[حزينه^وحيده]

الجزء الرابع


صحا خالد من النوم واهو راقد على الأرض راسه على وساده ومغطى بلحاف يحس براحه عجيبة قعد يتذكر اللي صار البارحة شنو صار اللي خلاه ينام على الأرض تذكر نوبته وكلامه قمر وقمر كانت تبجي وصوت قمر بالقرآن شاف نفسه لابس نفس الملابس اللي لابسهم امس قام بسرعة عند الحمام غسل ويهه وتيدد وصلى الفير لما خلص طلع يشوف اللي صاير بالبيت كل شي كان هادي المسجلة تشتغل على القرآن راح عند غرفة قمر الباب مفتوح ومحد داخل طلع من الغرفة ونزل تحت راح المطبخ ما شاف احد شاف الطاولة الريوق كلن زاهب قرب وشاف ورقه فتحها ((لا تخاف علي طلعت ويا زينا بمشوار ربع ساعه وبرد وانت تريق))
تطمن خالد وقعد ياكل بهدوء واهو يطالع الساعة كل شوي متى بترد قمر محتاج يكلمها يشرح لها الموقف يحاول يتذكر صج قمر دخلت غرفته اهو كان راقد على ريلها واهي تقرا عليه قرآن كل هذا صج ولا حلم..دخلت قمر ويا زينا قمر كانت تطالع خالد بنظرات غير عن كل مره عيونها كانت وكأنها تدور شي بويه خالد كان شكله مرتاح بس لونه ما تغير زينا راحت وقمر ظلت واقفة مكانها
خالد:صباح الخير
قمر:صباح النور شخبارك؟
خالد:بخير الحمد الله انتي شخبارج؟
قمر:تمام عال العال
خالد:خالد:وين رحتي؟
قمر:ولا مكان بس السوبر ماركت
خالد:جان قلتي لي اروح معاج مافي جمعيات عربية
قمر:توهم فاتحينها زينا ودتني
خالد ابتسم لها قمر على غير طبايعها صايره غريبة..قمر كان قلبها يدق خالد شكله مرتاح بس كان ضايع الود ودها تروح يمه وتلمه بس ما تبي تضايقه لأول مره امس بالليل حست ان لها حق على خالد انها تلمسه وتحسس فيه ومن حقه انها تعامله بطيب وحنان ندمت على افكارها تجاهه والحرب اللي قومتها عليه من دون أي سبب ماتدري شنو صار فيها عاصفة هبت في حياتها امس شوق وحنين اجتاحوا للبيت وكأنها تاركه شي عزيز على قلبها بالبيت وأول ما شافت خالد لما رجعت بدنها كله اقشعر كانت امس تقول سلامتك حبيبي ولما شافته كانت تبي تقولها بس استحت خالد حبيبها شلون؟؟ قعد تسولف معاه ومن كثر ما كانت متوترة كانت توزع ابتسامات على كل شي خالد راح الصالة يفكر شلون يفتح موضوع امس يبي يستفسر شصار شنو ما صار بينهم مستحيل يطلع كل اللي يفكر فيه مجرد حلم اهو حس بوجود احد معاه يمكن ندى بس حس ان هالفكرة سخيفة نوعا ما دخلت قمر خذت المبخر وراحت المطبخ خالد مل من الهدوء الغريب وراح وراها المطبخ
خالد:قمر
قمر:لبيه
خالد:قمر... شصار امس؟؟
قمر:ما صار شي
خالد:انا حاس ان امس ضار شي غريب لي ادري اني فقدت اعصابي وناجرتج وقعدتي تبجين بعدها انا دخلت غرفتي معصب وما كنتي معاي بالغرفه
قمر تغير لونها بس ماتبي يعرف انها كانت معاه:لا اهو صج انك عصبت علي بس عادي مو أول مره وانا ما كنت بالغرفة
خالد:متأكدة
قمر ما توهقت ما تعرف تجذب:اكييد
خالد:انزين انا باخذ لي شور على السريع وراد
قمر:على راحتك
راح خالد وقمر خذت نفس عميق كل شي ولا يدري خالد انها رقدت معاه بنفس الغرفة راح تموت من الحيا..خالد راح غرفته خذ شور وكان تعبان وراح في سابع نومه قمر ظلت تسولف مع زينا
