((للحــب عنــــوان)) ..,, قصـــه حلـــوة ..,,

[Gad]

غزلان +حصه: السلام عليكم
المديره: وعليكم السلام.. غريبه ليش يايين من اول يوم عندي معقوله شطانتكم بدت وطردوكم؟؟
غزلان: لا الله يسامحج ابله.. نحن يايين ونبا نطلب منج طلب..
المديره: اتفضلوا..
غزلان: ليش فرقتونا؟؟ حرام .. هاي اخر سنه.. ابا اكون ويا حصووو..
حصه: هي والله انا بعد ابا ابله.. كافي ان السنه اليايه كل وحده بتسير تخصص ولا جامعه غير عن الثانيه..
المديره: اكيد الوكليه غيرتكم عشان المشاغبات..؟
غزلان: عاد على اخر سنه اتغيرونا والله حرام..
المديره: خلاص خلاص.. لا تصيحون.. انا برمس الوكيله عشان اتردكم.. واترد اي حد يبا يرد صفه الجديم.. خلاص راضين علي احين..
حصه: مشكوووووره يا احلى مديره في الكره الأرضيه
غزلان: والمريخ.. والمشتري.. وزحل.. والزهره.. ونبتون.. وبلوتو.. وكل الكواكب..
المديره: ههههههه.. يلا روحوا للوكيله وانا يايه وراكم احين..
طلعوا من الغرفه وهم مستانسين حدهم واخيرا بيجتمعون سوى في نفس الصف.. ام عادل تمت سرحانه وهي اتشوف الإبتسامه على ويه حصه.. واتخيلت نفس الإبتسامه لعادل يوم بتكون من نصيبه..

..


وغزلان نقلوها لصفها الجديم .. وردت ويا حصه.. وطبعا غزلان كعادتها ما تنسى شغل الزعامة.. لازم تسحب حصة وياها في مغامراتها بس هالمره حصه ما سمعت لها.. دق جرس الحصه الأخيرة وغزلان ظهرت من الصف تمت اتحوط شوي في المدرسه.. بعد ما مر على الحصه ربع ساعه دخلت... كانت عليهم مدرسة الكيميا الي ادرسهم من الصف الأول الثانوي.. أبله مريم..
دشت غزلان الصف وبصوت عالي: الســــّلام عليكم.. ليش ما تردون؟؟
أبلة مريم: لا والله؟
غزلان: أوه.. أبلة مريم هني.. شحالج؟ شخبارج؟؟.. كل عام وانتي بخير؟؟
ابلة الكيميا: ردي مكانج يلا..
غزلان: أفا.. ما توقعت منكم جيه.. شو سويتوا بأبله مريم.. اقولها اشحالج اتقولي ردي مكانج..
أبلة مريم: وبعدين يعني..
البنات تموا يضحكون على تصرفات غزلان واستهبالها وخبالها.. وهي ردت مكانها.. وناقعه من الضحك.. شافت كتاب الكيميا محطوط على طاولتها.. بس ما كان عندها كتاب النشاط..
غزلان نشت وحاطه ايدها على خصرها: لا والله.. اشمعنى انا الوحيده الي ما عندها كتاب نشاط.. ناسيني من الحسبه..
أبلة مريم اتعرف سوالف غزلان وتمت تضحك عليها: لا حووول.. أم لسان.. من يوم ما درستج من اول ثانوي للحين.. ما تكبرين ولا تتغيرين..
غزلان: ترا ماشي أبلة كيميا غير وحدة بس حلوه مثلج تتحملني..
ودق الجرس وطلعت غزلان ويا الأبلة وهم يسولفون طول الدرب عشان تاخذ كتاب النشاط من المخزن.. وبعدها ظهرت ويا حصة عشان تروح صوب المواقف ويردون البيت.. ومن ظهروا شافوا ابراهيم يترياهم تمت غزلان تتحرطم وما تبا تروح وحصة تسحبها غصب..
غزلان: مابا قلت لج مااااااااابا.. شو ما تفهمين عربي.. غصب يعني
حصة: هيه غصب.. ولا تراني بزعل..
غزلان: انا مادري كيف يتحمل ملاقة اخوج.. يلا امشي..
حصة: عقب الزواج بتتحملين كل شي..
غزلان: شو.. زواج.. لا لا لا.. اخاف منكم اتورطوني اتودوني عند الملاج احين مافيني.. مجرمين خليني.. مابا ادريبج انتي متفقه ويا اخوج ادري..
حصة: انتي وايد متأثره بالمسلسلات.. امشي بسرعه
ركبوا الموتر.. وابراهيم كان مستانس وايد لشوفة غزلان.. بس الي زعله ان غزلان من ركبت الموتر تغطت..
حصة؟: انتي عكس الناس من تركبين الموتر تتغشن.. وبرع لا
غزلان: مو شغلج..
ابراهيم: خلي البنت على راحتها اشفيج انتي..
حصه: تدرين الحركة الي سويتيها في ابله مريم حللللوه..
غزلان: بعد عشان اتعرفين.. توه هاي اول جرعه اتريي الباجي اكثر..
ابراهيم: شو سويتو اليوم.؟؟
غزلان: شو هاللقافه عفان الله.. وقف وقف بنزل هني بكمل مشي للبيت
حصه: قعدي شو اتخبلتي انتي.. مب صاحية اليوم شكلج.. تبين تنصلخين في هالحر..
غزلان: اصلا انا اصحى منج.. ما كنت صاحية يوم ييت وياج انتي..
حصه: اقول نزلي وصلنا بيتكم.. اشوفج العصر عشان انجلد الكتب سوى
غزلان: اوكي يلا باي
ابراهيم: في حفظ الرحمن..

غيضت غزلان من ابراهيم بس طنشت ودخلت البيت وشافت هادف ووداد قاعدين في الميلس يسولفون.. دخلت عليهم وكان هادف حاط راسه على ريل وداد وهي كانت تلعب في شعره..
غزلان: لا والله .. كل هذا يصير وانا محد
هادف: وصلت الحسوده..
وداد: فديت غزولتي انا.. تعالي وقولي لي عن أول يوم دراسي.. كيف كان؟
غزلان: لا بالأول خل اسمع يوم الدراسي لهادف..
هادف: لازم يعني هاللقافه..
غزلان: وهاي قعده اتريا حضرتك تنطق..
وداد: انا سمعت السالفه مابا اسمعها مره ثانيه
غزلان: والله مب مشكلتي جان اترييتي لين ما اوصل..

هادف: اسمعي.. اليود دشيت المدرسة وكان محمد وناصر وياي.. وكل شوي انا ومحمد نسولف بصوت عالي ونضحك.. والشباب مب مصدقين ان هذا الي وياي هو محمد نفسه.. وشله حمدان كانوا دوم يحطون على نصوور قاموا يخافون مني.. اذا انا مشيت في درب هم يمشون عكسه.. والأساتذه ما يرمسوني.. ولا المدير يطالعني بنظرات اجرامية وده يطردني من المدرسة.. راح له محمد وفهمه كل شي.. وتم يمدحني جدام المدير وقال له انه رد علاقته وياي لأنه عرف إني فعلا تغيرت.. وقتها صدق استانست وتطمنت ان الله عطاني ربع بمعنى الكلمة.. وحسيت ان الله عوضني..

[Gad]

غزلان: اخي العزيز.. اني اهنئك بهذا الصديق الحقيقي الذي لديك.. احتفظ به.. وابقى معه ابد الدهر.
هادف: شكرا يا اختاه على هذا الشعور الطيب..
وداد: لقد حان وقت الغذاء.. هلمووا.. هههه الله يخس ابليسكم خليتوني اتخبل شراتكم..
بوسعيد: لا والله بغزلان حبيبتي.. ليش ما بدلتي للحين..
غزلان: كنت اسمع قصه كليله ودمنة من هادف..
هادف ضربها على رقبتها.. وهي صرخت ..: انا اراويج..
ام سعيد: الله يخليكم لبعض على طول ولا يفرقكم يا عيال..
الكل: آميييييييين
هند: انا الصراحه يوعانه مافيني اتريا.. الغدا بيبرد ترا
.....

سلطان قعد يقيل ويا هله والكل يسولف.. فدوى كانت تلعب ويا عيالها.. واما الباقي فيسولفون ويا بوسلطان وام سلطان..
سلطان: اقول امي.. ما قلتي لي متى قررتوا املج على وداد.. ترا انا حدّي مستعيل..
جاسم: عاش المعرس..
أم سلطان: خل بالأول احل سالفة مريم
سلطان: لاحووول.. انا شو ذنبي يوم الله رزقنا ببنت خالة علة ..
أم سلطان: مب ذنبك.. ذنبها هي انها ياهل وما عندها عقل وما تعرف اتفكر صح
سلطان: مشكله يوم نبتلش بيهال..
ناصر: والله من يوم ما خبرني احمد وقالي عن اسلوبها وهي ترمس كرهتها ..
أم سلطان: الله يهديها..
جاسم: ابا افهم.. شو تتحرى الزواج غصب.. ؟؟ خل تتريا نصيبها.. لازم تخرب على غيرها..
سلطان: الله يخليكم صخوا عن طاريها انا روحي واصل حدي منها..
ام سلطان: دريت ان عرس اخوها اسماعيل عقب العيد
سلطان: الله يهنيه..
بوسلطان: اسمع يا سلطان اشرايك ارمس عمك الليله اقول له اذا طاع يعني.. انا نملج بكم في رمضان؟؟ والحفله بعد العيد.. يعني بعد عرس اسماعيل؟؟
سلطان ابتسم واستانس على راي ابوه: صدق.. والله ياريت
ام سلطان: خوش فكره..
بوسلطان: خلاص عيل الليلة بنسير بيتهم.. وبنرمسهم في الموضوع
سلطان: بس وداد قالت لي مره انها ما تبا حفلة غير يوم سعيد اخوها يكون موجود
بو سلطان: مو مشكله.. اهم شي الملجه..
سلطان: اقول جاسم ما تعرف رمضان السنه متى راح يكون؟؟
الكل تم يضحك على سؤال سلطان الي بين اشكثر مستعيل على هالزواج..

.. ..

بيت عادل الجروان..
عادل طول الوقت يحاتي موضوع حصة.. فقرر انه يفاتح امه بالموضوع ويشوف شو سوت.. كانت ام عادلواميره قاعدين في الميلس يسولفون ..
أميره: يني من يبنا طاريك طلعت لنا؟
عادل: ليش شو كنتوا اتقولون عني؟
أم عادل: كنت ارمس اختك عن حصه.. وقررنا خلال هالإسبوعين نروح بيتهم..
عادل: إحلفي.. قولي والله؟؟ يعني بتخطبونها لي.. توني كنت ياي ارمسج في هالسالفه لأني ماباها اتطير من ايديني
أميره: لا يكون حمام وانا مادري.. دوومك مستعيل..
عادل: المصرقع ريلج.. انجبي انا ارمس مدام نعيمه.. إم عااااااااااادل.. ومليون خط تحت عاااااادل
أم عادل: هههه.. لعلني ما انحرم من هالفرحة.. وعقبال ما افرح فيك معرس وارقص في عرسك..
عادل: انتي اخطبي ولي.. وخل اعرس.. وبترس لج هالبيت كله عيال.. بييب يوسف.. وريم.. وعايشه.. وأحمد.. وغيرهم.
أميره: ولا بعد سماهم بعد.. انت شو ناوي تقضي على المجتمع بعيالك
أم عادل: ربي يهنيك ويرزقك بالذرية الصالحة يا رب.. وانت بعد رمس استاذك..

