[لحظات تأمل]

حلا

موضوع حلو ولو ان الخبر والموضوع قديم شوية

انا واحدة من اللي كانو موجودين في ميدان التحرير صحيح مش بصفة دائمة لكني ذهبت هناك اربع مرات

مرة قبل احداث موقعة الجمل يوم 27 يناير وثلاث مرات بعد حادثة الجمل بايام قليلة

في البداية ماكانش في باعة متجولين ولا اي حاجة من اللي اتوجدت بعد كده

لكن بعدها بعدة ايام ابتدت بئا اعداد غير قليلة من الباعة الجائلين

وانا واحدة من اللي اشترو العلم من بائع بعشرة جنيه وبندانا باتنين جنيه ولما مشيت شوية لقيت العلم اللي اشتريته بخمسه جنيه والبندانا بجنيه

طبعا اتغظت وعرفت اني انضحك عليا وانا سمي وموتي ان حد يضحك عليا (( علي فكرة شباب الثورة كانو مضايقين اوي من انتشار الباعة في المكان ))

انا ايضا قرأت وسمعت عن الناس اللي بتاكل كنتاكي وعن المية دولار والمية يورو اللي بيوزعوها في ميدان التحرير

طبعا الكلام كدب في كدب بس انتي عارفة بئا الحكومة ماكانتش عارفة تئول ايه

انا هحكيلك عن الشعور اللي حسيته وانا هناك في ميدان التحرير

الجدير بالذكر اول ماتدخلي الميدان اولا بيفتشوا الشنط بنات ربنا يحفظهم وشباب وبيشوفوا البطايق وبتدخلي

اول مابتدخلي حقيقي حقيقي كأنك في كرنفال

او مهرجان سياسي

او في عرس معزومة فيه من غير دعاوي زي مابيقولوا الدعوة عامه

او كانك داخل معرض بتتفرجي علي احداث الثورة وبتتفرجي علي الاشخاص اللي انضربوا واللي اتظاهروا وصور الشهداء واهاليهم

وبالنسبه للميدان وانتي بتلفي فيه تحسي انك علي ارض مقدسه و قلبك بيرفرف من روح الثورة وحب الوطن

تلفي بقا تلاقي المشاهير زيهم زي الغفير وكمان مجموعات بتهتف ومجموعات اخري نايمه من التعب ومجموعات بتوزع الاكل

ومجموعات بتفتخر بما كتبته من عبارات علي الاوراق واللوح و شعارات في كل مكان

الجدير بالذكر ايضا موقف لن انساه كل واحد معاه شعار مفتخر بشعاره جدا جدا وكأن شعاره هو اللي بيغير الثورة وكله عاوزني اصور شعاره

ولن انسي ابدا الراجل العجوز اللي قالي بالنص كده (( والنبي يابنتي تصوري الشعارات وتحطيها علي الفيس بوك انتوا اللي عملتوا الثورة ديه من علي النت ربنا يحميكوا )) وللعلم بالشيء اني واثقه ان الراجل لايعلم ماهو الفيس بوك اصلا

وكمان هناك اشهر اكله الكشري الذي اطلق عليه الشعب المصري هناك كنتاكي التحرير طبعا راجع ده لخفة دمهم والتريقه علي الحكومه اللي قالت هناك اعانات خارجيه

احب اقول اني شفت شباب ورجال وشيوخ ونساء مسنات ونساء متزوجات وبنات زي القمر وبنات متدينات جدا ايضا واخيرا لن انسي اني شفت اطفال ورضع كمان

وشفت عائلات كاملة نايمه في الخيم وعمري ماهنسي احدي الامهات اللي جلست بجوارها وكانت تهتف معي ارحل ارحل عندما طلبت منها ان اتصور معها رفعت رأسها بشموخ

وقالتلي وماله يابنتي وقالتلي احنا هنتقابل تاني يوم النصر العظيم وكانت تقصد بكلامها رحيل الطاغية

واجمل منظر ممكن تشوفيه في حياتك وقت الصلاة والمسلمين بيصلووالاخوة الاقباط واقفين يحموهم وهما بيصلو

كمان لما تلاقي تعانق ايدي شيخ ازهري ماسك مصحف مع قس مسيحي ماسك الصليب اثناء قراءة ترنيمة جميلة يقرأها احد الاخوة الاقباط

في النهايه

احب اقول اني شفت الامل هناك حسيت بيه اوي شفته في عين كل اللي هناك شفت الشجاعة بجد مهما حكيت ووصفت مش هقدر اوفيهم حقهم ربنا يحمي مصر لناسها الطيبيين