رؤية العالم
دا كان عنوان محاضرة ..بيشرح فيها دكتور نظرية اسمها رؤية العالم
.مش هرغى كتير ف الموضوع
بس هوصل الفكرة اللى شدتنى ف الموضوع كله واللى من ساعة ما سمعتها وانا بفكر فيها
الفكرة كلها بتقول ان رؤية العالم دى بتنقسم لحاجتين :
رؤية الانسان لنفسه (ذاته)
ورؤية الانسان للناس (الآخرين )
وان فى ارتباط كبير بين نظرة الانسان لنفسه ونظرته للناس وبالتالى نظرته للكون
يعنى لو الانسان طول الوقت لابس نضارة سودا هيشوف نفسه مغيمة اوى يا اما هيشوف نفسه عظيم اوى وهو مش كدا ...يا اما هيشوف نفسه ضعيف اوى وهو سامح لنفسه انها تبان كدا ....
وبالتالى نظرته للناس هتكون دايما يا اما بيكرهوه ...يا اما بيستضعفوه ...يا اما غيرانين منه عشان هو احسن حد ف الدنيا ...
وعلى طوول شايف الدنيا سودة وكئيبة ومفيهاش ولو خيط نور بسيط ممكن منه نظرته تتغير ..
اما بقا لو الانسان لابس نضارة شفافة من جواها هيقدر يشوف نفسه صح ...يبقا عارف ازاى يندمج مع الناس حتى لو هما بعدوا ....عندو دايما امل ف بكرة ...وقبلها ثقة ف ربنا ...لانه طول ماهو متفاءل هيشوف نفسه كويس وهيشوف الناس كويس ...وعلى اساسه هيشوف ان الكون جميل وشايف بردو الحاجات الوحشة ...بس دايما بيبقا عنده امل ان الحاجات الوحشة دى هتتغير للاحسن ...
دا الكلام اللى اتقال مش كلامى
اللى شدنى موضوع خطير اوى ....اغلبنا دلوقتى دايما شايف الدنيا سودة اوى ودايما مفيش امل ...ومهما حقق نجاح ومهما كانت ف حياته حاجات حلوة وتطمن بردو النظرة السودة مش راضية تروح ...
مش مجرد كلام ...انا تفكيرى كدا ...اوقات كتيييير بحس ان الدنيا ضيقة اوى...وان مافيش فايدة...
آه صحيح الواقع هو اللى وحش ....بس فى حاجة اسمها نظرة امل ف بكرة ...
بس للاسف دايما جوانا ان بكرة هيكون اسوأ م انهردة ....
دايما اى علاقة مع الناس ...مش شرط صداقة او حب ....حتى علاقتنا مع اهالينا يبقا فيها خلافات كتير
حتى لو ف مجرد وجهات نظر ....
بس بنحس دايما فى اى حاجة ان اى حاجة صغيرة بتحصل بتقفل الدنيا كلها ...
ولو حصلت مشكلة مع حد بنرفض اننا نكمل مع الباقيين حتى لو هما احسن بكتير ...وبنفقد الثقة ف الناس ...وبيبقا جوانا ان كل البشر وحشين ....
واحيانا ناس كتير بتفقد الرغبة ف الحياه .....بسبب كدا ...
طب ماهو لو الانسان مصلح نظرته للحياه ...اكيد نظرته لنفسه هتصلح واكيد نظرته للناس بردو هتصلح ...والحاجات الكئيبة دى هتبقا مجرد خلافات عابرة وبتعدى...
ماهو اكيد الموضوع م البداية ان الانسان مش عارف يشوف نفسه صح !
اممممممم
تفتكروا ليه ؟؟؟
ليه مش عارفين نشوف نفسنا صح ؟
وليه مش عارفين نشوف الى حوالينا صح؟
وليه شايفين الدنيا كئيبة من غير امل؟
وليه اغلب علاقتنا مع الناس اخرها فشل ؟
وليه بردو علاقتنا مع ربنا فيها فشل ؟؟
منتظره مشاركتكم
الحب هو اللعبه الوحيده التى يكسبها الطرفان ... او يخسرها الطرفان