[حزينه^وحيده]

لجزء الحادي عشر
قعد خالد من الرقاد على صوت الاذان قام بسرعه من مكانه وحس بالراحه تسري فيه يطالع المكان قام عشان يدخل الحمام شاف قمر نايمه على الكرسي تضايق معناته انها ماراح تنسى سالفه الغرف المتفصله تنهد ودخل الحمام وقعدت قمر وشافت الفراش خالي راحت عند الحمام وشافت خالد جدامها طالعها بنظره متألمه وخلاها تدخل تعجبت قمر علامه خالد يطالعني جذي للحين زعلان لاني ضحكت عليه بس نظرته غير وكأني قايله شي ولا مسويت له شي..دخلت الحمام تيددت وطلعت خالد ما كان بالدار فرشت السياده وصلت لما خلصت توها دخل خالد وشافها بالثوب شكلها ملائكي
خالد:تقبل الله منح
قمر:منا ومنك
خالد قعد على الكرسي وقمر قعدت تسحي شعرها تطالع خالد من المنظره واهو مهموم يفكر وعيونه بالارض شالسالفه شنو يفكر فيه؟
قمر:خالد صاير شي
خالد:ليش ما انتي تقولين لي شصاير
قمر:شقول انت اللي زعلان مو انا زعلان لاني ضحكت عليك تحت ترا مو قصدي
خالد مارد عليها ويقول في باله والله انها بتخليني افقد اعصابي الحين
قمر قعدت يمه:خالد ما ابيك تتضايق من شي ابيك تكون مرتاح
خالد:عشان ما ادش المستشفى وتتوهقين فيني
قُمر قامت عنه... شلون يفكر انها يوم ما ما تهتم له .. وان كانت تروح له المستشفى فانها تروح لانها تحس بالواجب مو انها ما تقدر تهنى بعمرها من دونه وتخاف عليه اكثر من نفسها ..
قُمر: شقصدك بالكلام
خالد: ما قصدي شي ... تزهبي عشان نروح بيتكم .. اكيد تولهتي عليهم من كثر ما جابلتي ويهي
قُمر زاد غضبها ... شناوي عليها الليله .. ما بيرسيها على بر.. لكن انا اللي اوريه
قُمر بحزم: مو رايحه
خالد يلتفت لها: شنوو
قُمر بعدم اهتمام: ما بروح ..
خالد: وليش..
قُمر تقعد على الفراش: مزاج
خالد: صج والله
قُمر: أي والله .. بقعد في البيت. .برتاح وباجر بشوفهم بالعزيمه .. الدنيا مو طايرة ..
خالد: على راحتج ..
راح يبدل ثيابه وقُمر ناويه عليه انه يندم لكل كلمه قالها ... راحت عند الدريسر وطلعت اغراض الاظافر والمنظف وكل شي .. لمت شعرها وربطته من فوق .. خذت باندانا وحطته على شعرها من جدام وقعدت على السرير .. خالد طلع من غرفه التبديل.. وشافها قاعده على السرير واهي تعدل باظافرها تذكر اظافره .. طالعهم بس حشى والله عليه يمد يده لها .. الدلوعه..
صار الوقت عشى ورد خالد راح يصلي وقُمر بعد ومن بعد الصلاه ردت حق شغل الاظافر.. وخالد قاعد على الكرسي يطالعها ومشغل المسجله .. على شريط كاظم الساهر اليديد.. باغنيه هل عندك شك .. الاغنيه كانت تقول..
(( قاتلتي .. ترقص حافيه القدمين ..
ترقص
تررقص
حافيه القدمين
عند مدخل شرياني .. ))
قُمر تدندن ويا الاغنيه واهي تدري ان خالد يحترق مكانه .. اهو كان هادئ اكثر من ما كان متوقع.. تبيها حرب اعصاب مثل روما وميلانو.. خير يا قُمر .. ما طلبتي
طقت مريم الباب على الساعه 8:30
خالد: تفضل
مريم: احم احم ااااااااااحم ..hellow love birds العشا زاهب ... وامي تناديكم
قُمر: ان شالله الريم .. حبيبي بتنزل
مريم احمرن خدودها للموقف وخالد يحس ان قُمر تلعب لعبه: ايه حبيبتي بس نطريني خمس دقايق البس وانزل وياج
قُمر: ان شالله حبيبي ........ (تطالع مريم اللاصقه على الباب) ... بنيي بسرعه مريومتي
مريم تضحك : انزين ما تبون سلطه.. سالي خالد يمكن يبي
قُمر تدري شنو مريم تبي وما ردت طلبها .. بنظره حالمه تطالع خالد: حبيبي تبي سلطه؟
خالد واهو يصك بظروسه .. تتلاعب المدام .. لكن اوريج: لا حبيبتي ماابي.. تعرفين مااقدر على الحموضه
قُمر: ابي بس انا مريم ..
مريم: اكو حمص بعد .
قُمر : هههههههههههههه بس خلاص .. لين نزلنا بنشوف
مريم باحباط: ساليه انزين
خالد: قلنا بننزل وبنشوف مريم...
مريم فهمت من نظرة خالد انها لازم تنزل : انزين قمور .. حبيبتي كثري من الحلاو على العشا .. خبرج بعرس جريب وابي اتعلم..
