[تاج النساء]

...:::][ الحلقة الرابعة عشر ][:::...


:::: أشتكي ما عاد ينفع شفت عزي في سكوتي من عطـا سره لغيـره موقفه زاد و تأزم ما عليه لو حكوا به فيـه ما بسمع شمـوتي ..يكبـر الغالي بعيني ...وحجم حسـادي تقزم ::::


مسحت دموعي .. اخذ يتقرب مني و قلبي يضرب بـ قوة .. ما ادري شنو فيني .. بس كانت خايفة الا بمووت من الخوف ..
لما صار جسمه ملاصق لـ جسمي غمضت عيني ..
حسيت بـ دفى في رقبتي ..
فتحت عيوني بـ هدوء و طالعت روحي في المنضرة ..
كن محوط يده ع رقبتي بـ حنان .. اخذت نفس طويييل ..
مسح بـ حنان ع رقبتي و همس لي في اذوني .. " انا اسف "
قال انا اســـــــف !!!!! .. لا ما اصدق .. اكيد صادني خلل في اذني .. اتذكرت اول يوم شفته فيه لما رفض يعتذر لي .. بس الحين اعتذر .. ابي احد ايي يقرصني اتأكد ..
بس انا ليش مهتمة لـ هذه الدرجة .. هذا المفروض يتأسف لي ..
حوط ويهي بـ يده و غصبني اطالعه .. و اغوص في عذاب عيونه .. بقيت مدة اطالعهـ .. ما ادري كم بقى لنا ع هذا الحال .. حسيت لـ نفسي لما ابتسم لي ..
فارس : صايرة حلوة اليومـ ..
صطرته ع خده .. كـ رد فعل طبيعي .. ما اعرف شلون اوصف لكمـ نضراته لي ذاك الوقت .. حسيت بـ خوف .. رديت لـ الباب و رصيت نفسي فيهـ .. تقرب مني و العرق يتصبب مني كأنه شلال .. و الله يا فارس مسوي لي فلم رعب ..
مسكني من ذراعي و طالعني بـ حدة .. امتلت عيوني بـ الدموع و طاحوا بـ خوف .. حتى الدموع صارت خايفة ..
ما ادري شفيه تركني و طالعني مدة و بعدين تباعد عني ..
رديت عليه و انا اصيح ..
عيون : ليش ما طقيتني .. هاااا ..
طالعني بـ نضرة .. ما قدرت افهمها .. هـ الإنسان معيشني في دوامة خوف و توتر .. ما ادري شنو بـ يصير بعد هذا .. كل يوم هواش و ينتهي لما يطقني .. مب هذه المرة كأنه تذكر شي .. و تركني .. بس لما تركني و كأنه رماني ع الباب .. ما ادري احس راسي رد يألمني .. اباا أوقف .. راسي بـ ينفجر .. مسكت مقبض الباب و سندت نفسي عليه و وقفت بـ صعوبة .. شفيني احس راسي كل مالهـ و يزيد ..
مشيت بـ خطوات ثقيلة ..
بس خلاص انهد حيلي و طحت ع الارض ..
تقرب مني فارس و جثى ع ركبته ..
رد علي بـ حنان و كأني ياهل : شكلج تعبانة ..
ما رديت عليه .. مب مطنشتهـ .. بس مب قادرة احرك لساني .. احس و كأني انشليت .. راسي يألمني .. مب قادرة .. مسكت راسي و رصيت عليه بـ ايدي .. خلى ايده ع راسي ..
فارس : لـ الحين يألمج راسج ..
صحت .. ما ادري ليييش .. يمكن من ألمـ راسي .. او يمكن من نبرة فارس معاي .. يعتبرني يــــاهــــل ..
خلى يده ع خدي ..
فارس : اسف و حقج علي .. ما كنت اقصد ..
عيون : .....
صحت زيادة .. ما اباا احد يعتبرني ياهل .. بعد 5 ايامـ ادخل 20 .. شنو يـــاهــــل ..
ضماني لـ صدرهـ .. تمسكت فيهـ .. احس بـ الامان .. بس مب قادرة استحمل .. احس روحي بـ تطلع من جسدي في أي لحظة .. الألمـ كل ماله و يزيد في راسي ..
رفع راسي و طالعني بـ نضرات كلها حنان ..
فارس : قولي لي شنو اسوي لج علشان ترضين ..
انا نفسي منصدمة من الي قلته بس ما ادري شلون طلعت مني ما ادري شــــلــــون ..
عيون : ما اباا منك شي .. ما اباا تعتبرني ياهل .. ما ابااا .. انت انسان بدون احساس .. بـ تعذبني و بـ تقتلني .. ( شهقت من البجي ) اتمنى في كل يوم لو ارد مثل قبل .. اتحسر و اتحسر و اتحسر .. اباا احلامي كلها تتحقق .. انت حرمتني من كل احلامي .. احلامي الي كنت ابنيها .. انت الي حرمتني و ضيعتني .. و عيشتني في جـــحــــيــــم ..

