|
|
|
|
02-10-2007, 10:23 PM
|
#161 |
|
-+[¨¤ نائبة الإدارة ¤¨]+-  
|
رد: ღ° ☆∴ روايه صفحه الم ! ☆∴°ღ
اخذوا خليفه وهو في حاله جدا خطيره صوب العمليات .. وميثا ما مسكت عمرها ومطر ماسكها عن لا توقف الممرضين وتأخرهم انهم يلحقون على خليفه ياللي بدوا في صراع مع الوقت على شان ينقذونه .. في هاي اللحظه بدت ميثا تتكي على جدار المستشفى .. بدت تتكي وهيه تبكي .. بدت تتكي وتحاول تمسك صوتها بعد ما انطبع على كله طوبه في القسم حزن ورنين الالم ياللي حصل لها ... بدت ميثا تنزل شوي شوي وهيه متكيه على الجدار في اللحظه ياللي ما قدر مطر يمسكها لانه بروحه كان التعب ماخذ من قلبه مأخذ وهو يشوف ولده ورجال البيت من بعده بهذيج الحاله ... بدت شوق تشوف ساره و روضه جسد واحد من حضنهن لبعض على مصيبتهن .. هني طلعت شوق من الغرفه وهيه تتمايل من المصيبه ياللي حلت فيها .. تمايلت وهيه تمسك نفسها محاوله انها توقف جنب ميثا في هذي المصيبه .. وفقت ومشت على شان تطلع من الغرفه على شان تكون مع ميثا ياللي سنين وهيه واقفه معاها على الحلوه والمره .. وقفت معاها ولا تركتها .. هني اول ما طلعت شوق تقربت من ميثا تبي تكلمها ...تقربت منها تبي تواسيها .. بس اول ما تلامس جسدها بجسد ميثا رمت ميثا بيد شوق بعيد عن جسدها مثل ياللي يعاتب عليها انه الحادث بسببهم .. هني تمنت شوق انه رمح انغرس في قلبها ولا شافت عيون ميثا الحزينه تتمنظر فيها بهاذيك النظرات ياللي كانت احد من السيف في قلبها ... وهني بدت شوق تبكي ومطر يواسي شوق لانه ميثا لين الحين منصدمه بالحادث .. مطر ..وهو يحاول يصلح ياللي طلع من ميثا ... وهو عيونه صوب شوق .: شوق .. ما عليج .. تراه شي الله كتبه علينا وعليكم .. وانتي لا تاخذين خاطرج من ميثا .. تراها لين الحين منصدمه .. ما تقصد شي تراه ... هني شوق تبي تريح مطر لرغم انها لين الحين تنزف من نظره ميثا ياللي كانت تلومها وتلوم سعيد في ياللي استوى في خليفه ...: لا يا مطر ... انا ما الومها .. واللوم يلحقنا .. ومنكم العذر والسموحه يا ابو خليفه .. مطر وهو عيونه حزينه على حاله شوق ياللي تغير لونها من اللوم وصارت نظراتها في التراب ...: لا والله .. ما فيه امبينا اعذار يا بنت سعيد .. شي الله كتبه ونحن راضين فيه .. كان الله اعطانا اياه له الحمد والشكر على نعمته .. وكان اخذه هذي امانه الله امنا عليها واخذها .. وما باليد حيله ... نصبر والله كريم يا بنت سعيد .... هني لمحت شوق سعيد توه وصلهم بعد ما راغوه من غرفه العمليات .. تقرب سعيد من امه وهو نفسه انه الارض تنشق وتبلعه عن لا يشوف منظر هذيج العايله بهذا المنظر ياللي تسبب به .. تقرب واول ما تلاقت عيون سعيد بعيون امه شوق اختلفت عيونها من حزن ولوم لنظره كلها مكسوره ومتحطمه .. تقرب سعيد ونفسه يشوف العزا من امه .. العزا من انسانه طول عمره يتمنا انه تضمه لحظنها في ظروف مثل هذي .... تقرب واول ما تقرب منها.ولا وسط دهشه الجميع بطراق في وجه سعيد ياللي غادي راسه ضمادات من فوق .. ما دروا غير باليد الحنونه تقسى على ضناها وهو ما كان قاصد باللي حصل .. ما درا غير بسكين تنغرس في خدوده من اقرب الناس له وهو محتاجها اكثر من اي وقت مضى على شان تخفف عما في خاطره .... هني حط سعيد يده على خده وهو مش مصدق انه امه بدل لا تضمه لاحضانها تضربه .. هل هذا لوم ولا عتاب .. هل هذا خوفٍ عليه على ياللي جراله ولا بدايه كره له على ياللي استوى من تحت يدينه ....مسك سعيد على خدوده ولا بدمع تخونه قدام امه ياللي فجاه من شافت الدمعه بكت وهيه تلومه ... شوق وهيه تبكي ..: ليش سويت جيه يا سعيد ليش .. انته كيف تسوي فيني وفي مطر واهله جيه .. شنو ذنبهم !!... انته ليش وعدتني انك ما راح تدخل الحزن لقلبي وانته بفعايلك طعنتني في الظهر .. سعيد ليش سويت فيني جيه .. ليش .. ليش .. ليش !!!!! |
|
02-10-2007, 10:24 PM
|
#162 |
|
-+[¨¤ نائبة الإدارة ¤¨]+-
|
رد: ღ° ☆∴ روايه صفحه الم ! ☆∴°ღ
مطر وهو يحاول انه يخفف موجه غضب شوق : يا شوق ذكري الله .. سعيد ما قصدها .. ومش بيده ياللي استوى فيهم ....شي الله كتبه لهم .. خافي الله في الولد .. تراه ياللي فيه مكفيه .. هني ما كانت شوق تسمع كلام مطر لانه صدمتها في خليفه وياللي شافته من لوم لاهله اقوى من انها تسمع اي شي .. هني كانت دموع سعيد تهل وهو خدوده تبللت من الدمع .. حضر سعيد كل شي ...الحادث .. شاف خليفه من اول ما استوى الحادث لين بدى يختلف شكله وهو ينزف ويتكلم واخر شي حظر دخوله العمليه ياللي ما يندرى فيها ياما يطلع منها حي ويحيي الارواح ياللي تحبه ولا جثه واهله يتمون .. ويعشون حياتهم يعاشرون الدمع لذكراه .. هني تذكر وصيه خليفه في ساره ...تذكر كلام خليفه له في ساره .. تذكر اخل كلمه قالها خليفه له .. انه ساره تحبه .... التفت سعيد صوب ساره ياللي كانت تبكي حال اخوها وحال الانسان ياللي تحبه يوم شكله صاير بهاي الصوره .. اول ما تلاقت عيونها في عيونه اعطته نظره كنها عتاب له .. هني تحطم قلب سعيد في اخر امل له انه احد بيوقف في صفه غير مطرياللي كان يجامل ويكابر على الحاله ياللي شافها .. اهني حس سعيد بتغير نظرات ساره صوبه .. عرف لحظتها سر هذيج الابتسامات .. سر اشراق وجهها يوم تشوفه .. تذكر كلمات خليفه يوم يقوله انها تحبه .. تذكر صدمه ساره يوم رد الساعه لها ..عرف اسرار هذيج النظرات ياللي كان يحسب انها بس تفرح لوجوده معاهم لانه ولد شوق .. بس عرف الحين انها نظرات حب موب نظرات اعجاب او فرح لوجوده .. بدى يسأل نفسه وين كان من هذا كله .. وين كان من كل هذا قبل لا يخبره خليفه ياللي في خاطره .. هني انتبه سعيد لكلام شوق ياللي كانت تكلمه ... وهيه تبكي .. شوق وهي تبكي ..: اكلمك انا .. ليش تناظر في روضه وساره .. واول ما التفت سعيد صوبها ولا بطراق ثاني على خده ... هني هلت دموعه غصب ..هلت دموعه في اللحظه ياللي بدى فيها سعيد يتلقى صفعات متكرره من امه .. بدى سعيد يتلقاها ولا قال ولا كلمه ....