قُمر تمت تضحك ومريم راحت وخالد متغيض من عمره من حركات قُمر .. خلصت قُمر شغلها وراحت تغير هدومها وخالد من وراها .. ونزلوا للعشى..
خليل نزل وياهم ويا وضحه ورحبت وضحه بقُمر لانها ما شافتها يوم وصلوا لان راسها كان بالحنه .. وسلمت على خالد بعد اللي استانس يوم شافها حامل وان راح يصير عم .. العشى كان ولا احلى .. الوناسه وسوالف خليل والضحك كان على اخره ..
خالد يطالع شعر خليل: ويلي ويلاه منك خلول شعرك رهيب.. ههههههههههههه
خليل: تتغشمر ويا ويهك .. اصلا محد اييب اللون دامها ام عيسى اللي مسويه الخلطه
مريم: عوافي بو ابراهيم .. وخله خلود يتغشمر لمتى يشبع بيي اليو م اللي يبي الوصفه..
خليل: ايه .. حبيبتي وضحه شيلي شعري طايح على عيني
وضحه: هههههههههههههههههه
بو خليل: شصاير اليوم ..
خالد: يوبا خليل محني شعر راسه
بو خليل عصب: خليل.. قلت الخيرة محني راسك ..
خليل: هااا يوبا ( يطالع خالد بنظرات ) لا يوبا بس لان الدكتور نصحني عن الحزاز اللي براسي
ام خليل: في راسك حزاز..
خليل : ايه يمه .. وايد .. بقع صاير لي
ام خليل: بو خليل باجر ييب لي زيت اللحم احطه على راسه يمكن يروح
خليل: هاااااااااااااااا لا يمه ما يحتاي
خالد ومريم وقُمر ماتوا من الضحك على خليل
ام خليل: أي ما يحتاي الحزاز مو زين اييب لك اعصاب..
خليل: يمه ماكو اعصاب شوفيني كول هادئ .. يوبا ما تتكلم ؟.
بو خليل: لا امك صاجه .. انا ما عفس حالتي الا الحزاز اللي براسي.. خلها تدهن راسك فيه .. صج ان ريحته ما بتروح الا بعد شهر بس زين ..
خليل يهمس لزوجته: وضحوا انقذيني
وضحه: حبل الجذب قصير يا خليل
خليل: مالت عليج وانا اللي استنجد بج .. (صد لخالد ) خلود تكفى اخوك انا اكبر منك انقذني من هالعقد
خالد: لا خليل والله العلاج زين .. وزيت اللحم وايد زين هههههههههههههههه تذكر ابوي يوم يدهنون راسه به..
خليل: شلون انسى.. ما وهقنا بالمستشفى وبالعرس بالريحه .. الكل علباله العشى مجبوس لحم ولا برياني .. والله ما يصير جذي
قُمر: هههههههههههههههههه هالمرة خليل خذ وياك الطرشي عشان كل ما تشتهي البرياني بالمكتب
قُمر ومريم ووضحه اللي ضحكوا لكن خالد وام خليل وابو خليل ظلوا مستغربين
خليل بصوت مرتفع: اوريك يا جسوم الشقردي اوريك .. فاضحني ..
الا ودخله جاسم: هلاااااااااااااا بهل الدار.
الكل قام له ..
خالد: هلا بعمي الغالي هلا فيك ..
جاسم: خالد حبيبي .. وحشتني ..شهر ونص من اخر مرة شفت شلون جذي يالقاطع
يتغامزون لبعض
جاسم: عروووووسنا الغاليه هلا والله فيج منور بيت بن ظاحي ..
قُمر : النور نورك عمي
خليل يدري ان جاسم كان عند قُمر وخالد طول المده .. وفكر ينتقم منهم على الغشمرة.
خليل: هااا جاسم .. حلات الويه اللي يشوفك يقول رايح فرنسا ولا ايطاليا مو السعوديه
جاسم: هااااا. أي ايطاليا يا معود الا احترقت بالرياض .. حالتنا حاله والله .. تعب
خليل: بس انا مو متاكد .. باين عليك مصيف باوروبا
جاسم: ههههههههههههههه الله عليك يا ولد اخوي سوالف انت ..
(يطالعه بنظرة عشان يسكت ولاحظ شعره) : محني شعرك خليل
الكل ما عدا جاسم وخليل ضحكوا .خليل: يا ناس شنو حرام .. احني راسي مافيها شي .. مو اول ريال ولااخر ريال يحني راسه .. ويمه .. لا تفكرين تحطين بشعري زيت اللحم .. مستعد اني احلق اقرع ولا اني احط الزين براسي.. وضوحه.. كلي دبل حبيبتي عشان البيبي ..
وضحه: أي دبل انت من صجك ..
جاسم : قُمر .. اوريج اللحين سالفه الخطوط (يصد لخليل) شخبار الخطوط خليل
خليل: اسكت يوم عرفوا ان اليهال للحين ماانولدوا عطوني جم كلمه تهزب الصاحي وطلعوني .. رضوا الولد بس حليلها العنود ما رضوا لها
قُمر : هههههههههههههههههههههههههههههههههه
خالد: شالسالفه ؟؟
جاسم واعيونه تدمع: خليل ... .ألله يهداه بس .. فاتح خطوط حق اليهال .. عياله
خليل: والله واحد وفرحان بييبون لي عيال انت شحارك
خالد مات من الضحك على اخوه وعلى حركاته اللي تطلع منه .. كملوا عشى على السوالف والضحك وانتقلوا للصاله ..