بعدها عمـ السكون ..
قال شي .. بس ما سمعتهـ .. كنت اصيح بـ صوت عالي .. احس راسي بـ ينفجر .. ألم عمري ما حسيت فيهـ ..
دقايق و غفت عيوني .. ما ادري انا توفيت .. او نمت .. او اغمي علي .. بس الي سمعتهـ .. صوت فارس يناديني بـ اسمي ..

......

ما ادري شنو فيها .. طاحت علي .. حاولت اوعيها .. ناديتها بـ اسمها كذا مرة .. بس ماشي جوااب .. حملتها و خليتها ع السرير .. خليت يدي ع جبينها اتحسسه .. ماشي حرارة .. من بكرة اذا ردينا لازم آخذها المستشفى ..
طلعت من الغرفة و احس مالي نفس .. انا صج بالغت .. لكن ما توقعت انها تحس ان انا اعاملها مثل الياهل .. علشان اتفادى الهواش معاها ..
نزلت كانوا العنود و هيفاء يالسين .. و معاهم كان سلطان و راشد .. يلست ع كرسي من كراسي الصالة و تنهدت ..
شفتهم يطالعون بعض و يبتسمون ..
عقدت حواجبي : شنو فيكمـ !!
ضحكوا بـ صوت هادي ..
راشد : و لا شي ..
دخلت مريم طالعتني و أبتسمت .. لا اكيد صاير شي ..
يلست يمي و يودت يدي اخذت تلعب بـ اصابعي ..
يودتها من لحيتها و رفعت راسها .. طالعتني و أبتسمت .. ما رديت لها الابتسامة بس عقدت حواجبي ..
مريم : وين عيون !!
تركتها و طالعت الجهة الثانية بدون أي كلمة .. يا نـــــــــاس مالي نفس اتكلمـ ..
سلطان يا و يلس يمي من الجهة الثانية .. طالعته مستغرب .. شنو فيهمـ .. ما ني بـ فاهمـ ..
سلطان : ما بـ تقول مبروك ..
فارس : ....
سلطان : مريم وافقت .. !!
طالعت مريم كانت تطالعني و مبتسمة .. حضنتها و حبيتها عراسها .. ما اتخيلت مريوم الصغيرة في يوم بـ تكون عروس ..
شلتها عن حضني و ضميت ويهها بـ يديني .. ابتسمت لها رغم الغصة الي طاغية قلبي .. ردت لي الابتسامة .. بـ ابتسامة عذااب ..
سلطان : بعد ما نرد بـ 5 أيامـ الخطوبة و الملجة و بعدها بـ 3 أيامـ عرس العنود و راشد ( طالع العنود و راشد و ابتسم ) و بعدها بـ شهر عرسنا انا و مريم ..
طالعته و ابتسمت : يعني مخططين لـ كل شي ..
سمعت صوت من وراي ..
... : و انت متى نشوفك علشان نقول لك ..
لفيت شفته بشار ..
فارس : شقصدك يعني ..
يلس يمي و طالعني بـ نص عين ..
بشار : دايم مع عيون .. ( حرك كتفه ) و حنا شنو نسوي فيك ..
فريته بـ المخدة الي كانت ع الكرسي ..
فارس : لا و الله ..

ضحكوا كلهمـ ..
بس انا ما ضحكت .. ما لي خلق الضحكة .. تسندت ع الكرسي و طالعتهم متعجب ..
تميت طول الوقت اسمع سوالفهم و مالي نفس .. صج ان خالتي ام عيون و ام سلطان حلو الجو .. بس بعدي ما لي خلق لـ شي ..
ما اجذب عليكم .. ضحكت شوي ع خبال بشار و أحلام .. بس لـ الحين احس روحي بـ تطلع.. احس بـ الغم يسكن احشائي ..

وقفت ابا اطلع برع .. ابا اشم هوى .. مب قادر اتنفس ..
بشار : ع وين !!
سلطان : مع حبيبة القلب بعد مع منو ؟
العنود : أووه .. انتوا شفيكم ع الريال خلوه بـ راحته .. امسحها بـ ويهي فارس ..
ابتسمت لها : لا عادي .. ( طالعتهم بـ نص عيون ) و بـ نشوف النهاية معاهمـ ..
سلطان + بشار : يمه خفت ..

هذه المرة ضحكت عليهم .. بس طلعت برع ..

......