عادل: احين.. احيييييين برمسه..
أميره: يوم اقول مصرقع ما تصدقوني.. ههههههه




.. .. ..

[Gad]

في بيت العم خليفه(أبو سعيد)


كانت وداد قاعده ويا غزلان وحصة اتساعدهم في تجليد الكتب.. وهند اتساعد امها في شغل البيت..
هادف: وييييييو.. يهالوو.. بعدكم انتوا على سالفه تجليد الكتب..
وداد: صح .. حبيبي هات كتبك خل اجلدهم..
هادف: لا شو.. تبون يقولون عني مصري.. ولا ياهل.. مابا ..
غزلان: انت اخس كتب كتبك .. مقطعه على اخر السنه وها كله لنك ما اتجلد..
حصه: هههه.. اشفيكم كلتوا الولد خلوه.. يوم بتتقطع كتبه ذاك الوقت نحن بنضحك عليه..
هادف: جب جب .. فالحين ترمسون بس.. صدق انكم حريم


رن تليفوون البيت على طول ربعت تشل التليفون..
هادف: نشت البداله.. الي يشوفها جن التليفون بيركض عنها وبيشرد..
غزلان: ما عندي سالفه ارد عليك.. ألوووووو..
الطرف الثاني(--): السلام عليكم
غزلان من سمعت صوت ريال اتخرعت لأن الصوت غريب عنها وغير جيه الرقم أول مره اتشوفه.. : منو؟
(--): انتي الغزاله.. أنا متأكد من صوتج..
غزلان: هيه انا غزلان .. منو وياي؟
(--): بعد اسمج غزلان.. صدق اسم على مسمّى..
غزلان: نعم.. وبعدين.. منو وياي؟؟
وداد: هاتي التليفون خل اشوف منو؟
غزلان: ماعرف.. واحد مادري بلاه يستهبل..
طبعا الطرف الثاني من سمع صوت وداد.. بند بسرعه .. ووداد ما سمعت غير صوت الخط وهو ينقطع طووط طووط
وداد: الله يغربلهم.. يلعوزون الخلق.. بس ما عليه ها رقمه في الكاشف اذا اتصل مره ثانيه بخلي سلطان يتفاهم وياه.. خل اكمل تجليد احسن
غزلان: لا ما يحتاي.. انتي سيري ساعدي امي.. وأنا بجلد الكتب ويا حصه.. واذا بغينا مساعده الأخ هادف موجود..
هادف: ايه انتي.. انا ساير .. ما بساعد ولا شي..
وهي رن التليفون عصبت وداد واتحسبت ان نفس الشخص رد يتصل.. وردت بسرعه من غير لا تتطالع الرقم.. وافتشلت يوم سمعت صوت مرت عمها (أم سلطان)
وداد: آسفة عموو.. بس توه واحد متصل يستهبل اتحريتج هو.. المهم اشحالج؟؟ وشخبارج؟؟
أم سلطان: بخير طاب حالج.. أقول الغاليه اليوم طالعين مكان؟؟
وداد: لا عمو ليش؟
أم سلطان: قلنا بنيي الليلة عندكم وأنا وعمج والعيال
وداد استانست من سمعت هالرمسه.. أكيد سلطان وياهم: هيه هيه.. حياكم الله .. البيت بيتكم.. أي وقت
أم سلطان: خلاص عيل انتي سيري خبري أمج .. ونتشاوف عقب
وداد: خلاص صار..

بندت وداد الخط وربعت بسرعه عشان اتخبر امها السالفه.. وأما غزلان فكانت اتفكر فاللي متصل.. كيف عرفها.. ومنو هذا؟؟ .. والأفكار اتوديها واتييبها.. لاحظت حصه القلق الي باين على عيون غزلان ودرت الي بيدها وبدت تسألها: حووو.. اشفيج؟؟ شو صاير ؟؟ روميو مات..
غزلان: يالسخيفه.. (تمت تتطالع حواليها اذا في حد يسمعهم من اهلها ولا ماشي).. سمعي.. الي كان متصل توه عرفني.. قالي انتي الغزاله اكيد نفس الصوت..
حصه وهي فاجه عيونها وبصوت عالي: منو هذا.. ؟
غزلان وهي تضربها على راسها: يالغبيه خفي صوتج.. فضحتينا.. ماعرفه.. بس خايفه والله
حصه: لاحوووول.. ومنو هذا.. انا اموت واعرف..
غزلان: مادري بس ما اتوقع حد من الأهل لأنه صوته مب مألوف.. والرقم غريب
حصه: يعني ظهر رقمه..
غزلان: هيه
حصه: شوفي اذا اتصل مره ثانيه سأليه انت منو؟؟
غزلان: لا والله احلفي..
حصه: شو بلاج غبيه.. ما قلت اتعرفي عليه.. قلت سأليه انت منوو.. يعني شو بيطلع لج من السماعه مثلا
غزلان: اسكتي اسكتي.. وداد يايه صوبنا مافيني اتعرف..
وداد: اليوم عمي وعياله بيون..
غزلان وبخبث: كل عياله.. حتى ولدهم العود..
حصه: أكيد.. أصلا ما يستوي ايون بيتكم ومن غيره ما تحلى القعده اصلا
وداد: سخيفات.. اصلا انا ما عندي سالفه اخبركم
هند: متى اتحيدينهم عندهم سالفه.. خبريني انا..
وداد: امي ما قالت لج.. يقولج عمي ومرت عمي وعيالهم بيونا..
هند: هييه.. بس حسافه احمدوو محد..
غزلان: ماعليه المهم نصوور الدعله موجود
هند: تدرون.. اشتقت لسعيد خاطري ارمسه..
وداد: وانا بعد اتصدقين.. نشي خل اندق له..
وهني رن تليفون حصه وكان الرقم غرب.. ترددت انها ترد في البدايه بس عقبها ردت..
حصه: ألوو..
أبلة نعيمه: السّلام عليكم.. وياج أبله نعيمه
حصه وهي متفاجأة: أبـــله نعيمه.. هلا. وعليكم السلام
المديره: أنا خذت رقمج من أبلة هنادي لأنج دوم على اتصال وياها.. اشحالج ؟؟
عادل كان لاصق بالسماعه يبا يسمع صوت حصة وأميره ناقعه من الضحك عليه.. تم يصّر على أمه انها تتصل فيها وتسألها إذا كانت مخطوبه ولا لا.. وتفتح وياها السالفه .. لأنه مب قادر يصبر زود...
حصه: الحمد لله بخير.. بس غريبه صاير شي.. حد مشتكي عليّ؟
المديره: هههه.. لا تخافين محد مشتكي ولا شي.. ما وحّالكم اتداومون.. بس بغيت منج رقم أمج إذا سمحتي..
حصه: شووو (امتلكها الخوف تمت اتقطع في الكلام وتبلع ريجها).. أأأأمي.. لـ..لـ.. لـ.. ليش؟
المديره: شو بلاج خفتي.. قلت لج لا تخافين.. انتي قولي لي منو وياج؟
حصه: وياي غزلان,,, ليش؟؟ والله طاح قلبي..
المديره: عطيني برمسها..
حصه: غزلان.. المديره تبا اترمسج
غزلان تمت اتأشر لحصه (ليش؟).. ردت عليها حصه بالإشارات (ماعرف)..
غزلان: ألوو.. السلام عليكم.. اشحالج ابله؟
المديره: وعليكم السلام.. بخير.. اسمعيني.. بقولج شي.. ومابا حصه اتعرف شي عن الي بقوله لج لين ما ارمس امها..
غزلان: ان شاء الله..
حصه تمت اتحاول تلصق في غزلان عشان تتسمع بس غزلان تصدها وما تخليها..
المديره: بغيتج اتقولين لي.. حصه مخطوبه لحد.. محيرينها لحد..
غزلان: اممم... لا
المديره: الله يبشرج بالخير.. انزين.. عطيني يما رقم امها..
غزلام: حصوو.. كم رقم امج؟
حصه: (******).. (بصوت واطي).. شو السالفه؟
غزلان: هاج ابله الرقم .. سجلي عندج (******)
المديره: مشكووووره.. يلا مع السلامه.. مثل ما وصيتج مابا حصه اتعرف بشي..
غزلان: خلاص صار ان شاء الله..
بندت غزلان الخط وهي تضحك ونفس الوقت اتحاتي من كلام المديره ودها اتعرف شو الموضوع مب قادره..
حصه: غزالوو.. شو السالفه خبريني..
غزلان: حالي من حالج مب فاهمه شي..
حصه: ضحكة المكر هاي ماحبها.. ممكن اتقولين شو السالفه؟؟
غزلان: صدقيني ماعرف شي.. انتي روحي بيتكم واعرفي السالفه من امج.. وخبريني..
حصه: لا اول لازم اعرف منج..
غزلان: بتروحين بيتكم ولا افرج..
حصه: والله اذا طلعتي اتعرفين شو السالفه وما قلتي لي.. براويج
غزلان: والله ماعرف شي.. انتي روحي..
حصه: اقول.. انا بسير البيت.. انتي الواحد ما ياخذ منج لا حق ولا باطل..
غزلان: احسن.. يلا برع..

طلعت حصه وربعت بيتهم عشان اتعرف شو السالفه.. اول ما دخلت لقت سالم ريل عزيزه اختها يطالعها ويضحك.. وعبدالله كان يلعب ويا عياله من شاف حصه ودر عياله وتم يأشر لخوله مرته الي تمت اتيبب .. شكت ان السالفه مب هينه وفي شي صاير.. لأن الكل مب على حاله.. ومخبين شي.. سارت الميلس عشان اتشوف امها الي من شافت حصه ربعت وحضنت بنتها وتمت اتصيح: يا عيني عليج يا بنتي كبرتي وصرتي عروس وقاموا الناس يخطبونج.. كبرتي وكبرتينا وياج...
حصه: ممكن افهم السالفه.. ترا انا بتخبل مب فاهمه شي..
عزيزه: خلوني انا بفهمها.. ترى هاي طول عمرها بتم خديه ولا بتفهم ..
ابراهيم توه كان داخل البيت.. ومعصب ليش ان حصه ردت البيت من غيره لا تترياه.. : السلام عليكم.. انتي هني؟؟ انا مب قايلج اترييني انا بييج؟؟
حصه: اووه.. انا مب فايجه لشي.. فهموني ممكن.. شو السالفه؟
ابراهيم: اي سالفه.. شو السالفه ..
ام عبدالله: اقعد امي بخبرك شو السالفه..
بو عبدالله: سمعي يا بنتي انتي كبرتي وصرتي حرمه.. ماشاء الله عليج..
حصه وهي تقاطع كلام ابوها: وبعدين والله صدعت وافتر راسي.. ابا افهم .. مب قادرة اجمع أبا افهم الله يخليكم حد ينطق ويقول لي.. شو بتتبرون مني؟؟ ولا هي صح.. انا مب بنتكم وانتوا متبنيني واحين لقيتوا اهلي..

[Gad]

خوله: ههه وحليلج متاثره وايد بالأفلام المكسيكيه..