رن التلفون شالته قُمر لانها جريبه منه
قُمر: الو..
ام خليفه: قمور.
قُمر: يمه حبيبتي ... وحشتيني يمه
ام خليفه: قموووووووووووووووور يالحمارة شنو انتي من متى واصله وتوج تتكلمين وياي
قُمر تلومت على عمرها وخالد يطالعها وفرحان لانها لاقت اللي تلاقيه: يمه حبيبتي سامحيني بس ما سمحت لي الظروف اييج يالغاليه لا تحملين علي
ام خليفه: مااحمل عليج حشى علي بس ولهت عليج قمور حبيبتي .. شخبارج وشخبار خالد
قُمر: ابخير يمه دامج بخير يالغاليه.. ولهت عليج يمه
ام خليفه: ولهت عليج العافيه يالغاليه .. حبيبتي باجر بنيي ويا بنات خالتج وابيج تنسين كل اللي صار امبيناتكن وانا اعرفج حبيبتي .. راعيه اصل وما تنسين صله الرحم
قُمر: لا توصيني يمه .. من دون ما تقولين . خالتي وبناتها بعيوني
ام خليفه: الله يبارج فيج حبيبتي .. يالله حياتي اشوفج باجر
قُمر: ان شالله ..
ام خليفه: مع السلامه . سلمي على الكل
قُمر: يوصل يالغاليه الله يسلمج
سكرت قُمر عن امها
ام خليل: ليش ما رحتوا لهم ..
قُمر تطالع خالد وخالد بالمثل ومريم اللي تكلمت: ما شبعوا من بعض يمه اشفيكم قاعدين على قلوبهم
ام خليل: انتي سكتي يالملسونه شهالحجي
مريم واهي متلومه: بعد توهم معرسين
قُمر: لا خالتي لاني شوي تعبانه ما قدرت اروح وياهم وخالد حاول وياي وانا ما رضيت باجر ان شالله بشوفهم على خير..
بوخليل: انزين حصل خير ما صار شي (يكلم قُمر) على راحتج يوبا اللي يريحج سويه ..
قُمر شوي تضايجت بس بعد ظلت بالقعده .. خليل كان ويا وضحه ويسولف لها ومخليها تدمع من الضحك وجاسم وياهم .. خالد عيونه كانت على قُمر .. يحس بذنب فظيع .. لو ما اخناقه وياها جان الحين اهم راحوا وقُمر ما تهزبت من امها .. رفعت قُمر عيونها وشافت خالد يطالعها ونساها الحزن كله وتمت تطالع عيونه ..
ظلوا يسولفون الباجي من قُمر وووضحه ومريم على جهه .. خليل وخالد وجاسم من جهه
خليل: اييييي باجر عاد بفضي بطني عشان الاكل
جاسم: خلول انت من صج تاكل ..ما شاء الله عليك تحافظ على رشاقتك
خليل: ايييه لاني مقرر ادخل بمسابقه ملك جمال الخليج .. شرايكم
خالد: ههههههههههههههههه اكو مسابقات جذي
خليل يطالع خالد بغباء : انت من صجك بعد .. الا اقلك جسوم شفت فرس ناصر المصباح
جاسم: لا ما شفته .. شفصيلته
خليل: اصييييييييييله يا عمي ووالله روعه ما شفت مثلها .. ترعب القلب ليما تمشي ولا شعرها اللي على عيونها يااااااااااي هوووس
وضحه انتهبت وفهمت الكلام على انه لبنيه وتمت تطالع خليل واهو يكمل
خليل: المشيه المايله ولا النظرة الذباحه .. تذكرني بنظرة يدتي نوفه فديتها والله لو انا شاعر جان قصدت فيها
خالد لجاسم: كل هذا بفرس؟
جاسم: انت ما تدري اكيد هاذي فصيله الستاليون..
خليل: لا مو ستاليون .. اظنها موستانغ ..
جاسم: الموستانغ ما ايوونك الا بلون العيون ..
خليل: عاد هاذ غير
جاسم: هههههههه شلون غير يعني .. الفصايل ما تتشابه ولا ما فرقوا باساميها ..
خليل: انا انسان حر .. اقلك مو ستاليون اهي موستانغ
خالد: ههههههههههههههههههههههههههههههه تهاوشوا الله يخليكم من زمان ما شفتك هوشاتكم
خليل: كل شي تقدر تقولئه .. لكن مثل ذيج الفرس ماكو فرس....
التفتتت واهو يطالع وضحه اللي شوي وتحرقه بالنظرة... استغرب منها ليش معصبه قامت وضحه مرة وحده وخليل انتفض منها ..
خليل بهدوء: وضوحتي حياتي على وين
وضحه: يهنم الحمرة
خليل: بل.. شغلي المكيف انزين .. مااقدر على الحر وايد ..
وضحه تبتسم له بحمق: ان شالله .. تامر امر .. ما بتييي الا مبرده لك... عن اذنكم تصبحون على خير
الكل : وانتي من اهله..
جاسم يطالع خليل: اووووووووف خليل وضوحه من الزين معصبه عليك..
خليل: انزين انا ما قلت شي ... (يفكر خليل وفجاه) .. خسك الله من حظ يا حظ خليل..