فتحت عيوني بـ كسل .. رفعت راسي بـ كسل أكبر و سندت راسي ع السرير .. و قلت بـ هم " آآآآه "
طالعت الغرفة ما كان في حد .. رفعت كم القميص اباا اشوف كم الساعة بس ما كان علي ساعة .. ويــــن ســـاعـــتـــي ..!! و خاتمي بعد ..
طالعت زوايا الغرفة بـ حيرة .. تلاقت انضاري ع الطاولة الصغيرة الي كانت محطوطة بـ نعومة في زاوية من الزوايا .. خليت ريلي ع الارض بس حسيت بـ ألم خفيف ضرب ع راسي ..تفاديته و نزلت من السرير .. مشيت بـ خطوات ثقيلة لـ الطاولة .. لقيت خاتمي و الساعة و السويرة الي كانوا علي .. اخذتهم و لبستهم .. بس قبل ما البس الساعة طالعتها كانت 9:00 .. عقدت حواجبي و طالعت صوب الدريشة كانت مصكوكة و الستارة مغطيتها عدى اشعة الشمس الي كانت متسللة بـ دفء منها ..
شلون اشعة شمس .. رحت لـها و فتحتها يت اشعة الشمس بـ قوة ع عيني فـ غمضتها .. فتحتها شوي شوي .. بعدها بقيت اطالع المكان .. اشوف باص واقف يم الفلة الي ساكنين فيها .. بس مب بـ نيلس يومين .. انا اتذكر ان نمت لو اغمى علي .. لو شنو صار كانت الساعة 4 العصر .. بس الحين 9 الصبح ..
اخذت تضرب الافكار راسي ..
.... : قعدتي ؟
طالعت وراي كان فارس .. حسيته تكلم من طرف خشمه .. أونه متضايق من الي قلته .. من حقه ..
يلست ع الكرسي و تنهدت .. تقرب مني و يلس يمي .. ما ادري شفيني من يلس حسيت ان انا اباا ارجع .. وقفت و انا ماسكة فمي .. و دخلت الحمام ..
وقف يم باب الحمام ..
فارس : شبلاج ..
رشيت ويهي بـ الماي .. و غمضت عيني ..
دخل الحمام و تقرب مني يودني من ذراعي و سحبني لـه .. من حسيت بـ اصابعه لامست ذراعي غمضت عيني توقعت الحين بـ يذبحي ..
همس لي في أذوني : يلا تأخرنا ..
حسيت بـ دفى يدينه تتحسس ويهي .. طالعته بس من فتحت عيني شال يده و طلع من الحمام .. طلعت .. بس لـ الحين متعجبة لا يكون ساعتي خراب .. بس شلون الشمس ظاهرة و انا حتى ما صليت ..
عيون : فارس ..
طالعني بـ نضرات جامدة : ....
عيون : كم الساعة الحين .. ؟
طالع تلفونه .. و بعدين طالعني ..
فارس : 9:05 ..
عيون : ...
فارس : شبلاج ؟
عيون : كنت اتوقع ساعتي خراب ..
رحت لـ التسريحة و طالعت ويهي .. يا كرهي لـ هـ الويه .. ما احبه .. احسه صار شاحب .. هالات سودة تجمعت تحت عيني .. خليت يدي ع خدي .. و هنا المكان الي لامسته يد فارس ..
تقرب مني ..
فارس : يلا تأخرنا ..
عيون : وين بـ نروح ؟
فارس : المطار ..
طالعته و انا عاقدة حواجبي .. شنو المطار .. ليش مب قالوا بـ نيلس هنا يومين .. و حنا تقريبا يوم ما صار لنا ..
عيون : مب بـ نيلس يومين ..
فارس : أي
عيون : بس ....
قاطعني : و انتي قضيتيهم في النومـ
بقيت اطالعه مب فاهمة .. يعني كم ساعة بقيت نايمة .. هذا اليوم الثاني لنا و انا من أمس الضهر لـ اليوم نايمة ..
ركضت الحمام ابا أتوضأ .. علي اقضي الفجر و العشا و المغرب ..
فارس : وين رايحة ..
وقفت ..
عيون : بـ اتوضأ ..
فارس : ما يحتاي ..
عيون : شنوو ؟
فارس : مريم قضتهم عنج ..
عيون : ليش انا عاجزة ..
حسيته يبي ينهي الكلام بسرعة .. راح لـ الباب وقفت مدة بعدين تكلم ..
فارس : بـ نتأخر .. لبسي شيلتج و نزلي .. ورانا مشوار .. من هنا لـ المطار ..
عيون : بس ....
صرخ علي : قلت لج يلاا ..
غمضت عيني من صوته و نزلت راسي .. ما تكلمت .. رحت اخذت شيلتي و لبستها ..
طالعت الغرفة ما كان في حد .. رحت لـ الدريشة و صكيتها .. خسارة بـ اطلع من هنا .. و انا ما قضيت منه الا كم ساعة تقريبا .. الله يهداهم بس ليش ما قعدوني .. اباا اصرخ و اقول " ما اباا اطلع من هـ المكان " بس وين ..
يا الله توكلت عليك .. الله يساعدني ع ما بلاني .. فتحت الكبت .. ما كان فيه شي .. مسكيينة مريم تكفلت في كل شي و شالت اغراضي .. طالعت الشماعة كانت شنطتي الصغيرة معلقة فيها .. اخذتها و فتحتها تلفوني صار له مدة مقفول فتحته تفاجئت بـ 7 رسايل من رقم غرييب .. و 7 اتصالات من نفس الرقم .. كنت بـ افتحهم بس صوت فارس خلاني ادخله بسرعة داخل الشنطة .. ما حبيت احط لي كحل .. و لا مكياج .. خلاص تعبانة ما لي بارض لـ شي ..
نزلت بسرعة .. ما شفت حد تحت بس نزلت من ع الدرج .. لما ضربت في حد و الحمدلله ما طحت .. طالعته كان سلطان .. احمروا خدودي من الفشيلة ..
عيون : سوري ما شفتك ..
ابتسم لي : لا عادي .. الا من شنو تركضين .. " طالع الطابق الثاني " في حد لاحقج ..
عيون : لا .. بس اخاف فارس يعصب علي لان تأخرت ..
غمز لي بـ عيونه : اييي .. صج .. الا شنو السحر الي مسويته له ..
بقيت فاتحة عيني .. : شنو ؟
ضحك بـ صوت عالي : هههههه .. ما ادري .. هههه بس مب قادر ييلس لحظة يروح ويرد يتطمن عليج ..
وقفت مدة اطالعه .. اكيد جذاااب .. الا فارس يكرهني و انا اكرهه .. هههه .. يمكن يجذب عليهم ..
سلطان : زين نزلي ريلج ينطرج تحت ..
تصنعت الابتسامة : ان شاء الله ..