ابراهيم: انا بخبرج بمعلومه.. شوفي انتي شفناج عند الزباله لافينج بقماط ابيض.. لا لالا .. وردي.. وفارينج.. وشليناج ويبناج عندنا وكبرناج


الكل تم يضحك على شكل حصه الي شوي وبتنفجر صياح


أم ابراهيم: بس دوختوا بنتي.. خلوها عروس تستاني.. سمعي يا بنتي مديرتكم خطبتج لولدها.. وهذا الشي الي يخليني انا وابوج واخوانج اسعد اهل في الدنيا وفخورين ان عندنا بنت مثلج.. الي اختارتج انت يمن بين المئات البنات الي جدامها وبنات العوايل الي تعرفهم..


نشت ام ابراهيم وحضنت بنتها الي كانت تذرف الدموع من عيونها والفرحمه مب شايلتها.. ما تعرف شو اتسوي.. ونظره اخوانها لها.. والفرحه الي في عيونهم.. حست بفخر من نفسها.. واستانست يوم انها قدرت اتفرح اهلها بهالطريقه.. ما تصورت انها تكون سبب فرحتهم لهالدرجه..الخجل والحيا كان مالي خدودها.. بسرعه نشت وركضت عشان تروح غرفتها.. بندت البال وساندت ظهرها على الباب واتصيح من فرحتها.. ماكانت مصدقه الموقف الي هيه فيه.. كيف هذا كله يصير في يوم وليله.. كانت اتحس عمرها في حلم.. وما ودها اتنش منه.. فتحت مقبض شعرها ونزل شعرها الأسود الطويل وانسدل على ظهرها ونشت راحت اتجابل المنظره تمت تتطالع عمرها.. في المنظره وتتأمل في ملامحها وتتخيل عمرها عروس.. والطرحه على راسها.. والناس قاعدين يطالعونها.. وحست بالخجل من أفكارها.. وما قامت منها إلا بصوت دقة الباب الي ربعت عشان تفتحه شافت ابراهيم واقف جدامها ويبتسم لها..

ابراهيم: ها يالعروس.. تستحين بعد.. خبريني شو رايج ياللي سمعتيه..
حصه: ها (بإرتباك).. رأيي.. أنا.. في شو..
ابراهيم: اخ منكم انتوا يالبنات.. شطار في الإستهبال.. يلا عاد.. انا برهوم.. ماترومين اتخشين عني شي..
حصه: اولا انتوا بعدكم ما سألتوا عن الريال.. وثانيا لازم اشوف صورته على الأقل
ابراهيم: بس سالم يقول انتي شايفتنه وهو شايفنج.. والظاهر خبلتيه من شافج.. على طول خطبج.. وها دليل انه ريال محترم ما يفكر انه يلعب..
حصه: بس انا ما شفته ..
ابراهيم: مادري ناصر يقول مره في مركاتو شافج وانتي شفتيه هو نفسه قايل حق سالم لأنه كان طالب عنده..
حصه: ها.. إحلف؟؟ لا لا ما صدق.. معقوله.. ذاك الي تلاسنت وياه.. لا لا لا.. واي يما بيغمى علي
ابراهيم: ههههه.. ايه اشفيج بسم الله.. وبعدين ليش تتلاسنين وياه المسكين.. من البدايه راويتيه العين الحمرا
حصه: هههه.. اقول اطلع برع
ابراهيم: عروس مانروم نقول لج شي.. تطردنا بعد.. ما عليه انا اراويج.. ما بقول لج السالفه الي كنت ياي اخبرج عنها..
حصه: برهوووووووووووم.. حبيبي انت .. اتخش عن حصونه
ابراهيم: وااااي ماروم على الدلع ما اتحمل.. سمعي.. يوم الخميس بيون يخطبونج رسمي.. وعشان اتشوفينه بعد.. بس ها.. لا تخبرين حد غير غزلان.. أقصد من رباعتج.. تعرفين بعد سوالف البنات.. قولي لهم اذا صار كل شي رسمي..
حصه: ان شاء الله.. أحين ممكن اتسوي لي خدمة صغيره
ابراهيم: اشوف بدت الطلبات من احين.. عرسي عشان ريلج يبتلش بطلباتج..
حصه: هاك هاي ورقه كتبت فيها كل الي احتاجه للمدرسه..
ابراهيم: واخوج الي يدفع.. بفلس عيل جيه..
حصه: أفا انا اختك حبيبتك.. اذا ما صرفت عليّ تصرف على منو
ابراهيم: خلاص ان شاء الله من هالعين قبل الثانيه..
حصه: تسلم لي عيونك.. يا أحلى أخو في الدنيا..
ابراهيم: والله ماشوف بعض الناس حسوا بالحلاة الي تقولين عنها..
حصه: بتحس.. اذا مب اليوم باجر..
ابراهيم: مع السلامه

طلع ابراهيم من الغرفه عشان ياخذ الأغراض الي تباهم حصه للمدرسه وتمت حصه تكمل سرحانها بأحلامها وتتذكر شكل عادل.. ونظراته.. وما كانت منتبهه لتليفونها الي احترق من كثر ما يرن
..

في بيت العم خليفه (بو سعيد)
غزلان: اوهوووو.. وبعدين ويا هالبنت.. ليش ما ترد؟
ناصر: قولي الفضول ماكلنج..
غزلان: انت اسكت انا واصله حدي.. ومب فايجه لشي.. أقول هادف قوم حل انسير بيتهم وأعطيها ورقه طلباتي والبيزات عشان تاخذ لي شراتها,..
هادف: يلا لبسي شيلتج..
غزلان: ليش انا شو لابسه.. خيشه..
هادف: اوهووو .. شو عرفني فيكم انتوا البنات.. عباتج اقصد..
غزلام: جيه وين بسير انا الا هو بيت حصو.. خطوتين جدام بيتنا..
طلعت غزلان ويا هادف وسارت صوب بيت حصه وكان ابراهيم توه طالع من الكاراج.. ومن شاف غزلان وقف موتره ونزل وسار صوبهم.. ومن شافته غزلان تمت تتأفف وردت البيت.. وتم هادف يناديها وهي مطنشتنه ما ترد عليه.. حس بالفشله وياله ابراهيم وسلم عليه
هاف: هلا والله بو خليل..
ابراهيم: اهلين.. الحمد لله على السلامه.. ادري متأخره بس ما شفتك من وقتها
هادف: لا عادي.. الله يسلمك.. بس الرضيعه كانت تتصل في حصه وما ترد عليها بغت تعطيها هالورقه والبيزات عشان تاخذ لها نفس الأغراض.. يطقمون اونه.. والله هالبنات ما عندهم سالفه..
ابراهيم: اشعليك خلهم يستانسون.. هات الورقه وانا باخذ لها.. وحياها الله.. حصه داخل..
ومن سمعت غزلان هالرمسه غيضت: لا شكرا.. ما يحتاي.. هونت مابا اطقم وياها..
ابراهيم: ليش افا عليج.. ماشي فرق بينا.. وبعدين انا ساير اخذ لحصو..
غزلان: هادف.. ناصر يزقرك تعال..
هادف تم يضحك في خاطره على اشكالهم ومفتشل من ردة فعل غزلان ويا ابراهيم بس ما يروم يقولها شي..
هادف: اسمحلي بس الرضيعه دفشه شوي.. تامرني على شي.
ابراهيم: لا سلامتك..


ابراهيم حز في خاطره تصرف غزلان.. وماكان وده انه يشوف هالكره في عيون غزلان صوبه.. بس هو معاهد نفسه انه يصبر.. وراح يصبر إلين ما يلين قلبها واتحبه.. وقتها راح يخطبها.. أما هادف فرد البيت مغيض من اسلوب غزلان .. بس شو بيقول.. لأنه يعرف انها عنيده.. وما تسمع لحد.. خصوصا في هالموضوع.. دخل البيت وياها وهو ملاحظ ان ابراهيم ما غير وقفت ابراهيم ما تغيرت..
هادف: اف منج.. فشلتيه المسكين..
غزلان: احسن عشان مره ثانيه لا يفكر انه يتدخل..
هادف: الله يهديج..
غزلان: شو مينونه شايفني..
هادف: لا حشى.. عاقل.. وماشي اعقل منج.. يوم انج اتضيعين من ايديج ريال شراته شاريج.. وماشي احسن منه.. بس انتي الكلام ضايع وياج..
..

في الصاله ..
بوسعيد والعيال كلهم قاعدين وسوالف وضحك.. سلطان طول الوقت عينه على وداد ويتأمل تصرفاتها.. ويقول في خاطره.. متى هاللحظه الي تجمعنا انا وانتي سوى تحت سقف واحد محد ويانا.. ؟؟ آه متى بس.. يلا عاد يامي.. ارمسي.. مافيني صبر.. مب قادر اصبر عن هالحب وهالعيون زود عن جيه..
ام سلطان لاحظت نظرات ولدها.. فقاتل تفتح السالفه: والله يا أم سعيد نحن اليوم يايين عشان نحدد يوم لملجه وداد وسلطان.. ونحن قلنا يعني لو نخليه في رمضان .. شو رايكم؟
وداد من سمعت هالرمسه انصبغ ويها بالحيا.. وربعت لغرفتها.. والكل ابتسم يوم شافها.. وتمت غزلان قاعده عشان تتسمع.. تم ناصر يحط عليها وهي مطنشه.. همها انها اتعرف اخر الخبار وتبلغ وداد..
ناصر: ملقوووفه من يومج.. شو بنقول..
غزلان: انت مالك شغل.ز
سلطان: اشفيك عالبنت خلها على راحتها..
ناصر: من احين بديت اتدافع عنها.. الله يعين عقب العرس..
غزلان: موووت حره..
ابو سعيد: وبعدين يعني.. بتخلونا نرمس ولا شقايل؟
سلطان: السموحه عمي (تم يأشر لناصر عشان يسكت),,
بو سلطان: ها شو رايك يا اخوي؟
بو سعيد: والله يا اخوي وداد بنتكم مثل ما هي بنتنا..
ام سلطان: بس لازم انعرف راي البنت وشورها..
سلطان: شو تتريون يلا..


الكل تم يضحك على ردة فعله .. وعيلته.. ونشت فدوى تصعد الدري عشان تروح عند وداد عشان اترمسها وتعرف رايها.. وشافتها قاعده على الدري من الجهة العلويه.. عشان تسمع الي يصير.. ومن انتبهت لفدوى نشت من مكانها خجلانه.. وتمت فدوى تضحك عليها..
فدوى: اشفيج.. ياما سويناها قبلج..
وداد: ههههههه
فدوى: ها شو رايج؟؟ شكلج يقول هيه موافقه..
وداد: فاهمتني هالمشكله..
فدوى: ايبب.. كلولولولولولولوووووووش
الكل صد صوب الدري من سمع اليباب.. وسلطان اكثر واحد حس بالفرحه ومن غير لا يحس بعمره تم يقول بصوت عالي: هيهه.. واخييييييرا..
وافتشل يوم شاف الكل يضحك عليه .. بس الكل عاذره.. لأنه من سنين وهو يتريا هاللحظه الي انحرم منها.. وداد.. اخيرا الحلم صار حقيقه.. وهالمره محد بيوقف في ويهنا صدقيني لا مريم ولا غيرها بيقدرون يفرقوني ويبعدوني منج.. يا احلى وارق بنت دشت في حياتي..
آه يا وداد.. يالي خذيتي كل حبي وودادي..
.............
.....
..
.



