مـــــساء النور والسروور
اول شي احب امسيكم بالخير واهنيكم على المنتدى الاكثر من رائــــع
وبصراحه اليوم اول مشاركه ليه في ذا القسم
قـــــصيدة حلوة وحبيت انقلها لكم وااتمنى انها تعجبكم
البارحه جاني مـن الحـب مرسـال
من عقبـ ما بينـي وبينـه خصيمـه
وانا ترى في الحـب مانيـب فعّـال
ولا بعـد ولّـع بقلبـي هشيـمـه
ولا بعد غنّيت فـي ساعـة وصـال
ولا بعد ذقـت الفـراق وجحيمـه
ولا جرى دمعي على الخـد همّـال
ولابعـد جربـت مــرّ الهزيـمـه
حتى وردنـي تالـي الليـل جـوال
وانا على شاهي وبسكـوت ديمـه
الرقم بايخ لكـن الصـوت قتـال
كنه مثل صـوت المذيعـة حليمـه
قالت : مساء الخير يـا طيّـب الفـال
قلـت : رحبـي ترحيبـةٍ مستديمـه
بالعود والصفـري ودلـة وفنجـال
واجبك يا بنت الأصـول الكريمـه
ردتـ بضحكة ثم قالت : وش الحـال ..؟
قلت : اشهد إنـ الحال عقبكـ سقيمـه
قالت : وهي تضحك بعد مثل الأطفال
وانـا بعـد كنـي بدونـك يتيمـه
منـ يـوم قالتهـا تزلزلـت زلـزال
من فجعتيـ كنـي مسـوي جريمـة
قلت : ارفعي صوتك ترى مابه ارسال
كـذاب لكـنّ المصيبـة عظيمـة
قالت : أقول اسمع ترى هرجنـا طـال
ممكـن تصاحبنـي ترانـي وسيمـه ..؟؟
واسمي الحقيقي أول حروفـه الـدال
لكـن يسمّونـي البنـات الزعيمـه
ما عندي امغازل ولا لعب جـهّـال
ما عندي إلا في الشرف و الحشيمـة
بس الصراحة : قلبي لشوفتــك مـال
واصبحت وحدك جالسٍ في صميمه
فكّر بعقلك واترك القيـل والقـال
واحذر تطيع اهل العقـول العقيمـة
وارسل علي اللحين خمسميـة ريـال
أشحن بهـا جـوال أختـي غنيمـه
أو طقم غالي فيه خاتـم وسلسـال
أروح بـه فـي عـرس ولاّ عزيمـة
قلت الحقيقة مانيب رجـل أعمـال
ولآنـي بتاجـر والمـوارد عديـمـة
أنا الصراحة شبـه عطّـال بطّـال
وعلاقتـي بالفقـر جـداً حميـمـة
والراتب الله يرحم الحـال مـا زال
محـدود والمصـروف ربـي عليمـه
والدين بـالآلاف والبنـك شغّـال
ياكـل فلوسـي بالربـا و الظليمـة :
و السوق طايح والغلا ضيّـقـ البـال
والموت والله صايـر اكبـر غنيمـة
قالت تحمّل بـس والحمـل ينشـال
خلك شديد الباس صلـب العزيمـة
ياخي تصرّف جعلكـ تصيـر نشّـال
أهـم شـي إن النوايـا سليـمـة
لابد تفهمني علـى كـل الأحـوال
ما دمت من أهل العقـول الفهيمـة
قلت إيه والله فاهم اللي على البـال
لكن تـرى هـذي علينـا قديمـه
يا بنت هـذا صايـر اليـوم مـوال
للي تبي تلعب علـى ابـن اللئيمـه
يا بنت ما تدرين كـم فيـه محتـال
يلعب على الحبلين وانتـي غشيمـة
يا بنتـ كم من "جاهلة دمعها سـال
من عقب ما جات العواقب وخيمـة
والبنت لا اقفى عرضها بيد الأنـذال
والله مـا يبقـى لهـا أي قيـمه
قالت : تبي ولاّ فخلّك علـى جـال
مهوب ناقص نصايـح حكيمـة
عز الله إنكـ للأسف منـت رجّـال
وانك قليل الذوق ما فيـكـ شيمـة
يا لعنبو اللي مـا يسطّـركـ بنعـال
حتـى يعلمـكـ الغـزل يـا بهيمـه
تفو عليك وصكّت الخط في الحال
مدري تفو هي مدح ولاّ شتيمـه ..؟
منقوووووووووووول للاهمـــيـــة