ولا يشبهك في الدنيا حَدْ
(هذا هو محمد رسولنا الكريم)
كلمات : نور محمد
ولا يشبهك في الدنيا حَدْ
ولا لِكْ ما بين الخلق نِدْ
مين أدبك .... مين هذبك
سبحانه الواحد الأحد
يارسول الله ... يا أغلا من حياتي والوجود
ذكر إسمك يا محمد أتخلق للخلود
ولإن حبك في قلوب المسلمين
حب ما يحدوش حدود
حب باقي للأبد
واللي مش عارفين مقامك
ولا عارفين
إنت مين !!
يكفي بس يكون كلامك
وحي نازل ... من إله العالمين
مش رسول مبعوث لأمة
مافي بعدك تاني دين
جيت لكل الكون دا كله
إنس جن موحدين
جيت في قلبك كل وِدْ
للغريب .... والقريب
واللي سَبَّك
واللي حَبَّك
واللي هانك
واللي خانك
بالهداية تدعي ربك
للجميع بكل طيب
يا رؤوف بالناس رحيم
للقلوب إنت الطبيب
وف ميزاتك ما لها عد
مين في كل الكون دا ربه إسطفاه
يوم سرى بيك الإله
فوق براق مخلوق عشانك
لأم معجزات زمانك
من بيت الله الحرام
حتى أولى القبلتين
مسجد الأقصى الشريف
جوه منه الأنبياء واقفين صفوف
في إنتظارك للصلاه بيهم إمام
نادى جبريل الأمين
يا محمد
صلِّي بيهم ركعتين
قبل معراجك لِرَبَّكْ في عُلاه
حتى جبريل المَلَكْ
له مقام معلوم لكنك
في المقام مالكش حَدْ
إنته ترقا وتخترق
لكنجبريل لو يرقا يحترق
في رحلتك
للواحد الفرد الصمد
إنت بين الخلق أَوحَدْ
يا نبينا يا محمد
من بداية الزمان
حتى آخر الزمان
مهما قالوا ومهما عادوا
ومهما تاني الحقد بان بالكلام
من شخص جاهل أو غبي
لا يعرفوا حُرْمِة نَبِي
ولا بيصونوش لحد عهد
وإن أساءوا معاك أدب
اللي ناقصين الأدب
يبقا قَصَّرْنَا في حقك
كل أمة العرب
يوم م خلينا الرساله
كلمة بس في الخُطَبْ
وإحنا فين من سنته
ليه نسينا إن هو
قدوة لينا ف دعوته
قومي يا أمة محمد
فوقي ثوري
كفاية لعب
والأمانة خُدِيها جَدْ
يا بلاد المسلمين
زِيلُوا بينكم كل حَدْ
الاعداء متربصين
ليه بنبني مابينا سَدْ
آن أوان الإتحاد
إيد في إيد يلا إِتْحِدْ
يلاّ عِدُّوا ما أستطعتم
لجل ما نقدر نُرُدْ
عَمَّر الأرض بحماسك
بينا نبني مش تِهِدْ
دوس على الصعب بمداسك
قوم يا مسلم يلاَّ مد
قوم وخللي الهمة تعلا
شد حيلك يلاَّ شد
فيه نهاية وفيه حساب
في إنتظارنا أحلا وعد
يوم م هنقابلك يا طه
والُّلقا ما في منو بُدْ
ولو أساءوا ليك نبينا
راح يكون الرد رعد