|
|
|
|
01-03-2009, 12:33 AM
|
#1 |
|
(حلا فعّال)
 
|
صباح الخير يا مصر يا حبيبتى
صباح الخير يا مصر
صباح الخير على الناس المرهقين من عناء الحياة والدايرين في الساقية اللي منصوبة لهم من سبع الاف سنة .. الناس اللي عايشة اليوم بيومه .
.كل أملها يعدي من غير اي خساير .. مابتفكرش في بكره عشان ماتتقهرش... مابتفكرش في النهارده علشان ماتتنقطش .. صباح الخير على ضحكة عالية في قهوة شايها مايتشربش .. على شاب بيقوم لست كبيرة في الاتوبيس.. على كوباية شاي باللبن وحتة بقسماط بعد صلاة الفجر جنب السيدة نفيسة .. على قهوة في الحسين مبيعديش عليهاحد .. على سينما زحمة والضحك طالع من القلب للركب .. على سور الأزبكية وكتبه المعتقة .. على عشاق فقرا مش لاقيين شقة فبيخطفوا الفرحة متداريين في صخور الكورنيش ورا شجر النيل .. على عربيات الكبده والسجق لحمة الفقير وعربيات الدوم تفاح الفقير وعربيات التمر خمرة الفقير.. على اطباق الكشري خالي العدس وشطه زياده وغرقان في الدقة . . على فطاطري الحسين اللي سمى نفسه بيتزا الحسين فباظ من ساعتها.. على كل صالة بتلم الناس اللي مش عارفة تتلم على نفسها .. على كل نكته وحشه تتقال بصوت عالي . . على روح سيدنا الحسين اللي مش مدفون هنا اساسا .. صباح الخير على الناس اللي واقفة في طابور حكومة رخم بتتخانق عشان تسلي بعضها .. على مدرجات الدرجه التالتة وناسها اللي مش هنا اساسا .. على الاهلي لما يسكع الزمالك ستة وساعات اربعة وساعات اتنين .. صباح الخير على كل ايدين بتسلم عليك باهتمام بعد الصلاة.. وعلى كل امام ما بيطولش في الوقوف ويطول في السجود .. . على بتوع الزلابية اللي واقفين قدام المدارس خايفين من البلدية ... . صباح الخير على كل جميلة تغري شاب غلبان النظرة الثانية والتاسعة .. صباح الخير على الناس اللي بتكوي قمصانها وتبص على المراية قبل ماتنزل .. على شوارع الزمالك وجاردن سيتي والمعادي اللي تشرف وتفتح النفس للحياة وعلى كل اللي بيمشوا فيها وبيفرحوا للي ساكنين فيها .... صباح الخير على حب الجامعة ومظاهرات الجامعة وكل إفيه اتقال على اي معيد غتت في اي سكشن ... صباح الخير على الاوض اللي فوق السطوح والشقق المفروشة والايجار اللي مابيدفعش .. على صينية الاكل اللي بتيجي لك من الجيران قبل ما يتفقوا معاك تدي ابنهم درس... على قران الفجر وصوت النقشبندي وهو بيقول مولاي اني ببابك قد بسطت يدي ... صباح الخير على الجمعيات اللي ساتره الشعب المصري .. على تمييلة الصاحب على صاحبه في ساعة الزنقة .. صباح الخير على ام سعيد اللي بتحب جمال عبد الناصر وام محمد عبد المنعم اللي بتعمل رز مسكر وملوخية تضيع مستقبلك , ...صباح الخير على كل نجع وكفر مايكفرش من العيشة .. صباح الخير على الكنايس اللي شكلها حلو ,, على الاتوبيس النهري لما يكون نضيف.. على عم دويدار ونصبة الكشري بتاعةالكوبري .. على كل زوجه مابتنكدش على جوزها , وكل راجل مابيستقواش على ولية وعلى كل ندهة لبابا وكل لعبة لبنوته ومسدس ميه لحماده .. . صباح الخير على كراتين الجهاز المتعانة فوق الدواليب .. واحلام الجواز المتحاشة تحت البطاطين .. صباح الخير على عامود السواري والفاتحة اللي بقراها وانا ببص من تحته على تربة ستي اللي