كل ياللي سواه انه وقف مثل الجبل يتلقى الصواعق .. بدت شوق تصفعه وهي تبكي وفي هاي اللحظه ما درا سعيد غير بيد حنونه من بعيد توقف شوق وتوقف بجنبه .. التفتت شوق ولا بروضه ماسكتها بعد ما تأثر الكل بموقف سعيد ياللي ما نطق ولا بكلمه وحده .. وقفتها وعيون روضه تهل دموعها على مصابها وعلى موقف سعيد ياللي كان ثابت ولا حاول انه يدافع عن نفسه ولا بكلمه واحده .. هني التفتت شوق في روضه ياللي ماسكتها ..: خالتي .. ارجوج خليني اربيه .. خليني ابرد حرتي فيه ... روضه وهيه بدت نظراتها تقسى على شوق : سعيد تربيته ما فيه بعدها .. ولو هو مش مرباي يا شوق كان قال شي .. ولا كان مسكج ما تضربينه .. هني انصدمت شوق بكلام روضه ياللي كان مثل الماي ياللي يبرد على قلبها من لومها .. بس اول ما التفتت على سعيد ولا خدوده صارت حمر من الضرب ... وعيونه حمر من الحزن وموسخه خدوده شلالات من الدموع .. اهني بدى ضمير شوق يقوم بعد ما غطاه منظر خليفه .. بدى يقوم وهو يسألها .. بدى ضميرها يسألها وهو يقولها لها .. ما كفاه لومه في خويه .. ما كفاه انه حضر كل منظر ابشع عن الثاني .. ما كفاه شوفه اهل خليفه يبكون وهو سبب كل شي .. ما كفاه انه الكل صار ضده حتى انا !!! .. هني بدت شوق تلتفت في ميثا ياللي كانت جالسه بس سانده جسدها على الجدار وهيه مرتكزه على اصابيع رجولها وفي نفس الوقت تضرب براسها في الجدار بضربات خفيفه من صدمتها في ولدها وعيونها فيهم ..كانت شوق تقرى في عيون ميثا كلام يجرح .. كانت نظراتها مثل ياللي يقول انهم قتلوا ولدها .. انهم هم السبب في ياللي استوى في خليفه .. انهم السبب في ياللي جرى .. هني حست شوق انه نظرات ميثا كانت تناظرهم مثل ياللي يناظر في قاتل ولده وهو جالس جنبه ..كيف ينتقم منه ..كيف ياخذ حقه ويبرد قلبه فيه .. كانت شوق كل ما تلاقت عيونها في عيون ميثا تنزل شوق عيونها وهيه محرجه من ياللي استوى .... هني التفتت شوق في ولدها ياللي بدت ونه في داخله تطلع .. طلعت الونه بعد ما انقلب الكل ضده .. وبكل هدوء انسحب سعيد من تجمعهم .. انسحب وطلع للطابع العلوي على شان يحضر عمليه خليفه ... طلع وجلس جنب وحده من نوافذ المستشفى وهو عيونه برا لمدينه العين .. جلس وهو حاط يده اليمين على رجوله ياللي ضامهم لبعض مثل ياللي بردان من عواصف البرد ياللي عصفت عليه من اقرب الناس له ولا رحمت حاله .... وفي ابوظبي وفي الوقت هذا وخصوصا في شركه ابو عبدالله كان عبدالله وابوه في المكتب ومعاهم سلوم ... سلوم ..وهيه تروح لعبدالله ...: عبدالله ...عبدالله .. ابا حلاوه ..ابا حلاوه ... هلال وهو يضحك ..: هاهاها. .ما قلت لك انها بتحشرك !! .. قم الحين صرفها .. عبدالله .. وهو عيونه في الملفات ..: بعدين سلومي بعدين .. سيري الحين عند هند ...وخبريها تبين حلاوه .. سلوم وهيه تمسك بطرف ثوبها وبأصرار ..: لا .. ما ابا حند .. اباك انته .. ابا حلاوه .. هلال ..وهو يضحك ..: هاهاها.. لا وعنيده بعد!!!! .. طالعه على منو ما ادري .. هني لمح عبدالله انه ابوه يوجه النظر عليه .. وانه يقصده في الكلام .. هني ابتسم عبدالله وهو يقول : اي والله .. ابا اعرف على منو طالعه!! .. على منو ما ادري !! هلال وبعيونه ياللي تنكر رد عبدالله عليه..: لا والله اونك ما تدري !! .. لا يا المتهرب .. طالعه عليك ..هاهاها.. شوفها ..كلها حركاتك وانته صغير ... عبدالله ..وهو يضحك ..: حرام عليكم ..ظلمتوني .. انا كنت هادي وحبوب يوم كنت صغير .. هلال .. : لا والله ..هادي وحبوب .. لا بسم الله عليك ..امبين .. تتذكر هذاك اليوم يوم شفت لعبه في يد واحد من العيال شنو سويت !!! عبدالله وهو يتهرب ..: لا .. ما اتذكر .. اكيد قلت لك ابا لعبه .. صح !! .. وهني تدخل هند ...وفي يدها بعض الاوراق .. |
|
02-10-2007, 10:25 PM
|
#163 |
|
-+[¨¤ نائبة الإدارة ¤¨]+-
|
رد: ღ° ☆∴ روايه صفحه الم ! ☆∴°ღ
هني عبدالله بدى يضحك وهو يقول .. : ما اتذكر .. ذكرني.. اخاف ازل واقوم مصيبه من المصايب ياللي سويتها !!هاهاهاها ووصلت هند لمكتب ابوها وفي يدها بعض الاوراق ... وصلت وهيه تبتسم ...وبدت تسمع كلام ابوها واخوها وهيه تمشي بهدوء لانه ولا واحد فيهم انتبه لتواجدها في المكتب ... هلال ..وهو يضحك ..: هاهاها.. لا .. بقولك .. وبذكرك بكل ياللي سويته ..لانه الضارب ينسى والمضروب ما ينسى ..هاهاها عبدالله ..وهو فاك عيونه : بل بل بل .. لهاي الدرجه .. وصله للضارب والمضروب !! .. لااااااااااااااااا ... موب لهاي الدرجه .. هلال ... وهو يتذكر السالفه ..: لا .. وصلت ..هاهاها.. ما تتذكر شنو سويت .!! .. عبدالله ..وهو يدخل رقبته في جسده مثل السلحفاه ..وفج طقم الاسنان مثل ياللي ينتظر يتلقى الضربه ..: اتذكر .... ليش ما اتذكر .. لا يكون المره ياللي يوم قلت لك ابا لعبه وانت ما طعت لانه عندك اجتماع وسرت انا وكسرت ليتات سيارتك القداميه ورميت الحصي *الحجاره * على مرايات السياره !! .. وهني انفجر هلال يضحك وتضحك هند وراهم كلهم ... تفاجئ الكل من وجود هند ومعاهم رغم انهم ما حسوا بالباب تبطل وكان فيه احد دخل .. عبدالله وهو متفاجئ ..: بسم الله الرحمن الرحيم .. شنو دخل هاي الجنيه هني !! هند .. وهيه تضحك ..: انا جنيه يا المارد .. !! .. ما تخاف الله .. تسوي كل هاي البلاوي وانا ما ادري شي عنها .. هاهاها.. *وهني تلتفت هند في ابوها هلال * .. ابوي .. شنو بعد سوى عبدالله .. ابا اسمع سوالفه وهو صغير .. وهني يقاطع عبدالله هند وهو نظره في ابوه .. : لا يا ابوي .. دخيلك .. لا تقولها .. والله لا تفضحني .. عن الفضايح ولا تراني بخسر سمعتي في العايله .... هلال وهو يضحك .. : هاهاها.. عيل بتودي سلوم تشتري حلاوى ولا لا !! .. عبدالله وهو اونه ينتفض بتمثيل ..: على امرك .. على امرك .. بس ارجوك عن الفضايح .. هند ... : لا والله .. وليش ما اسمع .. والله لا افضحك ..هاهاهاها وهني يلتفت عبدالله في اخته هند وهو يبتسم بنظرات شيطانيه ..: لا والله .. ما كني متذكر شنو مسويته وشنو سوالفج وانتي صغيره !! .. هند وهيه تفج عيونها ..: لا والله .. اونك تعرف شنو مسويه بعد ..؟!! عبدالله وهو يبتسم ..: وليش ما اعرف .. مشاء الله والفضايحج تستمع في ابوظبي كلها .. نسيتي ولا لا !! ... هلال .. وهو يضحك ويريد يسمع سوالف عياله ..: هاهاهاها.....