نزلت من الدرج و طلعت برع .. الكل كان في الباص ركبت و يلست يم مريم .. و بعدها بـ دقايق وصل سلطان ..
مريم تهمس لي : ما شبعتي نوم
طقيتها بـ خفة ..
عيون : اقول انطمي ..
برطمت : افاا .. و انا خطوبتي قريبة و تسوين جذي
عيون : ههههه .. في البداية خلها تصير رسمي ..
مريم : و منو قال لج .. بعد 5 ايام حفلة الملجة و الخطوبة .. و بعدها بـ 3 ايام عرس العنود و راشد و بعدها بـ شهر عرسي ..
فتحت عيني : كل هذا !!! .. ما يمدينا الوقت ..
مريم : الا يمدي .. اذا تبين تشترين من هنا اشتري ..
عيون : من الاسواق الي مالية المكان .. و ثانيا الحين حنا رايحين المطار و رادين البحرين .. يعني بـ المشمش ..
مريم : اقول لج النوم فر مخج .. الحين كم الساعة ..
طالعت ساعتي ..
عيون : 9:30
مريم : و حنا من هذا الوقت لـ هناك .. يمكن نوصل المطار أمممممم صارت 10 .. و بعدها بـ نيلس هناك لـ 4 العصر ..
عيون : شنوو !!
مريم : الي سمعتيه ..
عيون : شنو نيلس في المطار .. شنو نسوي هناك..
مريم : هههههه .. يم المطار مجمع يقولون حلو ..
عيون : اول مرة اسمع الريف فيها مجمع ..
مريم : لا هذا تابع لـ المطار ..
عيون : بس مب بـ نيلس وايد هناك ..
مريم : ما اضن .. يقول راشد ان المجمع وايد كبير و يا دوب نطوفه كله ..
عيون : صج ..
حركت راسها بـ أي ..
... : شنو تقولون ..
مريم : أحلاموو ..
احلام : امري تدللي ..
مريم : بلا سخافات ..
احلام : افاا .. خلاص زعلت ..
مريم : ههههههه .. مينونة ..
احلام : ما مينون الا انتي ..
عيون : شنو فيكم انتوا ..
احلام : أوووه .. شوفوا من يتكلم .. اقول ردي لـ نومج احسن ..
عيون : مب كأنكم مصختوها .. كل واحد شافني علق ع نومي .. كيفيي .. لو أنام من اليوم لـ سنة .. عااادي ..
أحلام : تسوينها ..
وقفت ..
عيون : لاااا .. الكلام معاكم ضايع ..
سحبتني مريوم من يدي ..
مريم : هيي .. تعالي وين رايحة يا الخبلة ..
عيون : بـ اروح أيلس مع فارس .. زييين ..
احلام : اقول مريووم خليها اشتاقت لـ الحبيب ..
عيون : اففففففف ..
رهف : خلوها زين ..
احلام : جب يا الله ..
العنود : احلام .. صدقيني اروح اقول لـ بشار عن سواياج ..
يلست احلام ع الكرسي بـ أدب .. و تكتفت..
احلام : خلاص .. ما بـ اسوي شي ..
ضحكنا عليها ..
طالعت جدام كان فارس يالس بـ روحه .. ما ادري ليش ياني احساس ان اباا اتكلم معاه شوي .. بس ما ابااا .. افففف .. الحين شنو .. اوقف حيرانة .. مشيت بـ خطوات ثقيلة .. و يلست يم فارس .. طالعني و بعدين فر راسه لـ الجهة الثانية يطالع من الدريشة ..
انا ما كنت ابا اتكلم معاه وايد .. بس زيين دامه هو الي ما يباا انا بعد ما اباا ..
تذكرت الرسايل فتحت شنطتي .. و طلعت تلفوني .. وديت لـ الرسايل ..
فتحت اخر رسالة ..
" هااا .. وينج ما تردين لو فارس مانعنج "
عقدت حواجبي .. منو الي مطرش لي هذا و انا حتى الرقم ما اعرفه ..
فتحت أول رسالة .. كانت من نفس الرقم ..
" سمعيني عيون .. انتي لي و انا لج .. و انا بـ انهي علاقتج في فارس لو كان اخر شي اسويه في حياتي .. حتى لو أقتله هذا مب بعييد "
شهقت من قريت الرسالة .. طالعني فارس متعجب .. ارتبكت و خليت التلفون ورى ضهري ..
فارس : شنو صاير ..
عيون : هااه
فارس : شفيج ..
عيون : و .. و .. و .. و لا شـ شـي
رد طالع الدريشة .. تنهدت بـ خوف .. الحمدلله ما شاف الرسايل .. جان حفر قبري هناا .. بس يا ربي منو هذا انا اول مرة اشوف هـ الرقم ..
رديت طالعت الرسالة الثانية ..
" وين لا يكون القطو اكل لسانج "

