[بنوته مصريه]

فول مدشوش مغسول و منقوع من الليل للصبح
(تنقيه من الطين والحصى والذي منه..أما القشر حيعوم على وش الميه..تشيليه برضه)

نعناع جاف ..ملوخية جافة..بصل..مكعبين مرقة دجاج..شوية شطة ناعمة أد كده هو ..حلة بريستو...خلاط

الطريقة:
في الحلة حطي الفول وضيفي عليه ميه..تكون أعلى منه بمقدار صباع
قطعي بصل حلقات وحطيه في الحلة
ولعي النار وحطي الحلة وغطيها بإحكام
وفي الوقت ده ماتقعديش فاضية ..هاتي بصل على أد ماتحبي وخرطيه وإعمليه تقلية في الزيت ..علشان تزيني بيه البصارة

بعد نص ساعة شوفي الفول استوى ولا لسه
لو لسه كملي السوى
لو استوى..لما يبرد شوية اضربيه في الخلاط
وحطيه في حلة تانية عادية وحطي المرقة المكعبات بعد ماتفتفتيها..وترشي النعناع الناشف والملوخية الناشفة والشطة وتقلبي وتقلبي
تاخدي شوية بصل من اللي حمرتيه وتحطيه عليهم..وتقلبي
دوقيها..لو محتاجة ملح..إديها ملح
تغرفيها في أطباق وتزينيها بالبصل
وبالعيش البلدي اللي بنار الفرن.وجنبها بدنجان مخلل أو مقلي أو بصل أخصر..وتاكلو بالهنا والشفا..وصحتين على قلبكم