منتديات حــلا - :::: ( تخونيني تبين أرضى ؟؟؟ !!! ) ::::

بوقت من البطا وبليل تتراقص شياطينه

بعد شفت الضياء ينزع من ثياب المسا ثلثين

تحايلت المنام اللي مثل بيتك تزورينه

وانا اللي من تفارقنا وانا ماغمضت لي عين

غـريبة كـل حـلمٍ يـمر بـرقادي تزورينه

والاغرب كيف احلم الحلم وارجع واحلمة بعدين

قـبل يـومين شـفتك بـالمنام وقمت من حينه

ونمت امس ورجع نفس المنام اللي قبل يومين

انا اللي قبل اسافر شلت قلبي من شرايينه

تركته في يدك مثل الامانه واحفظيها زين

ترى حفظ الامانه دين مجبوره تردينه

اجل مافي احد قد قالك حفظ الامانه دين

مرد المقفي بيلفي ويستوفي وتوفينه

بعد ليله.. ثلاثه .. اربعه ..عشره شهر شهرين

اذا انت منتي بقد الكلام اللي تقولينه

حرام استأمنك حاجه واذا جيت اطلبك تنسين

تخونين وتبين أرضى واحد يرضى تخونينه

انا لاجيت اخونك مع حبيبه ثانيه....(ترضين!!)

من اول مارجعت من السفر ماشفت لك بينه

وانا اللي كنت احسبك قبل ادوس ارض المطار تجين

تكونين انت اول شخص عيني تحتضن عينه

وكنت اتخيلك من زود فرحة رجعتي تبكين

واشوف بدمعتك حكيك واعرفه قبل تحكينه

واجيب احلى من اللي بتحكينه واتركك تحكين

تقولين البلد نور واقول بنور مضوينه

تقولي غديت احلى واقول عيونك الحلوين

كلام نام بشفاهك وخفتي لاتصحينه

ذخرتيه للغرام اللي ينام ويترك تصحين

تغانمتي غيابي لين رجحتي موازينه

تعلم من يدك لمس الكفوف وعلمك تجفين

وليتك لاقية به شئ فيني ماتلاقينه

ماهو بغرور ولكن خابرك مالك امل تلقين

تغافلك بغلا ولا الحلى ماهو من زينه

تزينه الصور ولا الصحيح ابن الحلال زوين

وان ماني بناقص عنه يوم انك تبدينه

نصيبي هو نصيبي لو يسددها من الصوبين

قنوع بمظهري والسم مايذبح ثعابينه

على قول المثل ماني حلو لكن ماني بشين

اذا اهداك الزهر مره انا اهديتك بساتينه

واذا الهاك بفرح ليله انا تهت لبكاك سنين

واذا استضعفتك املاكه وشتتّك ملايّنه

انا حتى فتات الخبزه اقسمها معك نصين

طموحي بس اجي واظفر بشي تستحقينه

تدينته , تسلفته , سرقته, مو مهم منين

كأني من كثر ماارضى بكل اللي تمنينه

لو انك تطلبين الله يعميني باقول آمين

انا ما العب على الحبلين بوقت الطيش وسنينه

تبيني الحين يوم اني كبرت العب على الحبلين!!

ترى عند البدو بالذات عيب اللي تسويينه

حلاتك لاعشقتيني تعشقيني ليوم الدين

غرام نسكن ضلوعه حشيمة من مجانينه

جفا يجمع محبتنا ولا عشق يذل اثنين

كثار اللي تحدوني وقالوا لي تحبينه

امانه لاتخليني صغير بعينهم تكفين

لاني كل ماقالوا تخون قلت مسكينه

عليك الله علميهم منهو المسكين

انا خايف ليا طاح الجمل تكثر سكاكينه

وانا ما عادت اضلوعي تحمل طعنة السكين

مثل ماقالوا المكتوب واضح من عنواينه

لو ارحل منك للغربه بسافر من ظلامك وين!!

كفايه كـل حـلم يـمر فـرقادي تزورينه

كفايه من تفارقنا وانا ماغمضت لي عين

قـبل يـومين شـفتك بـالمنام وقمت من حينه

ونمت امس ورجع نفس المنام اللي قبل يومــين

الشاعر المبدع : حامد زيد

في وداعة الرحمن
شمس القوايل