في السكن ..هاهاها.. شكلك شاعر ... قول قول ياللي عندك .. فارس وهو مستحي ..: اي شاعر اي خرابيط .. يا اخي خلنا من الشعر ..*ولان فارس يعرف انه محمد ما راح يغير الموضوع قام وسأله نفس السؤال ياللي سأله محمد اياه ..* .. وانته يا محمد ما تحب احد .. قول .. وكان عندك شي من الشعر ..عد علينا .. ترانا نفسنا نسمع لك شي .... |
|
|
|
|
28-09-2007, 05:47 AM
|
#67 |
|
-+[¨¤ نائبة الإدارة ¤¨]+-
|
رد: ღ° ☆∴ روايه صفحه الم ! ☆∴°ღ
محمد .. : والله انته قلتها بنفسك يا اخوي .. ما من غصن في هاي الدنيا ولا هزه الهوى .. وانا هزني وكسر غصوني ..هاهاها.... خليفه ..: بل .. حشى .. موب حب استوى .. نشره اخبار بينك وبين فارس عن الغصون والرياح .. اقول ما مر عليكم اعصار الحب في يوم ..هاهاهاها وينفجر الكل من الضحك .... وخليفه عامل فيها انه مديرالنشره الجويه .... ويرجع محمد لموضوع القصيد ..: هاه فارس .. قول ياللي في خاطرك ... لا يكون مخبي علينا شي من هذا الكلام الزين .. فارس .. : والله يا محمد انا موب شاعر مثل ما تعرف .. وكان بتعد عليه شي ..* فارس وهو عارف انه محمد عنيد ولا راح يخليه بحاله ... فقاله * ... عد وانا اوعدك اني اعد عليك شي توني بس رتبت ابياته .. محمد .. : خلاص .. انا بعد والشباب بيحكمون .. وبنشوف من ياللي هزه الحب اكثر من الثاني .. فارس وهو يقول في خطره ليتني غيرت الموضوع من اول.. ليش تكلمت من اولها.. بس خلاص .. شكل محمد ما راح يخلينا بحالنا لين يقلب المواجع .... ويرجع فارس يقول لمحمد ....: اتفقنا .. وانته ابدى الاول .. محمد .. : حاظر .. واقول في قصيدتي ... عز القصيد وزاعلتني حروفه *** من يوم غاب اللي قصيدي مهاويه غابت به الدينا وخلت طيوفه *** عزى لمن مثلي زمانه يعاديه عقب الملاقي بس بالقلب اشوفه *** وعقب المناجي بس بالفكر اناجيه كلامي وشوفي لغيره حسوفه *** من غيره يخاوي غريبي واخاويه يا لوعه المشتاق تصفق كفوفه *** لين التفت ما شاف بالدار غاليه كن العيون بكل شين محذوفه *** والقلب كن جموع الايام ترميه تسابقني من زماني سيوفه *** تجرح مرادي في حياتي وترميه يا عونه الرحمن وين النكوفه *** لين انتحى الخفاق وش عاد يثنيه ما رحت ادور عند خلي مروفه *** ما يرحم الا الله فلا شك مغليه (7) |
|
|
|
|
28-09-2007, 05:48 AM
|
#68 |
|
-+[¨¤ نائبة الإدارة ¤¨]+-
|
رد: ღ° ☆∴ روايه صفحه الم ! ☆∴°ღ
وسلمتم .. وهني يصفق الشباب لانه كلام محمد طالع من خافي قلبه .. حتى طريقه عد القصيد كانت في غايه الروعه ... محمد وهو يناظر في فارس ويقوله بثقه ..: شفت اني متلعوز في حبي .. يالله طلع ياللي عندك يا فارس .. اريد اسمع قصيدتك ياللي كتبتها في محبوبتك .. فارس وهو يبي يغير الموضوع : مشاء الله عليك يا بو جسيم .. انته شاعر .. انا بس مبتدي ... ما عندي القدره على قصيدك .. محمد ..: خل عنك .. وانا مبتدي مثلك .. وكل هذي محاولات ...