قام خليل وراح ورى حرمته واهو يركض .. وظل خالد وجاسم ومريم وقُمر يسولفون .. خالد عيونه طبعا ما راحت عن قُمر .. يطالعها مطالع واهي مستغربه منه ومستحيه بعد .. لان مريم وجاسم ما خلوهم كل شوي يتغشمرون وخالد مو هامه الموضوع
مريم : طاع هذا... هيه انت شوي شوي بتاكلها
جاسم: ههههههههههههههههه أي والله مبقق عيونه عليها ما جاف خير
خالد بغرور: حرمتي وكيفي يااخي يوم اللي تلقى اللولو بتصير العن مني
جاسم: اااااااااه على اللولو
مريم عرفت عاد وانقلبت موجتها على عمها: أيه يالولو .. وينك يا دان الخير .. ويـــــــــــــنك ..بعدي بحار .. بعدي بحار .. صغير .. ما يقدر على بعاااااااادك .. وين القاك .. وين القاااااااااك
والكل يضحك على اغنيه مريم ووكانها اغنيه غوص.. خالد استغل اهتمام مريم بعمها وراح لعند قُمر .. تمت تطالعه وتفكر عيونه شريه الليله ما بتعدى على خير وياه..
جاسم: على وين خالد ..
خالد يقوم قُمر ويود يدها: تعبانين.. بنروح ننام .. باجر من الصبح تعال عشان نروح المزرعه واشوف الفروس..
مريم: توه الناس خالد .. روح انت نام وخل قُمر
قُمر صارت غتمه مرة وحده.. ما تتكلم .. خالد اللي يسيرها .. وعاجبها الوضع...
خالد: حنا الاثنين تعبانين .. مو حياتي
قُمر تاشر براسها وويها شاب ضو ..
خالد: يالله تصبحون على خير ...
جاسم ومريم اللي متونسين حيل على الموقف وعلى شكل قُمر : وانتوا من اهل الخير والعافيه ..
وراح خالد ويا حرمته لدارهم وسكرو الباب ......
خليل كان قاعد بداره ويا وضحه الزعلانه من صج .. ما يدري شلون يراضيها ..
خليل: حبيبتي وضوح انا كنت اتكلم عن الفرس
وضحه: أي فرس .. مشيتها ماادري شنو وقذلتها على عيونها .. ادري فيك يا خليل.. تحب المغازل .. لا وتتفارخ جدام اخوك وعمك .. ولا كاني قاعده وياكم
خليل: حبيبتي شلون تفكرين جذي.. انا مااشوف احد غيرج جدامي .. حتى الطوفه لاعنه خيري من كثر ماادق فيها .. ماانتبه حبيبتي الا لج
وضحه: تغشمر .. هذا اللي فالح فيه بس .. تغشمر علي . مو انا هني مهرج لك
خليل: والله .. ما دريت.. وين خشمج
(يمد يده لخشمها يبي ايوده وتطقه على يده)
خليل: ااااااااااااه .. حارة طقتج .. انتي اللي تقولين انا مهرج ابي اشوف خشمج الاحمر يا ام راس يابس..
راح لها ولمها : يا حبيبتي يا وضحه عساني العمى .. وعساني التعب وعساني الموت لو افكر اني اهتم لغيرج.. انتي ناسيه اني حطيت روحي تحت فرس عشانج .. واهدرت دمي حلال لج .. شلون تقدرين تفكرين اني يمكن اطالع غيرج ولا افكر في احد غيرج ..
وضحه بدلال: انت تقول يا خليل .. ما تراعي مشاعري .. يعني حتى لو فرس .. انت ما تدري اني اغار عليك حتى من الهوا ..
خليل: افا ااا.. لو الهوا مؤنث جان قلنا ماعليه مذكر شلون انغرم في شي مذكر يا وضحتي الغاليه
وضحه تحط راسها على صدر ريلها : احبك خليل.. ماادري ليش احس ان سعادتنا مابدوم
خليل: فال الله ولا فالج وقص بلسانج .. لاتقولين جذي.. انا وانتي بنعمر سنين .. شفتي يدي سبع.. اكثر منه .. لاننا نحب بعض .. ومستحيل عاشقين مثلنا ينسوون
وضحه بابتسام: حتى خالد وقُمر؟
خليل: خالد وقُمر؟ ... انتي من صجج .. اقلج محد تقولين لي خالد وقُمر ..
وضحه: هههههههههههههههههههه احبك حبيبي.. احبك
خليل واهو يلمها: وانا بعد يا بعد هلي ......... وانا بعد ..
تحت والساعه طافت ال12:15
جاسم: اوووووووووف يالله مريوم .. بروح انا
مريم بخوف: جسوم لاتروح .. ما عندي احد اسولف ويا.. انا خايفه جاسم وايد خايفه
جاسم: من شنو ؟؟ سعود واحد محترم وطيب.. ولو اني ما عاشرته كثر مطلق وحمود بس احسه طيب وذرب .. وحباب بعد .. لا تخافين..توكلي على الله ولا تحاتين شي.
مريم: احس ان سكته قلبيه بتصيبني من كثر الخوف .. اقعد ويانا الليله بات وياي بداري
جاسم:هههههههههههههههههههههه ها ريم رديتي ياهل لين خايفه ترقديني انا وخالد وخليل وياج
مريم بحزن:اللحين راحوا خالد وخليل ... وما ظليت الا انت ...
