|
|
|
|
21-08-2004, 04:14 PM
|
#1 |
|
(حلا نشِـط )
 
|
سرداح مرداح في حياة عبدالفتاح @@@
اهلين
حبايبي .... شلونكم شخباركم وينكم من زمان ما شفناكم .... هههههههههههههههههه هذا عبدالفتاح مسكين حياته كلها اخفاقات اخليكم تقرون قصته وتعرفونه سرداح مرداح في حياة عبدالفتاح عبدالفتاح هذا اخو عبدالصمد وعبدالصمد هذا اخو عبدالفتاح<--مصالة من اولها عبدالفتاح كان ينجح سنة ويسقط ثلاث يتحايل عليهم عشان مايدخلونه ليلي،المهم انه من كثر مايسقط قفلت مع المدير ذات يوم(منيب هين وناداه لمكتبه..دخل عبدالفتاح وسلم وجلس على الكرسي وقال:الحين انت ووجهك كم مرة اقولك لاتناديني الا وانت طالب لي شاهي ؟!<---تحسون انه مطيح ام الميانة المدير:ياخوي نسيت لاتطقني وجابله الشاهي وكل عبدالفتاح حبوب الضغط والسكر<--مشكلة هالشياب،وقال:هاه وش عندك هالمرة ؟!لاتقولي ازرف راتب مدرس الرياضيات ترى ذا مايزبن<--انواع الاجرام قال المدير:لالا عندي لك موضوع ثاني...انت طبعا دخلت المرحلة الثانوية قبل 4 سنوات والحين ماشاء الله عليك صرت كبير وفي ثاني ثانوي وبصراحة انا صرت استحي اكلمك مدري اقول ياولدي ولا ياجدي،وتقديرا لسنوات الخبرة وحنكة الدراسة عندك قررنا اننا نخليك معيد في الثانوي عبدالفتاح:بينما هو ينغف ويرفع ثوبه عن صرواله الاصفر المقلم بالتركواز قال:يعني شلون ؟<--انواع الدلاخة هالآدمي المدير:يعني انقلع لفصلك لارجفك الحين<--تحسون انه يئس يفهمه عبدالفتاح:الحين مقومني من النوم وجايبني من الفصل عشان تقولي ارجع؟!بس هالمرة ابمشيها بس ياويلك ان عدتها وطس خوينا للفصل وكان عليهم كيمياء والمدرس جديد اول يوم يداوم بعد مافلق عبدالفتاح راس المدرس القديم بتفلة مليون حصان،يوم فتح خوينا الباب الا والمدرس يركض اهلا يابيه..ابنك اي واحد فيهم ؟! عبد الفتاح:ما يدري وش الطبخه عاد الطلاب قاموا يضحكون وقال واحد منهم:هذا الاب الروحي للفصل وشعار المدرسة والعلم وقريبا بيحتفل بالمئوية عبدالفتاح وصل به الغضب اقوى شي بالعالم<--خرب ام الجملة بالنهاية وطلع العجرة من جيبه<-- شنطة جمس ذا موب جيب،وقال ايها المصري الارعن..لاجعلن منك حب مصري ابونص،ولاقطعنك اربا اربا وابيعك لحم مثلج باستثناء اباطك فبرسلها للصرف الصحي لحاجتهم الماسة والفضة ولايهون الذهب لها المدرس قفلت اخلاقه خاصة مع ضحك تماسيح الفصل وعاد علموه انه طالب هنا مع سبق الاصرار والتنفيذ<-- قعد عبدالفتاح في طاولته اللي مضبطها ومركب لها لحية وانوار زنون ومكتمها<--كني بديت اخمبق،واخذ له صاروخ حشيش معتبر وسحبها نومة وهالمرة وهو نايم جاه الجني الازرق وطلعله مع زمزمية الشاهي<--- القروي قروي حتى بحلومه،وقاله ياعبدالفتاح الا متى بتقعد كذا؟!خلاص ياخي مامليت غير عيشتك صدقني بتستانس... فز عبدالفتاح من مكانه وقال ايه والله انك صادق..قطعه المدرس المصري:الله يسلمك ياجدي،طبعا مايبيلها كلام ان المصري كلّه كم كف على الطاير،المهم عبدالفتاح جازت له الفكرة وقام يفكر وشلون يغير طريقة حياته يعني يطبخها بعافية ولا يقعد على نباتي،استشار عبدالفتاح احد اخوياه من مروجين الحشيش الباور هورس،المهم انه قاله يدز البحرين وبيلقى شغلة هناك حلوة،المهم ان عبدالفتاح بما انه شبه موظف بالمدرسة خذ له استثنائي وسافر،راح خوينا البحرين وقام يتسكع في شارع المعارض(شارع الفلة للبعض وشارع الدجة للبعض الاخر،دخل احد المراقص..