وش ياللي عجبك في قصيدتي .. !!! فارس ..: والله كلها ما فيها حيله .. ولا عليها قصور .. وانته مشاء الله قصيدتك روعه .. ولا عليها اي كلام .. بس فيه بيتين من سمعتهم اذبحني ... محمد وهو فرحان ..: شنو هن .. قولهن ليه كانك تتذكرهن.. فارس .. : ياللي قلت فيهن ... عقب الملاقي بس بالقلب اشوفه *** وعقب المناجي بس بالفكر اناجيه يا لوعه المشتاق تصفق كفوفه *** لين التفت ما شاف بالدار غاليه يا عونه الرحمن وين النكوفه *** لين انتحى الخفاق وش عاد يثنيه محمد وهو مستغرب : مشاء الله عليك يا فارس .. حفظت القصيده من اول ما عديتها عليك ... بالله عليك قول قصيدتك .. والله انك شوقتني .. ابا اسمعها منك .. هني خليفه حاول يدخل لانه بدت نظرات الحزن ترتسم في عيون فارس ....: فارس .. اباك في سالفه .. محمد وهو يلتفت في خليفه ..: بعدين بعدين .. ابا اسمع القصيده .. والله انه شكل فارس شاعر ومن ورانا بعد ... فارس وهو فاهم على خليفه : لا معليه ..الموضوع ياللي تباني فيه عارفنه .. وبعدين بكلمك فيه . *ويلتفت فارس في محمد وعادل ..بس الرساله كانت لعادل اكثر منها لمحمد * قلت فيها الله يسلمكم |
|
|
|
|
28-09-2007, 05:49 AM
|
#69 |
|
-+[¨¤ نائبة الإدارة ¤¨]+-
|
رد: ღ° ☆∴ روايه صفحه الم ! ☆∴°ღ
صار الحب كلمه تلعبها القلوب *** لتحقيق اطماع العقل وطلابيه في طريق العشق اتشوف العجوب *** شبابٍ روسهم منه صرات شايبه جروحه ما تعالجها الحبوب *** ولا ينفع العشب فيه ولا طبايبه له ضحايا من كل الشعوب *** دفعوا غاليا قيمه ضرايبه واليوم يسألوني كان لي محبوب *** وشمسي مشرقه بارضه ولا غايبه وان كان لي في الهوا دروب *** وجاوبهم ما ليه قوه على درايبه ما دروا بالروح لبها مسلوب *** والقلب يشتكي بعد حبايبه في داخلي وقد نار وحروب *** و وسط قلبي قلبه وزع كتايبه صار لي هو كل مطلوب *** واحروف اسمه بالروح ذايبه لامن ضوى الليل امسيت مشغوب *** خايفٍ من امال واحلام خايبه خايف يجبرني القدر واكون مغصوب *** على بعده وحالي يتعب بسبايبه خلي في الخيار دوم محسوب *** كاسبٍ رضى الوالدين وقرايبه في حياته ما خاوى اللعوب *** صاينٍ نفسه عن اللعب وعوايبه وعن طريق اهواه والله ما توب *** ولو طريقي فيه تكثر عقايبه (8) |
|
|
|
|
28-09-2007, 05:50 AM
|
#70 |
|
-+[¨¤ نائبة الإدارة ¤¨]+-
|
رد: ღ° ☆∴ روايه صفحه الم ! ☆∴°ღ
هني يوقف محمد وهو مندهش .. وقف وهو يسأل فارس ..: فارس عليك بالله انته قايل هذي الايبات...!!!؟؟ فارس وهو ترتسم فيه علامت الخجل.. : وليش لا يا محمد .. قلت لك انه ما من غصن في الدنيا ولا هزه الهوى .. محمد .. : انته ما هزك يا فارس .. انته شلك من جذورك يا اخوي .. الله يعينك عليه من حب .. شكلك بتروح فيها .. وهني يدخل خليفه عرض ..: اقول يا جماعه .. ليش ما تغيرون الموضوع .. انتم الثنينه بس ياللي تحبون ..