عيــــــــــون فـــــــــارس

[تاج النساء]

...:::][ البارت السادس عشر ][:::...

" تبــيني اضحك وانا بداخلي هموم .. تبيني ابكي وشوف الناس فرحانه عيت البسمه على شفاتي تدوم .. تــرتجي طيف له الــروح ولــهانه .. "

نزلت راسي و طاحوا خصلات شعري ع ويهي باعدتهم و بعدها طالعت فارس ..
تقرب مني و زخني من شعري ..
أخذت اطقه ع يده و اصيح : هــدني هــدني ..
زادت قبضته ع شعري .. حتى ان انا حسيت ان شعري بـ ينجلع من مكانه ..
صرخ علي : منو الجلب الي كنتين تكلمينه
صحت : ......
انعقد لساني عن الكلام .. مب رايمة انطق بـ كلمة .. شو هو صدق كل شي .. انا كنت ارمس مريم .. مريم .. مريم .. بس حتى لو قلت له ما بـ يصدق .. عيل انا الي قلته هين .. لا لا هب هـيــن .. كفاية عيون كــفـــايـــة لا تلومين نفسج .. ما بـ ينفع لومج ما بـ ينفع ..
فارس : ما تتكلمين ..
رديت عليه و انا اشهق من البجي : ما كنت اكلم احد ..
فارس : اقول لج تكلمي ..
عيون : ....
رماني ع الباب و نزل لـ المستوى الي انا فيه .. مسكني من ذراعي .. غمضت عيوني من الخوف ..
صرخ علي : وين تلفونج ..
عيون : .......
فارس : وين تــلــفــونج ..
تكلمت بـ صعوبة : ع التسـريحة
تركني بس يا ليته ما تركني رقعني بـ الباب .. و رفسني في بطني .. حسيت روحي طلعت مني .. الم في ضهري و بطني ما اروم اوصفه لكم ..
طلع من الغرفة و كان في يده تلفوني .. شوو بـ يسوي فيه ؟؟؟
طلع من البيت بعد .. هذا مينون ..
آآآآآه .. بــطــنـــي .. صحت بـ حرقة مصير .. حرام عليه .. هذا بدون احساس .. ذبحني .. جتلني .. عساك.....
و خلاص انقطعت انفاسي عن الكلام ..

........

" فــارس "

قليل بـ حقج هذاا !!
ما اكون فارس ان ما ربيتج ..
[Children are wearing new clothes
Bright colours fill the streets
Their faces full of laughter
Their pockets full of sweets
Let us rejoice indeed
For this is the day of Eid ]
" لـ الامانة : كلمات أغنية العيد لـ سامي يوسف "

فارس : هذه رنة تلفون عيون ..
اخذته شفت الرقم كان " الغالي "
فجيت عيني .. شوو !! الغالي بعد هاا .. اشوف الحين منو هـ النذل الي تكلمينه ..
شلته بس ما تكلمت ..
فارس : ........
... : السلام عليكم .. ( كان صوت رجولي .. )
صرخت عليه : مــن مــعــاي !!
... : فارس .. انا سامر .. شو ما عرفتني ..
شلت التلفون من اذوني و طالعته .. " الغالي " هو سامر .. هذا اخوها .. لاول مرة في حياتي احس بـ الذنب .. ضلمتهاا .. جذي تسوي الغيرة .. ما اجذب اعترف و جدامكم .. مدري شو الشعور الي ياني لماا قريت الغالي .. غيرة لو شوو !! .. مدري .. لحد يسألني الحيين .. !!
سامر : الووو .. الووو .. فارس وينك !!