طبعا الجزء خلص.. بس القصه ما خلصت؟؟


لا تنسون.. جدامنا يوم الخميس.. عادل واهله؟؟


ومريم.. شو بتسوي؟؟


وشو سر هالي اتصل؟ من يا ترى؟؟


تابعوني ..,,

[Gad]

ربي يسلمكم .. وهالبارت لعيونكم ..,,


هالجزء طويل وايد

الجزء السابع
للحب عنوان
=============
ملخص الجزء السابق: ((تأقـلم هادف ويا جو المدرسه.. اتصال ام عادل في ام حصه وطلب ايدها.. والإتصال الغريب الي يا لبيت غزلان وخوفها من هالإتصال.. تحديد ملجه وداد وسلطان...))
==================


خالد كان قاعد ويا ربعه في الكوفي..
عبدالله: ها بوالوليد.. شوأخبار الغزلان وياك؟؟
خالد: الغزلان.. هيه .. الغزلاااان.. لا ما عليك.. انا سريع.. يبت الي اباه..
عبدالله: ماشي.. كل شي تباه عالسريع.. انزين؟؟ انت شو الي تباه بالضبط من هالغزاله
خالد: لا.. مب قصدي العب عليها.. لا تتطالعني بخبث..

عبدالله: لا تقولي زواج؟؟ ما اصدق..
خالد: هيه .. ماشاء الله عليها بنت ناس.. واياويد.. ومستحيل اني ارضى اني العب عليها,.. بس؟؟

عبدالله: هاااااا .. هالمهم.. بس.. بس شو؟؟

خالد: بس ابا اخليها اتحبني.. مابا اخذ وحده وهي ما تحبني؟؟

عبدالله: وكيف بتخليها اتحبك يا شاطر..

خالد: لا عاد.. هالشي ما بقول... خل كل شي بوقته حلو..
حميد: وبعدين يعني.. انتوا الإثنين دوم جيه من اتيون تقعدون تتساسرون.. كل حياتكم اسرار

عبدالله: نش ابوي.. احين بيي حميد وبهالشيشه بيفرنا فيها..
خالد: انا بسير عالبحر.. اشتقت لقعدات البحر الصراحه.. منو بيي وياي منكم يا شباب..


توهم بيردون على خالد.. الا وياهم صوت واحد يسلم عليهم.. الكل من شافه تم امبهت يطالع.. مستغربين.. والكل متفاجأ لوجوده.. الي قام وباسه ويسلم عليه.. والي يحضنه.. تدرون منو.. ؟؟ تابعو عشان اتعرفون

خالد: علي.. متى رديت من السفر؟؟
عبدالله: يا هلا والله بوحسين.. اشحالك؟؟ وينك يا ريال؟؟ شو هالمفاجأة الصراحه..

حميد: انتوا خلوا الريال يتنفس من قال السلام عليكم كل واحد فيكم استلمه بالأسئله.. ايلس.. خبرنا عن علومك؟؟

علي: والله انا رديت امس الفير من السفر.. وسألت عنكم .. قالو لي انكم هني.. عاد تدرون انتوا .. انا ما ادل مكان في الإمارات.. من سبع سنين وانا برع .. شو بذكر.. اصلا الإمارات وين قبل وين احين .. وايد تغيرت..

خالد: لا لا لا.. الصراحه.. أحلى مفاجأة يوم انك فكرت ورديت البلاد.. ياخي ملينا من كثر ما نحن انييك.. مووول مقاطع الإمارات... يعني موول اونك ما اشتقت لها؟؟
علي: والله شو اسوي.. انتوا ادرى بالحال..؟؟

عبدالله:وعسى من ورى هالردة شي زين؟؟

علي: هيه.. والله تعبت ياخوان من الغربه.. قلت ارد.. احاول اني اتصالح ويا هلي.. ترا في النهايه مالي غيرهم.. والي فات مات.. سويت شي وانا مراهق الله يسامحني عليه.. وخلاص كبرنا احين
حميد: هي والله .. زين ما سويت.. عاد كله و لا انك اتقاطع هلك..

علي: بس تدرون.. والله الإمارات احلوت.. وايد تغيرت.. حتى انا تغيرت.. رحت من هني وانا حافي ما افتهم في الدنيا.. لولا نسيبي فهد جان انا ضايع للحين.. هو الي ساعدني.. وهو الي وقف وياي.. طلعلي هالبعثه ودرست.. ولا رديت لكم الدكتور علي المزروعي.. احم احم.. والنعم طبعا..

حميد: اوووووووب يعني اتخرجت.. مبروك يا ريال تستاهل..

علي: والله اول شي فكرت اسويه ازوركم واشوفكم.. تدرون ما عندي حد..

خالد: بس بذمتك يا علي.. ما اشتقت لأمك واخوك واهلك كلهم.. او خل انقول لتراب الإمارات

علي: ااااااه.. شو ما اشتقت.. لو الود ودي ابوس هالأرض واحضنها لو اقدر..

عبدالله: انزين وانت وين ساكن احين عند منو؟




علي: انا .. ساكن في فندق.. ما حبيت اروح عند اختي.. ولا حبيت اسير عند هلي احين.. قلت اعدل اموري عقب بروح ويا اختي وريلها واساوي اموري وياهم..
عبدالله: افا والله.. ما هقيتها منك.. تروح فندق وشقه اخوك موجود.. ماشي اليوم اتشل اغراضك واتيي عندي
علي: سلمت والله ماقصرت.. بس ما ودي اثقل عليكم
عبدالله: شوف انا هالرمسه موووول ما احبها.. ولا اداني اسمعها..
علي: هههههههه خلاص اسحبها..
عبدالله: عيل نش خلنا انسير انييب اغراضك من الفندق..
خالد: ونروح البحر..
علي: لا دخيلكم انا تعباااان.. قلت ايي اسلم عليكم واقعد اشوي وارد..
عبدالله: مو مشكله.. المهم انشل اغراضك وبوصلك الشقه وارقد هناك وسو الي تباه.. وانا بسير ويا روميو البحر..
علي: روميووو؟؟

[Gad]

خالد: عبووووود..
عبدالله: شو بتخش على علووو.. بخبرك عقب في الشقه.. خل انروح..
طلع خالد ويا علي وعبدالله عشان يسيرون الفندق ياخذون اغراضه ويودونه شقه عبدالله.. وبعدها يروح خالد ويا عبدالله ويقعد على البحر..
علي هذا قصته قصه.. في أيام ما كان في عمر المراهقه.. وأيام الثانويه.. كان انسان اناني جدا.. وانانيته هذي كان يأذي فيها الكل.. كان كل يوم يسوي مشاكل وضرايب .. وكل يوم يودي هله من مخفر للثاني.. ابوه عصب وغضب عليه وطرده من البيت.. وبرغم من ترجيات امه انه يرد البيت الا انه رفض.. وغير جيه الأبو نفسه رفض ردته للبيت.. اخته ساعدته وقالت له انها راح اتساعده بأنه يروح إيرلندا ولكن بشرط انه يروح يدرس وما يلعب.. ولا انها راح تحرمه من الدراسه واترده البلاد.. وهو عشان هالشرط فعلا درس طب واجتهد.. وماحب يكسر بخاطر اخته.. وفي هالفتره نضج..وكبر عقله وعرف غلطته.. فقرر انه يرد ويبين لأهله إنه مب مثل ما توقعوه.. إنه طلع ريال وقدر يبني مستقبله..
علي هذا يصير ولد خالة غزلان.. غزلان ما تعرف عنه .. لأنها كانت تقريبا صغيره يوم انه سافر.. فما تذكره عدل.. ونفس الشي بالنسبه للباقي.. مع مرور الوقت وابتعاده الدائم عن البلاد.. نسوه تقريبا.. علي احين عمره 25 سنه..
_______
هند: اقول يلا خلصي انا ابا اقعد عالنت.. عطلتيني والله..
غزلان: هنووده حبيبة قلبي انتي.. شوي بس.. والله قاعده انزل قصه في المنتدى ومتحمسه عليها..
هند: آخ منج ومن هالقصص..
غزلان: انتي عمرج ما فكرتي تقرين قصه من قصصي وتعطيني رايج فيهم..
هند: اختي حبيبتي.. منو قالج اني ما قريتهم.. لا قريتهم..
غزلان: انزين.. يلا قولي لي.. شو القصه الأولى منو الأبطال فيها؟؟
هند: ريم.. ويوسف.. وأحمد الي تبرع بشبكيته.. يوم ريم انعمت.. ها شو رايج احين..
غزلان افتشلت يوم شافت ان هند فعلا قاريه قصصها.. : ابيه.. اسفه.. بس الحق عليج انتي.. ما قلتي لي انج قاريه من قبل..
هند: احين خبرتج.. يلا وراج مدرسة.. وانا ابا اقعد..
غزلان: ابيييييي.. حصوووو.. ما دقيت اشوف شو السالفه.. تعالي تعالي قعدي خلاص..
هند: هيه فديتج.. أحين صدق حسيت انج اختي..
غزلان: هههههه..
نزلت غزلان وتوها بتشل تليفون البيت عشان تتصل لحصه إلا التليفون يرن.. اطالعت الرقم.. شافت نفس الرقم الي اتصل العصر.. تمت تتطالع حواليها اذا في حد وشلت التليفون..
غزلان: الووو..
خالد: هلا والله بهالصوت..
غزلان : نعم.. منو انت؟.
عبدالله بصوت واطي..: حطه عالإسبيكر ابا اسمع..
خالد وهو يحط ايده على السماعه: غبي انت.. خوز مناك.. ما يخصك.. انا برمسها..
خالد: انا.. انا الي من شفتك هويتك.. انا الي لو اقدر اعطيك عمري ما وفيتك..
غزلان: انت شو تستهبل: بتقول اسمك ولا اخلي هلي يتفاهمون وياك..
خالد: هلج.. هيه .. خليهم يتفاهمون وياي.. بقولهم عن عيوني الي من شافتج ما تحس بالألوان حولها.. فقدت حلاة هالكون من غيبتج عني وعن ناظري.. قوليلهم عني انا الهيمان بهيئتك.. وبسمتك.. وطماع بمحبتك.. قولي لهم.. اتريا على الخط.. عشان اقولهم ليش انا متصل ... وبجي بتقصرين علي درب طويل..
غزلان: اقول.. انا مب فاهمه كلمه من كلامك.. انت شو تقول؟
خالد: ولا بتفهمين هالقلب وش يحتوي .. لأنج ما تعرفين الحب يوم يمتلك القلب شو يسوي.. يسوي العجب .. بتقولين ها واحد فاضي ماعنده شغله يدقدق على الأرقام ويغازل.. بس والله انا ما دقيت على رقمكم الا وانا عارف بيت منو داق ولمنو داق.. انا داق لج انتي.. ابي منج القرب..
غزلان في خاطرها.. : ياربي كلامه وايد حلو.. بس منو هذا اففففف..
غزلان: اخبرك.. لو ما قلت انت منو ببند في ويهك.. ومابرد عليك..
خالد وهو منصدم: لا دخيلج.. اترجاااااج لا اتسوينها.. جيه بتجتليني.. سمعيني انا بقول لج انا منو.. والي فيها فيها.. شوفي.. اتحيدين يوم ييتي المستشفى ودخلتي غرفتي بالغلط؟؟ .. من يومها وانا مدوده... من يومها وانا الدنيا اتلخبطت في راسي.. من يومها وانا ضايع ادور على قلبي.. طلعتي من الغرفه وخذتي قلبي وعقلي وياج.. لاتقولين هذا لعاب ياي يلعب علي.. لا والله .. انا ماخذ رقمكم من المستشفى تميت اخرط عليهم لين ما عطوني رقم البيت من ملف اختج هند.. وبعدين انا دقيت عشان اقولج اني اباج.. وابا اخطبج.. لكن قبل لا اخطبج ابا اعرف رايج فيني.. وهل راح اتحبيني؟؟ لأني مابا اخذ وحده ما تباني.. ولا مجبوره علي..
غزلان تمت امبهته من كلامه.. اتحاول تجمع افكارها وتتذكر هالإنسان.. إلا انها حست عمرها ضايعه.. ما انتبهت لنفسها غير انها اتبند الخط.. وتصعد غرفتها.. وهي غرقانه في أفكارها إلي اتوديها شمال وجنوب.. ليش؟؟ ليش دخلت حياتي ليش.. لا أرجووك.. مابا هالكلام يأثر فيني.. غزلان.. كبري عقلج.. لا تخلين واحد تافه وفاضي يأثر عليج بكلامه.. لا ارجوك ياربي.. اطرد هالأفكار من راسي.. اااااااااااااااااه.. راسي بينفجر.. كيف اتحمل.. لا لا .. ما اقدر.. تمت على الفراش تتجلب يمين ويسار.. ما اييها نوم.. ماعرفت شو اتسوي.. تمت اتدور حول نفسها في الغرفه... سايره ويايه.. ماتعرف شو اتسوي.. اتصدقه.. ولا ما اتصدقه.. لا مابا اصدقه... هذا جذاب. اكيد جذاب.. لا ياربي.. مستحيل.. كيف.. وبعد هالأرق وهالأفكار.. نامت وهي ناسيه الليت مفتوح.. او انها تتغطى..
هند كانت قاعده على المسنجر.. اتسولف ويا الي معاها.. واتنزل مواضيع على المنتدى الي هي مشتركه فيه..
(المحادثه)