جاسم بحزن: أيــــــــــــــــه .. الله المستعان
مريم حست بالذنب: اسفه جسوووم .. ما كان قصدي ازعلك
جاسم : لا عادي مريم .. بس انا حزين ليش ان مالي احد يرعى مصالحي .. الوالده وراحت عني من زمان والوالد حرمني من شوره قبل 3 سنين ..واللحين انا مااقدر اقول لاحد ولا احجي لاحد ..
مريم تبتسم: انا هني .. قول لي ..اللي بقلبك وبسمعه كاامل ..
جاسم: اااااااااااااااااه يا مريم ... احبها .. احبها مريم .. ماادر يشلون حبيتها جذي.. اول شي حسبته ينون ولا حركاتي يعني .. بس زاد هاذا اللظى اكثر واكثر ليما عمر قلبي وحياتي كلها .. حتى القصايد ما تطلع مني .. زين مني ان الفت بيت واحد .. احبها مريم .. واحس ان مالي نصيب فيها ..
مريم: افا عليك عمي .. وين مالك نصيب فيها .. الا كل النصيب .. وان شاله انا بكلم امي عن الموضوع..
جاسم: لا خلج
مريم باصرار: الا بكلمها .. انت خلاص شيبت مو ياهل بعد .. خالد وتزوج ما باجي الا انت ... (تبتسم له) وما بتلقى احسن من لولوة يا عمي .. ابد ..
جاسم بابتسام: الله يخليج يمه مريم..
مريم بزهو: ربي يحفظك يا وليدي ..
قعدوا يضحكون ومن بعد سوالف للساعه 2 جاسم رقد في احد حجر بيت اخوه الجبير ومريم راحت دارها واهي للحين خايفه من باجر ..
انسدحت مريم واهي تتذكر سعود يوم كانو صغار .. كان كله ويا الفروس .. ما يخاوي خليل وجاسم وخالد .. تحس بنظراته بعزومه رده خالد .. كانت اول مرة يزورونهم .. سعود انحب من الكل من بعد ذيج الزيارة . .لانه اهو اللي ذوب الثلج بين العوايل ورد الصلاه من بعد موته ابوه.. بس اهي ما حبته .. لانها ما تبي تفترق عن بيتها وعايلتها واهم شي.. عمها واخوانها .. سعود واخوانه يسكنون بالرميثيه بعيد عنهم .. واهي بتضطر انها تسكن معاهم ... الصبر يا رب .. باجر الملجه والعفسه والحاله .. الله يعيني بس ..
خالد وقُمر للحين راقدين .. طافت الساعه 9 الا وتلفون خالد يرن .. ردت عليه قُمر لانه يمها ..
قُمر بتعب: الوووووو
جاسم: قُمر .. قُمر وينه ريلج التعبان
قُمر: هلا عمي ...
جاسم: هلافيج .. وينه خلود ..
قُمر: راقد عمي .. اصحيه
جاسم بغباء: لا حبيبتي خليه راقد ..
قُمر :انزين
جااسم بصوت مرتفع: قمممممممر من صجج وعيه لا اللحين اصب الماي عليه
قُمر: انزين
التفتت لخالد اللي رايح في سابع نومه .. تمت تطالعه يحليله .. شكله مثل اليهال..
بصوت ناعم تناديه: خالد ... حبيبي... حببي
خالد واهو راقد: امممممممممممممممممم
قُمر: حبيبي قوم جاسم يبيك بالتلفون
خالد بتعب: منوووووووو
قُمر: جاسم
خالد يرفع راسه ويبتسم ونص عيونه مفتوحه: صباح الخير
قُمر: هههههههههههههههه صباح النور قوم جاسم يبيك
خالد: خله يولي ... (سكت ونزل راسه مرة ثانيه وتذكر)... ويه جاسم
خذ التلفون من قُمر: جسوم سوري
جاسم: سوري بعيونك يالباهت يالباهس يالرقله يالصخله احد يعتمد عليك علبالك المزرعه جريبه يالله قم لا اقوم البيت على راسك اللحين قم
خالد بعد التلفون من صراخ جاسم عليه وقُمر تمت تضحك عليه .. مسكين ..
خالد: شسوي فيه اللحين
قُمر: ههههههههههههههههه روح له حبيبي .. حرام من زمان ينتظرك
خالد: ماابي اروح .. ابي اقعد وياج ..
قُمر بحيا: ماعليه .. روح اللحين والظهر بتغدى وياك .. شرايك
خالد: انتظر للغدى ..
قُمر: ههههه ايه مافيها شي .. ولا ما تقدر على فرقاي
خالد: تبين الصج ..... لا ... احبج قُمر .. احبج
قُمر بحيا تدزه: يالله قوم جسوم ينتظرك
تذكر جاسم بالتللفون ورد عليه: جسوم .. ربع ساعه وانا عندك ..
جاسم: يالله بسرعه ..
سكر جاسم عن خالد .. قام خالد راح الحمام اخذ له شاور سريع وطلعت له قُمر ثيابه وشماغ وساعه من ساعاته وعطره .. وتذكرت الخاتم.. ماكو وقت احسن من اللحن .. طلعت الخاتم من جنطتها وحطته وياهم ..