ما إلي خلق لـ شي .. صكيت التلفون في ويهه و رميته ورى .. خليت راسي ع السكان .. ما بـ تصدقون اذا قلت لكم ان دموعي نزلت .. هيه نزلت .. طقيتها .. و هي ما لها ذنب في شي .. بس انا لـ حد الحين هب متأكد من الي كانت تكلمه ..
ضليت مدة ع هـ الحال .. الوم نفسي و حالي ع الي سويته .. كنت معصب و خليت كل حرتي فيهاا .. و هي ما سوت شي .. ما سوت شي ..
شلت راسي عن السكان بـ ثقل كبير .. مسكت راسي و عصيت عليه .. انا شوو اسوي الحين .. شو اسوي .. منو يقول لي .. ما تسمعون .. الحيرة بـ تقطعني .. منو يقول لي منو منو منو !! تكلموا قولوا لي أي شي .. حالي ما يدري بهاا غيير الله و انتوا تقرون سطوري و تشوفون حيرتي و كل هذااا و لا احد ينطق .. لا تيلسون تقرون و تتطمشون .. بـ تعذبوني .. قولوا لي الحين شلون اعتذر منهاا و اعوض لها عن الي سويته شــلـــون (شلون) هذه جلمة من أربع احرف بس معناها كبيير في جوفي كبيير و وايد بعد !!
مشيت السيارة و انا مدري وين اروح .. شفت نفسي جريب من البحر .. بركنت السيارة و نزلت .. لفحتني نسمة هوى طيرت شعري ع ورى ..
يلست ع اقرب حجرة هناك .. الملم كل شي .. احمل هــم الحين .. بس ما اعرف شلون اشيله و ارميه .. يا ليت الارض انشقت و بلعتني قبل ما اسوي الي سويته ..
عــيـــون .. !!
و منو معذبني غيرج يا عيون .. " خليت يدي ع راسي و عصيت عليه " مليت الصمت و السكون الي مالي حياتناا .. لو ما صار الحادث .. جان الحين انا بخيير .. بس هذه هي وصيتك يا عمي .. انك تعيشني انا و بنت اخوك بـ هم و عذاب .. كل يوم نلوم نفسنا .. كل يـــوم !! ماشي تطور في حياتنا ماشي .. الدنيا .. آآآه منج يا دنيانا اااه منج ..
ضليت اراقب البحر شلون تلتطم امواجه بـ بعضها بـ صوت مفجوع .. صوتها يدوي في اذوني و كأنه يعاتبني .. هذا البحر ايي افرغ فيه كل همي .. بس هذا الهم كبيير .. ما يستحمله البحر ما يستحمله الكون .. شلون انـــا استحمله !! .. ما تقولون لي شلون !!
وقفت و تنهدت ..
ركبت السيارة و مشيت .. مدري شلون وصلت البيت .. المهم اني وصلت ..
نزلت دخلت الصالة .. وقفت جامد مكاني .. هذه عيون الي جدامي .. كانت مرمية في المكان الي رميتها فيه يطلع دم من بوزها و ما يتحرك شي في جسمها .. تقربت منها بـ خطوات ثقييلة .. جثيت ع ركبتي .. مسكتها من ذراعها و هزيتها ..
فارس : عــيـــون .. ردي علي عيون .. عـــيـــون .. الله يخليج ردي علي ..
بس ماشي .. " لا حياة لـ من تنادي "
وقفت و رحت المطبخ بسرعة .. شلت ماي و صبيته عليها .. بعد ماشي رد ..

" ماهــــو غـلـــط تـشـعـــر بـزلـتـك وتـعـــــــود صـــــدري وســـــيـعٍ للعـــــــذر والسـمــوحـه بـس الخـطـــا تـجـحـد وخـلـــــق الله شهــــود تـجـيـني وتـرســــــم للاخـــــــلاق لـــــــوحـه "

حملتها و مشيت بسرعة .. قولوا ركضت هب مشيت .. ركبت السيارة و خليت راسها ع ريلي .. مشيت بـ اسرع ما عندي ..
ضربت بريك و الحمدلله ما دعمت .. فتحت الدريشة و صرخت ..
فارس : انت ما تشوف ..
صرخ علي : الحين انا الغلطان لو انت !!!