[Gad]

الغريب المهاجر:
تدرين.. والله رديت البلاد وبعدني احس عمري غريب عنها..
دمعه منسيه:
لا تقول جيه.. بالعكس.. انت مب غريب عنها ولا شي.. انت من هل الدار ياعلي..
الغريب المهاجر:
ما علينا المهم.. اخر موضوع طرحتيه في المنتدى كان رهيب الصراحه.. وايد اثر فيني..
دمعه منسيه:
اشوفك وايد تفاعلت في الرد الي كتبته..
الغريب المهاجر:
مادري.. يوم قريت الموضوع حسيته عني.. حسيت اني يوم قريته فتحت عيوني على اشيا انا غافل عنها.. عليج اسلوب صراحه.. صدق يأثر بالواحد..
دمعه منسيه:
اعتبرها رساله كنت ابا اوجها لك بس بطريقه غير مباشره..
الغريب المهاجر:
يعني نغزه..
دمعه منسيه:
تقريبا.. بس ما قلت لي؟؟ زرت هلك؟؟
الغريب المهاجر:
لا بعدني.. قاعد افكر اني استقر .. واتوظف.. وشوي اثبت عمري بعدين بروح لهم..
دمعه منسيه:
هم يدرون انك هني؟؟
الغريب المهاجر:
لا .. انا قلت لأختي ما تقول لحد..
دمعه منسيه:
انزين انت يوم رديت البلاد.. ما تذكرت اشيا كانت اتخص طفولتك.. أيام قبل..
الغريب المهاجر:
طفولتي.. بلا.. وايد ذكريات.. اصلا انا ما اذكر اي احد من هلي غير اخواني وخواتي.. لأني يوم كنت صغير صارت قطيعه كبيره بين اهل امي وبينا.. فماعرف خوالي.. ولا خالاتي.. ولا عيالهم.. او حتى ما اذكرهم.. حتى اعمامي.. مب وايد كنا وياهم.. نحن عايله منعزله.. مادري كيف هلي متحملين هالشي..
دمعه منسيه:
لا الحمد لله.. نحن علاقتنا ويا عمي الوحيد وااايد حلوه.. بس انا نفسك في اهل امي.. خوالي نحن على اتصال وياهم.. غير خاله وحده.. قاطعتنا.. مادري ليش؟؟ الله يسامحها.. حرمتنا من عيالها..
الغريب المهاجر:
تدرين.. ساعات الكبار يخطئون أخطاء الصغار يدفعون ثمنها.. وساعات الصغار يكونون هم الصح والكبار غلط.. اذكر انا ياما تضاربت ويا هلي بسبت هالقطيعه.. كانوا دوم مطنشيني..
دمعه منسيه:
والله القطيعه مب زينه يا علي.. ربك ما يرضى يقطع صلة الرحم.. هاي اهم نقطه في العلاقات الإنسانيه..
الغريب المهاجر:
هي والله .. بس شو نقول.. المهم انا طالع احين لأن ربيعي وصل ومب حلوة اودره روحه..تامريني على شي؟؟
دمعه منسيه:
لا سلامتك.. بس لا تنسى اترد على موضوعي في المنتدى..
الغريب المهاجر:
اوكي.. وانتي بعد .. بسج قرض في العضو ******.. تراه طفر منج
دمعه منسيه:
هههههه.. يصير خير..
بندت المحادثه وردت تقعد على المنتدى الي شاغله وقتها عليه.. وبعدها راحت اتنام.. لاحظت ليت غرفه غزلان بعده مفتوح.. والساعه احين 2.00 فليل.. يعني معقوله ما نامت للحين؟؟

هند وهي تفتح باب الغرفه شافتها راقده وملتويه على عمرها من البرد الي هي فيه لأنها مب متغطيه.. غطتها.. وبندت الليت... وسارت غرفتها عشان ترقد.. قبل لا تدخل الغرفه كانت تسمع صوت ياي من صوب غرفه وداد... يوم جربت سمعت وداد اترمس سلطان.. ابتسمت .. وسارت غرفتها وهي الثانيه غارقه بأفكارها..

هند: ياربي.. انت بإيدك تصنع المعجزات.. انا عايشه في الدنيا ولا كأني عايشه .. مالي اي دور فيه.. غير اني اكل واعبدك واشرب واتكلم .. لكن ما اقدر أبني أسرة .. وأكون لنفسي الكيان الي اباه.. عايشه في عزله.. ماقدر اني اكون أم في يوم من الأيام.. يارب.. انا مب فاقده الأمل في قدرتك.. وكل يوم يزيد إيماني بقدرتك.. بأنك تقدر اتغير الحال من المحال.. يارب .. فرح قلبي المسكين..

راحت هند الحمام واتيددت وظهرت من الحمام .. عشان تقرا لها شوي من القرآن مثل ما متعوده قبل لا ترقد..

..

في غرفه وداد..
سلطان: تدرين يا وداد... والله مب مصدق.. اخيرا مافي شي بيمنعج عني..
وداد: بس والله بعدني خايفه.. سلطان انا مابا مريم يصيبها شي بسببي..
سلطان: شو الي بيصيبها مثلا.. مافيها الا كل خير.. ما عليج منها ياهل..
وداد: ترا هالمشكله.. انها ياهل .. لو وحدة عوده وعاقل ما بخاف ولا بفتكر فيها.. بس انا ..
قاطعها سلطان: بس انتي لي.. وبتمين لي.. ولا مريم .. ولا عشره من أمثالها بيقدرون ياخذونج مني او يمنعوني من اني اخذج.. ولا أي قوة في هالدنيا بتمنعج مني الا الموت..
وداد: بسم الله عليك.. لاتقول جيه..
سلطان: وداد.. تسمحين لي اقولج كلمه.. ؟؟
وداد: قول..
سلطان: والله أحبج..
وداد: ما اسمع؟؟
سلطان وهو يبتسم: تستهبلين.. .. أ.. ح.. بج..
وداد: شو؟؟ ما اسمع؟؟
سلطان وهو يعلي صوته: أحبــــــج..
وداد: عن يسمعك احد خف صوتك..
سلطان: خلهم يسمعون.. تراني ما قلت شي غلط.. قلت اني احبج.. وكل اثنين مخطوبين يتغزلون في بعض..
وداد: انزين انزين.. انا برقد احين تدري وراي دوام باجر..
سلطان: اغار لا اتداومين..ترا بغير دوامي وبيي اداوم وياج..
وداد: هههههه... فديتك خلك مكانك وخلني مكاني.. عشان نشتاق لبعض؟؟
سلطان: شو قلتي.. فديتك.. آآآآه.. كم بعيش.. لا لا .. بس ماروم اتحمل..
وداد: عيل بند..
سلطان: فديتج والله.. تغطي عدل.. ماباج تبردين.. تراني اغار عليج من نسمه الهوا..
وداد: ان شاء الله وانت بعد..
سلطان: وداد
وداد: عيونها؟؟
سلطان: احبج..
وداد: هههههه... مع السلامه..
سلطان: انزين يالبخيله .. يالزطيه.. يالكنجوسه.. قوليها لي..؟
وداد: ههههه.. انا كل هاييل.. عناد ما بقولها..
سلطان: لا افا... انا الزطي انا كل شي.. دخيل الي يابوج قوليها..
وداد: احبك..
سلطان: لا انا اليوم ما برقد.. باجر بسحبج من الدوام وبوديج المحكمه بقولهم انا هاي اموت فيها يوزوها لي..
وداد: هههههه.. يلا مع السلامه

[Gad]

سلطان: طاعوا هاي.. تبا اتبند.. يلا مع السلامه فديتج.. تصبحين على خير..
وداد: وانت من اهله..
وتموا ساكتين شوي.. كل واحد يتريا الثاني يصك الخط..
وداد: وبعدين يعني.. شكلي ما برقد اليوم..
سلطان: ماودي ابند..
وداد: لا بند.. شكلي برقد في الدوام باجر..
سلطان: لا كله ولا تعبج.. ببند خلاص... مع السلامه..
بند سلطان الخط عن وداد.. وعلى طول طرش لها هالمسج..
(خلني..قصه هوى تسكن كيانك

خلني صوره مسافر في سماك!

وخذ حياتي خلها شمعة زمانك

وخذ عيوووني ما سكن فيها <سواك>

ولمني ثم "ضمني"

بأقصى حنانك..

ولمني ياجعلني كلي فدااااااك.. )
من قرت وداد المسج استانست.. : لعلني افداك والله.. فديت حبيبي..
ردت طرشت له هالمسج:..
(أنا قلبي علىالفرقى عصاني

يحبك ما يحب إنسان ثاني تولع فيك في يوم وليله

(ورسم لك داخلي كل الأماني

أحبك حب ما يخطر ببالك

ويعجزعن تواصيفه لساني

أحبك حب يسوى العمر كله

فداك العمر دام العمر فاني)
استانس سلطان على هالكلمات.. ورد طرش لها مسج..