قالتلي وانا رايح الجامعة اول مرة " يابني البلد بلدهم يعملوا فيها ما بدالهم !" صباح الخير على لمة صحابي واحنا مع بعض وشتايمهم فيا علشان بطلت اجي .. صباح الخير على دعوة ربنا يكفيك شر طريقك .. . على مسلسل ارابيسك وفيلم حب في الزنزانة و الكيت كات ونجيب الريحاني وهو بيغني حتى الفيران اشتكت من قلة فرافيتي ... ! علي الجامعه وشليتنا .. علي اسامه وفريد واحنا بنتكلم في الكوره وبنهزر علي قعدتنا في الكافتريا واحنا بنتكلم في كل حاجه علي ابو شاكر الجدع ومنظره وهو مزنوق بيشرح لكل طلاب الدفعه على ابو رضا اللي سابهالنا مخضرة وراح السادات .. على محمود صاحبي الي زهقان من الروتين .... على احمد اللي كل ما اتكلم معاه احس اني بستفاد شيئ جديد ... والايام اللي كنا مش لاقيين ناكل فيها بس كان عندنا شاي وسكر كتير.. على الكينج وصحبته ..واحنا سهرانين في البلاي ستيشن صباح الخير على حبيبتي بنت الاصول اللي مابتخافش من اي حاجه بكتبها . .صباح الخير على بنتي اللي لو ماشفتهاش بتكبر .. قولولها ان ابوكي كان راجل جدع . |
|
|
|
|
|
01-03-2009, 12:48 AM
|
#2 |
|
( ضيف حلا )
|
رد: صباح الخير يا مصر يا حبيبتى
كلام جميل من عضو جميل
|
|
|
|
|
|
|
01-03-2009, 01:57 AM
|
#3 |
|
نائبة الإدارة  
|
رد: صباح الخير يا مصر يا حبيبتى
 |
|
|
|
|
|
|
01-03-2009, 02:06 AM
|
#4 |
|
(حلا فعّال)
|
رد: صباح الخير يا مصر يا حبيبتى
توبيك اكتر من رائع
وفى انتظار كل الجديد باذن الله تحياتى لك : bosy    الحب هو اللعبه الوحيده التى يكسبها الطرفان ... او يخسرها الطرفان  <<... أصرخ فيكم أصرخ أين شهامتكم.. إن كنتم عربا.. بشرا.. حيوانات فالذئبة.. حتى الذئبة تحرس نطفتها والكلبة تحرس نطفتها والنملة تعتز بثقب الأرض ... >> فلتحيا غزّة رمز العزّة |
|
|
|
|
|
|
04-03-2009, 08:13 AM
|
#5 |
|
موقوف
|
رد: صباح الخير يا مصر يا حبيبتى
شكرا للموضوع !
همام |
|
|
|
05-03-2009, 08:50 PM
|
#6 |
|
موقوف
|
رد: صباح الخير يا مصر يا حبيبتى
مشكووور ع الموضوع الرائع
يعطيك الف عافيه دمت مبدع الى الامام دائما |
|
|
|
10-03-2009, 01:03 AM
|
#7 |
|
(حلا جديد )
|
رد: صباح الخير يا مصر يا حبيبتى
مصر الله يرحمها بناها عبد الناصر والسادات قتلها وحسنى دفنها هى فين مصر دى علشان نحبها
|
|
|
|
10-03-2009, 01:17 AM
|
#8 |
|
(حلا جديد )
|
رد: صباح الخير يا مصر يا حبيبتى
كل كلامك مظبوط عدا حكاية الاهلى طبعا انت عارف ان الاهلى هو فريق السلطة اى الحكومة اى النظام وبالشكل ده تبقى واحد من اتباع الناس الوحشة الحق نفسك وشجع اى نادى تانى وممكن نقبل انك تبقى زملكاوى
|
|
|
 |
| مواقع النشر (المفضلة) |
| الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| صباح الخير | ابو زغدانة | مجلس حلا لعذب الكلام | 6 | 13-12-2005 01:37 AM |
| مدري صباح الخير والا مساء الخير == بس الوكاد بوجهك الخير كله | الراســي | مجلس حلا للترحيب والإهداءات | 2 | 07-06-2005 12:05 PM |
| صباح الخير | هلت العبرات | مجلس حلا للشعر وهمس القوافي | 2 | 02-01-2005 03:55 AM |
| صباح الخير .... | اسيره في قلب دامع | مجلس حلا لعذب الكلام | 6 | 18-12-2004 01:07 PM |
العرض العادي