طنشته و مشيت .. حسيت بـ حرارة في ريلي .. وقفت السيارة ع صوب .. و طالعت عيون .. كانت تبجي .. يعني ما ماتت عيون .. ضربتها خفيف ع خدها ..
همست : عيون
فتحت عيونها شوي ..
عدلتها و سندتها ع الكرسي ..
تكلمت لي بـ صعوبة : انا وين ؟
فارس : بـ نروح المستشفى ..
عيون : ما ابااا اروح ..
صرخت عليها : مب ع كيفج ..
اخذت تصيح : لا ما اباا اروح .. تبي تطقني شرات ما طقيتيني قبل .. طقني .. شو الي بـ تسويه بعد قول لي شوو .. ما اباا اروح .. ما ابااا !!
مسكت يدها ..
رديت بـ حنية : عيون سامحيني ..
ردت علي و هي تبجي : ما أرد للجمرة وأشيلها بكفي جرحتني مرة وأظنها تكفي كفااية فارس .. كفاية عذاااب ..
ما تدري انها جرحتني و قطعتني .. ما تدري .. انها بـ كلامها هذاا .. ردتني لـ جرحي .. ما تدري بـ شي .. عيون ياهل .. و صغيرة عن هذه الدنياا .. صــغــيرة ..
نزلت راسي : كفاية عيون .. لا تعذبيني ..
شلت يدها من ايدي و حوطت ويهها بـ يدها و يلست تصيح ..
مشيت السيارة و بركنتها في باركات المستشفى .. نزلت .. فتحت الباب لـ عيون ..
فارس : نزلي ..
عيون : ما ابااا ..
و ردت تصيح ..
صرخت عليها : بـ تنزلين لو انزلج ..
عيون : قلت لك ما ابااا .. لا تغصبني ع شي ما اباااه .. كفاية اني ضليت في المستشفى سنة كاملة و انت السبب .. كفاية !!
مسكت يدها و سحبتها .. حسيتها مب رايمة حتى توقف .. طاحت ع الارض و هي مساكة السيارة ..
نزلت بـ مستواها .. و مسكتها من ذراعها وقفتها .. قفلت السيارة.. كانت تمشي بـ صعوبة فـ اسندتها .. كان هذا غصباً عني .. حوطت بـ ذراعي ع كتفها و خليتها تمشي غصبا عنها .. تصدقون توني الحين مكتشف ان ما عليها شيلة .. بس هذا الوضع ما سمح لي حتى اتذكر هذا الشي .. اشوفها جدامي تصيح .. ما لاحضت ابد ..
لماا شافوها الممرضات ساعدوني و ودوها غرفة المعالجة .. ضليت يالس ع الكراسي ..

....

" رهـــف "

لاحضت انخطاف لونه ..
رهف : شبلاك سامر !!
سامر : مدري .. اتصلت لـ عيون .. شلاه فارس و كان معصب و صكاه فـ ويهي ..
رهف : شوو يعني .. يمكن صاير شي في الشركة .. و ....
قاطعني : لا صاير شي جايد .. احساسي يقول جذي ..

يت لناا غفران و هي تركض ..و تربعت في حضن ابوهاا ..
غفران : ثوف .. أموو أهلام تطقني ..
دخلت أحلام ..
احلام : تعالي .. غفرانوو ..
اخذتها من حضن ابوها و حضنتها ..
رهف : بسم الله ع بنتي .. شو بلاج انتي ..
احلام : سالي بنتج .. ام لسانين ..
غفران بـ ببراءة : انا ما ثويت ثي ..
احلام : امبلى سويتين .. يا الجذابة ..
غفران : انا هب تذابة ..
سامر : شو مسوية .. ؟؟
احلام تيلس يم سامر ..
احلام : رايحة لـ بشار تقول له ان انا اطقها .. و ياا لي بشار و هزبني .. " برطمت " يرضيك جذي ..
ضــحــكـــنا ..
طقيت غفران ع بوزها ..
رهف : صج غفرانوو .. تجذبين هاا !!
غفران : وااااااااااء ..
و راحت لـ سامر تصيح عنده ..

....

