[تاج النساء]

...:::][ الحلقة الخامسة عشر ][:::...

::: مــن هـو بقـالي كـان عـني تخلـيت وانـت الوحيد اللـي بعمري بقالي الحب ماهو بـس خذني وانا جيـت الحـي وقـفه بين غالي وغالي احلم بشوفك شوفة الحـي للمـيت اللـي عن ايامه خذته الليالي :::


فتحتها .. و ضليت مدة اترجم الكلام الي مكتوب .. حسيت بـ صدمة تسري بـ روحي .. هذا منــــو !!!!!!!
كان مكتوب فيها ..

" نطرت .. و دقيت عليج كذا مرة .. بس ما اقدر استحمل .. اسمعيني تهديدي بـ انفذه و هذا وعد مني انا .. فارس .. عفواً ريلج .. بـ اذبحه بطيء و هذا انذار لج "

رغم الكرهـ الي بـ داخلي اتجاه فارس .. الا ان انا تعودت عليه .. تعودت كل يوم اصبح بـ هواش معاه و انام متهاوشة و زعلانة .. هو في يوم ما أكون زعلانة .. كل يوم دمت اعييش مع فارس .. أتعود ..
تنهدت بـ يأس ع مصيري ..
... : شبلاج تتنهدين !!
عيون : ملل .. مريوم متى بـ نوصل
مريم : وصلنا !!
عيون : صج
مريم : أي عيل اجذب عليج .. يالله تعالي ننزل ..

مسكتها من يدها و نزلنا .. لما شفت المطار .. راودني الحنين لـ البحرين .. أول مرة احس بـ الحنية لها .. يمكن لان هذه المرة سفرتي غيير .. و مع ناس عمري ما اتخيلت ان انا بـ اسافر معاهم ..
دخلنا المطار و كملنا الاجراءات .. دخلت الطائرة و كان تقسيمنا مثل قبل الرياييل جدام و الحريم ( يعني حنا ) ورى ..
مر الوقت و انا اتكلم مع مريم و شوي مع العنود و بعدها اخذت غفران الاعبها ..
حسيت الوقت مشى سريع .. عكس قبل .. الي كنت احسب فيه الدقايق لما نوصل ..
نزلنا من الطائرة .. بس تأخرنا شوي في الاجرائات .. كانت الساعة 6 المغرب .. الكل متلوم ع الصلاة ..
كملنا و ركبنا في سيارات أجرة .. و كل واحد لـ بيته ..
وصلت البيت ..
كل شي حبيتـــه في بيته نسانــي الهدوء .. الليــل .. الصمت .. الألوان حتى لون الـورد و الفرحه .. و مكـاني داهمتني الغـربه ليتني ماجيـت ليتني .. رديـت حزني .. غرّب ضحكتـي لساني ضيّع كلمتـي حسيت بـ الياس .. و مشـيت كنت بشكـوك و شفت الحقيـقة في عيونه .. تعتـرف بـ كل شي .. كان يطالعني و كأنه فاهم مشاعري ..
آآآآآه منك يا فارس ..
دخلت البيت .. طالعته و كأني أول مرة أشوفه .... ضيعت في البداية الغرفة بعدها لقيتها ..
فصخت شيلتي و رميتها .. توضأت و فرشت سجادتي ابا أصلي ..
دخل فارس .. خلى الشنط .. بعدها فصخ جاكيته و طلع من الغرفة .. يمكن بـ يروح المسيد .. اعوذ بالله من الشيطان الرجيم .. انا خلني اصلي بـ الاول ..
صليت و قريت سورة الرحمن و ياسين ..
فصخت حجاب الصلاة و رديت السجادة و القرآن مكانهم ..
طالعت ساعتي كانت 7:15 ..
و لـ الحين فارس ما ياا .. انا شبلاني أفكر فيه ..
طلعت من الغرفة .. أحس بـ الم خفيف في بطني و عندي رغبة في الترجيع .. بس .. الي خايفة منه تطلع شكوك رهف و أحلام في مكانها .. ان انا حـــامــــل !!