" سمعيني زين .. اذا ما بـ تردين هذا بـ كيفج .. و انا واحد بـ انفذ تهديدي .. "

" وينج "
" ما بـ تردين "
" صار لي 5 ايام ارسل لج و ما فكرت اتصل لج .. لكن صدقيني بـ اتصل اذا ما رديتي علي "

هـ المرة يودت قلبي و شهقت ..
طالعني فارس مرة ثانية .. لكن هذه المرة ما طنشني ..
فارس : ييبي التلفون ..
دفنته في يدي ..
عيون : لـ لـ لـ لـيش ..
صرخ علي : قلت لج ييبي ..
عطيته اياه و يدي ترتجف .. سحبه من عندي .. اخذ يطالع الرسايل و وجهه شاب نار .. وقفت اباا اروح بس هو مسكني من يدي و سحبني .. قربني منه .. تجمعت الدموع في عيني ..
قلت بـ صوت مايل لـ البجي : ما ادري هذا منو ..
فارس : لا تخافين .. انا اعرفه و بـ اصفي حسابي معاه ..
طالعت عيونه .. توقعته بـ يهزبني بس كانت كلماته تفيض بـ الحنان .. سحبت ايدي من عنده بس ما رحت يلست مكاني .. شفته يعفس في تلفوني بس طنشته .. طالعت الجهة الثانية .. يمكن مر علينا 30 دقيقة في الباص ..
همس لي : عيون
طالعته بدون ما أتكلم : ....
فارس : بـ تروحين مع منو في المجمع ..
طالعت الجهة الثانية : مع مريم ..
يود ويهي و فراه ..
فارس : اذا اكلمج طالعيني ..
مسكت ايده و فريته ..
عيون : نعم بغيت شي ..
فارس : كلميني عدل لو ....
قاطعته : بـ تطقني صح ..
فارس : افول نزلي احسن ..
وقفت و نزلت من الباص .. نزلت بعدي مريم و بعدها هيفاء و بعدها نزل بشار و نزل أحلام من يدها .. أونها تعبانة .. بس و الله دلع حرييم ..
نزل فارس فـ لفيت نضري لـ الجهة الثانية ..
... : بـ اروح هاا .. بااي ..
عيون : اففف .. مريموو وين بـ تروحين .. اباا أي معاج ..
فتحت عينها : شنوو !!! .. و فارس مع منو .. ؟
عيون : طقاق يطقه .. مع الي يبي يروح خله يروح ..
بـ ابتسامة سخرية : قولي زعلانة منه ..
.... : لا مب زعلانة ..
طالعت مصدر الصوت .. كان فارس .. شنو و منو هو علشان يدخل نفسه .. القهر انه سحبني من يدي و همس لي في اذوني ..
فارس : بـ تيين غصبا عنج ..
ما ادري شنو اقول لكم .. كانت نبرته نبرة تهديد .. لويجبرني .. لو شنو ما اعرف شلون اوصفها لكم ..
رديت بـ نفس نبرته : زيين

مريم : هاا .. شنو قلتين ..
فارس : بـ تيي ..
طالعته معــصبة..

ابتسمت لنا مريم و راحت مع هيفاء .. طالعته من تلاقت انضاري بـ انضاره .. فريت ويهي بـ غرور ..
فارس : زين .. تعالي
مشى فـ مشيت وراه .. يسويها يخلينا هنا بـ روحي ..
دخلت داخل .. فجيت عيني .. ما توقعت ان الريف فيها مجمع و بـ هالحلاة ..
كان يمشي و كأنه يدور ع شي .. شوي و وقف .. انا بـ دوري وقفت ..
فارس : تبين شي تاكلينه
عيون : .....
فارس : أكلمج ..
عيون : ما اباا
فارس : عيون .. خلي حركات اليهال حقتج بـ صوب .. و سمعي الكلام
عيون : ليش انا ياهل يتكلمني بـ هذه الطريقة ..
فارس : أففففف
عيون : لا تتأفف قدامي .. و ثانيا انت الي قلت تبيني ايي معاك
فارس : و بعدين .. انتي صار لج يوم كامل ما أكلتي شي
عيون : و انت بـ شنو يخصك .. انا اكلت لو ما اكلت انا حرة .. هذه حياتي و كيفي فيها ..
حسيته عصب من كلامي .. بس هين .. طالعته بـ نضرات احتقار .. اليوم ان ما طلعته من طوره ما أطلع عيون ..
زخني من كتفي و همس لي في أذوني ..
فارس : لا تطالعيني بـ هذه النضرات
ابتسمت بـ سخرية : و ليش بـ الله
ما رد علي بس سحبني من يدي .. و خلاني أيلس ع وحدة من الطاولات غصبا عني ..
فارس : سمعي الكلام دام النفس راضية عليج ..
عيون : .....
فارس : شنو تبين آخذ لج
عيون : ما أبا شي