" مــريـــم "

يالسة ع طرف الصالة .. ع الكرسي الي كان دايم ييلس عليه فارس .. فــارس .. وينك يا فارس وينك فيه !! من رحت .. الشقة صارت وحشة ..
متى ايي بكرة .. ما تصدقون بـ اطير من الوناسة .. بكرة يوم ملجتي و خطوبتي .. شلون ما افرح ..
دخلت غرفتي و فتحت الكبت .. طالعت فستان الخطوبة .. ضميته لـ صدري .. و رحت لـ التسريحة .. يلست و خليت يدي ع خدي .. اخذت اتأمل ملامح ويهي .. و أبتسمت .. فتحت الدرج و طلعت الطقم .. زادت ابتسامتي .. شلت الخاتم و لبسته .. و التراكي و السلسلة .. طالعت نفسي في المنضرة .. طالع رهيييب .. وايد ناعم ..
شلتهم لماا سمعت صوت الجرس ..
لبست شيلتي و طلعت .. فتحت الباب كانت العنود ..
العنود : السلام عليكم ..
ابتسمت : و عليكم السلام .. تفضلي .. !!
دخلت و يلسنا في الصالة ..
العنود : شخبار العروس ..
انصبغت احمر : بخييير .. و انتي شحالج !!
العنود : يسرج الحال .. الاا اقول لج في وين اخذتي صالة لـ ليلة عرسج ..
مريم : صالة طيران الخليج ..
العنود : أي سمعت عنهاا .. يقولون فخمة ..
مريم : تصدقين ما شفتها ..
العنود : عيل شلون اخذتيها ..
مريم : سلطان الي حجز .. ليش كنسلتين الحجز في الفندق ..
العنود : همممم .. ما اباااه .. اخذت صالة الدانة ..
مريم : جذي عيل ..

[ حبك ليا غالي عليا أحسه بقلبي وأشوفه بعيني حبك ليا بيطمني بيعيشني أحلى سنيني ...... ]
" كلمات أغنية حبك لياا " رنة تلفون العــنــود ..

الصراحة تنرفزت .. ما احب شي اسمه اغاني .. و هذا الي رباني عليه فارس .. فارس !!
ذكراك في قلبي يا فارس .. الله يهنيج فيه يا عيون .. الله يهنيج ..

العنود : هلا و الله .. الحمدلله بخير .. و انت شخبارك ؟ .. ههههههه .. أي .. شوو !!.. مينون انت !! .. ان شاء الله .. تامر امر كم راشد عندي .. هههههه .. مع السلامة ..
صكته و طالعتني مبتسمة ..
وَقَفَتْ ..
العنود : يلا الحين بـ اروح
وَقَفْتْ : ويين !! .. ما شربتي شي ..
العنود : ما يحتاي مرة ثانية ان شاء الله .. مع السلامة ..
لويت عليها : الله يسلمج ..

طلعت من عندي ..
احس نفسيي تعبانة حييل .. رمييت نفسي ع السرير .. دقايق و طرت في عالم النيام ..

.....


" هــيـفــاء "