لا مستحيل .. انا قلت بـ انتحر اذا صرت حامــل .. دخلت المطبخ .. بس ما اباا آكل ..
يلست ع واحد من كراسي الصالة و تنهدت .. طالعت كل زاوية من زوايا الصالة بـ يأس ..
بعدها أخذت الريموت .. و فريت التلفزيون فر .. ما لقيت شي زين .. الا مزاجي اليوم متعكر و مالي خلق لـ شي ..
بندت التلفزيون و فريت الريموت بعييد .. رميت نفسي ع الكنبة الطويلة و حضنت المخدة الي كانت عليها .. احس نفسي ابا اصييح .. هذا فارس وين ذلف .. و خلاني بـ روحي ضايعة .. أبي أعيش بـ دنيتي دونه .. مثل الطيور الي بها الجو حره أبي اطوي سنين وامسح جروحٍ داخلي مستمره ولأني على الي راح باجية وندمانة كله مقدر لي بـ خيرهـ وشره .. بس هذه كلها أحلاااام .. ضاعت و ضاعت كل امنياتي و آمالي ..

.....

دخلت البيت و دخلت الشنط .. كانت تصلي .. شكلها حلو و بريء .. ما يخلو من الخشوع .. طلعت من الغرفة .. بـ أروح المسيد ..
ركبت سيارتي .. و فتحت باب الكراج و طلعت .. افكر اصفي حسابي مع ناصر .. النذل .. وصلت فيه الجرأة انه يهدد حرمتي ..
أخذت تلفوني .. طلعت رقمه و اتصلت عليه .. فيني نار اباا اطفيها و ما بـ القى غيره الحين ..
بس كان مشغول .. اكيد يكلم وحدة من خايساته .. ( ابتسمت بـ سخرية ) .. شنو يقول .. " خل لي عيون .. لان انا حبيتها قبلك " ههههههه .. الي يسمعه يقول انا اموت ع التراب الي تمشي عليه .. انا لو على كيفي تركتها .. بس وصية المرحوم في رقبتي ..
خليت التلفون ع السايلنت .. و دخلت المسيد صليت و رديت السيارة .. ناصر كان داق علي ..
بسرعة دقيت عليه ..
ناصر : لا خلا من فارس ..
صرخت عليه : الله لا يخليك قول آمين
ناصر : يا اخي ليش كل هـ الكره .. ماكل حلالك انا
فارس : قول مطفشني في كل وقت
رد علي بـ ببروده المعتاد : انا !!!
فارس : لا الطوفة
ناصر : قلت لك .. تبيني اخليك في حالك اترك لي عيون
فارس : ليش هي لعبة اتركها لك
ناصر : ما لي خص
فارس : عيون ما بـ خليها لو ع قص رقبتي
ناصر : ههههههههه
فارس : انا قلت شي يضحك !!
ناصر : ....
فارس : أبعد عن حرمتي و هذا آخر كلام بيننا ..

و صكيته بـ ويهه .. يا ربي انا شنو أسوي الحين .. ناصر كان أعز اصدقائي و الدنيا قلبتنا .. عسى الدنيا الفنى .. و لا أعيشها ..
بـ أروح الشركة اكيد الشغل الحين متراكم .. وقفت في البارك الخاص لي .. في البداية ما رضيت ان عيون تسجل الشركة بـ أسمي .. بس هي اصرت .. رغم انها تكرهني الا ان عينها تقول انها تثق فيني .. او جدام اهلها .. تبي تبين لهم ان زواجنا عادي و ماكو شي فيه ..
نزلت من السيارة و قفلتها .. خليت المفتاح في جيسي .. دخلت الشركة .. سلموا الموضفين علي .. حتى ان انا مب متعود ع كلمة طال عمرك .. حضرة المدير .. كنت معاهم عاادي .. و كأني واحد من موضفين الشركة ..
دخلت غرفة مكتبي .. لقيت السكرتيرة ..
السكرتيرة : اهلا استاز فارس ..الحمدلله ع السلامة .. نورت الشركة
ابتسمت لها : منورة بـ أهلها .. سميرة شلون الشغل الحين .. ؟
سميرة : الحمدلله .. بس شي أوراق تحتاج توأيعك ..
فارس : زين ييبهم لي ..