طلع خالد من الحمام واهو لابس بشكير ابتسمت له قُمر وراحت وراه الحمام .. قعد يتلبس في ثيابه وساعته والتفت لعلبه الخاتم .. فتحه انعجب فيه .. وايد حلو .. بس من وين له الخاتم
راح لعند باب الحمام: حياتي
قُمر: ها حبيبي
خالد: خاتم منو هاذا
قُمر بحيا: خاتمك حبيبي.. شاريته لك من فينيسيا ...
خالد: صج والله ..
طلعت له قُمر يوم خلصت.: أي ... كنت ناويه اعطيك اياه بيوم الطلعه بس......................
خالد سكت وقُمر بعد وحسوا نفسهم بيردون لذاك اليوم .. بس خالد ما خلاها .. باسها على جبينها: شكرا حياتي
قُمر بحيا واضح: العفو .. حبيبي ..
راح عند الكبت وطلع كاب بدال الشماغ..
قُمر: ليش ما بتلبس الشماغ؟
خالد: مالي على الحر واللويه .. وجذي احسن .. (لبس الكاب) احسن مو
قُمر: وايد احسن ...
خالد راح عندها: احبج قُمر ... صدقيني احبج ..
قُمر لاول مرة تحس بالحيا من بعد ايطاليا.. بس خافت وما ردت على خالد واهو فهمها
خالد: ادري انه من الصعب عليج تصدقيني بس انا من صج احبج .. احبج قُمر ..
قُمر ابتسمت ونزلت عيونها وحب خالد راسها .. وطلع
قُمر: در بالك على حالك .. لا تتعب نفسك
خالد بابتسام: ما طلبتي يا بعد عمري .. في امان الله
قُمر: في حفظه ..
وراح خالد .. ظلت قُمر مكانها .. تحس بالراحه وشويه من الفرحه .. الخوف احتل كل شي فيها بس بتحاربه وبتقدر تعيش مع خالد الحياه اللي اهي تحلم فيها .. لازم ...
تعدلت وتكشخت وحملت المبخر وراحت دار وضحه .. طقت الباب
وضحه: ارحبو..
دخلت قُمر من الباب: اكو احد هني
وضحه بابتسام: دخلي قمور خليل طلع ..
دخلت قُمر وتطالع ووضحه : الله الله بالزين .. ياحليلج وضوح
وضحه: انا حليلي.. الا قولي شهالجمال.. شهالجلابيه الكشخه ..
قُمر: الله يخليج من ذوقج .. (تمت تطالع بطن وضحه وتبتسم) متى بيي ؟
وضحه تاشر على بطنها: البيبي.. بعد 2شهرين.. بالله المستعان
قُمر: الله يسهل عليج ..
ودخلت المبخر على وضحه: تعالي خليني ابخرج
وضحه: الله عليج قُمر ليش متعبه نفسج الحين انادي رينا واتييب البخور لي
قُمر بدلال: خليني ابخر حرمه سلفي .. والله عندج مانع
وضحه بابتسام: على راحتج يالغاليه ..
قُمر ضحكت وقعدت تبخر وضحه اللي تحس نفسها بتنفجر من البيبي اللي ببطنها .. تحس بالثقل وكانها تحمل اثنين بدال الواحد... حبت قُمر .. يحليلها .. واهي اللي كانت خايفه منها .. الحمد لله انها ما طلعت مثل باجي الحريم .. قُمر حبوبه .. بسرعه تدخل القلوب .. تبخرن الحريم ووضحه قعدت تبخر دشداشه ريلها وقُمر غارت من الحركه وراحت تبخر دشداش خالد .. وعطتها وضحه بعد مرش من عندها حق شماغ خالد .. وتمن ويا بعض مده ساعه واهن يعدلن باغراض رياييلهن ويسولفن ويضحكن على سوالف بعض .. رراحن لمريم بعد ما خلصن وشافوا حالتها حاله .. ترتعش وتعرق من الخوف وتهتز مثل الورقه
يوم قعدت قُمر يمها مريم سالتها: قُمر انتي بعد حسيتي جذي يوم ملجتج
قُمر: واكثر بعد ههههههههههههههههه
مريم بظيج: قُمر تكفين لا تتغشمرين علي
وضحه:ههههههههههههههههههههه مريوم علامج تنتفظين مافيها شي بس بيلبسج طقمج ودبلتج وبيطلع مافيها شي ..
مريم: احسن اني بموت قبل لا تيي الحزة..
قُمر: نسيتي روحج شسويتي لي يوم ملجتي ويا خالد .. طفرتي بعمري
مريم: ذاك كان غير.. عادي يعني اطفرج لانج كنتي بتموتين بس ياريت خالد اللي لبسج
قُمر حزنت شوي ونزلت راسها
وضحه حست لقُمر: بس عاد مريوم اللحين يعني بتسوين هالحركات كاهي قُمر زعلت استانسي..
قُمر: لا ما زعلت .. عادي (تبتسم لهن)
مريم: اسفه قمور .. بس اليوم انا مو صاحيه .. قومن خذوني المستشفى خلوهم يرقدوني ولا يطلعوني قبل باجر .