لا والله .. شنو مسويه بعد هذي !! .. هند طول عمرها هاديه وحبوبه .. هند وهيه تمثل اونها متكبره ..: شفت .. شفت .. حتى ابوي شهد لي .. شنوتبي بعد ... انا ما عندي فضايح .. عبدالله ..وهو يضحك ..: لا عندج ويا كثرها .. نسيتي ولا اذكرج ... هند وهيه تتحدى ...: قول ياللي في بالك .. الحمدلله .. انا ما عندي شي من السوالف ... وطول عمري هاديه .. وابوي شهد بعد بكل هذا .. هني بتسم عبدالله وهو عيونه فيها ...: هنود .. تراني بتكلم .. هند ..: وانا اتحداك .. قول ولا تسكت لين باكر .. عبدالله .. : هاهاها..نسيتي شنو سيتي بالقطوه الصغيره ياللي كانت عندنا .... !! هني هند احمر وجهها وهيه تربع صوب عبدالله على شان تسكته بس عبدالله رمى بالاوراق ويلس يدور على الطاوله وهند وراه تبي تسكته وهلال يضحك ... وعبدالله يكمل كلامه وهو يقول...: لا .. خليني اكمل .. هاهاها.. خليني اكمل .... ولا بسكت لين باكر ..هاهاها |
|
02-10-2007, 10:25 PM
|
#164 |
|
-+[¨¤ نائبة الإدارة ¤¨]+-
|
رد: ღ° ☆∴ روايه صفحه الم ! ☆∴°ღ
هند وهيه يحمر وجهها وهي تصيح عليه ..: عبود لو كملت ما راح يحصلك طيب .. اسكت احسلك .. عبدالله .. وهو يضحك ..: وين التحدي .. وين التحدي ... هاهاها.. اقول ... بخبر ابوي .. بخبر منى .. هاهاها.. بخبر كل احد في الشركه عن قصه القطوه ياللي رميتها في الغساله وهيه حيه ..هاهاها.. اونج تعلمينها السباحه ...هاهاها.. سفاحه ..هاهاها.. ولا ما كفاج .. بعد كل هذا سرتي ويصليتي عليها اونها صلاه الميت ودفنتيها في الحديقه وانتي تبكين ..هاهاها هند وهيه تصرخ وهيه مستحيه : عبود اقولك اسكت ... ودخيلك كله ولا منى .. تراها نشره اخبار الشركه ..بنفضح .. خبر الاخبار بذاتها بس لا تطري شي لمنى لانها اكثر انتشارا من الاخبار ... وهني اسمترت هند تربع ورا عبدالله وعبدالله يدور على الطاوله وهو يكمل..: هاهاهاها.. عليج بالله قلن احواض السباحه حتى تعقين القطوه في الغساله اونج تعليمنها السباحه .. ولا .. تقولي بعد .. هاهاها. خلها تتعود على الاعاصير يوم بتروح تدور على امها ..هاهاهاهاه.. شنو فيج ... ليش انتي هبلا وتندمجين مع افلام الكرتون .. هند ..وهي توقف من الربعان وعبدالله يوقف ومن بعيد يطلع لها لسانه .. وهني سمعوا صوت ضحكه من الخاطر طالعه .. ويوم التفتوا في نصهم ولا بابوهم هلال ضاربته الدوره وهو يضحك على سوالف هند يوم كانت تندمج على افلام الكرتون وتسوي هاي المصايب .. هند ..وهيه متقفطه ..: زين زين .. ضحكوا عليه ... انا ياللي لازم افضحك يا عبود .. عبدالله ..وهو يضحك ..: هاهاها.. ما فيه عندي فضايح .. وهني تلتف هند في ابوها ..: ابوي .. اكيد سوالف عبود ما توقف ..شنو سوالفه .. خلاص .. انا انفضحت .. ما فيه امل .. وهني يضحك هلال وهو يقول ..: لا والله ... ما انفضحتي .. وانا معاج ...هاهاهااها.. بس قولي لي .. اي نوع من المواقف تبين .. عبدالله .. وهو يختلف وجهه من ضحك لجديه ..: ابوي .. واللي يخليك .. تدخيلك لا تقولها .. هند ..وهيه عيونها في ابوها ..: لا ارجوك قولي .. ابا اعرف ... عطاك وحده من الفضايح .. عطني وحده وخلاص ... هني هلال اتلفت في عبدالله وهو يضحك .. : هاهاها.. شنو رايك يا عبود .. فضيحه وحده وبس .. *وهني يأشر هلال باصبيعه على حجم الفضيحه ياللي بيقولها واونها صغيره ..* عبدالله .. وهو ينكر ..: ابوي . خلك عادل .. انته فضحتني بسالفه السياره .. بس .. وحده بوحده .. هلال وهو يضحك ..: هاهاها.. لا بس فيه سالفه اتذكرها ابا اقولها .. هند ..وهيه بطير من الفرحه : الــــــــله .. يعني فضيحه جديده بتطلع .. هلال ..وهو يلتفت على هند ..: مو بس فضيحه .. هذا عبدالله كتله من الفضايح .. بس بقول سالفه صغيره وخلاص .. وخلونا نرجع للشغل .. هند وهيه تضحك ..: هاهاها.. والله انكشفت يا عبود ..هاها عبدالله وهو مطلع بوزه شبر ..: انا عندي دواج .. والله لا فضحكم .. هلال ..وهو عيونه في عبدالله ..: عبدالله .. تتذكر مره شنو سويت !!!! عبدالله وهو ينكر كل شي ويصفق بيدينه اونها خاليه ..: لا .. ما قد سويت ولا شي .. كله نسيته .. امتسح .. بح .. هني وصل صوت زعلان من تحت الطاوله يقول ..: بح .. بح .. عبدالله قال بح .. ما فيه حلاوه .. ما فيه حلاوه .. هني كانت سلوم تحت الطاوله ترسم على الاوراق المتناثره وهيه زعلانه على عبدالله ... |
|
02-10-2007, 10:26 PM
|
#165 |
|
-+[¨¤ نائبة الإدارة ¤¨]+-
|
رد: ღ° ☆∴ روايه صفحه الم ! ☆∴°ღ
هند وهيه تضحك ..: سلوم .. شنو تسوين تحت طاوله ابوي .. سلوم وهيه زعلانه ومبوزه وبكل برائه تقول سلوم ..: سلوم زعلانه على عبدالله .. عبدالله ما فيه حلاوه .. عبدالله قال بح .. يعني ما شي حلاوه هني بدى الكل يضحك .. ويمسكها عبدالله وهو يضحك .. : هاهاهاها.. *وبدى يبوس فيها وهيه زعلانه ولا تتحرك ولا تتكلم معاه* خلاص ...خلاص .. بنسير بس خلينا نسمع فضايحنا على شان نفضحج انتي بعد يوم تكبرين ... وعلى ضحكات الكل .. وعلى انتشار النور بينهم يدخل فرعون البيت على الكل .. دخلت حصه ولا بالكل موجود ويضحك .. واول ما دخلت التزم الكل الصمت .. الا هلال .. اول ما دخلت تطلع فيها بنظرات كلها غضب .. اول ما دخلت حصه مسك عبدالله سلوم هو عارف انه امه لازم بتقط كلام ثقيل عليه .. مسك عبدالله سلوم وقالها عبدالله وهو عيونه في ابوه انه بيطلع يودي سلوم برا ..: يالله يا سلوم .. بنسير نشتري حلاوه .. هني انفجرت سلوم تبكي وعيونها المرتعبه في امها حصه ياللي زارعه الرعب في قلبها .: ما ابا حلاوه .. ما ابا ..خلاص .. *وهني بدت سلوم تبكي وبعبرات مثل ياللي يشوف الموت جاه * .. خلاص . خلاص .. ما ابا حلاوه .. هني شاف عبدالله تصرف سلوم انه تصرف غير طبيعي .. وكله ترتجف وتبكي .. اول ما شافها بهاي الحاله ضمها لاحضانه بقوه وغطا عيونها بيديه مثل ياللي ما يباها تشوف الوحش ياللي سنين وهو مذوقهم مر الكاس .. مسكها وهيه بعدها ترتجف وتبكي خايفه على بالها انها كل ما تطلب حلاوه امها بتضربها .. كل ما تبي شي فيه من يكسر بخاطرها.. كل ما تشتهي شي فيه انسان يسد نفسها منه وهيه بعدها صغيره .. وهني التفت عبدالله في ابوه ياللي كان متفاجئ من تصرف سلوم وبكاها وارتعاشها بهاي الصوره المخيفه .. عبدالله وهو عيونه في ابوه بعد ما شافوا منظر سلوم بهاي الحاله ..: ابوي .. انا بطلع شوي بسلوم وبشتري لها حلاوه .. هني بدت سلوم تصرخ وتحضن عبدالله وهي تبكي ..: عبدالله ...