(قلبي قسمته يا هوى البال بالنص

نصه بوفي وأنت بهديك نصه

أرفق عليه ولا تنيه

وأحرص دامه يخصك بصادق الحب

خصه لا غبت عني يبتدي الحال ينقص

وأسهر وتبدالي مع الحزن قصه

ياليتني في لجنة العلم مختص

والله لحط لمنهج الحب حصة)

عيبتها وداد الكلمات.. وردت طرشت له.. (وبعدين يعني.. شكلي باجر ما بداوم.. ولا برقد اليوم.. لو سمحت لاترسل لا اخبر ابوي عليك)
سلطان ضحك ورد طرش لها مسج (لا كله ولا عمي.. نامي.. نوم العوافي .. أحبج لا تنسين)..
ابتسمت .. ونامت وبالها وقلبها مرتاح.. انها اخيرا ردت للغالي.. وكل شي رد طبيعي..

....

في بيت مشعل العامودي..

حصه مارامت طول الليل ترقد.. التفكير ماخذ النوم من عيونها.. ماتعرف شو اتسوي.. ولا كيف تطرد هالأفكار من راسها.. تمت تتخيل كيف بتقابل عادل.. ياربي.. هذا بعدني ما انخطبت له رسمي وانا جيه افكر فيه.. عيل لو صار خطيبي صدق.. ياويل حالي.. وبعدين انا كيف بتجابل ويا امه باجر في المدرسه .. لا لا لا .. ماروم.. ابييييه.. غزالووو.. الله يغربل ابليسي تفكيري نساني غزلان ونساني اني اطمنها.. بس الوقت متأخر مافيني اتصل احين ازعجهم.. باجر بشوفها وبقولها السالفه.. بس وين ابراهيم تأخر .. ماياب الأغراض الي طلبتهم منه للحين.. كل هذا ساير المكتبه.. فديته اخوي خل اطمن عليه..

حصه: الوووو.. ممكن اتعرف..؟؟
إبراهيم: ياحي هالصوت والله.. أكيد أكيد.. حاضرين للطيبين..
حصه: لو سمحت اثنين براتا.. وريال فلافل..
إبراهيم: لحظه خل اكتب .. ما عندي قلم.. انتي شو.. صدق مخرفه.. شو ياب البراته صوب الفلافل.. البراته عند الهنود.. والفلافل عند الزلمات.. ؟؟ وبعدين مسرع ما غيرتي الموجه.. توج تبين تتعرفين؟؟
حصه: ههههههه.. شو اسوي.. اختك خرفت وقعدت..
إبراهيم: معلووم ابوي بتخرفين.. غاديه عروس حقنا عشان جيه.. انزين.. قولي لي ليش متصله.. شو تبين؟؟
حصه: بل بل.. شو هالإسلوب.. انت جيه بترمس حرمتك عقب؟؟
إبراهيم: مالج شغل بحرمتي.. أرمسها كيف ماريد..
حصه: هههههه.. الله يعيينها.. انزين.. وين طلباتي.. انت الدليفري سيرفز مالك تعبان.. مره ثانيه ما بطلب منك.. ولا بعطيك بيزات الدليفري..
إبراهيم: شاريهم.. احين انا عند البحر..
حصه وهي مستغربه: البحر.. شو عندك؟؟ شو صاير؟؟؟ فديته اخوي.. زعلان متضايق؟؟ شو مضيق فيك.. قولي .. ماعاش من يضايق بوخليل..
إبراهيم: حبه حبه.. شو فيج.. الي مضايقني ربيعتج.. الي ما تحس.. كارهتني مادري ليش اتقولين ذابح حد من أهلها..
حصه: والله مادري شو اقول لك.. انا هالبنت تعبت وياها من كثر ما ارمسها.. عسى ما افتح لها سيرتك اتسكتني.. قولي شو اسوي وياها.؟؟
إبراهيم: لا تضغطين عليها.. بتكرهني زود.. وانا مالي غير الصبر.. مابيدي حيله..
حصه: انزين ما قلت لي.. ليش ساير البحر؟؟ شو صاير؟؟
إبراهيم خبرها السالفه يوم صادف غزلان عند الباب..
حصه: بل بل,.. كل ها يصير وانا ماعندي خبر؟؟
إبراهيم: ليش هي ما يت عندج عقب؟؟
حصه: لا ولا دقت لي.. اكيد زعلانه لأني من رديت ما دقيت لها.. وتوني تذكرت بس تدري الساعه وحده ونص مايصير ادق لها هالوقت..
إبراهيم: كم كم .. وحده نص.. وانتي شو ما وراج مدرسه؟؟ شو مسهرنج ممكن اعرف؟
حصه: ياسه افكر حالي من حالك.. كيف بتجابل ويا المديره باجر.. والله فشيله..
إبراهيم: هههههه.. الله يعينج..
حصه: اقول انا متصله اتخبر عن الأغراض وانت رمست وهذربت وايد.. ورصيدي ما تم فيه شي.. ممكن تتكرم واتييب لي بطاقه وياك؟

إبراهيم: بل بل.. زطيه.. ماشي.. تستخسر على اخوها بطاقه..
حصه: يلا ترا بسويهم دبل بطاقه..
إبراهيم: لا دخيلج.. تونا في اول اسبوع من الشهر وبعلن افلاسي بسسبج.. يلا باي..
حصه: اترياك لا تتأخر.. ولا تسرع..
إبراهيم: اوووووووووكي.. يلا باي..
حصه: باي..
بندت الخط.. وسارت صوب البلكونه تمت تقرا لها كتاب ومندمجه فيه.. لين ما سمعت صوت الباب يفتح وابراهيم يدخل موتره.. على طول ربعت وظهرت من الغرفه نزلت اتسير صوب الباب..
حصه: هلا والله.. يا هلا بالمهلي.. يا مرحبا وسهلا...
إبراهيم: هاج اغراضج.. خليني اسير ارقد وراي دوام..
حصه: طاعوا هذا انتوا.. لا تصبحين على خير.. ولا احلام سعيده..
إبراهيم: اوه.. صدق.. اسف نسيت.ز تصبحين على خير..
حصه: كمل يـــا..
إبراهيم: يا أرق وأحلى إخت في الدنيا.. انتي الله يعين ريلج.. لازم احفظه هالإسطوانه بس تبديل بسيط بدال اخت.. حبيبه او زوجه..
حصه استحت من كلامه وشلت اغراضها وسارت غرفتها عشان اتشل الي تباه من الأغراض وتنام..وجهزت جدولها .. وراحت على السرير وهي اتفكر في عادل.. قطع حبل افكارها صوت المسج.. كان ياينها مسج من رقم غريب..
(روحي يا رساله لحبيبي وزوريه

ولو كان نائم أرجوك لا تزعجيه

وإن مل صبرك من الإنتظار صحيه

وعن لهفتيه في غيابه خبريه

وقولي له

(صاحب الرساله يحبك)

وانت ما فكرت فيه

وإن ما جاوبك خليه يفكر لا تحرجيه.,.)

[Gad]

استغربت حصه من هالمسج.. وتمت تتطالع الرقم.. وما قدرت اتعرف منو.. لأنها اول مره اتشوفه.. كانت متردده تتصل عليه .. ولا لا.. بس هونت ما اتصلت.. وتوها بتغمض عينها واتنام وصلها مسج ثاني..
(اسف ازعجتج.. وادري انج مستغربه من الرقم لأنج ما تعرفينه .. بس انا سرقت الرقم من امي من غير لا تعرف.. انا عادل ياحصه.. ارجوج لا تزعلين مني )

يوم قرت المسج .. حست برعشه اتدور في كل جسمها.. وارتباك.. ماعرفت شو اتسوي.. اترد عليه بالمسج.. ولا ما ترد.. فضلت انها تغلق التليفون.. غلقته وفرته في الدرج.. وتمت اتفكر.. ؟؟ معقوله يحبني؟؟ معقوله لهالدرجه انه خذا رقمي من امه وتجرأ وطرش لي هالمسج.. افففف.. انا ليش افكر فيه... خل ارقد احسن لي..

خالد رد البيت من بعد ما سهر ويا ربعه.. ومن عاده امه انها ما ترقد غير يوم تطمن على عيالها كلهم.. بما فيهم خالد تترياه لين ما يرجع البيت عشان تطمن وترقد.. توه داخل البيت وشاف امه قاعده في الصاله على الجلسه ومغمضه عيونها.. وراح عندها شوي شوي..
خالد: بووووو
نقزت من سمعت صوته من الزيغه تمت تتعوذ: اعوذ بالله منك.. يوز يوز.. انا قلبي ما بيوقف غير منك انت..
خالد: اسم الله عليج.. لعل عدوينج ولا انتي..
ام خالد: مره ثانيه لا تتأخر والله تعبت ماروم اسهر مافيني شده السهر.. الكبر شين يا ولدي
خالد: وين كبيره.. اصلا انتي الشابات يغارون منج.. ماعليج انتي.. وبعدين انتي الي متعبه روحج وتسهرين.. تراني برد البيت ما ببات برع من غير لا اقول لج..
ام خالد: بس بعد انا ها طبعي .. ماروم ارقد ولا اطمن غير يوم اشوفكم كلكم جدامي.. يلا امي سير ارقد عشان اروح اقفل باب الحوي.. وارقد
خالد: امي. بغيت اقول لج شي..
ام خالد: قول يمي .. شو الي يحز في خاطرك..
خالد: امي.. انا افكر اني استقر عن هالهياته الي كل يوم انا فيها.. يعني بإختصار ولدج يفكر يعرس..
ام خالد وهي تبتسم له ذيج الإبتسامه العريضه: هاي الساعه المباركه ولدي.. والله ودي ليش لا؟.. هاي الساعه المباركه الي اشوفك فيها معرس.. خلاص من باجر بشوف لك بنت الحلال الي تناسبك..
خالد: لا امي.. البنت موجوده.. وبنت ناس وعرب.. بس اتريي علي شوي.. وبنفسي بوديج بيتهم تخطبين لي اياها..
ام خالد: خلاص انا حاضره.. كم خالد عندي..
خالد:فديتج.. ربي يخليج لنا يامي .. ولا يحرمني منج ولا من قلبج الطيب..
ام خالد ابتسمت له وطبطت على ظهرت ونشت عشان تتطمن على البيبان والدرايش والغاز كعادتها وترقد.. وخالد نش صعد يروح غرفته عشان ينام.. وتم وهو سادح على السرير يفكر في غزلان وهو يطالع رقم بيتهم..

من أشوفج يجف القلم.. ويعيا انه يكتب اسمك على اوراقي.. نعم أحبج واعشقج.. وبكل أيامي اتمنى قربج.. تغمض عيونج واسهر انا لجل حبج.. اسهر افكر ياترى بكون جنبج ولا راح اعيش بعيد عنج.. لا لا .. مب قادر على البعد يا حبي اسمحي لي.. راح امنعج راح اسحبج جنبي للأبد.. صدقيني ما أجمال.. صدقيني ما أبالغ... هذا الصدق.. هذا الشعور الي لي ممتلك.. هالعيون الي اسرني غلاها.. هالصوت الي شوقني أذوق شذاها.. كلامي مختلط.. شعوري مرتبك.. ما يدري كيف يسطر على الورق.. كيف يحكي حكايه عاشق صار في بحر الهوى غرقان.. وتايه وولهان..