ما تكلم بس مشى عني .. راح لـ مكان الطلب و طلب ما ادري شنو .. رد يا و يلس قبالي ..
بقينا مدة السكوت سيد الموقف .. بعدين يا لنا موضف الكوفي .. عطانا 2 كابتشينو ..
ما شربته .. احس ما لي نفس لـ أكل .. شرب فارس شوي منه .. وبعدين خلاه مكانه ..
مليت السكوت هذا .. أبا اصرخ و أقول
" مــــــلـــــــــيـــــــت هــــذه الــــحــــيــــاة "
مليت و زهقت خلاص أبا اتكلم .. أطالعه انتظره يقول شي .. أي شي .. المهم ما نضل بـ هذا السكون .. و الله ملييت ..
عيون : فارس
طالعني بـ نضرات جامدة .. بعدها رد نضره لـ الكوب الي قباله و اخذ يحركه يمين و يسار و يسار و يمين ..
قهرني انا ازقره علشان يسكت ..
عيون : منو الي كان يطرش لي ذيك الرسايل ..
تغيرت ملامح ويهه .. ما ادري شنو كانت .. معصب .. لو شنو .. ؟
فارس : ما لج خص .. خليج في نفسج احسن ..
عيون : .....
رد السكون مكانه .. افففففف .. يا ربي ساعدني ع ما بلاني .. انا شنو اسوي بـ هذه الحالة .. اضل ساكتة .. و اتحمل اهاتي .. لو اطالعه .. في احد يخبرني شنو اسوي معاه .. حرام عليه .. طفشني .. و عذبني ..
عيون : زين تكلم ..
فارس : مب انتي ما تبين تتكلمين في شي ..
عيون : مليت السكوت
فارس : و انا شنو اسوي لج ..
ما تقولون لي شنو اسوي فيه .. اذبحه .. لو اجتله جدام الناس .. طفشني .. مب قادرة استحمل اكثر ..
صرخت عليه : و لا شي زيين ..
رد علي بـ احتقار : شبلاج انتي !!!!
طاحت دمعة من عيوني .. مسحتها بت عصبية .. و طالعت الجهة الثانية ..
هذا ما عنده ضميير .. انسان بدون احساس .. اكرهه .. و اكره حياتي معااه ..
همس لي : تبين شي ..
عيون : ..... ( ماشي رد )
حوط ويهي بـ يده ..
فارس : تكلمي الحين ..
ما ادري ليش دمعت عيني ..
عيون : منو الي طرش لي الرسايل ..
شال يده ..
فارس : ما عندج موضوع غيره ..
رديت عليه بـ اصرار : لا
فارس : كل شي بـ وقته حلو .. بـ تعرفين عن قريب .. بس انتي طنشي رسايله و اتصالاته ..
عيون : ليش عاد ؟
صرخ علي : اقول لج بس طنشيه ..
رديت عليه بـ ببراءة : زين لا تصرخ ..
وقف ..
فارس : يلا ..
طاوعته .. بس علشان اتجنب الهواش معاه ..
مشى جدام و انا مشيت وراه .. ما ادري شنو بـ نسوي في كل هذا الوقت .. طالعت ساعتي .. كانت 11:30
يعني أذن ..
ناديته : فارس ..
وقف بس كان ماعطني ضهره ..
عيون : أذن
فارس : أدري .. الحين حنا رايحين غرف المسيد ..
عيون : .....

مشينا شوي .. أشر لي ع غرفة يمها حمام و قال ان هذه غرفة الصلاة .. و اذا كملت انطره عند الكوفي الي كان هناك ..
وافقت .. و رحت الحمام .. توضأت .. و رديت الغرفة الي اشر عليها فارس .. دخلت كان هناك .. بنت شكلها بـ عمري .. تحيرت شلون أصلي جذي .. انا ما علي عباية .. و لابسة بانطلون ما يجوز ..
لاحضتني البنت متحيرة و تقربت مني ..
... : تبين شي تصلين فيه
عيون : أي
فصخت عباتها .. كانت عباية كتف .. زين .. انا متعودة عليها .. لبستها و صليت .. كانت البنت يالسة و تطالعني ..
كملت و فصخت العباة .. عطيتها اياها ..
عيون : مشكورة ..
.. : العفو ما شويت شي .. و الأجر عند الله ..
و ابتسمت لي .. انا بـ نفسي رديت لها الابتسامة ..
... : ياية مع أهلج ..
عيون : أي .. و انتي ؟
... : انا ياية مع ريلي .. شهر العسل ..
عيون : مبروك
... : الله يبارك فيج ..
عيون : الا ما قلتي لي عن أسمج ؟
... : هند
عيون : و النعم
هند : الله ينعم في حالج .. و انتي شنو اسمج ؟
عيون : يعني لازم ..
هند : ليش شنو فيه اسمج ..
عيون : ولا شي .. عيون ..
هند : انتي من وين
عيون : من البحرين
هند : و انا من الكويت .. حلو الريف صح ؟
ابتسمت لها : أي وايد .. انا تأخريت ع ريلي ..
هند : انتي متزوجة ..
عيون : أي
هند : و ليش متزوجة و انتي صغيرة ..
عيون : ههههههه عمري 20
فتحت عينها : شنو ؟
عيون : 20
هند : من صجج ..
عيون : أي
هند : العمر كله ان شاء الله ..