خلاص ..خلاص .. بح .. ما ابا حلاوه ..بح .. خلاص .. والله ما بي .. خلاص .. بح .. بح .. هني حصه تقربت من الكل وفي خطواتها تكبر وتعجرف ودكتاتوريه .. وبكل حقاره وبلا نفس تقول لهم ..: اشوف الكل هني .. حتى سلوم الطرطوره في الفزعه .. ومن متى سلوم هني ..!!!؟؟؟ هلال وهو عيونه في عبدالله ..: عبدالله شل اختك ودها تشتري ياللي تباه .. وانتي يا هند .. شوفي ملفات ياللي بنعرضها على الوزاره بعد بكره .. وجهزيهم .. هند وهيه منكسه راسه وتعرف انه اليوم اكيد فيه بتكدر خواطرهم ...: ... انشاء الله يا ابوي .. على امرك .. وهني تطلع هند صوب مكتبها ياللي كان جنب مكتب منى ... حصه وهي تبصبص بعيونها في الكل ..: بل بل بل .. توكم ضحكم واصل لقاعه الاستقبال .. ليش وقفتوا من شفتوني ... عبدالله .. وهو عيونه في امه حصه ياللي موب معبر وجودها في نصهم .: يالله يا سلوم .. بناخذ احلى احلاوه لاحلى سلوم .. في الوقت ياللي عبدالله ما عبر امه واستمرت سلوم تبكي وترتجف من الخوف عن لا تنضرب التفتت حصه في عبدالله وهيه تكلمه ولا كنه شي .........: حوه انته ..عبود .. عنبوك يا بو المخدرات .. صرت رجال ولا تعبر ناس اكبر عنك ..... اهني التفت عبدالله في ابوه مثل ياللي يقول انه ما يقدر يرد عليها لانها امه .. بس الكلمه ياللي قطتها عليه كانت مثل السكين في قلبه .. ما دام امه اقرب القريب يقول جذيه .. يعني الناس شنو بتقول ..!!! .. هني هلال تدارك الموضوع ودخل عرض ...: على الاقل ابن ادم يغلط ويتوب .. مشلكه ياللي ما طاع يتوب ولا يدري بعياله وين ساروا ولا وين كانوا .. ما دام سلوم الصغيره ما دريتي عنها وين كانت .. كيف تبين احد يعبرج !!!! حصه وهيه عيونها في الكل ولا كنهم شي ..: لا والله .. ومن صاروا اصلا هذيلا مشان يكنون احد .. !!! *وهني تأشر حصه على عيالها ياللي انجرحوا كلهم منها ...* عبدالله وهو يحضن سلوم بكل حنان وهيه في حضنه تبكي من الخوف وبنظره حزينه .: يالله سلوم .. خلينا نسير نشتري شي يفتح النفس بلا الكلام ياللي يغم النفس ..... هني بدت حصه تحرك شفايفها يمين ويسار مثل ياللي مستحقر الكل وهيه مستصغره ولدها : عشتوا .. والله صار له لسان يتكلم فيه بعد ..... هلال وهو يدخل عرض ..: على الاقل عبدالله رجال وكبير في عيون الناس .. بس انتي ياللي ما فيه احد سالم منج ......حتى سلوم الصغيره ما سلمت منج ..خافي الله فيها.. حصه ..وهيه تأشر على عبدالله وسلوم ياللي توهم طلعوا من مكتب ابوهم ..: عشتوا !! .. وعليك بالله سلوم شنو دراها باللي يصير اصلا .. حتى الكلام ما تجيبه صح .. !! |
|
02-10-2007, 10:26 PM
|
#166 |
|
-+[¨¤ نائبة الإدارة ¤¨]+-
|
رد: ღ° ☆∴ روايه صفحه الم ! ☆∴°ღ
هلال وهو يشتعل نار من داخله بس مخفي غضبه لانه يدري حصه جايه بس تغايضه لانه البارحه كان يناقرها ويصايح عليها ..: وليش ..شنو فيها .. انا الصراحه متعجب منج .. عليج بالله انا شفت امهات ... وكل وحده تموت على الارض ياللي يمشي عليها وليدها .. بس انتي من شنو قلبج والله ما ادري .. لو اقول لوح ثلج بكون نقصت درجه حرارتج لانج انتي ابرد من جيه .. ولو اقول قلبج نار يشعل كل من حوله بكون هم مقصر ...حصه انتي لين متى بتمين جيه!!! .. لين متى!!! .. قولي لي متى اخر كلمه حلوه سمعتها منج .. ليش تتعاملين معانا كانا خداديم في بيت ابوج ... اقول .. انتي ما عرفتي نفسج لين الحين .. ولا حتى عرفتي مقدار حب عيالج لج .. شوفي نظراتهم... شوفي حياتهم كيف هيه ..!!! حصه وهيه حطت يديها على بعض وهيه تتنهد وتنفخ وعيونها لفوق مثل ياللي يسمع هذي النغمه كل يوم .. : افففففففف.. عليك بالله انته حشرتني بهاي الرمسه .. ما تسوى عليه تراه .. عليك بالله انته شوف .. ما اظنك عمي ولا عندك قصر في النظر .. شنو ياللي ينقصهم .. لبس عندهم من احسن الاباس ..... اكل ولا طيب ولا اصح منه .. وسفرات يطلعون لدول عيال اكبر تجار ابوظبي يحلمون فيها... شنو ياللي ينقصهم .. قولي عليك بالله .. وانته كل ما كلمتك ولا جلست جنبك فتحت ليه نفس الموضوع .. اففففففففففففففففففف .. تراني مليت .. طفشت .. هني قام هلال من كرسيه وهو يكلم حصه ..: حصه .. !! .. عيالك موب ناقصهم شي مادي .. الماده موجوده والحمدلله .. وكل شي موجود .. ولله الحمد والشكر .. بس ناقصهم الشي ياللي هوه اهم من كل هذا كله ولا ينلقى لا في دوله ولا في سوق ... شي انتي عندج وتعرفينه زين ... .. حصه وهي تنفخ ..: اففففففففففف .. يعني شنو ناقصهم .. يالله .. بدينا بالفلسفه الزايده ياللي ما لها معنا .. هلال وهو يكمل كلامه رغم انه عارف انه حصه ما راح تستمع له .. : ناقصهم القلب ياللي يضمهم ويحضنهم .. ناقصهم ام تراعي مشاعرهم .. ام توقف معاهم موب دوم ضدهم .. ناقصهم حنان .. ناقصم حضن دافي .. ناقصهم اشياء ما وفرنها لهم .. اشياء يا حصه لا تنباع ولا تنشرا ... اشياء انتي في يوم بتحسين فيها وبتعرفين مقدارها .. حصه وهيه توقف وتصارخ ..: عليك بالله انته ما تستحي على نفسك !! .. رجال شوف طولك وشوف عرضك يالس تقولي في كلام عن الحب والحنان سامعنه من المسلسلات !! .. اي حب اي خرابيط .. اقول .. حوه ..انته .. ما عرفت عمرك عدل .. انته المفروض انك ما تقول هذا الكلام .. لانه عيب عليك .. والله لو يسمعك واحد من الناس بطيح من عيونهم .. هلال ..وهو لطم بيده في الطاوله من الغيض ياللي فيه لانه مهما تكلم ..مهما نطق .. حصه ما راح تترك وجه نظرها .: لا اله الا الله .. يا بنت الناس .. يا ادميه .. يا بنت الحلال .. انتي ليش ما بتين تفهمين .. ليش ما تبين تقولين شي .. ليش كله تعاندين .. بسالج بالله شنو انتي شغلتج في البيت .. وليش راكبه راسج ولا ناويه تفهمين عيالج ولا تفهميني !!! ... حصه وهيه تفتش في شنطه يدها مثل ياللي مش مهتم في كلام هلال ولا حتى معبره ..: اقول .. خل عنك الكلام هذا ... وانا ما ابا افهمك لانك سخيف .. وانسان تافه .. ما عندك سالفه ... عندي موضوع مهم!! هلال وهو بينفجر من الضيق بس ما يبا يسوي فضايح في الشركه ويكفيه ياللي استوى من قبل ...: انا الحين سخيف !! .. وتافه بعد ولا عندي سالفه !!!!!.. حصه لا تنسين اني زوجك ولين الحين ليه حق من رب العباد عاطيني اياه .. وقبل لا يكمل هلال كلامه تقاطعه حصه وببروده شديده جدا: نعم نعم نعم .. سمعناها هاي الكلمه .. بس يالله خل عنك الفلسفه الزايده .. اباك تخلص هذا الرجال وتشغله عندك في الشركه .. هلال .. وهو بيموت من الغم ..: نعم .. شنو !!!! رجال ويشتغل من طرفج انتي !! .. اقول حصه ما كفانا بني عمج وصرقتهم !!!! ... ما كفانا سنين التعب والعذاب ياللي عشناها بسببهم !! .. حصه انتي ليش ما تبين تعقلين وتتعلمين من السنين ياللي طافت !!! |
