[Gad]

في شقه عبدالله.. علي كان راقد من التعب.. لأنه تم طول الليل سهران.. وعبدالله يحاول يقومه عشان يروح يكمل أوراقه ويقدم اوراقه للوزاره عشان يتعين كطبيب ..
عبدالله: علوووي.. انا اعرفك.. اذا ما نشيت وراح عليك اليوم بتقوم عقب وبتعور لي راسي ليش ما قومتك يلا نش وفكني.. وراي دوام يا ريال؟؟

علي: اوهووو.. روح الدوام.. انا باجر بسير..

عبدالله: مب ساير.. بتم ازن على راسك لين ما تنش وتتلبس وأتأكد انك نشيت..

علي: ياربي شو هالعالم الي ما تحس.. انتوا العرب مشكلتكم عديمي الإحساس..

عبدالله: ماعليه يالأجنبي اتحملنا عاد..

علي: لاحووول.. (نش من مكانه وهو يسحب اللحاف وياه صوب الحمام).. عفان الله.. ناس عمرها ما بتحس ولا بتعرف قيمه النوم.. ولا ..

عبدالله: على وين على وين.. شايل لحافك وساير.. شو تبا اتكمل رقادك في الحمام..

تم يسحب عنه اللحاف.. وهو مافيه حيل يقاوم سحب عبدالله للحاف فودر عبدالله اللحاف من صوبه .. وقتها طاح علي على ورى واتعور.. وهالطيحه صحته من الرقاد عدل.. تم عبدالله يضحك على شكله وهو متعور في مأخرته..

علي: ماعليه عبوود.. والله اردها لك.. اتريا عليّ..

عبدالله: نش نش الله يخليك.. هههههه..

شل عبدالله تليفون وتم يصور شكل عليو وهو طايح على الأرض مب رايم ينش..

علي: عبوود.. خوز عني.. ترا والله بنقض عليك..

عبدالله: انت نش بالأول عشان تنقض علي.. ههههه.. اتصدق.. حالتك اتعور القلب..

علي: اقول.. روح روح دوامك عن يخصمون منك على التأخير..

عبدالله: اتصدق أحسن من مجابلك..

علي: يكون احسن..

بعدها دخل علي الحمام عشان يسبح ويجهز يروح الوزاره عشان يقدم اوراقه ويخلصها.. وكعادته متعود على الكشخه .. وهو ماكان عنده ولا كندوره.. بحكم انه توه ياي وما لحق يفصل.. كان عبدالله مجهز له كندوره بيج.. وسفره حمرا وعقال.. ووزار وكل شي.. وحاطه على السرير ومبخرهم ومعطرهم وكاتب له في رساله عشان يلبسهم .. يوم شاف الورقه ابتسم وحمد ربه ان الله عطاه ربيع يفكر فيه.. ويرتب أموره..

علي: الووو.. عبوود

عبدالله: اكيد شفت الرساله ودقيت.. بس لا يكون رقدت في الحمام؟؟

علي: لا ما رقدت.. تسلم والله.. ماقصرت.. جمايلك مغرقتني..

عبدالله: علووي.. انا ما انسى وقفاتك وياي يوم كنت في إيرلندا اتعالج.. كنت اتداريني في المستشفى.. الإهتمام الي شفته منك.. ماشفته من اخوي الوحيد الي كان مفروض يكون وياي..

علي: اهئ اهئ.. يا ضنايا.. اشفيك.. شوي وبتصيح.. الي انا سويته لا انجاز ولا شي عجيب.. شي عادي ممكن يصير أي مكان..

عبدالله: اقول.. يلا فارج وراي شغل..

علي: انا جدامي.. كااااااااااك

عبدالله: ههههههه.. يلا مع السلامه..

بند علي الخط عن عبدالله وتم يتلبس ويتعدل.. كان طالع شكله رهيييب بهاللبس.. تم يطالع عمره.. ويتذكر اخر مره كان لابس فيها كندوره.. تم يضحك.. قبل لا لحيه ولا شنب مثل الأوادم.. وكان ضعيف.. لكن احين جسم وكتاف عريضه.. ولحيه وشنب.. وعيون سود ووساع.. كان ماخذ من ملامح أمه وايد وجمالها.. الخشم.. سيف مسلول.. والثم اتقول قلب من صغره..

علي وهو يطالع عمره في المنظره: والله فديتك يا علوو.. بطيح الطير من السما,.. امممموح..الله يحفظك..

علي.. الغرور من أطباعه.. طبعه مختلط ما بين الحنان.. والطيبه.. والغرور .... بعد ما تجهز.. ظهر من الشقه وركب موتره الكوبي.. كان كل ما يمر في شارع.. يجذب الكل صوبه..خصوصا ان موتره موديل السنه.. ومب مخفي..فكان كل ما يمر عدال سياره غصبن عنهم كان يجذبهم نظره الغرور الي ماليه عيونه.. وقف عند باب الوزاره.. ونزل من الموتر.. ودش المبنى.. كل من شافه تم يرمس ويساسر عليه... راح صوب الإستقبال

علي: السلام عليكم.. لو سمحت اخوي.. انا مب عارف وين اسير اقدم أوراقي عشان التوظيف؟؟

الموظف: اخوي.. سير الطابق الثاني.. عند وداد العمران.. وهي المسؤوله عن التوظيف..

علي: تسلم اخوي..

ومن سار علي بعيد عن الموظف على طول سارت وحده من الموظفات صوبه..