و اكتفينا لـ هذا الحد .. لانها راحت لـ زوجها .. و انا رحت لقيت فارس واقف و شكله معصب .. رحت فيها الحين ..
فارس : جان ما ييتي ..
عيون : ....
فارس : افففف .. و انا منو قال لي اخذ ياهل معاي ..
عيون : ياهل الا أنت .. و بعدين محد طقك ع يدك و قال تعال خذني معاك ..
فارس : أقول تعالي اشتري لج لـ ملجة مريم و عرس العنود .. احسن لنا ..
عيون : ......

مشيت وراه .. دخلت واحد من المحلات .. كان اليشمك .. ما عيبني شي .. كان اللون الغالب عليهم الوردي .. و انا مليت من الوردي .. فـ حبيت اخذ لي لون ثاني ..
دخلت المحل الثاني والثالث و بعد ما عيبني شي ..
صرخ علي : الى متى بعد ..
عيون : أفففف.. تقدر تروح تيلس هناك و انا الي باخذ لي ع كيفي ..
فارس : صدقيني اذا يات الساعة 4 و انتي ما اخذتي شي .. بـ نمشي .. و أخذي لج من البحرين ..
عيون : يكون أحسن بعد ..
و مشيت عنه .. دخلت محل الصراحة الفساتين يهبلون .. طالعتهم بـ حيرة .. فكرت آخذ لـ خطوبة مريم شي بسيط .. كان فارس واقف برع ..
اخترت لي فستان لونه أزرق فاتح .. كان وايد طويل ( هذا موديله ) و بدون أكمام .. اخذت لي من نفس المحل شيلة لونها أبيض .. تطلع حلوة معاه ..
طالعت فساتين السهرات بـ حيرة أكبر ..
عيبني واحد لونه أسود .. طالعته .. موديله قصير لـ الركبة .. و من ورى وايد طويل .. احسه عاري شوي .. بس فيه من فوق خيط ينربط في الرقبة .. وايد عيبني موديله .. ما أتوقع فارس .. بـ يرضى ألبس جذي .. بس عناد له .. باخذه ..
اخترت اللون أحمر ..
و أخذت معاه شيلة سودة .. و فيها ورود لونهم أحمر ..
دفعت و طلعت ..
فارس : كملتي !!!
عيون : لا
فارس : لـ متى
عيون : باقي الاكسسوارات .. و الصندل
فارس : افففف يلا
اخذت لي مع الفستان الازرق شريطة اربطها في راسي لونها أبيض .. و نعال لونه ابيض و فيه فصوص زرقان ..
اما لـ الفستان الاحمر .. الصراحة احترت .. في الاخير اخذت لي صندل فيه خيط يصير ع ريلي من فوق .. طالع حلو .. و اخذت ورود حمران .. افكر اصبغ خصلات من شعري أشقر .. و بعدين المهم بـ ذلين الورود .. و اسويهم حلزونات طايحين ع شعري ..
خلصت ع الساعة 2 ..
احس بطني يألمني .. يــــوعــــانـــــة !!!!
دخلنا مطعم فخم ديكوره قديم و ريفي .. يلسنا ع طاولة تطل ع المطار .. طلبنا لنا .. و يلسنا .. اكلت بـ هدوء و فارس نفس الشي .. السكوت هذه المرة ارحم من يصرخ علي .. اكلت و انا ساكتة و ما اعترضت ع شي .. و هو نفس الشي ما تكلم ..
فارس : خلاص كملتي كل شي ..
اكتفيت بـ تحريك راسي بـ الايجاب ..
فارس : الحين شنو نسوي .. باقي ساعتين ..
حركت له كتفي أوني ما ادري ..
فارس : تكلمي .. انا يالس مع صنم ..
عيون : مثل ما كنت تسوي لي .. انا اسوي لك
فارس : عناد يعني ..
ابتسمت بـ سخرية : الي بـ تسميه ..
و أكلت من المعكرونة .. حسيت بـ لوعة .. اخذت كلينكس و خليته ع بوزي ..
فارس : شبلاج ؟؟
عيون : ما ادري ..
فارس : اذا ردينا البحرين بـ وديج المستشفى غصبا عنج ..
عيون : ما أبااا ..

بس ما استحملت و وقفت ركضت لـ الحمامات .. طلعت كان فارس في ويهي .. مسكني من يدي و ضغط عليها ..
فارس : قولي لي شنو فيج ؟؟
عيون : قلت لك ماكو شي ..
فارس : لا في شي ..
عيون : .....