زينا:شو يا ستي اشوفك محلوه زياده اليوم
قمر بحيا:يبين علي؟
زينا:ايه يا ستي اطلعي عخدودك مثل الجمر يغزي العين
قمر:ههههههه يا زينا والله ما عندج سالفه
زينا:ههههههه بس يا ستي الاستاز ما عم يعجبني لونه هيكي شكلو مريض
قمر بخوف:انا بعد حسيت جذي
بالكويت تحديدا بالجهراء بمنزل بو خليفه والد قمر
مروه ونوفه خوات قمر قاعدين بدار قمر منسدحين على فراشها ويسمعون اغاني
نوفه:ايه يا قمر خذاج دون جوان العايله وحرمنا منج
مروه:أي والله ما حسيت بعمري اني بشتاق لقمور جذي الا اليوم لها وحشه الكريهه ما اتصلت؟
نوفه:بلى اتصلت مرتين ومره بعمي بو خليل من بعدها ولا ندري عنها تايهه في الحب ويا خالد
مروه:ما أظن خالد ما كان يبين عليه أبدا انه يحب قمر ولا مبين ان يحس بأي شي اتجاهها لا تنسين اهو عايش بلندن اربع سنين
نوفه:يعله المرض وين يلقى مثل قمر والله ماكو احلى عنها ولا اخف دم منها طالعه على اختها الغاليه العزيزه
مروه بخبث:شكرا يا نوفه ما دريت اني عزيزه عليج لي هالدرجه
نوفه:ويهج بس من ياب سيرتج انا اقصد نفسي
مروه:والله انا ينينا نمدح روحنا ما بقالنا احد لطوف وراحت خلوف وبالغصب نشوفه ولا طلول هذا عاد امي اغسلت ايدها منه قبل قمور كانت عندنا الحين راحت
نوفه:شرايج نتصل في ريمو يمكن تعرف رقمها
مروه:ما اظن يمكن عمي جاسم يعرف
نوفه:ويمكن لولوه
مروه:وييييييييييع الا هذي القرفة والله ما اشتهيها تقهرني اهيا والعقد اللي وياها بالعرس وسيمه ونهله ومادري منو
نوفه:لأن ولا عمرج حاولتي انج تكونين علاقة صداقة وياهم
مروه بغرور:انا مروه بن ظاحي حفيده سبع ونوفه الله يرحمهم اكلم هالأشكال مينونه لو تخلى الدنيا من البنات ما ابي صداقتهم
نوفه:خلي عنج هالسوالف وقومي نروح بيت عمي بو خليل نقعد مع ريمو
مروه:والله فكره قومي نخبر الوالدة
مروه ونوفه طلعوا من الغرفة ولا وطلال بويهم
نوفه:الله على الزين طلول بن ظاحي شتسوي بالبيت؟
طلال:ياي اطالع ويهج يالدبة واحد وراد بيته شنو حرام؟
مروه:ما درينا ان لك مكان غير البر والمعسكرات
طلال:يعني كان لازم قمر اللي تروح وانتي تبقين
مروه:من حسن حظك يا تعيس الحظ
نوفه:طلال شرايك نروح بيت عمي بو خليل
طلال:ليش مالي شغل انا اروح هناك وبعدين انا تعبان حيل ياي اتسبح وانام وارد البر حق الربع
مروه:الحين ربعك اهم
طلال:اممممم تبين الصج ربعي لاني ما اشتهيجولا اطيقج ولا ودي اقعد معاج مكان واحد يا ام كشه نوفو لا تماشينها هذي خليها بلا رفيجاتlonely نوفو ما اشتهياها مستحيل تكون اختي
نوفه:بس اهيا ولا كلنا
طلال:اهي وانتي بس
نوفه:حرام عليك طلول انا مالي احد غيرك انت وقمور
طلال:ايه يا قمر بيتنا اظلم بلياها يسعد فيها المغرور
نوفه:انا بعرف ليش كلكم تقولون عنه مغرور؟
طلال:ما شفتيه يا نوفه شلون كان بالعرس جنه مغصوب ولين يبتسم يبتسم بكبرياء جنه الناس يطرون منه
نوفه:انزين طلول تغدى معانا اليوم
طلال:ما ابي ويا مروو الخايبه ما اقعد