حرااام عليه و الله حرام .. ابااا اعرف ليش طلقني .. انا شوو سويت .. و أمه ليش ما تحبني لييش .. !! انا سويت شي ما يرضيها .. سويت مثل ما تسوي كل بنت في أم ريلها .. حرضت ولدها عليها .. ما سويت شي من هذاا !! .. انا الي كنت اقول له يبقى معاها و ما يخليها بـ روحها .. لماا حملت .. ما جربتون شعور لما يقولون لج ان ياهل في بطنج .. ذااك اليوم انا نفسي هب مصدقة .. طايرة من الوناسة .. اماا جاسم فـ كان ما يقل عني .. بس .....
جــاســـــم !!
صحت .. وينك يا جاسم وينك فيه !! ليش خليتني و خليت ذكراك بـ قلبي ليييييش ؟؟؟ وين انت فيه الحين .. اكييد تزوجت الي تبيها امك .. و انااا خليتني جذي .. ما كنت اضنك ما تحبني .. كنت اشوف الحب بـ عيونك .. بس ليش طلقتني ليييش ؟؟؟
" حضنت المخدة في احضاني و داريت دمعتي .. بس خانتني و طاحت .. "
دخل سلطان و شاف الدمعة تجري ع خدي بـ ألم و حسرة .. يلس يمي ..
سلطان : هيفاء تصيحين
انفرجت عليه اصيح : وين ما اصييح .. و انا انادي و الصدى يرد الجواب .. لا تقول لي ان انتوا معاي .. " زاد صياحي " محد بـ يعوضني في هـ الدنيا عن الي انا فييه غير جاسم ..
اختفى صوتي مع الصياح .. حضني و ضل يمسح ع راسي ..
كملت كلامي : انتضرته و طال انتضاري .. منو يتحنن علي و يطفي ناري .. انشدك يا سلطان .. من يداريني و لـ فؤادي يداري .. فتح عيونك .. و شوف شوو الحال الي انا الحين فيه .. ما جنت احسب يصيدني جذي ..
رد علي و هو يمسح ع راسي و يمسح آلامي
سلطان : لا تفكرين فيه .. الي باعج بـ رخيص بيعيه بـ رخيص ..
هيفاء : انا بـ اشتريه بـ غاااالي .. بس لا يخليني .. لا يخليني ..
وجنتي احمرت من البجي .. بـ تطليقه لي خلاني اعييش بـ هم .. انا الي ما اتحمل جفاه .. هو الي يامرني و لو موتي له فدى .. رد لي .. جاسم .. لو خذني معاك.. يا جاسم و حاجيني .. توني صغيرة ع لقب " مطلقة " .. هب انتَ خيمة لي .. هب انتَ حصني يا جاسم ..
يا جاسم.. رد ليي .. الله يخليك .. لا تخليني اعيش بـ حسرة فراقك ..
كان في طفل بـ حشاي .. في بسماتي و دمعاتي .. انا احبك ياا جاسم .. بس امك .. ذبحتني .. و فرقت بينناااا ..

......

" فــارس "

ضليت يالس مدة برع غرفة المعالجة .. فكري أبد هب معاي .. الدنياا احسها مفترة في راسي .. وقفت .. و طلعت من المستشفى .. رديت البيت ..
دخلت الغرفة .. و أخذت شيلة لـ عيون .. طلعت و رديت المستشفى .. تفاجأت ان الدكتور لـ حد الحين ما طلع من الغرفة .. يلست ع الكرسي بـ يأس ..
مسكت الشيلة و شميتهاا .. ريحتها ياسمين .. ريحة تفتح النفس ..
طلع الدكتور فـ وقفت
فارس : خيير دكتور
الدكتور : اخذنا فحوصات لها .. اذا طلعت النتائج نقول لك !!
فارس : أقدر اشوفها
الدكتور : أي تقدر ..

ما سمعت شوو قال بعدها .. و دخلت شرات المينون لـ الغرفة ..
كانت مرمية ع السرير .. و التعب باين ع ويهها .. الحين حسيت بـ شدة الي سويته فيها .. تقربت منها و خليت يدي ع خدها اتحسسه .. غطيت شعرها بـ الشيلة و رحت لـ الدريشة ..
ضليت يالس اطالع المكان من برع .. الناس تروح و ترد .. و الدنيا ضلمة .. يلست ع الكرسي و ضليت اطالع عيون .. حالها الله يعلم فيها .. الذنب و الألم بـ ياكلني .. ليش طقيتها ياا فارس ليييش !!

......

" عــيــون "

