[الريـــــــــــــــــــم]

مقدمه لا تنتهي مع أحد أصحاب الكلمه الحساسه (الشاعر: فيحان الصواغ

هذاك اللى يهزّك يالمسا ويفاخرك يا ليل
جديلة لا تناثر من متونه قلت ... يا ليله

هذاك اللى يكلمنى وانا غارق بصوته حيل
يهد الحيل في صوته ولا شيٍ يهد حيله

فتون يرتّل حروف السوالف والحكى ترتيل
والا يا حبني لأبيض سواليفه وترتيله

يزيدك يالمسا هيل ويزيد الكيف ( بسمه هيل )
وانا ما زان كيفي غير من فنجاله وهيله

دلع كن الدلع في خلقته طبع .. وغناة .. وميل
فيا سبحان من صوّر .. غِناه .. وطبعه .. وميله

كأن الشعر في حسنه عجز يِتْكلّم التفعيل
من بحور الخليل ومن طواريقه وتفعيله

على طاريه قصّة حب بين الدمع والمنديل
يا ليت الدمع دمعه وأحمر المنديل منديله

وانا لامن سكنتك يا مسا وارتحت لك يا ليل
تذكرت الجديل اللى عليه وقلت ... يا ليله