|
02-10-2007, 10:28 PM
|
#167 |
|
-+[¨¤ نائبة الإدارة ¤¨]+-
|
رد: ღ° ☆∴ روايه صفحه الم ! ☆∴°ღ
حصه .. وهيه متنرفزه ..: وانته ليش عصبي وحالتك لله .. اقول .. هذا مش بن عمي ولا هم يحزنون هلال وهو يجلس على الكرسي ويناظر بعيونه باستحقار لكلام حصه ..: نعم .. لا يكون بعد زوج وحده من شلتج الفسدانه !!!! حصه .. وهيه تبتسم ..: لا تخاف .. انا ما اروح عند ناس اقل من مستواي .. انا دورم فوق .. فوق .. فوق ... *وهني تأشر حصه بيدها فوق وهيه متعاليه وراسها لفوق وهيه مثل ياللي يقول انها عزيزه المقام * هلال .. وهو يمسك القلم ويلعب فيه مثل ياللي يبا شي يشغله من العصبيه ياللي في نفسه ..: نعم .. عيل منو .. لا يكون فيه احد يبا واسطه .. !! حصه .: لا والله .. احمد ولد ربيعتي ام احمد توه متخرج مشاء الله عليه من الجامعه .. وانسان وسيم .. وخلوق .. ودريس ... ومشاء الله ما شي ينقصه غير بنت الحلال والشغل ... هلال وهو يتنكر لكلام حصه ..ويوقف بعباطه من مكتبه .. : والله !! .. احمد يفكر يشتغل معانا .. اللــــــــــــه ..*وهني يرفع يدينه هلال مثل ياللي يشوف نفسه فايز *... اللـــــــه احمد يفكر في شركتي انه يشرفها .. هني يقوم هلال من مكانه اونه مرتبك كنه واحد من شيوخ الدوله بيدخل مكتبه .. ويمثل اونه متلخبط وما يعرف من وين يبدى ...: شنو اسوي .. كيف ببدى .. لا .. انا لازم افرش الشركه ورد لانه احمد بيجيني .. انا لازم اوزع هدايا وعصاير على الموظفين لانه احمد بيجيني .... هني حصه عرفت انه هلال يضحك عليها وما يبا يشغله ......:وليش .. شنو فيه احمد .. اظنه من زينه شباب بوظبي .. هلال ..وهو يرجع لمكتبه ويجلس ..: لا والله .. احمد من زينه الشباب .. وانسان معروف .. ومشاء الله ...وكل بنت في الدنيا تتمنى عندها زوج مثل احمد .. حتى انه الشركات قامت تسوي له عروض خاصه ...انه يشتغل معاهم بمرتب خيالي .. *وهني حط هلال يده على خده مثل ياللي يضحك على حصه ..* حصه ..وهيه معصبه من استعباط هلال ..: لا والله .. وحظرتك تضحك عليه !! .. ما كنه كلامي عاجبك .... هلال ..: لا وليش ما يعجبني ..مشاء الله .. من بني عمج ردينا لحثاله ابوظبي .. عليج بالله ما تستحين على نفسج حرمه وش طولج وش عرضج تتوسطين لواحد صايع .... حصه ..وهيه تحط يدينها على بعض مثل ياللي زعلانه ...: لا والله .. وشنو ينقصه بعد ابو شهاب .. مشاء الله عليه ..انته ما تعرفه لو تشوفه كيف مرح وحبوب ما كان قلت شي ...وتراه مؤدب وااااااااااااااااااايد ...يا الله على اخلاقه كيف حلوه .. هلال وهو ينفجر من الضحك ..: هاهاهاها.. لاااااااااااااااااا .. حلوه كثير اخلاقه .. هاهاها.. هذي اخر نكته سمعتها .. اقول يا حرمه .. تراه ولا مدرسه ثانويه للبنات في ابوظبي ما تشتكي من احمد .. انسان صايع وضايع .. وراعي مشاكل وبنات .. وعمره ما قد درس .. ولا حتى وصل للجامعه .. وعلى فكره .. الجامعه يوم دخلها لين الحين فيها.... يعني ما تخرج .. ومقبوض ومفصول منها من ثلاث شهور لانه مسوي بروجكت من واحد من المعاهد ياللي في العين .. يعني انسان غشاش ولا فايده منه .. حتى اني اظمن لج انه ما راح ينتظم في دوامه .. وانا انسان ما اشغل غير ياللي يستحق ... حصه وهيه تستحقر كلام هلال ..: لا والله .. شاريها الشهاده هه !! .. من صدقك انته .. عليك بالله وهذا الخسف ياللي ما يتسمى .. ياللي هوه اسمه *وهني اونه حصه تتذكر اسم فارس واونه انسان مش مستواهم وهيه تصفق بصابيعها اونها تتذكر * .. ياللي اسمه .. اوه .. تذكرت .. فارس .. وليش شغلته وهو بعده في الجامعه..!!! يعني حلال عليكم وحرام علينا !!! هلال ... وهو ينفخ مثل ياللي ضاق صدره ..: يا بنت الحلال .. فارس انسان جدي .. ودوم يوصل في مواعيد دوامه ولا مره قد غاب .. حتى انه مشاء الله عليه انسان معتمد على عمره .... ويبذل كل جهده انه يدرس ويشتغل ويبني نفسه بنفسه .. موب مثل احمدوووه هذا ياللي حاشرتنا فيه ... حصه وهيه معصبه ..: لا والله .. عليك بالله تحط كلب الشوارع عند ولد العز احمد !! .. عليك بالله شوف الفرق .. والله انه فرق وواضح بعد الفرق بين احمد وفارس هلال وهو يبتسم ..: اي والله فرق .. وفرق شاسع بعد ... وعلى فكره .. انتي اول مره تقولين كلمه صحيحه وشي صريح ... فيه فرق بين احمد ولد ربيعتج المغروره ام احمد .. وبين فارس ياللي ينرفع فيه الراس .. والنعم فيه .. حصه وهيه تطلع ورقه من شنطه يدها وترميها على مكتب هلال .. : اسمع يا هلال .. انا ما جيتك اتحيل فيك واطلب منك انك تشغل احمد .. انا جيت هني امرك انك تشغله .. هلال وهو يناظره حصه بعصبيه ..: لا والله .. امر .. !! .. وباي صفه تأمريني انتي !!! |
|
02-10-2007, 10:29 PM
|
#168 |
|
-+[¨¤ نائبة الإدارة ¤¨]+-
|
رد: ღ° ☆∴ روايه صفحه الم ! ☆∴°ღ
