ارحل وخذ حبـك معـك لاتخليـه

[قـــــــــــــــرناس]

ياصاحبـي والقلـب يكفيـه مافيـه ××× يكفيه من لوعـات الايـام ماجـاه
الهـم فـيـه مشـيـداتٍ مبانـيـه ××× ولا اقبل ظلام الليل ثـوّر مطايـاه
يرعن عشب القلب واللي حواليـه ××× ويردن حوضه لين يروَن من مـاه
ياصاحبي ماعاد بـه شـي نرجيـه ××× ياكـود شـي وصدفـةٍ ماحسبنـاه
والاّ هـواك اقفـى وقفـن لياليـه ××× ولا عاد باقي منـه ياكـود ذكـراه
ارحل وخذ حبـك معـك لاتخليـه ××× مابي اكون اللـي نقـل داه بـرداه
والحب ماهو قول (احبـك ولبيـه) ××× ولاهوب منـوَه مـن بغـاه يتمنـاه
الحـب نعمـه مـن عزيـزٍ نلبيـه ××× ولا يسكـن الا فالقلـوب المشقـاه
والحب نار وشوق في قلب راعيـه ××× يسوقه الينه يحـده علـى اقصـاه
والحب وصلٍ بين غالـي ومغليـه ××× تواصل الاحبـاب ساسـه ومبـداه
والحب داءٍ صعـب للـي يداويـه ××× وراعيه ماينسـاه لـو هـو تناسـاه
هذا الهوى .. والاّ انت تجهل معانيه ××× ارحل وقلبي منـك يكفيـه ماجـاه
والاّ على قول (النصافـي) لغاليـه ××× (من شق شقٍ يااريش العين يرفـاه)


أعجبتني هالقصيده وإن شاء الله تعجبكم

لشاعر فراج ابن جفران ( على ما اظن)