نحن ما نحب .. فياليت تراعون مشاعرنا ياللي ما نحب .. والله ياللي يسمعكم بيقول انا عديمين الاحاسيس .. هاهاهاها محمد ..: هاهاها.. لا والله حشى ما كان قصدي .. بس .. خليفه ..: لا بس ولا هم يحزنون .. محمد وهو مصر على انه يسمع قصيده ثانيه لفارس ..: عليك بالله يا فارس ..قولي وصفها في قصيده .. ارجوك .. لا تقولي ما قد كتبت وصفها في قصيده ... اكيد كاتب .. فارس ..: محمد !! .. انته من صدقك الحين تتكلم.. اقولك انا ما اقصد ..!! محمد ...: خل عنك هذا الكلام .. والله انك تقصد .. مشاء الله عليك .. حلفتك بالله عد عليه قصيده انته قايلها فيها ... فارس وهو مسكين متقفط ..: يا محمد اقولك انا موب شارع ... وهني ينفجر خليفه من الضحك لانه اصلا كان وده يغير الموضوع ولقي سبب على شان يغير الموضوع..:هاهاهاها.... شنو فيك خبصت .. اشوفك تقول شارع بدل لا تقول شاعر .. هاهاها.. وينفجر الكل من الضحك .. بس محمد اصر على كلامه ياللي ما تغير ... محمد ... وبأصرار ..: فارس كان ليه معزه عندك بتعد قصيده ثانيه .... فارس .. : محمد ارجوك غير الموضوع .. محمد ..: لا والله ... دخليك .. قولي قصيده وحده وخلاص ... فارس ..: شوف هذي اخر قصيده اعدها عليك ..... محمد وبلهفه ..: انا موافق .. ولا بحشرك بالمره .. بس دخيلك قول ياللي عندك .. فارس .. : تمام .. هذي القصيده فيها ......... وتوصفلك بعض ياللي شفته .. محمد .. : وش يقول الشاعر فيها .. فارس ... وهو عيونه لبرا الغرفه ... : الله خلقها روعه للمخاليق *** وكلن على الحسن الخيالي حسدها في وجهها نور جذاب كل عشيق *** كالشمس مجنون الخرافه عبدها شمس لها مطلع الشمس تشريق *** تصير في جنيا الغواني وحدها لا جربت همٍ ولا جربت ضيق *** وان مرت النسمه تجرح جسدها وجمالها ماهوب زيف وتلفيق *** استغفر الله كن محد ولدها ومن تحتها ناسٍ تبي بله الريق *** والكل جاها من بعيد وقصدها فجرٍ يهل بثغرها واخر يويق *** وليله يمت بحسرته من رقدها تملك سحر كل العذارى بتشويق *** وان سلهمه بالعين ماتوا بعهدها (9) |
|
|
|
 |
| مواقع النشر (المفضلة) |
| الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| ღ° ☆∴ بمناسبة اقتراب شهر رمضان ... جميع انواع الشوربات ☆∴°ღ | مــ الحزن ــلاك | مجلس حلا للطبخ العالمي | 11 | 06-10-2007 12:38 AM |
| ღ° ☆∴ (( هديتــي لعشــاقـ المنتخــب السعـــودي))☆∴°ღ | مــ الحزن ــلاك | مجلس حلا للموبايل | 10 | 06-10-2007 12:26 AM |
| ღ° ☆∴ (( السكري الخفي - النسبة أكبر بين الشباب منها لدى البنات ))☆∴°ღ | مــ الحزن ــلاك | مجلس حلا للطب والصحة | 6 | 30-09-2007 03:45 AM |
| ღ° ☆∴ (( هامـ لمستخدمي بطاقاتـ الـ dsl))☆∴°ღ | مــ الحزن ــلاك | مجلس حلا للكمبيوتر والبرامج | 14 | 31-07-2007 02:25 PM |
العرض العادي