وضحه: الا بنخليي سعود يدخل عليج ويخليج ترتجفين مثل الورقه لا وبعد تسوينها بروحج
مريم بشر: يالباهسه خسج الله من حرمه شنو انتي ما بقلبج رحمه
وضحه: لا
مريم: قوموا طلعوا من دار ي بسرعه
وضحه يودت يد قُمر وقامت وياها ومريم شبصت فيهن مرة ثانيه واهي خايفه: على وين؟
قُمر: توج طاردتنا
مريم: من صجكن انتن اخليكن تروحن وانا بموت من الخوف .. مو قصدي قُمر
وضحه: يوم اني اطلع باهسه بعيونك يالناقه مالي قعده وياج
مريم تيلس وضحه وتخلي راسها على حظنها: امدودحي سامحيني حبيبتي والله انتي ورده وانتي قُمرة انتي حبيبتي حياتي لاتروحين عني..
وضحه تغمز لقُمر: لا لا انا زعلانه
مريم: حرام عليج وضوح .. انا مريم حبيبتج ..
وضحه: شي واحد بيراضيني
مريم: امري..
وضحه: العطر اللي هناك
راحت مريم وشلت شياشي العطر كلهن : كلهن لج ما طلبتي
وضحه : ههههههههههههههههههه الله عليج مريوم حبيبتي والله
وقعدن وياها يكشخونها ويعدلونها .. نزلن تحت وابو خليل قاعد
بو خليل: الله .. محلاهن بناتي .. 3 قمور كل واحد احلى من الثاني ..
ام خليل: أي والله
راحن البنات باسن راس عمهن وعمتهن ومريم اللي طولت بحظن ابوها وتمت تصيح
بو خليل: توها الساعه 11 الصبح خلي شوي من دموعج حق الليل..
قُمر + وضحه: ههههههههههههههههههههههههههههههههههههههههه
مريم ببجيها: والله ما توقف دموعي يا يوبا . مااقدر اصدق اني بفارجكم
بو خليل: هاذي سنه الله يا بنتي والحرمه مالها الا بيت ريلها .. والله انا غلطان يا وضحه؟
وضحه: حشى عليك عمي تغلط .. صح كلامك .. ماعليك منها هالدلوع بعدين ما بتفتكر فينا ويا ريلها
مريم: خس الله حظج انا انساكم الا كل يوم بتصل فيكم وبعور راسكم ولا بخليكم تنامون
قُمر: انا اللي برد عليج مريم اذا ملوا منج
مريم واهي تحظن حرمه اخوها: حبيبه قلبي انتي .. مو انتي يالكريهه وضحوا
وضحه: هااااااا
مريم تبجي: اتغشمر وياج اشفيج انتي ما تتحملين غشمرة شلون مروة ويا خلول
وضحه: احلى حياه هههههههههههه حبيبتي مريم ...
عايله بو ناصر وصلت من الصبح بيت بو خليفه والكل استقبلهم حتى بو خليفه .. بعد الاقناع بو ناصر بعد خاواهم لبيت ام خليفه .. اول ما شافه بو خليفه خذاه بالحظن وتموا جذي فترة ليما بجوا الكل
بو خليفه: يالقاطع يالواسن وينك انت .. 10 سنين يالظالم عشر سنين
بو ناصر: سامحني ياخوك .. بس الدنيا ومشاغلها
بو خليفه: الله يبارج هالاعراس .. اللي ردت الدم لمجرى العروق ..
بو ناصر : أي والله
بو خليفه يلتفت لناصر: الله والفحوله .. ريال من منبت رياييل .. شعلومك ناصر..
ناصر: علومن طيبه عمي .. شخبارك انت
بوخليفه: بخير بشوفتك ..
بوناصر يتلتفت لطلال وخليفه: الله بالرياييل.. شخباركم يا عيال
يبوسسون راسه وخشمه واحد ورى الثاني : تمام بشوفتك يالغالي
ويلتفت لنواف ولد لطيفه: هاذا ولدك يا خليفه
خليفه : لا هاذا ولد ضاحي ولطيفه
بو ناصر: ما شاء الله . .ريال .. وينه ولدك
ياشر خليفه لولده اللي وراه: هاذا .. عبد العزيز
بو ناصر يحمل عزيز بو 4 سنين : الله عليك يا بو سعود يحليلك والله
يضحك عزوز ويا بو ناصر ويلمس شواربه ...
بو خليفه: .. الا وينها شواخي ؟؟
شيخه من تحت الغطى: كاني عمي .. كاني
بو خليفه يلتفت وطلال وناصر ميتين من الضحك: مااشوف شي كلهن مغطيات..
تجدمت شيخه: كاني عمي .. شخبارك عمي ..
بو خليفه: الله الله .. شواختي دلوعتي استوت حرمه .. حليلج والله يا بعد قلبي شخبارك انتي
شيخه: تمام بشوفتك يالغالي..
بو خليفه: وانتي نوارة
نورة تهز راسها: ايه عمي ..
بو خليفه بفرح: ما شاء الله .. ربي يحفطن يا بناتي .. جربوا داخل جربوا تفضلوا
بو ناصر :زاد فضلك
دخلن الحريم داخل وين ما قام التحبب والتحظن والتوايه والسال عن الاحوال .. نورة ظلت ويا نوفه وشيخه ومروة واقفه بعيد عنهن .. نزلت لهن لطيفه اللي كانت حامل بالشهر الثامن ومنتفخه حالتها ..
شيخه: الله يا لطوف انفجار سكاني فيج
لطيفه: هههههههههههههههههههه جبي وتعالي بوسيني ..