(الكلمات من تأليف الكاتبه.. )

..




===============

يوم الأحد..

الساعه 6.30 الصبح

==============

غزلان وهي نازله من الدري بسرعه.. من غير لا تنتبه لهادف دعمت فيه..
هادف: حوله الإخت ما تشوف..
غزلان: بيغمى علي.. ياني ارتجاج في المخ يا جماعه.. الحقو علي..
هادف: ياها ارتجاج وهي ترمس بكامل قواها العقليه..
غزلان: صباح الخير.. ولو ان راسي بينفجر من العوار.. وعيوني قاعده اتدمع..بس غزلان يوعانه..
هادف: ههههه.. اقول .. انا ساير المدرسه.. شرده..
غزلان بصوت عالي: هااااااااادف.. ليش خلصت البسكوووت.. انا هاي حالتي ويا هالإخوان.. في ألمانيا كان سعيد يخلصهم لي.. وهني انت الي اتخلصهم.. احين بشو اشرب الشاي..
هادف: يلا انا ساير نصور يترياني..
غزلان: ماعليه.. وين بتشرد ترا بشوفك الظهر.. ماشي بنتقم يعني بنتقم..
هادف: مع السلامه..
ام سعيد: بحفظ الرحمن.. روح الله يحميك.. ويسهل دربك.. ويوفقك.. ويبعد عنك كل شر..
غزلان: كل هذا حق هادف.. لا بالله ما تم شي لنا..
ام سعيد: انتوا كلكم عيالي.. الله يشهد ليل ونهار ادعي لكم..
غزلان: فديتج والله يا احلى ام في الدنيا.. بس ولدج ها هدوووف ما خلا لي ولا حبه بسكوت زين جيه
ام سعيد: افا والله.. يعني انا ماعرف ان غزولتنا حبيبتنا تحب بسكوت.. خشيت لج كم حبه..
غزلان: صدق.. فديييييييييييت روحج والله.. اقول وين وداد..
ام سعيد: مادري نشت بس بعدها ما نزلت..
وداد وهي اتعدل عباتها ونازله من الدري: ها.. اسمع اسمي.. منو ياب طاري..
غزلان: عمرها طويييييل.. بل..
من سمعتها امها اتقول بل ضربتها على راسها فانضرب بالطاوله من شده الضربه.. وهي تتظاهر انها اتصيح: هيييييييي.. شو ها.. توه ارتجاج في المخ.. احين في المخيخ..
وداد: احسن تستاهلين.. عيل انا اتقولين لي بل.. وبعدين يا بنت العلمي.. شو ياب المخيخ صوب يبهتج.. لا بالله بتسودين الويه السنه..
غزلان: انتوا طوفوا .. ماعليكم مني.. المهم تفهمون.. يلا انا سايره اتلبس..
وداد: عنبو.. سايره وفي ايدها صحن البسكوت.. هاتي حبه يالزطيه..
غزلان: فجي هالثم لعلني افداه.. بوكلج..
وداد فجت ثمها تتريا غزلان اتأكلها.. وتوها غزلان مجربه البسكوت صوب ثمها عشان اتأكلها ترد غزلان وتأكل عمرها.. : يميييي.. لذييييذ..
وداد: حماره تدرين.. كنت ناويه اليوم اوديج السينما.. بس خلاص هونت.. ماشي طلعه..
غزلان من سمعت طاري السينما تمت تمشي ريوس.. يعني ظهرها ورى.. وهي تمشي راده على ورى.. :فديييت روحج انا( وتحضن اختها من ظهرها).. اممممموح على هالخدود الحلوه.. فديييتج والله انا اقول اصلا وداد احسن اخت في الدنيا.. ياربي ماروم اعيش من دونج.. انا ماودي اصلا اتحرك من مكاني ؟.. ودي الصق فيج بس المشكله وراي مدرسه..
وداد: اخ منج انتي.. محد يروم عليج.. ملسونه .. يلا سيري بوديج..
ام سعيد تمت تضحك على حركات بنتها وسارت المطبخ عشان اتجهز الحليب لأبو سعيد لأنه يحب يشربه حار.. وهو متعود يشرب حليب نوق طازج من عزبتهم .. وصعدت غزلان عشان تتلبس وتتجهز وتروح بيت حصه عشان يروحون المدرسه سوى.. وبعد ما تلبست وجهزت نزلت مره ثانيه عشان اتروح بيت حصه..
غزلان: يالله امي انا سايره بيت حصوو.. عشان اروح المدرسه وياها..
ام سعيد: روحي.. ربي يحفظج ويوفقج.. ويسهل عليج..

وراحت غزلان باست راس امها وابوها وظهرت من باب الصاله وراحت صوب بيت حصه.. يوم دشت البيت استغربت يوم ما شافت موتر ابراهيم.. العاده يكون موجود يترياهم عشان هو الي يوصلهم مب اسماعيل الدريول..
غزلان: السلام عليكم اسماعيل.. اشحالك؟؟ وينك ما تنبان؟؟
اسماعيل: وعليكم السلام.. ها .. انا هني.. بس انتي مافي يجي سيم سيم اول..
غزلان: افااااا.. ما تسأل عنا.. ونحن شرات عيالك.. من نحن صغار انت هني ماشاء الله.. شو شخبار حرمتك وعيالك؟؟
اسماعيل: كلو في جين.. بس انتي مافي يجي سلم على انا.. انا في رجال كبير احين..
حصه: غزووووول حبيبتي.. فديتج والله..
غزلان: انجبي انتي.. ما اكلمج انتي.. عاد جيه يالظالمه نسيتيني.. شو هالسالفه الي نستج غزووول...
حصه: تعالي ونحن في الدرب بخبرج.. والله سوري.. ما نسيتج بس بفهمج الموضوع..
اسماعيل: هذا حصه في سوي ميريج.. عشان جيه احين مافي فكر في حد غير في هاسبند مال هو..
حصه: اسماعيل الله يسامحك.. ليش اتخرب علي انا بروحي بخبرها..
تمت غزلان واقفه مفججه عيونها مب مصدقه شو قاعده تسمع وتحاول تجمع.. وتمت حصه اتدزها واتركبها الموتر عشان يروحون.. : امشي اشفيج اتقولين حد دايس على ريولج فاجه ثمج..
غزلان: انا موووول مب فاهمه شي.. تعالي غريبه ليش اسماعيل يودينا.. العاده ابراهيم.. شو ياه؟
حصه: ابراهيم.. اونج يعني ماتدرين.. انجبي دخيلج.. نسيتي شو سويتي فيه امس.. فشلتيه المسكين.. مجروووح.. عشان جيه قال لإسماعيل هو الي يوصلنا..
اسماعيل: ليش انتي مايريد انا ودي ..
غزلان: لا اسماعيل مب جيه بس انا مستغربه..
حصه: اسماعيل اشفيك وايد ترمس اليوم.. خلني اخبرها..
وتمت حصه اتقول السالفه لغزلان الي من سمعت السالفه حضنت حصه بالقو وتمت اتصيح.. : حرام عليج.. والله جلبه.. بتعرسين وبتبتعدين عني.. عقب بتنشغلين بريلج وبتنسيني.. والله حرام.. ليش جيه؟؟ احين هاي ما حصلت غيرج.. خل ادور على وحده غيرج المدرسه مليانه بنات.. ما حصلت غيرج انتي حبيبتي انا..
حصه: اشفيج اتصيحين.. فدييييتج والله.. غزول عاد لا تجلبينها مناحه ترا انا بعد بصيح وياج.. بعدين شو فيج.. يعني ما تبيني اعرس..
غزلان: لا عرسي.. بس وياي.. عشان لا انتي قبلي واتم روحي.. ولا انا قبلج واتمين روحج..
حصه: شوفي ... لو اعرس ولو شو ما يستوي .. انا مستحيل انسااااج ولا انقطع عنج.. انتي توأم روحي وحبيبة قلبي.. ولا 100 درهم بيقدر ياخذ مكانتج الي في قلبي..
غزلان: هي قصي علي.. قصي علي بكلمتين وسكتيني.. انا المديره هاي كرهتها.. ماباها.. ما احبها.. حسيت انا قلبي نغزني.. ياريتني قلت لها انتي محيوزه .. انا الغبيه اصلا.. شو الي خلاني اقول لها انج مب مرتبطه..
حصه: افاااااا يعني ما تبين لي الخير..
غزلان: انتي تدرين اني اكثر وحده ابا لج الخير واحبه.. بس ما ودي ابتعد عنج..
اسماعيل: يلا انا في واجد شغل لازم سوي.. انتي بعد ساعه في وقف هني جدام مدرسه..
حصه وغزلان تموا يطالعون بعض ويتضحكون ..
حصه: اقول نزلي نزلي مافيني يردنا البيت..
غزلان: لازم ما تبين اتردين البيت.. اقول ردني البيت ردني..
حصه تمت اتدز غزلان صوب الباب عشان تنزل من الموتر ويدخلون المدرسه..
غزلان: مابا مابا انزل.. ما احب هالمدرسه..
تمت غزلان تتحرطم وهي تمشي وحصه اتدزها كل شوي.. وتضحك على شكل غزلان وهي تتحرطم.. اول ما دخلوا شافوا المديره واقفه ويا الأخصائيات.. من شافتها حصه ارتبكت.. ما عرفت شو اتسوي.. واما غزلان فتمت تتطالعها بحقد كأنها ماكله حلالها..
غزلان: شو فيييييج.. تعالي ماعليج منها.. خل انسير الصف ولا كأنها موجوده..
حصه: يلا..
وتوها حصه بتمشي صوب الصف ويا غزلان.. نادتها المديره..
حصه: غزووول.. زقرتني.. ابييييي...
غزلان: اوهووو.. نحن لازم ننتقل من هالمدرسه.. شو هالمديره الي عندنا..
المديره: حصه.. تعالي شوي؟؟
حصه تمت ماسكله مريوول غزلان وتسحبه كل شوي.. وتبتسم للمديره: غزوووول.. والله مرتبكه..
غزلان: لا تروحين.. انا مالي شغل فيج..
حصه:شو مالج شغل فيني.. تعالي وياي..
غزلان: مديرتج هاي.. ماحبها.. تعرفين يعني شو مادانييييييها..
حصه وهي تسحب غزلان وياها سايره صوب المديره وغزلان تتحرطم: هلا.. السسسسسلام عليكم..
المديره: اشحالج حصه.. وشخبار امج؟؟
حصه: ها..
غزلان: الحمد لله بخير.. وامها بخير انا شفتها الصبح وكانت بخير.. يلا حصوو بتبدأ الحصه وتدرين عاد علينا رياضيات وأبله ابتسام بتعلقني وياج على المروحه اذا تأخرنا.. عن اذنج أبله..
المديره كانت تضحك على كلام غزلان.. هي مقدره شعور غزلان ورده فعلها لأنها تعرف العلاقه الي بين غزلان وحصه كيف قويه.. ولايمكن هالتصرف طالع من غيرتها.. بالعكس من حبها.. وخوفها من فقدان حصه..
المديره: هيه.. صدقها غزلان.. اسمعي كلام ربيعتج.. تبا مصلحتج..
غزلان: يلا مع السلامه ابله..
حصه: اشفيج انتي.. عيب والله عيب..
غزلان وهي تقلد المديره: اسمعي كلام ربيعتج.. تبا مصلحتج.. افففف تقهر تقهر..
حصه: حرام عليج والله ابله نعيمه طيبه..
غزلان: طيبه.. وتبا تشلج عني..
حصه: اقول.. اظني ابله ابتسام ما بتعلقنا على المروحه.. بتسوينا انا وانتي غسيل معلق عالحبل.. امشي خل انسير قبل لا نتأخر..
غزلان: يكون احسن ..

