الحب قبل وبعد الزواج

[الساحرة]

قبل الجواز

هي: بنظرة ساهمة هتفضل تحبني كده حتى بعد الجواز؟
هو: ولغاية آخر يوم في عمري يا حياتي......

بعد الجواز بشوية

هي: إنت ليه ماعدتش بتقول لي إنك بتحبني؟
هو: أنا بحبك بس دي حاجة إنتِ أكيد عارفاها ومش محتاجة إني أقول لك عليها.

ويمكن يبقى العكس وهو اللي يكتشف إنها مابقتش بتهتم بيه زي الأول أو حتى زي الأيام الأولى من الزواج ماعادتش حريصة إنها تودعه لغاية الباب ولا حريصة على إنها تكون مستنياه لما يرجع من الشغل بابتسامة، وماعادتش بتكلمه في التليفون زي الأول كل ساعة علشان "تطمن" عليه.

ويبدءوا الاتنين يعيشوا في "وهم" إن حياتهم بقت خلاص جافة وناشفة. إيه اللي حصل......... هل معنى كده إن الحب خلاص خلص وماعادش له وجود في حياتهم وإن حياتهم اتحولت لجواز تقليدي بتتحكم فيه الحقوق والواجبات وبس؟؟ الحقيقة فيه إجابتين على السؤال ده..

آه خلص

وده بيتم في حالة الزواج اللي مبني على قرار انفعالي يعني اتنين اتقابلوا وعاشوا مع بعض قصة حب عنيفة وجنبوا عقلهم تماما، ومالحقوش يعرفوا بعض كويس، وقرروا يتجوزوا وبيفوقوا بعد شوية ويكتشفوا إن حبهم لبعض مابيدعموش تقارب فكري وعقلي يعني بيحبوا بعض وخلاص وغالبا الجوازات دي بتنتهي بالفشل والطلاق أو حتى بالطلاق الصامت (الاتنين عايشين مع بعض وممكن يكون فيه بينهم أولاد لكن كل واحد في سكة منفصلة).

لأ ماخلصش... لكن

والحالة التانية بيكون العقل والقلب مع بعض في الجوازة وفي الحالة دي لازم الاتنين يبقوا عارفين إن "لأ" طبعا الحب ماخلصش بعد الجواز بالعكس ده اترسخ أكتر لأن الرابط بينهم بقى روحي وجسدي واجتماعي وكل حاجة. بس الحقيقة هو استقر واطمّن للوضع فبدأ يكسل إنه يظهر بدليل إن أول ما تحصل حاجة بتستدعي الحب ده بيحضر فورا.. يعني مثلا لو حد من الاتنين تعب أو مرض تلاقي التاني قاعد جنبه ومابيسيبوش ولا لحظة... مش بس علشان ده الواجب بس علشان كل اللحظات الجميلة اللي مع بعض.

طيب إيه اللي حصل؟

اللي حصل هو انشغال من الطرفين على شوية ضغوط ومسئوليات الحياة اليومية على شوية تطنيش من الاتنين يعني تلاقي كل واحد من الطرفين مستني التاني يبدأ بالاهتمام وأهم حاجة الملل وعدم التجديد، يعني تلاقي الاتنين اللي يناموا فيه يصحوا فيه مع شوية تراكمات على حاجات معلقة، فالنتيجة طبعا إن الحب بينزل لأقل مستوياته ولو مالحقوش ممكن فعلا يخبو ويضيع.

يعني الحل إيه؟

خلّونا نتفق على كام حاجة وهنقولها ليكم بالتفصيل واحدة واحدة.. ركزوا كده معانا لأننا -إن شاء الله- هنديلكم الحل...



الحب كائن حي

الحب بينمو وييزدهر وبيكتر لما يلاقي حد مهتم بيه وبيموت لما العكس يحصل ويتم تجاهله عمدا.. هنا الحب بيقرر الانتحار والموت بالسكتة القلبية كمان. يبقى لازم نخلي بالنا من حبنا.


الحب مسئولية مشتركة

الحب ده مسئولية طرفين مش مسئولية طرف واحد يعني لازم الاتنين يبذلوا قصارى جهدهم في الحفاظ على حبهم. وحرام الحب اللي بينهم يقل لأن كل واحد رامي مسئولية المبادرة على الطرف الآخر. يبقى ياريت الاتنين مايطنشوش.

لابد من النيولوك

مش بس نيولوك ليكم لكن لحياتكم وشكلها.... لازم الاتنين يجربوا طرق رومانسية علشان يحاربوا بيها الملل والتجمد اللي بتعاني منها الحياة الزوجية و"غادة" هتقول لكم على بعض الحاجات اللي ممكن تعملوها. يعني لازم التجديد.

لا للتراكمات

لازم الزوجين يرفعوا شعار لا للتراكمات... لازم المشاكل اللي بينهم تتحل أولا بأول بحلول فعلية مش مجرد مسكنات... حلول ترضيهم هم الاتنين على قد ما يقدروا... يبقى الخلافات تتحل أول بأول.

لا تراجع ولا استسلام

لو كنت إنت الطرف المبادر دايما أرجوك ماتيأسش.. ارفع شعار لا تراجع ولا استسلام وأكيد الطرف التاني هيحس ولو ماحسش اتأكد إنه هو مقدر اللي إنت بتعمله علشانه وراعي إن فيه اختلافات في الشخصية والتربية -الكلام ده بالنسبة للناس اللي متجوزة جديد- ودي اللي مخلياك إنت طرف مبادر والطرف التاني إلى حد ما سلبي... يبقى لازم ماتستسلمش.

الساحرة