نشيت من ع السرير و طالعت المكان .. كان ضلاام و ماشي حد .. شوي و دخل فارس .. طالعني بس ما تكلم .. تقرب مني و مسكني من يدي و سحبني .. اناا مشيت وراه .. طلعني من الغرفة .. كان المكااان ضــــلام واايد .. بس شي ضوى متسلل في زاوية من زوايا المكان .. أشر لي أني أروح هناك .. طالعته مستغربة .. بس مشيت لـ المكان الي أشر عليه ..
شفت مريحاانة و فيها بنوتة حلوة .. طالعت فارس .. أبتسم لي و رديت الابتسامة .. أخذت أمريح الياهلة و كانت تضحك .. بس فاجأني فارس لماا يااا .. و شكله معصب .. قلب المريحانة و الياهلة طاحت و أختفت من نضري ..
في ذي اللحظة نشيت خايفة .. وين اناا فيــه !!!!
يعني كل الي شفته حــلـــم ..
الياهلة و فارس و الضلام كل هذا حلم !! تنهدت .. و طالعت المكان فارس كان يالس يم الدريشة و شكله هب معاي .. في مكان ثاااني ..
قلت بـ صوت خفيف : فـ فـ فارس !!
طالعني مفزوع و كأنه كاان في كابوس و نش منه .. تقرب مني ..
فارس : شلونج الحين !!
طنشت سؤاله : انااا وين ؟
فارس : في المستشفى
فتحت عيني : المستشفى !!
فارس : هيه المستشفى
عيون : شو اسوي هنااا
فارس : ما تتذكرين

ردت افكاري لـ ورى .. هيه صح ..فارس طقني ع سالفة التلفون و .... " ما اذكر شو صار بعد هذاا !! "
عيون : اباا ارد البيت
اخذ له كرسي و يلس يم السرير ..
فارس : ما بـ تطلعين قبل ما تقولين لي منو الي كنتين تكلمينه

اففففف .. ردينا لـ طير يلي ..
رديت عليه : ما كنت اكلم احد
زخني من ذراعي و قربني له ..
رد علي و هو صاك ع اسنانه : اقول لج قولي منو الي كنت تكلمينه !!!!!
صحت : كنت اكلم مريم
صرخ علي : جذبي علي بـ غيرها
زاد صياحي : و الله كنت اكلم مريم .. و اذا ما تصدق اسالهااا
طلع تلفونه و مداه لي
فارس : اتصلي لهاا
اخذت التلفون من عنده و يدي ترتجف .. طاحت دموعي ع شاشة التلفون مسحتها من عليه و دقيت الرقم .. و خليته ميكروفون ..
مريم : هلا فارس !!
عيون : انا عيون
مريم : عيون !! خيير شبلاه صوتج ؟؟
عيون : ماشي .. بس انا اتصلت لج الصبح
مريم : هيه اتصلتي
طـالعـت فارس ..
رديت عليها و دموعي تطيح : كم كانت الساعة ؟
مريم : مدري .. كانت ع ما اضن 9 لو 9و نص
عيون : انزين .. شو قلت لج في البداية
مريم : لييش تسالين !!
صحت : مريم الله يخليج جاوبيني
مريم : شبلاااج عيون
شهقت من البجي : مــــريــــم .. جاوبيني رحم الله والديج ..
مريم : قلتي هلا و الله
عيون : بس .. شو قلت بعدهاا
مريم : مدري .. ما اتذكر
عيون : مريم لا تعذبيني .. تذكري
مريم : همممم .. قلتي هلا و الله بـ حبي ..
عيون : مشكورة مريم .. مع السلامة
صكيته و يلست اصييح .. طالعت فارس .. كان يطالعني و علامات غريبة مرتسمة في ويهه ..
مديت له التلفون ..
مسك التلفون و مسك يديني معاااه .. طالعته و عيوني ضايعة في بحر الدموع ..
فارس : سامحيني عيون ..
شهقت من البجي : ......
شال يده و شل التلفون .. يلس ع الكرسي و خلى يده ع راسه .. المكان كان هدوء ما عدى صوت صياحي ..
شعره كان طويل لـ حد انه غطى عينه .. شفت دمعة ع وجنته .. هيه دمعة .. فارس يـــصـــيـــح !!
أول مرة اشوف فارس بـ هذا الحال .. قطع الهدوء صوت الباب ينفتح و ينصك .. رفعت راسي و فارس بعد رفع راسه ..
كان الدكتور !!
لما طالعنا أبتســــمـ ..
الدكتور : مبروك .. البنت حــامـــل !!

>>> يتبع في البارت الجديد