و دخلت المكتب .. ماكو شي تغير فيه .. يلست ع الكرسي .. و طالعت الورقة الي كانت هناك .. صفقة بسيطة نسيت ما وقعتها .. قريت شروطها .. بعدها رفضتها .. احسها بـ تسبب خسارة في الشركة .. انفتح الباب و انصك ..
سميرة : استاز فارس ..
طالعتها و عطتني الاوراق ..
فارس : واايد
سميرة : تراكم الشغل و ما عاد في حد يوأع فيهن ..
فارس : عسب اصحاب الصفقات ما عصبوا ..
ابتسمت لي : لا .. انا فهمتهن الوضع و ما فيهوش أي مانع لـ الشركة ..
فارس : الحمدلله ..

طلعت .. دقايق و ردت ..
سميرة : استاز فارس .. ريال يبيك برع ..
فارس : قولي له يدخل ..
سميرة : حاضر استاز ..

دخل الريال رفعت راسي عن كومة الاوراق الي جدامي .. و وقفت .. طالعته متعجب .. ابتسم لي ابتسامة سخرية و خلى يده في جيبه .. تقربت منه و صرخت عليه ..
فارس : انت شنو تسوي هناا
... : ياي اصفي حسابي معاك ..
فارس : ناصر .. اذا عندك كلام .. قوله و خلصني ..
صرخ علي : اباا عيون
فارس : و انا قلت لك لا .. ليش هي لعبة تعطيني اياها و اعطيك اياها ..
ناصر : نسيت لما كنت ادرس معاك في ماليزيا .. نسيت لو اذكرك .. شلون كنت اتكلم لك عنها و ان انا احبها و اذا رديت اتزوجها .. و انت شلون اخذتها مني و .....
قاطعته : لا انا ما اخذتها .. انا نفسي ما كنت ادري ان هذه هي ..
دمعت عيونه : لا كنت تدري .. بس كنت تحقد علي .. تبي تعذبني ..
خليت يدي ع كتفه : لا انا ما كنت ابا اخرب عليك .. بس نسيت انك اعز اصدقائي ..
ابتسم بـ سخرية : كنت
فارس : غصبا عني اخذتها .. فاهم
ناصر : هههههههههههههه .. جذب على غيري .. ليش انت بنت يغصبونك .. و هي بـ شنو تقرب لك علشان يغصبونك عليها ..
فارس : تبي تعرف شنو الي خلاني آخذها تعال اقولك ما تبي .. الباب يوسع يمل ..
ناصر : لا ما ابااا .. ما اباك تجذب علي اكثر .. روح دور لك ع غيرها ..
دزني ع الجدار ..
ناصر : اضنك قريت كل الرسايل الي دزيتهن لـ عيون .. ( ابتسم بـ استهزاء ) قصدي زوجتك .. بـ تموت .. بس ع بطيء ..

و طلع عني .. وقفت و ضربت الجدار بـ كف ايدي .. خليت راسي ع الجدار .. انا عمري ما توقعت اصير في مثل هذه المواقف .. شلون هذا ما يفهم .. خلاص البنت صارت في ذمتي .. شلون يبيها ..

.....