راحت شيخه لها وخذتها لطيفه بالحظن : الله الويه الحسن .. يحليلج شيخوا مو شيخوا المشمخه
نورة: نظر عني ناصر كل يوم يمسح ويهها بباليس السيارة ليما استوت جذي
شيخه: يا ملقج ..
مروة : خلونا ندخل احسن من هني ....... وتمشي عنهن بغرور..
شيخه تقلد على صوتها: يالله يا بنيات عن هني .. وتمشي مثلها والبنات يضحكون عليها ..
فصخن البنات الغشاوي والشيلات وتخاون في ملحق الصاله .. وقعدن بالسوالف والضحك ورهف شوي شوي تتعود على شيخه وتحبها ..
شيخه:ايييييه يحليلها مريوم من قدها اليوم ..
البنات : أي والله
شيخه: يالله اهي من الباب الجدامي .. ونوفو من الباب الوراني هههههههههههههههه
نوفه: حشى علي ماافارج امي وابوي ولا دلالهم .. روحي انتي من الباب الوراني
شيخه: وينه ... اهو بس خله ايي .. وكل شي بيصير مثل ما يبيه
نورة: والله فشلتنا هالبنيه ميته على العرس
وديمه الياهل: فثلتنا والله
شيخه : والله فثلتج .. ويا ويهج انتي بس .. وين ظروسج
وديمه: في خثمت..
شيخه: عسى خشمج العوي لا تتغشمرين على خشمي
وديمه: خثمت عوي ههاهااهاه
الكل يضحك الا شيخه: بذبحج يالبطه سكتي زين
وديمه بحظن امها: مافيت خيل
شيخه: شنوووو
لطيفه تضحك: مافيج خير تقلج ..
شيخه: ايا النحسه .. مافيني خير .. تعالي خليني اعظج ..
راحت شيخه تعظ وديمه اللي تمت تصرخ
لطيفه: ذلفي عن بنتي يالمجرمه ..
شيخه تقعد ويا نوفه اللي ميته من الضحك عليها: اوريج فيها هالنفيخه ان ما طيرتها الليله بسما بن ظاحي
وديمه: مافيت خيل
لطيفه: بس ودوم... هاذا كله طلول اللي معلمها هالحجي .. وينه اخوج يعل عيني ما تبجيه ما عنده هالكلام
شيخه تبتسم: دام طلال اللي معلمها خلها .. عسل يا حبيبتي
وديمه بشر: عثل بعينت
شيخه تطالعها باجرام بس تضحك لها: يحليلج والله الا اطيرج يالنفيخه الميهوده
وظلن الحريم على الضحك والسوالف ليما يه العصر وتحركن لبيت ابراهيم بن ظاحي .. خالد على وعده لقُمر رد البيت الساعه 12:30 وراح لها المطبخ واهي تسوي الحلاو ويا وضحه .. ناداها من بعيد عشان ما يشوفه احد من الحريم .. قُمر تاشر له انها ما تقدر تروح له لكن اهو ظل يناديها ... قعدت تطالع عمتها وحرمه سلفها وشرردت من عندهن
قُمر بهمس: اشفيك ما قلت لك مااقدر اييك
خالد: انتي الل قلتي بنتغدى ويا بعض
قُمر: مااقدر حياتي وراي شغل وايد
خالد: انت مو مسؤوله .. اعنبو 3 خدامات وبعدت تشتغلين وياهن .. ماابي يدج تخترب حبيبتي
قُمر: هههههههههههههههههه حياتي شيرة الا حلاو شيخربها ..
خالد يضحك: ابي شوي
قُمر : لحظه
خالد ايودها من يدها: وين تعالي .. تبيها عذر عشان تروح .. عطيني من اللي بيدج
قُمر: من صجك
خالد أي من صجي .. قعدت تشل شوي وتوكله اياه واهو يضحك واهي بعد .. سحبها عشان تروح وياه
قُمر: هههههههههههههههههههه حبيبي خلني والله بعدين يصير خير..
خالد يازعم زعل: خلج انزين ما بيي لج .. خلي الحلاو وضحه ونيمو ينفعونج
قُمر بدلا: افااااااا بو ليد .. بتخليني وبتروح
خالد يسند راسه على الطوفه: ويلي ويلاه منج .... احبج قُمر
قُمر: وانا بعد ..
خالد: انزين قوليلها
قُمر تذكرت يوم بايطاليا: انزين انا قلتها
خالد: ما سمعت شي
قُمر تهمس له: احبك
خالد : يااااااااااااااااااااااااااااااااااااي يالله بروح اغرق روحي يالله اوتعي من هالحلم الحلو
قُمر: قول لا اله الا الله .. مافينا شده الحسد
خالد ناظر قُمر بحب وحنان : يالله حياتي اخليج
قُمر: وين رايح
خالد: هههههههه بروح ويا الرياييل اشفيج
قُمر :لا خلك وياي ..
خالد: روحي سوي الحلاو ..
قُمر: لا بقعد وياك
خالد: ههههههههههههههههههه احسن
قُمر:هههههههههههههههه من صجك ما صدقت عمرك
خالد بزعل: طالع هاذي .. أوريج يا قُمر تعالي
شردت قُمر عنه واهو ظل واقف مكانه يطالعها ويضحك.. وراح لديوانيه الريايييل