[Gad]

في شقه عبدالله.. علي كان راقد من التعب.. لأنه تم طول الليل سهران.. وعبدالله يحاول يقومه عشان يروح يكمل أوراقه ويقدم اوراقه للوزاره عشان يتعين كطبيب ..
عبدالله: علوووي.. انا اعرفك.. اذا ما نشيت وراح عليك اليوم بتقوم عقب وبتعور لي راسي ليش ما قومتك يلا نش وفكني.. وراي دوام يا ريال؟؟

علي: اوهووو.. روح الدوام.. انا باجر بسير..

عبدالله: مب ساير.. بتم ازن على راسك لين ما تنش وتتلبس وأتأكد انك نشيت..

علي: ياربي شو هالعالم الي ما تحس.. انتوا العرب مشكلتكم عديمي الإحساس..

عبدالله: ماعليه يالأجنبي اتحملنا عاد..

علي: لاحووول.. (نش من مكانه وهو يسحب اللحاف وياه صوب الحمام).. عفان الله.. ناس عمرها ما بتحس ولا بتعرف قيمه النوم.. ولا ..

عبدالله: على وين على وين.. شايل لحافك وساير.. شو تبا اتكمل رقادك في الحمام..

تم يسحب عنه اللحاف.. وهو مافيه حيل يقاوم سحب عبدالله للحاف فودر عبدالله اللحاف من صوبه .. وقتها طاح علي على ورى واتعور.. وهالطيحه صحته من الرقاد عدل.. تم عبدالله يضحك على شكله وهو متعور في مأخرته..

علي: ماعليه عبوود.. والله اردها لك.. اتريا عليّ..

عبدالله: نش نش الله يخليك.. هههههه..

شل عبدالله تليفون وتم يصور شكل عليو وهو طايح على الأرض مب رايم ينش..

علي: عبوود.. خوز عني.. ترا والله بنقض عليك..

عبدالله: انت نش بالأول عشان تنقض علي.. ههههه.. اتصدق.. حالتك اتعور القلب..

علي: اقول.. روح روح دوامك عن يخصمون منك على التأخير..

عبدالله: اتصدق أحسن من مجابلك..

علي: يكون احسن..

بعدها دخل علي الحمام عشان يسبح ويجهز يروح الوزاره عشان يقدم اوراقه ويخلصها.. وكعادته متعود على الكشخه .. وهو ماكان عنده ولا كندوره.. بحكم انه توه ياي وما لحق يفصل.. كان عبدالله مجهز له كندوره بيج.. وسفره حمرا وعقال.. ووزار وكل شي.. وحاطه على السرير ومبخرهم ومعطرهم وكاتب له في رساله عشان يلبسهم .. يوم شاف الورقه ابتسم وحمد ربه ان الله عطاه ربيع يفكر فيه.. ويرتب أموره..

علي: الووو.. عبوود

عبدالله: اكيد شفت الرساله ودقيت.. بس لا يكون رقدت في الحمام؟؟

علي: لا ما رقدت.. تسلم والله.. ماقصرت.. جمايلك مغرقتني..

عبدالله: علووي.. انا ما انسى وقفاتك وياي يوم كنت في إيرلندا اتعالج.. كنت اتداريني في المستشفى.. الإهتمام الي شفته منك.. ماشفته من اخوي الوحيد الي كان مفروض يكون وياي..

علي: اهئ اهئ.. يا ضنايا.. اشفيك.. شوي وبتصيح.. الي انا سويته لا انجاز ولا شي عجيب.. شي عادي ممكن يصير أي مكان..

عبدالله: اقول.. يلا فارج وراي شغل..

علي: انا جدامي.. كااااااااااك

عبدالله: ههههههه.. يلا مع السلامه..

بند علي الخط عن عبدالله وتم يتلبس ويتعدل.. كان طالع شكله رهيييب بهاللبس.. تم يطالع عمره.. ويتذكر اخر مره كان لابس فيها كندوره.. تم يضحك.. قبل لا لحيه ولا شنب مثل الأوادم.. وكان ضعيف.. لكن احين جسم وكتاف عريضه.. ولحيه وشنب.. وعيون سود ووساع.. كان ماخذ من ملامح أمه وايد وجمالها.. الخشم.. سيف مسلول.. والثم اتقول قلب من صغره..

علي وهو يطالع عمره في المنظره: والله فديتك يا علوو.. بطيح الطير من السما,.. امممموح..الله يحفظك..

علي.. الغرور من أطباعه.. طبعه مختلط ما بين الحنان.. والطيبه.. والغرور .... بعد ما تجهز.. ظهر من الشقه وركب موتره الكوبي.. كان كل ما يمر في شارع.. يجذب الكل صوبه..خصوصا ان موتره موديل السنه.. ومب مخفي..فكان كل ما يمر عدال سياره غصبن عنهم كان يجذبهم نظره الغرور الي ماليه عيونه.. وقف عند باب الوزاره.. ونزل من الموتر.. ودش المبنى.. كل من شافه تم يرمس ويساسر عليه... راح صوب الإستقبال

علي: السلام عليكم.. لو سمحت اخوي.. انا مب عارف وين اسير اقدم أوراقي عشان التوظيف؟؟

الموظف: اخوي.. سير الطابق الثاني.. عند وداد العمران.. وهي المسؤوله عن التوظيف..

علي: تسلم اخوي..

ومن سار علي بعيد عن الموظف على طول سارت وحده من الموظفات صوبه..

ساره:عبيد عبيد.. منو هذا؟؟

عبيد: لاحول ولا قوة إلا بالله.. اقول.. سيري جابلي شغلج وانتي اشعليج..

ساره: ها.. بس أسأل اول مره اشوفه هني..

عبيد: احين كل يوم يدخل عندنا فوق ال100 مراجع.. وكل واحد تقريبا اول مره انشوفه.. اشمعنى سألتي عن هذا..

ساره: ها.. لا ماشي.. بس يشبه واحد من أهلنا قلت يمكن هو..

عبيد: لا والله.. اقول.. دشي دشي مكتبج وكملي شغلج..

ساره: انت الواحد ماياخذ منك حق ولا باطل..

كان حافظ الفراش توه مار في الممر ويغني وحده من هالأغاني الهنديه الي دوم يغنيها.. ومن شافته ساره قبضته..

ساره: حافظ حافظ.. تعال..

حافظ: شنو هذا ماما.. انا في لازم ودي جاهي حق مدير.. بعدين سوي عصير حق ارباب موسى.. وبعدين في..

ساره: اقول فكني من هالمحاضره كلها.. واسمع الي بقوله احين..

حافظ: شنو ريد..

ساره: في واحد توه كان ياي.. وكان يكلم العم عبيد.. واحين سار عند وداد.. سير شوف هذا منوو؟؟ وشو اسمه؟؟

حافظ: انتي شو.. باقل.. مافي مخ.. يريد سوي حق انا مشكل..

ساره: محد باقل غيرك.. يلا بسرعه قبل لا يظهر من مكتب وداد..

حافظ: شوف ماما..

ساره: ماما في عينك انزين..

حافظ: شوف.. انا مافي سوي شغل بلاش.. انتا في بيسا.. انا في سوي..

ساره: انزين.. بعطيك.. عنبو انت كل شي ببيزات عندك.. ما يسدك راتبك..

حافظ: لا مافي كفي.. يلا عطي انا بيسا انا في روح..

ساره: لا.. انت روح اول ويوم اتييب الأخبار انا بعطيك البيزات..

حافظ: اوكي..

راح وتم يكمل الإغنيه الي كان يغنيها وصعد في الليفت عشان يروح مكتب وداد يشوف شو السالفه..

عبيد ما عيبه تصرف ساره.. ولا في عمره ارتاح لتصرفاتها.. وياما يقولها وهي تقعد اتطول لسانها عليه.. ريال شيبه على قد حاله.. ما يقدر يتحمل طوله لسانها فيسكت عنها ويتحمل.. واما حافظ.. هالفراش فكل تفكيره في البيزات ما يهمه شي.. دام انه هالشي بيكسبه فلسين ما يقول لا.. وراح مكتب وداد.. دق عليها الباب..

وداد: ادخل..

حافظ: جود مورنينج مدام.. كيف هالك اليوم.؟؟

وداد: بخير.. الحمد لله.. اشحالك انت حافظ؟؟

حافظ: تمام.. انتي يريد شي انا جيب حق انت..

وداد: لا ..

وداد كان عندها مراجع ثاني فكان علي يتريا هالمراجع يظهر عشان يدخل.. وحافظ كل شوي يرمس ويا وداد يتريا علي يدخل..

وداد: الحمد لله.. غزلان بخير.. شو يابها على بالك..

حافظ: لا انا مافي شوف هي من جمان عشان جيذي..

وداد: من كثر ما اتهز راسك يا حافظ عيديتني بديت اهز راسي..

وفي هاللحظه انتبهت وداد لدقة الباب ورفعت راسها.. شافت علي.. تمت اتسمي على جماله في خاطرها.. ما قدرت تنكر ان جماله جذبها فعلا..

علي: السلام عليكم اختي..

وداد: وعليكم السلام والرحمه.. اي خدمه؟؟

علي: والله انا توي متخرج من ايرلندا على حساب الوزاره.. واحين ياي اقدم طلب التعيين..

وداد: هيه .. هات اوراقك... كلها جاهزه..

علي: هيه الشهاده مصدقه وكل شي والصور جاهزه.. كله موجود في الظرف..

وداد طلعت الأوراق من الظرف وتمت تتطالعهم.. وكانت اتسجل عندها البيانات عشان تعطيه ايصال رقم الملف .. يوم شافت الإسم.. استغربت.. تمت تحاول اتعيد ذاكرتها..

وداد بإرتباك: انت علي سليمان جاسم سليمان الملا..؟؟

علي: اي نعم؟؟

رفعت وداد راسها وتمت تتطالعه.. وتحاول تذكر شكل خالتها آخر مره شافتها.. وتقول في خاطرها.. لا مستحيل... الشبه كبير.. والإسم نفس اسم ريل خالتي.. معقوله علي رد.. لا ياربي.. ما اصدق.. احين انا كيف ارمس وياه.. شو اقول له؟؟

علي: اختي في شي؟؟

وداد: ها.. لا ماشي.. خلاص هاك الإيصال .. وراجعنا بعد يومين وان شاء الله خير.. بودي اوراقك للمدير..

علي: ياريت لو اتخلصين اوراقي للتعين بسرعه لو ماعليج أمر لأني مستعيل الصراحه..

وداد: ماعليه.. بس انت اتعرف الإجراءات الروتينيه شوي تاخذ وقت.. ولين ما يحددون موعد للمقابله.. بس ماعليك ان شاء الله..

حافظ يوم سمع اسم علي.. حفظه.. وبسرعه طلع من المكتب عشان يخبر ساره عن اسمه..