طالعت ساعتي كانت 8:10 .. فارس لـ الحين ما ياا .. طالعت زوايا الصالة بـ خوف .. اخاف ايلس بـ روحي .. مع أربع طوف .. غمضت عيوني بـ خوف .. يا ربي الحين شنو اسوي .. خااايفة .. بـ اموت من الخوف .. وقفت و اخذت امشي حول الصالة و انا ماسكة الجدار .. نزلت ع الارض و اخذت اصيح .. تكورت ع نفسي .. ما ادري كم بقيت ع هذا الحال .. بس رفعت راسي تمنيت اشوف فارس جدامي .. بس ما كان في حد في البيت .. وقفت و رحت لـ المطبخ طالعت ساعتي كانت 8:35 ..
فارس وين رحت .. خـــــــأيــــــفـــــة .. ليش خليتني بـ روحي هنا .. لييش ..
دخلت الغرفة قلت اقضي وقتي في ترتيب الثياب .. رتبتهم كلهم حتى ثياب فارس .. طالعت ساعتي 9:15 ..
وقفت و فتحت الدريشة .. يلست قبالها اطالع المكان .. كان بيتنا أو بـ الاحرى شقتنا .. ما كان بيت .. صغيير .. بس متواضع .. يطل ع البحر .. " كرنيش الملك فيصل " .. تنفست الصعداء و تنهدت .. وينك فارس .. ما كنت ابيه لـ شي .. بس كنت خايفة .. مب متعودة اضل بـ روحي في مكان خالي ..
صكيت الدريشة لان حسيت بـ برد .. طالعت ساعتي 9:25 ..
يا ربي الى متى بـ اضل اطالع ساعتي و انطرك .. اخاف يخليني هنا بـ روحي .. شنو اسوي الحين ..
رميت نفسي ع السرير .. و حضنت المخدة .. غمضت عيني بـ هدوء .. بس ما نمت .. مب متعودة انام بـ روحي ..
وقفت و رحت الصالة .. اخذت تلفوني اباا اتصل فيه اقول له انا خايفة .. بس ما عندي رقمه .. اتصل لـ مريم ..
دقيت لها من شافت الرقم شالته ..
مريم : خيير شنو صاير .. فيج شي عيون .. يألمج شي ؟؟
عيون : هههههههههههههههه
مريم : الله يقطع بليسج .. ( تثائبت ) شنو تبين ؟
عيون : عطيني رقم فارس
مريم : ليش مب عندج ..
ما عرفت بـ شنو ارد عليها ..
عيون : امبلى عندي .. بس ابا اتأكد اذا هو و الله لا ..
مريم : زين سجلي عندج .. *******
عيون : مشكورة .. مع السلامة ..
مريم : الله يسلمج

صكيته و ضغطت رقم فارس .. بس ترددت اتصل له و الله لا .. سجلته عندي بـ اسم " فارس " ..
خليت التلفون ع جنب .. شغلت التلفزيون عسب أقضي الملل و الخوف الي ياني ..
يلست ع الكنبة فريت التلفزيون فر .. أخيراً خليت ع mbc1 كانوا حاطين " بالصراحة احلى" .. صج انه برنامج سخيف و ما منه فايدة .. الا اني بس اقضي مللي ..
طالعته لما غفت عيوني ..

......