حصه وهيه تريد تغايض هلال ..: بصفتي زوجتك .. وصاحبه الشركه .. ولا نسيت انه الشركه بأسمي .. وانته بنفسك مسجلها هيه وبيت اختي مريم بأسمي !! هلال حس بضيقه من كلام حصه لانها غلطه وغلطها .. : اي والله غلطت .. وصدقيني اني ندمان عليها .. ولين الحين اعض يديني عليها .. بس صدقيني اني راح اوريج في يوم .. وصدقيني انه قريب هذا اليوم .. حصه وهي تضحك ..: هاهاهاها.. والله ضحكتني .. واونك بتنتقم مني !! هلال .. وهو يأشر لفوق ..: لا .. موب انا ياللي بينتقم .. ياللي رفع السما بلا عوامد راح ياخذ حقه منج .. وحق ياللي انظلموا على يدينج .. حصه وبكل بروده ..: خل عنك هذا الكلام . .أونك بتخوفني .. اقول .. على طاري بيت اختي مريم .. ابا انظفه واسويله صيانه .. وابا بعد انظف المخزن القديم ياللي فيه على شان نحط فيه اثاث البيت القديم .. والله مااردي ليش ما فيه احد يبا يستأجره .. سنين قديمه وهو ميت ولا احد طاع انه يستأجره وياللي جنبه مني ومناك يستأجرونهن.. شكلي ببنيه على التصميم الجديد .. هلال ..: ما فيه احد استأجره لانه مال حرام .. وانتي تعرفين زين انه المفروض يكون لشوق ولدها ..... حصه وهيه تضحك ..: هاهاها.. منو منو منو .. شوق ومنو !!! .. نسيت انه اخوك عقيم .. يعني نص رجال !!! هني عصب هلال وهو يقوم من مكانه لانه انهان اخوه ..: اقوووووووووول .. لمي فمج احسلج يا حصوه .. تراه والله ثم والله لا ادوسج بهالعقال ياللي على راسي .. حصه وهيه في داخلها خافت بس بدبت تبتسم مثل ياللي يحارب بحرب نفسيه وبكل بروده ردت على هلال..: اعصابك .. اعصابك .. على العموم .. عندك الوراق وابا احمد يشتغل اليوم قبل باكر .. وتراني معطي الحرمه كلمه .. ولا تنسى .. تراني ما بتفشل قدامها .. وهني قبل لا يقول هلال اي كلمه ...مسكت حصه شنطتها وبكل بروده طلعت .....طلعت وهيه تبتسم مثل ياللي انتصر في معركه من المعارك ..طلعت وهيه حامله رايه النصر في يدها انها عصبت في هلال وقهرته مثل كل مره تسوي فيه ..... هلال من طلعت حصه وهو نفسيته مش مرتاحه .. ضاق صدره .. تحسف على اليوم ياللي تزوج فيه بحصه .. تحسف على كل شي سواه لها .. تحسف على كل خطه خطتها له وهو تبعها على شان يكون له هذا العز ياللي لين الحين ما يعرف هل هوه حلال عليه ولا حرام .. هل وهو شي ينفرح به ولا شي ما يرضي الله.... في هاي اللحظه دخلت منى على هلال وهيه ماسكه الاوراق ..... منى وهيه تسأل ......: هلال .. انته فيك شي !!! هلال وهوينبه لمنى... : اششششششششششششش... لا احد يسمعج .. انتي نسيتي انا في الشركه موب بالبيت !!! ... ويطلع هلال ويناظر كان هند في المكتب ولا لا .. منى وهيه تضحك ..: هاهاها.. لا تخاف .. لا تخاف .. هند مش موجوده طرشتها تطبع اوراق ... وعلى فكره .. اختي سلامه اتصلت ثلاث مرات .. تسأل كان تقدر تجي اليوم على الغدا ولا لا !!! هلال .. وهو متعجب ..: منى !! .. انتي من صدقج .. اي غدا .. اليوم عندي اجتماع .. .. وخاصه اني لازم اليوم اسير البيت .... منى وهيه تحط يدينها على بعض مثل ياللي يعرف مثل هاي الحركات ..: هلال ..!! .. انته من صدقك انه عندك اجتماع .. ولا بعد تتعذر بالاجتماع على اساس تروح لحرمتك الثالثه !!! هلال وهو يبتسم ...: لا والله .. انتي من صدقج تسألين ..!! .. منى .. تراه لين الحين انتي سكرتيرتي واخت زوجتي الثانيه .. وانتي ادرى بكل مواعيدي !!!!!!!! منى وهيه تبتسم .: اي والله .. ادري .. بس حبيت اسوي سوالف عندك والطف جوك بعد ما ضيقت عليك هذي الفرعونه حصوه جوك .. هلال وهو يبتسم .: الله يسلمج يا منى ..اقول .. خلينا رسميين لين نرجع البيت ..انا بطرش هند للبيت مثل كل مره وبقول لها اني بطلع للاجتماع .. وبلاقيج في البيت .. منى ..: تمام ...على راحتك .. بس لا تنسى .. تراه سلامه تبيك في موضوع تقول انه جدا جدا مهم !!..هاهاها هلال وهو يبتسم ..: لا والله .. اي موضوع .. واشوفج تبتسمين وتضحكين بعد .. تراه شوفي .. بلا دلع وبلا طلبات ما لها معنا .. تراني لين الحين مدخل في حساباتكم فلوس .. منى ..وهيه تبتسم .: لا والله..... لا تخاف .. موب سالفه فلوس .. شي ما ادريبه بيفرحك ولا لا .. على العموم .. هيه تقول انها مفاجأه .. ويالله .. لا تتأخر عليها... هلال .. ما عليه ... بس انتي خلج الحين رسميه .. وعن الكلام الزايد .. ويالله برا .. عن لا تشك هند .... منى وهيه تبتسم ..: هاهاهاها .. حرام عليك .. وين تشك .. بنتك يا هلال مسكينه ولا لها اي شغل بافكار مثل هذي .. حتى انه مسكينه مصدقه تمثيلي عليها اني اخاف منك وانتفض يوم تمر جنبي .. هاهاها.. ما تدري اني سكرتيرتك ونسيبتك اخت حرمتك .. بس على العموم .. انا بسير المتكتب الحين .. هلال ..وهو يبتسم .: تمام .. سيري الحين .. وانا انشاء الله بلحقكم بعد ما اصرف هند للبيت .. في الوقت ياللي كانت هلال يراجع الاوراق كان عبدالله وسلوم برى على شان يشتري لها ياللي تبيه وينسيها خوفها من امها ياللي هيه امها بس بالدم .. وعمرها ما حسستهم بحنان الامومه ولا لمره وحده .... عبدالله وهو راجع من البقاله وفي يده سلوم اول ما وصلوا لسياره هند ياللي عبدالله اخذها منها على شان يشتري لسلوم حلاوه بدت سلوم تشوف عبدالله ساكت وحزين .. سلوم وهيه ناسيه كل شي ..: عبدالله .. عبدالله .. ليش زعلان .. عبدالله وهو يفكر في همومهم ياللي يوم ورا يوم تزيد ..: لا ما فيه شي سلوم ..كيف الحلاوه ..حلوه ..*وهني يبتسم عبدالله وهو نفسه يرجع صغير ويلاقي احد مهتم فيه مثل ما فيه احد مهتم في سلوم * سلوم وهيه تبتسم ونص وجهها التحتي صاير شكلاته ..: حلو .. يم يم .. تبا وبكل برائه تمد سلوم بالحلوه صوب عبدالله .. هني قتلت العبره عبدالله انه لين الحين منجرح من كلام الكل فيه .. من كلام امه عليه .. من كلام اصحابه ياللي تركهم والسبب انهم موب قد المخوه الصحبه .. بدى يفكر .. بدى يحس بحنين لايام الطفوله ياللي حتى ولو كانت عذاب فيه امل انه الانسان يعيش مرتاح لانه بعده في عالمه الوردي .. هني وقدام سلوم هلت دمعه حزينه من عبدالله .. اول ما شافت سلوم عبدالله يدمع انسدت نفسيتها من الاكل .. ويلست تتطلع في اخوها وبطلها ونظر عيونها وهو يهل دمعته .. هني بدت سلوم تشارك اخوها عذابه رغم انها مش فاهمه السالفه وبعدها صغيره .. بس القلوب عند بعضها .. وحبها لاخوها ومشاعرها اتجاهه خلاها تهل دمعتها .. هني وفجأه قدام عبدالله طاحت من يد سلوم الحلاوه وهيه تناظر في اخوها بحزن.. عرف عبدالله انه كدر صفوه سلوم ياللي توها نسيت دموعها .. وحاول يبتسم .. بس ما قدر نزل عبدالله لطول سلوم وهو يكلمها بكل ود .... عبدالله ..وهو يبتسم بدمعه ..: سلوم .. ليش عقيتي الحلاوه .. انتي ما تحبين الحلاوه ..!!! سلوم ..