وبما انه ماقد شاف خير وكان شبه فاقد وقف بنص المرقص وقال:قاق قاق احتشمي يابنت..ياشاب اتق الله قاق قاق<--مسوي جمس الهيئة،ثم قام يغطي عيونه بالشماغ يقاله مستحي...طبعا كل هذا بتاثير السكرة ولا هو ماوفر الهندي زبال المدرسة،ثم جلس على الارض وقام يزاعق القهوة ياولد...طبعا بعد تدخلات ومحاولات عديدة من حقين الامن استطاعوا بالنهاية انهم يمسكون يده<--كان قالبها سامري،الين هدا وجلس بالربعة ومازال مصر انه يتكي على الارض...بعد ساعات انفكت السكرة بخير ولله الحمد،وقعد يناظر الرقاصات بالفم المليان<-- لاتشرهون معطيني شوي قبل يشرب،عاد على حظه اول ماعود لوعيه قفل المرقص..بس الرجال معيي يطلع...يقولون له خلاص قضى الدوام يقول انا دافع فلوس،وعاد يوم يئسوا يطلعونه راحوا نادوا وحدة من الرقاصات وطلعته لان وقتها كان زي السكران وهو يناظرها،طلع عبدالفتاح وجلس عند الباب يحتريهم يفتحون ثانية،وصار الرجال مداوم هناك الين قدم على وظيفة وقال اكحل عيني ببلاش ازين،وافق المرقص ووظفوه سكيورتي بالمرقص،اليوم الاول من حياة محشش في مرقص...كان مزكم شوي،اول مافتح المرقص وعبدالفتاح طاق التكميلة والكاب وفارد عضلاته،طبعا صارت البشرية تدخل المرقص بدون ماتدفع لان خوينا عبدالفتاح فاق كشرته ويناظر الرقاصات...المهم ان احد الاخوان الجالسين فقد وطار عقله وبما انه من طقة عبدالفتاح..راح وطب عند الرقاصات وقام يرقص وطبعا هنا لازم يتدخل البطل عبدالفتاح لينقذ الرقاصات المصون من هالسكير،ويجيك عبدالفتاح طاااير وينقز على المسرح مدري وش اسمه اللي يرقصون عليه ويعطيها هز ويرقص مع السكران الثاني،وعبدالفتاح يزاعق هز ياسنايدي هز،طبعا تدخل احد مسئولين الامن بالفندق وكلبشهم ومافيه الا تمزيع بس طلع منها عبدالفتاح لانه كان مضبط وضعه مع السكيورتي وعطاه فرصة ثانية،المهم رجع عبدالفتاح للدوام الفلة،وكان ماسك اعصابه الين سوت وحدة من الرقاصات حركة مالها داعي وخذت ورقة من واحد من الحاضرين ويفحط عبدالفتاح على رجليه ويروح لذاك ويمسكه مع خشمه ويقوله هيه انت ماعندنا بنات يسوون هالحركات وبعدين لاشفتها كاشفة تسوي هالحركات ويعطيه كم كف على كم بقس الين تسدح على الارض وقاله:الكذب امامك والقبر قدامك وقامت الرقاصة تزاعق ويجي عبدالفتاح ويلطمها على خشتها ويصارخ بوجهها اها بس حركات نص كم ماتمشي عندي...وبعد ان دبت الفوضى في ارجاء البلاد جا مسئول الامن ويكلبش عبدالفتاح ويتله للدور الارضي ويرمي عليه يمين الطلاق قصدي الفصل،وفصله من الشغل الرهيب،ورجع عبدالفتاح وهو يجر اذيال الهزيمة مكملا بذلك مشواره الطويل في الدراسة |
|
|
|
 |
| مواقع النشر (المفضلة) |
| الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| قصة حياة كريستيانو رونالدو | Gad | مجلس حــلا الــريــاضـي | 3 | 16-10-2005 01:37 AM |
| قصه حياة النجم رونالدو | حنين86 | مجلس حــلا الــريــاضـي | 6 | 20-09-2005 01:17 AM |
| نحو حياة افضل | نورفلسطين | ۞ مجلس حــلا الاسلامي ۞ | 9 | 03-09-2005 04:09 PM |
العرض العادي