سحبني لـ الطاولة .. و يلست .. يلس قبالي ..
فارس : تدرين شنو تقول رهف و أحلام ..
عيون : عن شنو ؟
فارس : عن الي فيج ..
عيون : شنو ؟؟
حوط ويهي بـ يدينه ..
فارس : أنج حامل ..
عيون : .... >> ( فتحت عيني )
فارس : من جذي لازم تروحين المستشفى
ابتسمت بـ سخرية : مستحيل اكون حامل ..
فارس : ليش هو كيفج ..
عيون : لا كيفك انت ..
فارس : لو يطلع انج صج حامل .. شنو بـ تسوين !!
بـ حركة لا ارادية مسكت يدينه الي كانت محوطة ويهي ..
عيون : أنتحر ..
فارس : علشان بس انج حامل ..
عيون : اقدر بعد ارمي نفسي من فوق الدرج لـ تحت
فارس : اذا انا معاج ما تقدرين ..
عيون : لا اقدر ..
فارس : ما تقدرين
عيون : لا ما اقدر ..
فارس : يـــاهــــل
قرصت في يده .. فـ شال ايده عني بـسرعة .. و أخذ يهف عليها .. ضحكت عليه ..
فارس : انا من ارد بـ اقص اضافرج ..
عيون : انا اتعب في تربيتهم و انت تيي آخر زمن و تقصهم ..
فارس : أي بـ اقصهم .. أحححححح .. حشى مب اضافر ..
عيون : ههههههههههه
فارس : تضحكين جليلة الحيا
وقفت ..
عيون : يلا ..
فارس : يلا ..

دفعنا الحساب .. و مشينا ..
فارس : وين تبين تروحين ..
عيون : ما بـ تاخذ لك ثياب ..
فارس : باخذ من البحرين ..
عيون : ....
فارس : تبين نروح صالة البولينغ ..
عيون : في هناا ..
فارس : ما ادري .. بس اتذكر راشد كان يقول انه اذا أيي يلعب فيها ..
عيون : صج .. عيل اباا اروح ..
فارس : تعالي نروح ..

مشيت وراه .. ما ادري كم مرة لفينا ع المجمع لما لقيناها .. بس كانت كبيرة .. انا يلست ع الكراسي .. اطالعه شلون يلعب .. ما يخلي و لا وحدة تبقى ..
فارس : تبين تجربين ..
عيون : ما اعرف ..
فارس : تعالي ..
وقفت و رحت يمه .. فارس : شوفي مسكي الكرة من ذلين الثقوب و رفعيها .. بعدين رديها ع ورى و ارميها ..
عيون : زين ..
سويت نفس الي قاله .. بس ما قدرت ارفعها .. و هو يضحك علي ..
عيون : ما اقدر احملها ..
فارس : حاولي ..
كنت ارفعها بـ مسافة سانتيمتر او 2 .. و بعدين تطيح .. ثقيييلة ..
ما ادري شلون و في أي لحظة فارس مسك يدي و رفع معاي الكرة .. بقيت اطالعه .. لما تلاقت انضاري بـ انضاره ..
أحد فيكم جرب يوقف شريط فيديو ..
يوقف شريط الذكريات في نضري بـ هذه اللحظة .. و كأن شريط الدنيا توقف كله داخل عين فارس ..
ابتسم لي و رجعنا الكرة ع ورى مع بعض و رميناها .. صج انها ما كانت زينة .. بس هذا انجاز بـ النسبة لي ..
مر الوقت و انا الي ارميها بس ادزها ما احملها ..
لما احملها شوي تطيح ع ريلي ..
قضيت وقت حلو هناك .. و هذه اول مرة اندمج بـ هذه الطريقة مع فارس .. مر الوقت بسرعة .. حتى ان حنا ما حسينا فيهـ ..
طالع فارس تلفونه و فتح عينه ..
فارس : الساعة 4
عيون : شــنـــو !!!!!!
مسكني من يدي و سحبني ..
و انا انافخ : بس الله يخليك .. ما اقدر اركض ..
وقف ..
فارس : بسرعة ..
يودت ركبتي و نزلت راسي .. و أخذت أنافخ ..
فارس : عيون .. يلا .. اذا تبين الطائرة تطير أبقي بـ روحج ..
عيون : ماني بـ قادرة ..
بقيت شوي واقفة بعدها أخذت نفس طويييل ..
فارس : نمشي ..
عيون : أي
مشى بعدها مشيت وراه .. احس اليوم كل شي تغير .. بس ( ابتسمت بـ سخرية ) ما اضن بـ نبقى ع طول جذي .. لحضات مثل كل مرة و تروح ..
فارس : شبلاج ..
عيون : و لا شي ..

وصلنا الباص .. و كان بشار يساعد أحلام تركب .. هههه .. حامل و الحمل متعبنها .. الحين هي في الشهر السابع .. الله يساعدها بس ..
ركبت و رديت مكاني .. و فارس نفس الشي ..
كانت مريم تتكلم مع العنود .. فتحت الستارة و اخذت اطالع الطريق .. دقايق و بـ نوصل المطار ز. لان ماشي مسافة وايد .. ساعة بـ الكثير و حنا موصلين ..
قطع حبل أفكاري صوت التلفون .. فتحت شنطتي و طلعته .. كانت رسالة من نفس الرقم ..
فتحتها .. و ضليت مدة اترجم الكلام الي مكتوب .. حسيت بـ صدمة تسري بـ روحي .. هذا منــــو !!!!!!!
كان مكتوب فيها ..

>>> يتبع في البارت القادمـ