كملت شغلي .. أخـــــــيـــــــراً .. رديت الكرسي ع ورى و خليت يدي ورى راسي و غمضت عيوني .. افكر في حل لـ مشكلتي .. ناصر كان أعز اصدقائي و أقربهم لي .. لما سافرت علشان ادرس في ماليزيا .. صار معاي يدرس .. علاقتنا صارت أقوى من قبل .. كان يقول لي بـ كل شي عنه و عن اسراره .. كان يم الفندق الي ساكنين فيه .. بيت لـ عايلة بحرينية تييه كل 5 او 4 أشهر .. كانت عندهم بنت عمرها 17سنة .. من شافها ناصر .. ضل طول الليل ساهر و ما ينام .. قام يترقب الوقت الي يوصلون فيه .. رغم انهم ييلسون شهر واحد .. الا انه يصير من أحسن الاشهر عنده .. لما كنا بـ نرد من ماليزيا .. خلصنا دراستنا .. كانت أعمارنا 21سنة .. و عمرها هي 19سنة .. كان ناصر كل يوم يتوعد انه اذا رد يخطبها من اهلها و كنت انا اضحك .. انا ما شفتها الا من بعيد .. و بـ هذه الطريقة ما عرفت منو هي .. لما رديت البحرين .. شفت عيون بعد اسبوعين من ردتي .. و صار الحادث و مات ابو بشار ( دمعت عيوني ) و غصبتني وصيتها اتزوجها .. تزوجنا بس لما درى ناصر بـ كل شي .. اخذ يصيح .. ايه يصيح .. و من ذاك اليوم ما خلاني بـ حالي .. اذا كنت ابا اقول له عن كل شي .. بس كان يطنشني ..
فتحت عيوني .. و نشيت بسرعة .. و خليت افكاري ع صوب .. طالعت ساعتي كانت 11:30 .. فتحت عيني ع الآخر .. الوقت وايد متأخر ..
طلعت ما كان في حد في الشركة غير الحارس .. ركبت السيارة و رديت البيت بسرعة ..
وصلت البيت .. دخلت و يلست ع الدرج .. فصخت الجوتي و خليته مكانه .. دخلت الصالة كان التلفزيون مشغل و عيون نايمة ع الكنبة ..
اخذت الريموت و بندت التلفزيون .. طالعت شكلها و هي نايمة .. تقربت منها ..
همست لها : عيون ..
عيون : همممممم
انجلبت لـ الجهة الثانية ..
قلبتها لـي ..
فارس : عيون نشي ..
عيون : ......
لا شكلها في سابع نومة .. مسكتها من كتفها و وقفتها .. الحين شكلها نشت فتحت عيونها ..
عيون : فارس !!
فارس : توج موعية .. يلا تعالي نامي ..
عيون : زين اترك يدي
فارس : تبين تطيحين
عيون : كم الساعة الحين ؟!
طالعت ساعتي
فارس : 11:50 ..
عيون : و ليش خليتني هنا بـ روحي ..
فارس : ليش انتي ياهل ..
طالعتني بـ نضراتها الي تعودت عليها ..
فارس : ما قلت شي .. و كم مرة قلت لج انا ما احب هذه النضرات ..
سحبت يدها و مشت لـ الغرفة .. تثاءبت .. ابا ارقد .. دخلت الغرفة و اخذت شاور و بعدها نمت ..

......

نشيت ع صوت تلفوني .. طالعته .. كان المتصل " سلطان "
عدلت يلستي بسرعة و فركت عيوني .. اخذت التلفون و رديت ..
مريم : مرحبا الســاع
سلطان : صباح الخير
مريم : صباح النور
سلطان : شلون خطيبتي ..
مريم : أبيض
سلطان : ههههههههههههه ..
مريم : هههههه الحمدلله بخير .. و انت شخبارك ؟!
سلطان : بخير دامج بخير .. خلصتي اغراض الملجة ..
مريم : أي .. و انت ؟
سلطان : انا .. أي خلصتهمـ .. تبين تشوفينهمـ
مريم : لا .. خلهم مفاجئة ..
سلطان : تامرين امر كم مريم عندي ..
مريم : ........ " انصبغ ويهي احمر "
سلطان : ههههههه عمري ع الي يستحون .. اقول مريومة ..
مريم : هااه
سلطان : ههههههه .. وين رحتي
مريم : و لا مكان ..
سلطان : انزين انا رايح شغلي .. اخرتيني ..
مريم : في وين انت تشتغل
سلطان : مهندس صغييير ..
مريم : هههههه
سلطان : و انتي متى بـ تكملين دراستج ..
مريم : اممممم .. باقي علي سنتين و اخلص ..
سلطان : زين عيل زوجتي بـ تصير دكتورة ..
مريم : ههههه لا عاد مب مرة وحدة دكتورة .. يمكن مساعدة دكتور .. هذا ع الي بـ يصير ..
سلطان : اذا مساعدة دكتور .. ما بـ اخليج تشتغلين ..
مريم : و ليش يا حافظ ..
سلطان : أغاااار
مريم : ههههههههه .. يمكن يخلوني مساعدة دكتورة ..
سلطان : انزين .. يلا فيمان الله
مريم : مع السلامة ..