ساره:عبيد عبيد.. منو هذا؟؟

عبيد: لاحول ولا قوة إلا بالله.. اقول.. سيري جابلي شغلج وانتي اشعليج..

ساره: ها.. بس أسأل اول مره اشوفه هني..

عبيد: احين كل يوم يدخل عندنا فوق ال100 مراجع.. وكل واحد تقريبا اول مره انشوفه.. اشمعنى سألتي عن هذا..

ساره: ها.. لا ماشي.. بس يشبه واحد من أهلنا قلت يمكن هو..

عبيد: لا والله.. اقول.. دشي دشي مكتبج وكملي شغلج..

ساره: انت الواحد ماياخذ منك حق ولا باطل..

كان حافظ الفراش توه مار في الممر ويغني وحده من هالأغاني الهنديه الي دوم يغنيها.. ومن شافته ساره قبضته..

ساره: حافظ حافظ.. تعال..

حافظ: شنو هذا ماما.. انا في لازم ودي جاهي حق مدير.. بعدين سوي عصير حق ارباب موسى.. وبعدين في..

ساره: اقول فكني من هالمحاضره كلها.. واسمع الي بقوله احين..

حافظ: شنو ريد..

ساره: في واحد توه كان ياي.. وكان يكلم العم عبيد.. واحين سار عند وداد.. سير شوف هذا منوو؟؟ وشو اسمه؟؟

حافظ: انتي شو.. باقل.. مافي مخ.. يريد سوي حق انا مشكل..

ساره: محد باقل غيرك.. يلا بسرعه قبل لا يظهر من مكتب وداد..

حافظ: شوف ماما..

ساره: ماما في عينك انزين..

حافظ: شوف.. انا مافي سوي شغل بلاش.. انتا في بيسا.. انا في سوي..

ساره: انزين.. بعطيك.. عنبو انت كل شي ببيزات عندك.. ما يسدك راتبك..

حافظ: لا مافي كفي.. يلا عطي انا بيسا انا في روح..

ساره: لا.. انت روح اول ويوم اتييب الأخبار انا بعطيك البيزات..

حافظ: اوكي..

راح وتم يكمل الإغنيه الي كان يغنيها وصعد في الليفت عشان يروح مكتب وداد يشوف شو السالفه..

عبيد ما عيبه تصرف ساره.. ولا في عمره ارتاح لتصرفاتها.. وياما يقولها وهي تقعد اتطول لسانها عليه.. ريال شيبه على قد حاله.. ما يقدر يتحمل طوله لسانها فيسكت عنها ويتحمل.. واما حافظ.. هالفراش فكل تفكيره في البيزات ما يهمه شي.. دام انه هالشي بيكسبه فلسين ما يقول لا.. وراح مكتب وداد.. دق عليها الباب..

وداد: ادخل..

حافظ: جود مورنينج مدام.. كيف هالك اليوم.؟؟

وداد: بخير.. الحمد لله.. اشحالك انت حافظ؟؟

حافظ: تمام.. انتي يريد شي انا جيب حق انت..

وداد: لا ..

وداد كان عندها مراجع ثاني فكان علي يتريا هالمراجع يظهر عشان يدخل.. وحافظ كل شوي يرمس ويا وداد يتريا علي يدخل..

وداد: الحمد لله.. غزلان بخير.. شو يابها على بالك..

حافظ: لا انا مافي شوف هي من جمان عشان جيذي..

وداد: من كثر ما اتهز راسك يا حافظ عيديتني بديت اهز راسي..

وفي هاللحظه انتبهت وداد لدقة الباب ورفعت راسها.. شافت علي.. تمت اتسمي على جماله في خاطرها.. ما قدرت تنكر ان جماله جذبها فعلا..

علي: السلام عليكم اختي..

وداد: وعليكم السلام والرحمه.. اي خدمه؟؟

علي: والله انا توي متخرج من ايرلندا على حساب الوزاره.. واحين ياي اقدم طلب التعيين..

وداد: هيه .. هات اوراقك... كلها جاهزه..

علي: هيه الشهاده مصدقه وكل شي والصور جاهزه.. كله موجود في الظرف..

وداد طلعت الأوراق من الظرف وتمت تتطالعهم.. وكانت اتسجل عندها البيانات عشان تعطيه ايصال رقم الملف .. يوم شافت الإسم.. استغربت.. تمت تحاول اتعيد ذاكرتها..

وداد بإرتباك: انت علي سليمان جاسم سليمان الملا..؟؟

علي: اي نعم؟؟

رفعت وداد راسها وتمت تتطالعه.. وتحاول تذكر شكل خالتها آخر مره شافتها.. وتقول في خاطرها.. لا مستحيل... الشبه كبير.. والإسم نفس اسم ريل خالتي.. معقوله علي رد.. لا ياربي.. ما اصدق.. احين انا كيف ارمس وياه.. شو اقول له؟؟

علي: اختي في شي؟؟

وداد: ها.. لا ماشي.. خلاص هاك الإيصال .. وراجعنا بعد يومين وان شاء الله خير.. بودي اوراقك للمدير..

علي: ياريت لو اتخلصين اوراقي للتعين بسرعه لو ماعليج أمر لأني مستعيل الصراحه..

وداد: ماعليه.. بس انت اتعرف الإجراءات الروتينيه شوي تاخذ وقت.. ولين ما يحددون موعد للمقابله.. بس ماعليك ان شاء الله..

حافظ يوم سمع اسم علي.. حفظه.. وبسرعه طلع من المكتب عشان يخبر ساره عن اسمه..