نوفه:خليفه ولطوف بيتغدون هني يعني ما راح نكون بروحنا
طلال:I will think nofa then I will tell you ok
نوفه:يحليل الانجليزي بحلجك يا طلول والله ما يفهمون اللي يقولون البدو ما يعرفون شي غير القنص
نبذه عائليه ((بو خليفه و ام خليفه صار لهم 32 سنه على زواجهم اول مولود لهم لطيفه المتزوجة من ولد خالتها ضاحي اكبر منها بعشر سنين تزوجوا واهم يكنون المشاعر لبعض وعندهم ولدهم نواف عمره 11 سنه وديمه اللي عمرها 4 سنوات وعبيد سنتين ولطيفه الحين حامل..بعدها بسنه يابو خليفه ومتزوج من رهف بنت خال ابوه وعندهم عزوز الصغير وريم النونو..بعدهم يا طلال اللي عمره الحين 23 سنه كان توأمه ضاري بس ضاري مات واهو بالمهاد..مرزه تيي من بعد طلال عمرها 21 سنه طالبه بجامعه الكويت مغرورة بشكل فظيع اهيا رشيقة وجسمها حلو مثل عارضات الازياء وتمتلك افكار تحرريه عجيبة بس محد يلقيها ويه..بعدها نوفه اللي اكبر من قمر بسنه بالضبط بس كانت تحس دايما ان قمر اكبر منها لكبر عقل قمر وكلامها المنطقي المقنع سموها نوفه على يدتها المرحومة وتمتلك نفي تقاسيم ويهها من الصغر نوفه حلوه بس طويله وعريضه شوي..قمر سماها يدها سبع بهالاسم لأنها كانت بيضه بشكل فظيع غير عن البنات كلهم تربت بعز يدها ويدتها ليما توفت يدتها وردوها عند امها لان يدها ما يقدر يربيها بروحها بعدها بعشر سنين توفه يدها بس طول هالوقت قمر ما فارقت يدها سبع قبل لا يموت كان يفكر يزوج قمر لعبيد ولد ونيسه بنته لانه بدوي اصيل طالع على خواله بس توفى قبل كل شي وقمر صارت لخالد اللي ماعرف سبع وايد))
بالصالة كانت لطيفه يالسه مع بنتها ديمه ورهف مرت اخوها والأولاد بره بالعريش قاعدين ويا يدهم وخليفه وضاحي مروه ونوفه يوا يقعدون معاهم وقعدوا يسولفون عن حفله قمر ويعلقون ويضحكون دخل عليهم طلال
طلال:فديت الضحكات والله اموت انا بريحه حريم بن ضاحي
ام خليفه:هلا والله بنور سماي هلا والله بالغالي وينك يا مجافي العين والروح
طلال:كاني خدام عند رجليك يا احلى ام بالدنيا شبيك لبيك اطلبي اللي بغيتيه روحي للتنفيذ تتريا
ام خليفه:يا بعد قلبي والله حبيبي انت
مروه:الله وينك يا خليفو تشوف امك وخيانتها ويا الضب
لطيفه:سكري حلجج ما ضب الا ريلج يالعورة هذا شيخ الحلاه بالجهرا يعلني فداه ربيبي طلول
طلال:سمعتي يالقرفه قومي ما ابي اشوف ويهج هني سامعه
مروه:لا والله وين اقعد يعني ويا ويهك
طلال:مكانج بالمزرعة
مروه:يمه شوفيهم شيقولون عني ترضين
ام خليفه انتي يبتي حق روحج هالكلام تحملي يا ام لسان
خليفه كان توه داخل عندهم جان تروحله مروه:بروح للغالي اخوي خلوف اشكيله
خليفه:باعدي باعدي عني مالي على مشاكلج
مروه:افا خلوف نسيت ما كليت مني والحين انت بصفهم انا اوريك يا خلوف اذا ما عظيت ولدك لين يبجي
رهف:تخسين انتي وخبالج تلمسين ولدي احشج
خليفه:بسج عاد مروو انتي ما تيوزين كله نجره وهواش ويا طلول بس عاد العقل زين
طلال:أي عقل this girl is crazy
خليفه:أي يما ابوي يقولج نجبوا الغدا