صكيته و تنهدت .. ضميت التلفون لـ صدري و نشيت .. غسلت ويهي و توضأت .. صليت الفير .. و قريت قرآن و أدعية .. بعدها شليتهم .. و يلست مقابلة التسريحة .. خليت يدي ع خدي و سرحت في عالم بعييييييييد .. غمضت عيني .. و انسدحت ع سريري ..
بقيت مدة هايمة في عالمـ أحلامي .. وقفت ع صوت الجرس .. فتحت باب غرفتي بس لما حطيت ريلي ع طرف باب الصالة .. اخذتني رجفة .. تذكرت فارس .. اشتقت له متعودة كل يوم انش اشوفه يالس ع هذا الكرسي من يشوفني يصبح علي و يبوسني ع راسي ..
رن الجرس مرة ثانية و بسرعة له .. فتحت الباب حاطة في بالي اشوف فارس .. بس فتحت الباب و وقفت جامدة
" حياتي نضرة عيونك .. و عيـنـي عشقها لونـك .. على قلبي عـلـى هونك .. أعزك لااا يهمونــك !! "

نسيت ان ما علي شيلة .. صكيت الباب و تسندت عليه .. تنفست الصعدااء .. وقفت و ركضت لـ غرفتي اخذت شيلتي و لبستها و لبست عباتي بعد .. ما قلت لكم منو هذا .. ســلــطـــان .. !!
فتحت الباب ..
ابتسم لي : صباح الخير
نزلت راسي : صباح النور ..
سلطان : شبلاج ياية ركض ..
مريم : كنت احسبك فـ فـارس
سلطان : انزين .. انا ييت اسلم عليج .. فيمان الله ..
رفعت راسي : مع السلامة ..

راح و صكيت الباب .. دخلت المطبخ اسوي لي شي آكله ..

.....

بشار : أحلاموو .. نشي الله يخليج ..
احلام : همممممم ..
بشار : و بعدين اذا تزوجت عليج .. لا تقولين ليش ..

نزلت من ع السرير ..
أحلام : لحظة .. وين رايح .. ؟!
بشار : و هذا الي انتي تبينه ..
بـ دلع : أووه .. حرام عليك امس انا متى نمت ..
بشار : و ليش ما نمتي ..
احلام : الالم في بطني ذبحني ..
بشار : قولي دلع حرييم ..
برطمت : افااا
بشار : هههههههههه .. زين نشي سوي لي شي آكله بموت من اليوع ..
احلام : الحين انت مقعدني من النوم بس علشان اسوي لك شي تاكله ..
بشار : خلاص لا تسوين لي شي .. ما اباا ..

مشيت أوني زعلان ..
احلام : تــعــال بشار .. امزح معاك ..
وقفت و اخذت تركض .. الحين هذه التعبانة لانها حامل .. صج دلع حرييم ..

.....

صبيت له الحليب في الكاس ..
رهف : انزين .. و الاسبوع الي بعده ..
هز كتفه : ما ادري ..
مديت له الكاس : عطه اجازة ..
اخذ من عندي الكاس : بـ اشوف .. الا وين غفران .. ؟!
رهف : راقدة ..
شرب رشفة من الحليب ..
سامر : تسلم يدج ..
ابتسمت له : الله يسلمك ..
وقف و خلى الكاس ع الطاولة .. تقرب مني ..
همس في اذوني : احبــج
رهف : ....
باسني في خدي .. و طلع من المطبخ ..

.....