وهيه شبه حزينه وقريب لا تبكي لبكى عبدالله ...: عبدالله !! .. ليش انته تبكي !! ...ماما ضربتك مشان حلاوه !! عبدالله وهو يحاول يخبي دموعه ..: لا يا سلوم .. بس .. بس .. وهني خنقت العبره عبدالله وما قدر يقول شي .. كل ياللي سواه انه مسك سلوم وحضنها بقوه لدرجه انه بدت سلوم تسمع نبض قلب اخوها عبدالله يوصل صداه لقلبها .. رغم سماعها لنبضات قلبه واحساسها لحزنه الا انها ما قدرت تفهم اي شي .. غير انها تشارك اخوها دموعه.. بدى عبدالله يحضنها وهو يحسن بانه ما فيه احد يفهمه ويشاركه احساسه غير سلوم .. رغم انه العلاقه بينه وبين اخته توها تصافت .. وعلاقته مع ابوه حلوه.. بس لين الحين ما تعود على انه يفتح قلبه لهم .. ما عرف كيف يبدى كلامه ..كيف يحسه .. واول ما انتبه عبدالله ولا بسلوم في حضنه تبكي لبكاه .. وتدمع لدموعه.. بدى يحس انه فيه اتصال كبير بينه وبين اخته الصغير اكثر ما اي انسان ثاني في العالم كله ...... وهني مسك عبدالله سلوم من ذرعانها وهو يقولها بابتسامه ..: سلوم !! .. يالله نروح الحديقه !! .. ونلعب .. سلوم وهيه مش مصدقه من الفرحه الطفوليه ... ..: حديقه.... يبــــــــــــــي .. عبدالله وديني حديقه .. يبـــــــــي |
|
02-10-2007, 10:31 PM
|
#169 |
|
-+[¨¤ نائبة الإدارة ¤¨]+-
|
رد: ღ° ☆∴ روايه صفحه الم ! ☆∴°ღ
وهني حس عبدالله انه سلوم بتحس بفرح وبتضحك ... وعلى طول سار عبدالله ويلس يمشيها ويوديها لمناطق تلعب سلوم فيها وهو يطلع فيها والابتسامه في عيونه لانه فرح سلوم من فرحته .. ويكفيه انه لو ما عاش طفولته مثل باقي الاطفال انه يملى على الاقل عيونه بناس عايشن نفس الحياه ياللي عايشها هوه ... وفي الوقت ياللي سلوم يالسه تزقر على عبدالله وتأشر له وهيه تلعب بفرح ومرح جا على بال عبدالله اخويه سعيد وخليفه ومحمد .. فحب يسير للعين بعد الدوام على شان يسلي خاطره من همومه .. مسك الموبايل وبدى يدق على سعيد .. بس سعيد ما كان يرد على تلفونه .. ودق على خليفه بس خليفه مغلق تلفونه .. وكان على باله يدق لمحمد بس استحى لانه محمد ما كان يعرفه زين .. فقال انه بيتصل فيهم بعدين ....وجلس عبدالله يلعب مع سلوم لين رجعوا للشركه بعد فتره من اللعب والمرح حصلته سلوم من عبدالله ياللي كان يحاتي عليها ويبيها تعيش حياتها بعيد عن الحياه ياللي عاشها قبل .... مرت فتره ... ودخل المغرب .. وفي مستشفى التوام بمدينه العين ... كانت سعيد لين هذيج الساعه في مكانه في زاويه منحصر يشوف الناس والناس ما تشوفه الا ياللي يركز ... .. والكل كان عند غرفه العمليات ... كل اهله .. من اخواله .. واعمامه.. والشباب ياللي يعرفهم وصلهم الخبر .. .. مرت فتره وهو عيونه وفكره ساير لبعيد .. طارت روحه لتقلب في البوم ذكرياته مع الايام ياللي كانت مثل الجنه بالنسبه له يوم انه كان مع خليفه .. اخوه وصاحبه .. تذكر اول لقاء لهم في الكفتيريا .. تذكر ضحكاته .. نشاطه ومرحه... حب الكل له ...كانت دموع سعيد تنزل وهو كل ما يجي ويطري اسم خليفه على قلبه .. كل ما يجي اسم خليفه تخلطها عبره ودمعه .. وتختم عليها بونه تردد صداها في عالي السما .. تردد صداها فوق السحاب .. تردد صداها ليوصل دنيا عطشانه بكلمه خايف سعيد في يوم انه ينحرم من قولتها مثل ما انحرم من كلمات كثيره .. تمنى سعيد انه ولو انسان يفهمه .. يقدر ظروفه .. يقدر ياللي يعيشه .. مرت فتره وفجأه طلع الدكتور بعد ما سوى العمليه لخليفه .. طلع وهو منكس الراس ..... الكل كان ينتظر الخبر اليقين .. الكل كان ينتظر خبر يشرح النفس .. بس كان منظر الدكتور يخيب امل اي انسان .. طلع والكل يده على قلبه .. هني مطر قام من الكرسي وهو يتعكز على عصاته ...: بشر يا دكتور .. بشر .. عسا بس خليفه بخير ..!!! الدكتور وهو شبه تعبان من اثر العمليه .. : يا اخوي شنو تباني اقولك اياه .. سوينا ياللي نقدر عليه .. والباقي على الله .. مطر وهو على اعصابه ياللي تلفت وهو ينتظر ..: والنعم بالله .. يعني !!!!.. عطني الخلاصه يا دكتور .. عطني الخلاصه .. الدكتور ..: يا اخوي .. تأكد انه امر من الله .. ونحن سوينا ياللي علينا .. ولدك يا اخوي كان عنده نزيف في الرئه .. وسبب له اختناق .. بس الحين نحنا سوين ياللي علينا بالنسبه للنزيف .. اما بالنسبه للكسور .. عنده كسر في رجوله وضربه قويه في الراس .. ميثا وهيه تتشهق وكنها بتموت ..: يعني خليفه بيعيش .. بيعيش ولا لا .. *وهني بدت تبكي ميثا بحراره ..* الدكتور ..وهو يمسح العرق ياللي كان يتصبب منه على طول وقفته في العمليات : والله شنو يا اقولج يا اختي .. العمار بيد الله .. بس انشاء الله بيعيش .. هني تباشرت تهاليل الفرح .. ردت الروح لهم .. ومن بعيد لقط سعيد البشاره .. وفرح .. وغصبن عنه بدى يبكي بهستيريه .. منها فرح لكلام الدكتور .. ومنها حزن على ما سببه .. ولا قدر يتحمل اللوم ياللي حصله من امه واهل خليفه بروحه بدون انسان يعينه .. هني قاطعهم الدكتور بكلامه نكست روس الكل .....: يا اخواني .. انا ما كملت كلامي .. مطر وهو بدت البسمه تغرق في ملامح من الحزن ..: توك تبشرنا يا دكتور .. خير عسى ما فيه شي ثاني .. الدكتور .. : انا قلت انشاء الله .. بس يا اخوي .. ولدك لين الحين بحاله حرجه .. يعني لين الحين ما نعرف اذا العمليه نجحت ولا لا .. وهذا ياللي مخوفنا.. السالفه فيها نزيف حاد في الرئه اليمنا... موب شغله جرح وبيطيب بسرعه .. مطر وهو منصدم ..: يعني ..!! |
|
02-10-2007, 10:33 PM
|
#170 |
|
-+[¨¤ نائبة الإدارة ¤¨]+-
|
رد: ღ° ☆∴ روايه صفحه الم ! ☆∴°ღ