نشيت ع أذان الفير .. توضأت و صليت .. طالعت فارس شلون نايم .. قلت أوعيه لـ الصلاة .. امس ما يا الا متأخر ..
وقفت و رحت يمه ..
همست : فارس
فارس : ......
مسكت كتفه و هزيته بـ هدوء ..
عيون : فارس
فتح عيونه و انا شلت يدي ..
رديت لـ السجادة اخذت القرآن و فتحته ع سورة البقرة .. و أخذت أقرأ ..
اما هو فـ نش من النوم .. و راح لـ الحمام .. اخذ شاور و طلع .. انا شلت القرآن و فصخت حجاب الصلاة و شليتهم .. طلعت لي ثياب ابا اخذ شاور .. احس نفسي مخنوقـة .. شفته يطالعني بس انا ما عطيته أي اهتمام .. دخلت الحمام .. اخذت شاور و بعدها لفيت شعري بـ الفوطة .. طلعت شفته يمشط شعره .. رحت لـ التسريحة و فتحت شعري .. اخذت امشطه و انا اراقب فارس من المنضرة ..
كملت و رفعته ..
طلعت من الغرفة و دخلت المطبخ فتحت الثلاجة .. امممممممم .. يوعانة ابا آكل شي .. اخذت لي لبنة و لفيتها في خبز .. اكلت منها شوي .. بعدها انسدت نفسي عن الاكل لما سمعت صوت سيارة فارس .. اتذكرت ليلة امس .. الحين بـ يخليني بروحي بعد ..
فزعني لما دخل المطبخ .. سويت نفسي أوني مب مهتمة رميت الخبز في الخمامـ .. و غسلت الصحن و السجين .. طلعت من المطبخ و دخلت الغرفة .. فتحت تلفوني .. مريم كانت داقة علي !!
دقـيـت عـلـيـهـا ..
مريم : هلا بـ الطش و الرش
عيون : يا هلا و الله بـ حبي
" هنا دخل فارس و بقى مدة يطالعني "
مريم : ما تدرين شنو صار ..
عيون : شـنـو !!
مريم : تعالي الشقة و بـ اقول لج ..
عيون : متفيجة انا !! .. و بعدين يا خسارة ما عندي سيارة .. جان ....
قاطعتني : لا تتعذرين .. امممممم .. تدرين بـ اروح الجامعة .. و اذا رديت بـ ايي لج و مرة وحدة اسلم ع فارس ..
خفضت صوتي : اصلا هو متى ايي .. يخليني بروحي ..
" اضنه سمع .. بس طنشته "
مريم : تصدقين الجامعة بدونج ما تسوى ..
عيون : اكيد الجامعة بدوني ما تسوى ..
" فارس اضنه استين .. طلع و صك الباب بـ قوة وراه "
مريم : متفائلة ..
عيون : مريوم .. ادق لج بعدين .. باي

ما سمعت ردها و صكيته .. خليت التلفون ع التسريحة و طلعت ورى فارس .. كان توه يمشي سيارته .. الحين خايفة يضن شي ثاني و يجتلني .. يا ربـــي الحين شنو اسوي .. ؟!
دخلت البيت ..

.......

" ما يذلني شوق مخلوق للطين عايد دام رضى بعدي صار بعده يوم عيدي "

داريتج يا عيون بما فيه الكفاية .. و لها عين تكلمه جدامي .. ضربت السكان .. بس ما اكون فارس ان ما ربيتج .. مشيت السيارة بسرعة .. صج ان انا اكرهها .. بس عزة نفسي ما تسمح لي اشوفها تتكلم مع ريال جدامي لا و تقول لها " هلا و الله بـ حبي " ..
وصلت الشركة و نزلت صكيت الباب بـ عصبية .. دخلت مكتبي .. حتى سميرة ( السكرتيرة ) استغربت .. كل مرة ادخل مبتسم و اصبح ع كل الموضفين الا اليوم .. ما إلي نفس ..
رميت نفسي ع الكرسي .. و ضميت ويهي بـ يدي ..
سميرة : خير استاز فارس .. شكلك تعبان
فارس : لا مافي شي .. انتي روحي لـ شغلج ..
طالعتني و بعدها مشت بدون أي كلمة ..
يا عــيـــون .. فقدت اغلى صديق لي علشانج و الحين تكلمين ما ادري منو و جدامي بعد .. افففففففف ..

......

ضليت يالسة في الصالة و انا احرك ريلي ورى و جدام .. بـ اموت من الخوف .. و الله طريقتي خـــطــأ و مليون خطأ .. الحين شنو بـ يسوي فيني .. اذا ما جتلني زين ..
وقفت و اخذت اروح و ايي و ادخل المطبخ و بعدها اروح الغرفة الزجاجية .. لما اذن الضهر .. صليت .. و قريت قرآن .. سمعت صوت باب الكراج .. شلت السجادة بسرعة و قلبي يضرب بـ قوة ..
اخذت نفس طويل .. و طلعت من الغرفة .. دخل فارس و تم مدة يطالعني .. نزلت راسي و طاحوا خصلات شعري ع ويهي باعدتهم و بعدها طالعت فارس ..
تقرب مني و زخني من شعري .......

>> يتبع في البارت الجديد