الدكتور ..: يعني بنعرف كل شي في خلال الاسبوع هذا .. اذا قام خليفه من الغيبوبه ولو للحظات .. هذي بتكون بشاره للكل .. واذا طول .. الله اعلم يا اخوي .. وانا ما اظمن شي .. الكل بيد الله .. والله كريم .. وهني ينسحب الدكتور بتعب بعد ما ترك الكل لاهو بحي ولا بميت .. تركهم وهم ينظرون في بعض .. الكل بدى يناظر في بعض مثل ياللي يتجهز لمراسيم الحداده .. هني جلست ميثا وبدت تبكي .. ما عرفت شنو تسوي .. وروضه بدت تراضيها وتطيب خاطرها.. شوق ما تحملت .. وطلعت من الممر .. طلعت ولا بسعيد قدامها .. اول ما طاح نظرها فيه حست بسكين تنغرس في قلبها.. حست انه فيه شي سوته وغلطت في حقه .. بدت شوق تركز في ملابس سعيد ياللي كانت لين هذيج الساعه فيها دم خليفه ياللي من استوا عليه الحادث وهو معاه...بدت تركز في كسوره والضمادات ياللي كانت على راسه ...بدت تركز في وجهه ياللي كان فيه اثر الطراقات ياللي جته منها حتى بعد ياللي فيه من كسور وضربات في راسه .... بدت تشوف احمرار وانتفاخ عيونه من البكى والحزن ياللي صابه .. بدت تحس بلوعه في قلبها .. بدت تحس بحراره في داخلها .. بدت تحس بحنين انها تضمه وتخفف عنه كل ياللي في خاطره .. اول ما تقربت شوق من سعيد التفت فيها وبعيون تحرقها الدمعه من داخل التفت فيها وهو بكل حزن ويأس شديد في داخل اعماقه نفسه يقول شي .. بس حزنه مانعه انه يقول اي كلمه لانه اذا قال كلمه وحده راح ينفجر بالبكي .. وهو لين هذيج الساعه متحمل كل شي يستوي فيه من ضرب من امه لين لوم اهل خليفه .... هني حن قلب شوق .. حن وتلوم في ولدها .. حست انها غلطت .. تقربت منه وجلست مقابله سعيد وهيه تحد يدينها على ركبه .. حطت يدينها وهيه تقول ..: سعيد .. اسمعني .... وقبل لا تكمل كلامها هلت دمعه سعيد وهو يطالع في عيون امه ياللي ما عرف هلي هيه يايه تعزيه ولا تلومه ...التفت فيها وبدى يقول لها بعد ما نزلت دمعه حاره من عيونه ...وهو يقول اول بيت في خاطره طلع انه يبري نفسه من ياللي استوى انه قضاء وقدر ...بس حاول يبين لها حزنه انه خلاص .. يكفيه ياللي جاه من الحادث كانها بس جايه تلومه زياده بعد ما اظلم الكون في عينه .... يكفيه ياللي جاه ....لا تجي هيه القريبه وتزيد طعونه بطعنه جديده * يمه .. أنا مالي في هالزرع مقيال ... يمــــه ربيع الكون ماهو بعيني ماشاقني طفلٍ وأنا صرت رجال ... وأطلقت بـــــــالأيام مهرة سنيني قاطعته شوق بعبره في خاطرها لحال سعيد وهيه تقوله ..: سعيد .. انا ما جيت الومك .. انا .. انا .. جيت اقولك انه مهما كان انته ولدي .. وانا راضيه عليك ... وشي استوى وهذا قدر ومكتوب ...بس انته ليش موب راضي على نفسك .!! ..ليش مسوي بنفسك جذيه!!! *هني نزل سعيد راسه وهو يتذكر انه كل ما حاول يصلح شي او يعيش حياته تستوي فيه مصيبه مثل هذي* يمه رضيت بكل مايرضي الحال ... بس الزمــن بــالحيل يلوي يميني نوّخت فكري لــلتواضع ولا زال ... وجعلت فـــــي وكر الكرامه جبيني *وهني مد سعيد يده السيار على قلبه ويده اليمين بينه وبي امه وهو يراويها الدم ياللي لين هذيج الساعه ما امتسح من يده .. انه لين الحين مرسوم في خاطره وفي ضميره وهو اغلى دم .. ياللي هوه دم اخوه خليفه * ومديت كفينـــي عطا تشعل اشعال ... أصابعي شمـــــع لمن هو يبيني وجعلت فــي قلبي للأحباب منزال ... وسكنتهم رغــــــم علي عاذليني هني قاطعته شوق وهيه تدمع عيونها وهيه تحط يدينها على كتوف سعيد وتهزه بلوم..: سعيد .!! .. ليش ما وقفتني يوم صفعتك .. ليش ما قلت شي .. ليش ما ردتي عليه .. ليش سكتت والتزمت الصمت ولا دافعت عن نفسك .. *هني العبره خنقته وهو يشوف عيون امه في عيونه .. خنقته وهو نفسه يبري نفسه اكثر لانه لين هذيج الساعه يتذكر كلام امه يوم كانت تصفعه وهو ما يرد عليها .. * طبعي كذا ، ماخالطه خبث واهبال ... أشـري الذي في خاطره يشتريني يمه ، أنا في عالم الحب مرسال ... تكـــــفيني من نار العذاب ادركيني شوق ... ما قدرت تقول شي لانه ياللي شافته في سعيد كان اكبر من تصورها ..كان جرح يدمي ونزف اكثر من اي جرح يدمي وكان عنده امل انه بلمسه حنان من امه انه راح تكون بخير .. بس هيه زادت عذابه عذاب .. *هني تذكر سعيد منظر خليفه وابتساماته قبل الحادث .. تذكر احلى الايام ياللي عاشها معاه انها احلى سنين العمر .. تذكر انه الفرح عاشره من يوم ما عرف خليفه .. انه الدنيا بدت تبتسمله من يوم ما بدت الصداقه تترعرع بين قلوبهم ..بس انتهت بمأساه كان هوه سببها .. وتحولت الايام الحلوه لكوابيس هوه ياللي يدفع ثمنها ...* كنت أذكر البسمـه على شفاة الأطفال ... كانت تحرك كل الأفراح فيني صمتي قتـــــل في داخلي كل الآمال ... وتبـــــــخرت أحلام أول تجيني هني بكت شوق وهيه تكلم سعيد بلوم وعبره خانقتها وهيه تتذكر انها كانت تزيد طعونه وخاصه انه بدى يجاوبها بقصيد بدل الكلام .. وهذا اعطاها دليل انه ما كان يقصد .. وانه متلوم بشك فضيع في اهل خويه وفي خويه بنفسه .. وهني بدت شوق تسأله ..: سعيد ..دخيلك .. لا تزيد طعوني طعون .. يكفي ياللي عشته قبلك .. ليش ترد عليه بقصيد .. دخيلك ... رد عليه بكلام عادي ...يكفيني ياللي فيني .. لا تلوّمني .. *وهني انفجرت شوق تبكي قدام سعيد ...* هني هلت دمعه سعيد وهو عيونه في امه وهو يقول لها ....: كنت أحسب الـــــدنيا قصيدة وموال ... موالها فــرح ، وفرحها هجيني لكن نـغمها ماطرالــــي على البال ... ان اللـــــــــيالي بطبعها تكتفيني هني ترددت في خاطره كلمه امه انها عاشت عذاب قبله .. بس هل تذكرت انه هوه بعد عاش نفس العذاب ويمكن اكثر .. هل حست انها كان عندها عايله ياللي هيه ميثا واهلها .. هل نست انهم كانوا لها عزوه .. وهو بروحه كان عايش .. ما من رفيق ولا صديق يحس فيه غير ابو عبدالرقيب !! .. حس بنفسه بيبكي .. بس حب يرد عليها بكلام يخبرها انه حتى اهوه عايش بنفس العذب ..بس بطريقه تحسسها ولا تكون مباشره عن لا يجرها زياده ....ورد عليها ببيت يقطع القلب وهو يقوله ... |
 |
| مواقع النشر (المفضلة) |
| الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| ღ° ☆∴ بمناسبة اقتراب شهر رمضان ... جميع انواع الشوربات ☆∴°ღ | مــ الحزن ــلاك | مجلس حلا للطبخ العالمي | 11 | 06-10-2007 12:38 AM |
| ღ° ☆∴ (( هديتــي لعشــاقـ المنتخــب السعـــودي))☆∴°ღ | مــ الحزن ــلاك | مجلس حلا للموبايل | 10 | 06-10-2007 12:26 AM |
| ღ° ☆∴ (( السكري الخفي - النسبة أكبر بين الشباب منها لدى البنات ))☆∴°ღ | مــ الحزن ــلاك | مجلس حلا للطب والصحة | 6 | 30-09-2007 03:45 AM |
| ღ° ☆∴ (( هامـ لمستخدمي بطاقاتـ الـ dsl))☆∴°ღ | مــ الحزن ــلاك | مجلس حلا للكمبيوتر والبرامج | 14 | 31-07-2007 02:25 PM |
العرض العادي
